1. Ni kyahi ekya Bakristayo batholere ibakolha erighunza amalingwatha w’engebe?

ABAKRISTAYO bali omwa malingwatha w’engebe. Mbulha muthwamatsuka amathibitho kutse thwamabirighunza emyaka, thukayithagha erilholha embere erithibitha erihika okw’ighunzerera. Erihano erya omukwenda Paulo aha Abakristayo abe Filipi lyangana thuhira mw’omuhwa w’erighunza amathibitho. Abandi omwa kithunga kye Filipi babya ibabirikolera Yehova habw’emyaka mingyi bakabana ebaruha ya Paulo. Babya ibane muthibitha ndeke, aliwe Paulo mwabibukya ku batholere erilholha embere erithibitha omw’iyiyinia. Aby’anzire ibagherererya eky’erileberyako kiwe ‘eky’erithibitha erihika okwa nduli.’​—Fil. 3:14.

2. Busana naki erihabulha erya Paulo aha Abanya Filipi lyabya okwa buthuku?

² Erihabulha erya Paulo aha Abanya Filipi lyabya okwa buthuku. Ekithunga ekyo mukyabana eriendereribwa okw’inatsuka. Lyatsuka omughulhu Paulo na Sila baligha erikokya lya Yehova ‘ery’erisokera e Makedonia,’ neryo mubahika e Filipi omo mwaka wa 50. (Emib. 16:9) Eyo mubeyayo omukali oyukahulhawamo Ludia, oyuwabahulikirira, neryo Omukama amamw’ibukya omo muthima wiwe erihulikirira engulhu yuwene. (Emib. 16:14) Mwalhuaho iniabatizibwa haghuma n’ab’eka yiwe. Aliwe, Sitani mwalhua iniatsukiraho eribalethera ebitsibu. Abandu b’omwa muyi mubakurira Paulo na Sila embere sy’abathabali n’eribahangirira bathi babirisurusuthya abandu. Neryo, Paulo na Sila mubahunzwa, bamahirwa omwa ngomo, n’enyuma waho bamabwirwa ambu balhue omwa muyi. (Emib. 16:16-40) Mubanabikyako? Eyihi! Kandi ibbwa balikyethu omwa kithunga kihyaka ekyo? Mubahiraho eky’erileberyako ekyuwene, kundi nabu mubayiyinia!  Ahathe erithika-thika, eky’erileberyako ekyuwene ekya Paulo na Sila, mukyabaha amani.

3. Ni kyahi ekya Paulo abya inianasi, kandi ni bibulyo byahi ebyo thukendi kaniako?

³ Paulo abya iniabirithwamu erithendi lhuhirira kutse eribikyako. (2 Kor. 4:16) Abya inianasi ngoku iyo erithibitha omwa mathangwa erihika okwa nduli, aby’atholere iniahwerya amalengekania w’okwa kilhubirirwa kiwe. Eky’erileberyako kya Paulo kyanga thweghesyaki? Ni by’erileberyako byahi eby’abathaleghulha abamunabwire ebikakanganaya ngoku thwangana yiyinia nomuhangabya ebitsibu? Kandi amaha wethu w’obuthuku obukasa angaghumya athi erithwamu lyethu ery’erithendi lhuhirira?

4. Paulo mwathoka athi eriyihwerya omwa mubiiri wa Yehova nomwanabana ebitsibu?

⁴ Thulebaye akaghalha aka Paulo ahiraho erihandikira Abanya Filipi. Abya omwa ngomo y’eriboherwa eka e Roma. Isyawithe obwiranda bw’erithulira. Nomwabine, mwabya akathulira abakasyamulebaya n’erihandikira ebithunga ebya haali esyobaruha. Namunabwire, Abakristayo bangyi abathe banga thoka erilhua eka obundi busana n’obutseke kutse erikekelhuha, bakakolesaya akaghisa kosi-kosi erithulha engulhu yuwene okwa bakasyabalebaya. Kandi bakahandikira abandu abo bathe banga thoka erilholhako b’esyobaruha esikahumulikanaya.

5. Erikwamana n’ebinywe biwe ebiri omu Abanya Filipi 3:12-14, ni kyahi ekya wathikaya Paulo erihira ameso w’okwa kilhubirirwa kiwe?

⁵ Paulo mwathalighira eby’akolha kera, ebibuya kutse ebibi, kutse nibya ebisobyo bya kera bikamulengemerya. Nomwabine, mwabugha athi “eribirirwa emyatsi eyabirilhaba” kyabya kikayithaghisibwa “erisimbirira emyatsi eyiri emuliro,” ni bugha ambu, erithoka erighunza ndeke amathibitho. (Soma Abanya Filipi 3:12-14.) Ni bindu nga byahi ebyanga lengemerye Paulo? Eky’erimbere, Paulo athali abya Mukristayo, abya iniabirikolha bingyi omwa Kiyudaya. Nomwabine, mwalhangira ebindu ebyo “ng’ebibaya” kutse ekyabu. (Fil. 3:3-8) Ekyakabiri, nomwakine indi iniakanayowa nabi busana n’eribya imwendererya Abakristayo, ekyo mukithamughunza amani. N’ekyakasathu, mwathalengekania athi eby’amabirikolera Yehova bikaghunza. Paulo mwakolha bingyi omwa mubiiri w’erithulira nomwakine indi iniakanahiribawa omwa muliki, iniahunzwa, iniaswiribwa omwa mabwe, obwathu obw’alimo ibwatsanda, ihayira nibya iniabulha eky’erirya n’esyongyimba. (2 Kor. 11:23-27) Aliwe, omwa byosi ebyo abya iniabirikolha n’erilhabamu, Paulo abya inianasi ku atholere inialholha embere. Nethu ekyo kya thutholere ithwakolha.

6. Ebighuma by’okwa “myatsi eyabirilhaba” ebya thutholere ithw’ibirirwa ni byahi?

⁶ Thwangagherererya thuthi eky’erileberyako kya Paulo “eribirirwa emyatsi eyabirilhaba”? Abandi omw’ithwe banganabya ibakayowa nabi busana n’ebibi ebya bakolha kera. Wamabya iwukayowa wuthya, mbwino wangana tsuka eriyeghesya okwa kihongwa kya Kristo eky’embanulho? Thwamayeghesya, n’erighanirya oko mwatsi oyu, n’erikihira omwa musabe, ikyangana thuwathikya kutsibu erihwamu eriyowa nabi. Nibya ithwangana leka n’eriyowa nabi busana n’ebibi ebyo Yehova abirithughanyira. Thulebaye ekindi ekya thwang’ighira oku Paulo. Abandi banganabya imubaleka omubiiri owaliko sente nene bangahira Obwami bw’embere. Kyamabya ikwa kiri kithya, thwangan’ibirirwa emyatsi eyabirilhaba omw’ithendi yighomba ebya thwangabya imuthwayithalyako? (Emig. 11:4-6; Omu. 7:10) “Emyatsi eyabirilhaba” mwanganabya imwamuli n’ebindu ebya thwakolha omwa mubiiri wa Yehova kutse ebitsibu ebya thwalhabamu kera. Ni kwenene, eryibuka ngoku Yehova abirighenda akathutsumulha n’erithusighika ahabw’emyaka mingyi kyangana thuthunda hakuhi na  Thatha wethu. Aliwe, sithwanganza nahake erilengekania thuthi thwanamabirikolera Yehova ebikaghunza.​—1 Kor. 15:58.

7. Ngoku kiri omu 1 Abanya Korinto 9:24-27, ni kyahi ekikayithaghisibawa erisinga amathangwa w’engebe? Iha eky’erileberyako.

⁷ Paulo mwayitheghererya ndeke ebinywe bya Yesu bino: “Mulenge kutsibu.” (Lk. 13:23, 24) Paulo mwaminya ngoku, nayu nga Kristo, atholere iniayikasa kutsibu erihika okwa muhindo. Neryo mwalinganisya engebe y’Omukristayo n’amathangwa. (Soma 1 Abanya Korinto 9:24-27.) Omuthibithi akalhubirira erihika okwa muhuha kandi akayitheghaya okw’irengemeribwa. Ng’eky’erileberyako, abakasangira omwa malingwatha omwa syotawuni bangana kolesya esyonzira esiriko amaduka n’ebindi ebikalengemeraya. Wukalengekanaya omuthibithi inian’imana n’eriyalebya ebindu ebiri omwa maduka? Amabya inianzire erisinga syangakolha ekyo! Nethu omwa mathangwa w’engebe, thutholere ithwayitheya okwa bikalengemeraya. Thwamahira ameso w’okwa kilhubirirwa kyethu, eriyikasa ng’omukwenda Paulo, ithukendi syabana olhuhembo!

8. Ni bitsibu byahi bisathu ebya thukendi lebya?

⁸ Thulebaye ebitsibu bisathu ebyangana leka ithwasebebera. Nabyo ni: ebya thulindirire erithendibya, eritsotsobera omwa maghalha, n’ebitsibu by’olhughumerera. Ithwangana ghasirwa omw’ilebya abandi nga babirighumira bathi emibere eyi.​—Fil. 3:17.

9. Ebya thulindirire byamathendibya kyanga thuhambako kithi?

⁹ Ebya thulindirire erithendibya. Thukalindirira kutsibu ebibuya ebyo Yehova abirilhagha. Nibya, n’omughulhu omuminyereri wa Yehova ya Habakuki abya anzire kutsibu erilhangira Yehova akaghunzaho emibere mibi omwa Yuda, Yehova mwamubwira athi alinde. (Hab. 2:3) Aliwe ebya thulindirire byamabya nga byamasibayo, kyangana kehya omuhwa wethu. Nibya thwanganahwa amani. (Emi. 13:12) Eki mukyabya okwa balikyethu balebe omo mwaka owa 1914. Okwa buthuku obo, Abakristayo abahakabibwa bangyi ibalindirire erighenda elhubulha. Ekyo kyabere kyaghana eribya, abathaleghulha mubakolhaki  ebyo babya balindirire bikaghana eribererera?

10. Abathahenie baghuma mubakolhaki ebyo babya balindirire bikaghana eribererera ngoku balhue bakalengekania?

¹⁰ Thulebaye eky’erileberyako ky’abathaleghulha babiri abasingura ekitsibu ng’ekyo. Mughalha wethu Royal Spatz abatizibawa 1908 inianawithe myaka 20. Abya akakasirye ngoku akisiya iniaghenda elhubulha. Kundi nibya, abere akanza erithahya omwa 1911, mwabwira ya Pearl oyo anza erithahya athi: “Wunasi ekikayabya omwa 1914. Thwamabya b’erithahania, thukikoleko omwa byalhuba!” Mbwino Abakristayo aba mubanalemererwa omwa mathangwa wabu w’engebe bakabya isibathathunga olhuhembo lhwabu lhw’erighenda elhubulha omwa 1914? Eyihi, kundi ekilhubirirwa kyabu kikulhu kyabya iry’erikolha buthaleghulha erisonda lya Nyamuhanga, butsira erighenda elhubulha. Babya banzire erithibitha omwa mathangwa omw’iyiyinia. Kandi kwenene, Royal na Pearl mubalholha embere inina bathaleghulha kandi ab’omuhwa erihika aho baghunzira engebe yabu ey’okwa kihugho enyuma w’emyaka mingyi. Ahathe erithika-thika wulindirire erilhangira Yehova ak’erya erina liwe n’erikangania obuthabali bwiwe ku bwa buhikire n’eriberererya emilhaghe yiwe yosi. Wangana yikethera ngoku ebindu byosi ebi bikendi syabererera okwa ndambi eyo Yehova abirithegheka. Ekyo kithe kyabya, thuyihweraye omwa mubiiri wa Nyamuhanga, butsira erihwa amani kutse erisebebera busana n’erilindirira habw’omughulhu muuli.

11-12. Busana naki thwangana lholha embere erikolera Yehova nomuthwangabya ithulimutseka? Iha eky’erileberyako.

¹¹ Eritsotsobera omwa maghalha. Omuthibithi akayithagha akaghalha erithibitha omwa mathangwa. Aliwe siwuliyithagha eribya n’amaghalha awuwene kinyamubiri erithoka eryongera eribya n’erikirirya omu Yehova n’eribya n’omuhwa omwa mubiiri wiwe. Kundi nibya, abangyi ababiritsotsobera bakinahambirire erithwamu lyabu ly’erilholha embere bunyakirimu. (2 Kor. 4:16) Ng’eky’erileberyako, Mughalha wethu Arthur Secord * abya w’emyaka 88 kandi iniabiritsotsobera enyuma w’erikolera okwa Beteli habw’emyaka 55. Kiro kighuma omuthambiri mwamuhikako okwa ngyingo yiwe. Mwamusamalira kandi omw’itsomana mwabugha athi: “Mughalha wethu Secord, omubiri wawu oyu abirighenda esyomayiru n’esyomayiru omwa mubiiri wa Yehova.” Aliwe Arthur, syabya ahirire amalengekania wiwe okwa by’akolha kera. Mwamulhalhamira, amasenyenya, n’eribugha athi: “Ekyo ni kwenene. Aliwe ebya thwabirikolha si by’ebikulhu. By’ebya thukakolha munabwire n’erilholha embere.”

¹² Obundi wamabirikolera Yehova habw’emyaka mingyi aliwe lino busana n’eritsotsobera  omwa maghalha kikukalire erikolha ngoku wabya wukakolha. Kyamabya ikwa kiri kithya, isiwahwa amani. Wangana yikethera ngoku Yehova an’ibukire emibiiri yawu y’obuthaleghulha eyo wabirikolha. (Ebr. 6:10) Kandi wibuke ngoku erianza Nyamuhanga siriseghemere okwa lhulengo lhw’ebya thukakolha omwa mubiiri wa Yehova. Aliwe thukakanganaya olhwanzo lhwethu omw’ibya n’amalengekania awuwene n’erikolha ngoku thwangathoka erikwamana n’amaaka wethu. (Kol. 3:23) Yehova anasi erilemererwa lyethu kandi syangathuyithaghako ebya thuthe thwangathoka.​—Mk. 12:43, 44.

13. Omwatsi wa Anatoly na Lidiya akathuhiramu athi omuhwa w’erilholha embere nomuthwangabya omwa bitsibu bingyi?

¹³ Ebitsibu by’olhughumerere. Abandi baghombe ba Yehova bamabirighumira ebitsibu n’eriendereribwa habw’emyaka mingyi. Ng’eky’erileberyako, Anatoly Melnik  * abya awithe emyaka 12 misa thatha wiwe akahambwa, erihirwa omwa ngomo, n’erithwalhwa e Siberia, esyomayiru esilhabire oku 4,000 (kilomita 7,000) erilhua ewabu e Moldova. Enyuma w’omwaka mughuma, Anatoly, mama wiwe, n’ababuthi ba mama wiwe nabu mubathwalhwa e Siberia. Endambi muyahika, bamabya ibanganathoka erighenda okwa mihindano omwa kindi kyalu, aliwe ibatholere ibalyatha esyomayiru 20 (kilomita 30) omwa nzururu, erighumira ekihuhiriro kinene kutsibu. Enyuma waho, Mughalha wethu Melnik mwabohwa habw’emyaka isathu haali oku mukali wiwe, Lidiya, na mwali wiwe ow’omwaka mughuma. Nomubanabana ebitsibu habw’emyaka mingyi, Anatoly n’eka yiwe mubalholha embere erikolera Yehova buthaleghulha. Lino inianawithe myaka 82, Anatoly ane okwa Kathunga k’Ekyaghanda ky’Omuthahulha omwa Central Asia. Nethu nga Anatoly na Lidiya, thukole ekyosi-kyosi ekya thwangathoka omwa mubiiri wa Yehova, n’erilholha embere eriyiyinia ngoku thwanakolha kera.​—Gal. 6:9.

14. Paulo mwalhangira iniatholere erikolhaki erihika okwa kilhubirirwa kiwe?

¹⁴ Paulo aby’ayikethere ngoku akendi ghunza amathangwa n’erihika okwa kilhubirirwa kiwe. Iyo ng’Omukristayo omuhakabibwa, mwathunga amaha w’eribana “olhuhembo, lhw’eribirikirwa ly’endatha na Nyamuhanga.” Aliwe, eriberererya ekilhubirirwa ekyo, mwaminya ngoku atholere inialholha embere ‘eriyitsingirira.’ (Fil. 3:14) Paulo mwakolesya erilinganisya eritholere eriwathikya Abanya Filipi erilholha embere erihwerya amalengekania okwa kilhubirirwa kyabu.

15. Paulo mwakolesya athi omwatsi w’eribya ndulhani eriwathikya Abakristayo be Filipi erilholha embere ‘eriyitsingirira’?

 ¹⁵ Paulo mw’ibukya Abanya Filipi ngoku obwikalho bwabu buli elhubulha. (Fil. 3:20) Busana naki ekyo kyabya kikulhu? Okwa biro ebyo eribya ndulhani ye Roma ini kindu ky’obughuli bunene. * Aliwe Abakristayo abahakabibwa babya ndulhani omwa gavumente eyuwene, ekindu ekyangabaghasire kutsibu. Eribya ndulhani y’egavumente y’elhubulha, ikilengire eribya ndulhani ye Roma! Busana n’ekyo, Paulo mwabwira Abanya Filipi athi: “Emikolere yenyu yibye yitholere engulhu yuwene ya Kristo.” (Fil. 1:27) Abakristayo abahakabibwa munabwire bakahiraho eky’erileberyako ekyuwene eky’erilhubirira eribana engebe y’erikotha omwa lhubulha.

16. Mbulha thuwithe amaha w’erisyaghenda elhubulha kutse aw’erisyabya okwa kihugho, erikwamana na Abanya Filipi 4:6, 7, thutholere ithwalholha embere erikolhaki?

¹⁶ Mbulha thuwithe amaha w’erisyabana engebe y’erikotha omwa lhubulha kutse okwa kihugho paradiso, thutholere ithwalholha embere erilhubirira amaha ayo. Mbulha thuli omwa mibere eyiri yithi, sithutholere thuk’ibuka ebya thwabirisigha enyuma; kutse erilighira ekyosi-kyosi erikakirya erikulha-kulhana lyethu. (Fil. 3:16) Ebya thulindirire byanganabya nga sibyathabererera lhuba, kutse ithwatsuka eritseka omwa maghalha. Thwanganabya ithwamabirighumira ebitsibu n’eriendereribwa habw’omughulhu muuli. Mbulha ni kyahi okw’ebi, sithutholere ‘thukahangya-hangya.’ Omwakanya k’ekyo, bwira Nyamuhanga y’obwagha bwawu, omw’isaba n’erihathikana, nayu akendi kuha obuholho obwa wuthe wangalengekania.​—Soma Abanya Filipi 4:6, 7.

17. Omwatsi owakakwamako akendisyakania okuki?

¹⁷ Ngoku omuthibithi akanayikasa kutsibu akayaghunzerera, thuhweraye amalengekania wethu okw’ighunza amathangwa wethu w’engebe. Erikwamana n’amaaka n’emibere eyathulimu, thulengeho kutsibu n’erilholha embere n’omuhwa erilhubirira ebibuya ebiri embere. Thwanga kolhaki erilholha embere buthaleghulha? Omwatsi owakakwamako akendi thuwathikya eriminya ebya thwangahira embere kandi ngoku thwanga “minya ndeke ebikulhu kutsibu.”​—Fil. 1:9, 10, NW.