HANE olhusunzo lhulebe omwa kithunga olhwa wanzire aliwe iwabya isiwanga hebwalho lino? Obundi ni lhusunzo olho wundi awithe. Obundi ni mubiiri omwa kithunga, kutse lhusunzo lhulebe olhwa wanakolire. Aliwe busana n’erikulha omo myaka, amaghalha eritsotsobera, obunakwa, kutse esyongwamirwa sy’amaka ibyakukakirya. Kutse busana n’esyombinduka omwa kithunga, iwaleka olhukwamirwa lhwawu olho wabirikolha ahabw’emyaka mingyi. Mbulha ni kyahi okw’ebi, wangana yowa nga siwuli kolha ebyosi ebyo wanzire erikolha omwa mubiiri wa Nyamuhanga. Omwa mibere ng’eyo, ni kya buli kiro eribya iwangana yowa nabi. Nomwabine, wangayitheya wuthi okw’iyowa nabi​—ng’erihwa amani, erihithana kutse eriyiponera? Wangakolhaki eribya iwunatsemire?

Thwangan’ighira okwa ky’erileberyako kya Yoane Mubatizya ngoku thwangabya ithunatsemire. Yoane mwahebwa esyonzunzo sy’embaghane, aliwe ebya muhikako omwa mubiiri wa Yehova by’ebyathabya akalengekania. Angabya imwathalengekania athi angana ghunza omwa ngomo mw’obuthuku bunene kwilhaba obwa ghunza omwa mubiiri wiwe w’erithulira. Nomwabine, Yoane mwalholha embere inianatsemire, kandi mwabya iniane n’omubere oyo omwa ngebe yiwe yosi. Ni kyahi ekya muwathikaya? Nethu thwangabya thuthi ithunatsemire nomuthwangabana ebikathughunza amani?

Omo mwaka owa 29 E.K., ng’omwa Kwakani aho, Yoane mwatsuka omubiiri wiwe w’erithegheka abandu busana n’eriasa lya Masiya, athi: “Mubindule emithima yenyu erileka ebibi, kusangwa Obwami bw’elhubulha buli hakuhi.” (Mt. 3:2; Lk. 1:12-17) Abangyi mubakolha ekyo. Erithwalira haghuma abandu bangyi mubalhua haali erisyahulikirira omwatsi wiwe, n’abangyi mubayisubamu kandi bamabatizibwa. Kandi omwa buthubaha Yoane mwabwira abakulhu b’amadini ababya bakayithwalha ng’abathunganene okw’itswerwa eribalindirire bamathendi yisubamu. (Mt. 3:5-12) Ekindu kikulhu ekya Yoane akolha omw’ithulira liwe lyabya iry’eribatizya Yesu omo mwaka 29 E.K. ng’omwa Kwerikumi aho. Eritsuka n’aho, Yoane mwabwira abandu athi bakwame Yesu, Masiya oyuwalhaghanisibawa.​—Yn. 1:32-37.

Yesu abere akakania okwa lhukwamirwa lhwa Yoane olhw’embaghane, mwabugha athi: “Yoane  Mubatizya ni mukulhu kwilhaba abandu bosi ababuthawa.” (Mt. 11:11) Ahathe erithika-thika, Yoane mwatsema busana n’emighisa eyo abana. Nga Yoane, abangyi munabwire babiriyilhangirira emighisa minene erilhua oku Nyamuhanga. Eky’erileberyako ni mughalha wethu Terry. Iyo na mukali wiwe, Sandra, mubaghunza emyaka eyilhabire oku 50 omwa mubiiri w’omughulhu wosi. Terry akabugha athi: “Nabirihebwa esyonzunzo nyingyi esyuwene. Nabirikolha ng’omutemburi, omunya Beteli, omutemburi w’embaghane, omulebererya w’omuthimbo, omulebererya we disitrikiti, kandi lino ngathasyakolha ng’omutemburi w’embaghane.” Thukatsema thukahebwa olhusunzo omwa kithunga, aliwe ngoku thukendi lhangira omwa ky’erileberyako kya Yoane, eribya ithunatsemire kikayithagha akaghalha emibere eyathulimu yikahinduka.

Ekindu kikulhu ekya wathikaya Yoane Mubatizya eribya inianatsemire lyabya iry’erisima esyonzunzo esyo ahebawa. Thulebaye eky’erileberyako. Yesu abere abiribatizibwa, omubiiri wa Yoane mwasuba ahisi n’owa Yesu am’ongera. Abigha ba Yoane mubakwa obuba neryo mubabugha bathi: “Lebaya, akabatizaya, n’abandu bosi bakamuhikako!” (Yn. 3:26) Yoane mwasubirya athi: ‘Oyuwithe omuheruki, n’iba w’omuheruki; nikwa omwira [omunywani] w’iba w’omuheruki, oyo wimene n’erimuhulikirira, akatsema kutsibu eriowa omulenge w’iba w’omuheruki. Lithya obutseme bwaghe bwamahika.’ (Yn. 3:29) Yoane mwathabya omwa malingwatha na Yesu, kutse eriyowa ebya Yesu akakolha nga byabirileka ebiwe ibyabya nga sibikiwithe mughaso. Omwakanya k’ekyo, Yoane mwabya inianatsemire kundi mwalhangira ini lhusunzo eribya ‘munywani w’iba w’omuheruki.’

Amalengekania agho Yoane abya awithe mwamuwathikya eribya inianatsemire nomwakine indi omubiiri wiwe syabya mwolho. Ng’eky’erileberyako, Yoane abuthawa ini Munaziri, neryo abya isyatholere erinywa obwabu. (Lk. 1:15) Yesu akakania okwa ngebe nyolho ya Yoane, mwabugha athi: “Yoane mwasa isyalirya kutse eripulya.” Aliwe, Yesu n’abigha biwe sibabya Banaziri neryo ibo sibabyako lhukako kandi engebe yabu iyiri ng’ey’abandi. (Mt. 11:18, 19) Nomwakine indi Yoane mwathakolha kithiko-thiko kyosi-kyosi, abya inianasi ngoku abigha ba Yesu, imwamune n’abaghuma b’okwa babya bakwamire Yoane, banga kolire ebithiko-thiko. (Mt. 10:1; Yn. 10:41) Omwakanya k’erilengemeribwa omw’ebyo, n’omuhwa munene Yoane mwamakirira olhusunzo olho Yehova amuha.

Nethu thwamalhangira olhusunzo olhwa thwangabya ithuwithe lino omwa mubiiri wa Yehova mwa lhw’obughuli, ithwanganabya ithunatsemire. Terry, oyothulyakanayako, akabugha athi, “Iningahweraya amenge okwa buli mubiiri ogho ngahebawa.” Akabya akalengekania okwa ngebe yiwe omwa mubiiri w’omughulhu wosi, akabugha athi, “Sindi yikubayabwomo aliwe ebikatsemesaya bisa bya ng’ibuka.”

Thwangan’ongera etseme yethu omwa mubiiri wa Nyamuhanga omw’ighanirya okwa bikaleka obuli lhusunzo kutse olhukwamirwa lhw’ekiteokrasi ilhwabya lhw’obughuli. Lhw’olhusunzo lhw’erikolha haghuma na Nyamuhanga. (1 Kor. 3:9) Ngoku erisugha ekindu ky’obughuli likanaleka ikyabya ikyinuwene, erighanirya ngoku ni kitsumbi erikolha haghuma na Nyamuhanga kikendi kakirya amalengekania awathuwene erithw’iha kw’etseme yethu. Ithukendi yitheya okw’ilinganisya akaghalha kethu n’ak’abandi. Sithwendi yowa abandi nga bawithe esyonzunzo esyuwene okwa syethu.​—Gal. 6:4.

Yoane angabya iniabya inianasi ngoku omubiiri wiwe w’erithulira ni w’obuthuku buke, aliwe syabya asi ngoku akend’ihwa kitsumbukirania. (Yn. 3:30) Omo mwaka 30 E.K., imuhamalhaba mezi mukagha Yoane alibatizirye Yesu, Omwami Herode mwahira Yoane y’omwa ngomo. Aliwe, Yoane mwakolha ekyosi-kyosi ekyo angathoka erilholha embere erithulira. (Mk. 6:17-20) Ni kyahi ekyanga muwathikirye eribya inianatsemire omwa mibere yosi eyi? Mwahwerya amalengekania wiwe okwa by’obunyakirimu.

Yoane iniane omwa ngomo, mwowa okwa bya Yesu anemukolha omw’ithulira. (Mt. 11:2; Lk. 7:18) Yoane abya inianasi ndeke-ndeke ngoku Yesu ya Masiya aliwe angabya iniabya akayibulya Yesu ng’angaberererye athi ebyosi ebyo Amasako abya akabugha athi Masiya angaberererye. Kundi Masiya  ni w’eribya mwami, mbwino erithabalha lya Yesu likisiya iryatsuka? Mbwino ekyo kyangalekire Yoane inialhusibwa omwa ngomo? Yoane aby’anzire eriminya ebya Yesu akendi kolha, neryo mwathuma ababiri b’okwa bigha biwe eriyabulya Yesu ekibulyo kino: “Ninawe oyukasa, kutse thulindirire owundi kwehi?” (Lk. 7:19) Babere bakasubulha, Yoane angabya imwahulikirira ndeke bakamusoborera ngoku Yesu abirikolha ebithiko-thiko by’erilhamya, n’eribabwira athi baghende babwire Yoane bathi: “Esyondimethime sirimulhangira, n’ebirema birimughenda, abahagha bakalhamibawa, abatsiha bali mwowa, abaholi balimulhubukibwa, n’engulhu yuwene yikathulhawa oko bera.”​—Lk. 7:20-22.

Ahathe erithika-thika omwatsi oyo mwaghumya Yoane. Mukyakangania ngoku Yesu ali okw’iberererya amaminyereri awahambire oku Masiya. Nomwakine indi eryasa lya Yesu silyanga lekire Yoane akalhua omwa ngomo, Yoane abya inianasi ngoku ebyo akolha sibithakwa busa. Nomwanabya omwa mibere eyikalire, abya inianawithe ekyanga leka iniabya inianatsemire.

Nethu nga Yoane, thwamahwerya amalengekania wethu okwa by’obunyakirimu, ithukendi thoka eriyiyinia ithunatsemire kandi omw’ighumisirizya. (Kol. 1:9-11) Thwangana kolha eki omw’isoma e Biblia n’erighanirya kuyo, neryo ikyathwibukya ngoku ebya thukakolha omwa mubiiri wa Nyamuhanga silhuhira busa. (1 Kor. 15:58) Sandra akabugha athi: “Erisoma esura nguma ye Biblia obuli kiro kyabirinyiwathikya eriyithunda hakuhi na Yehova. Kikaleka ingamuhweryako amalengekania butsira eriyihwerya ghoko.” Kandi ithwangana lengekania okwa bya balikyethu banemukolha, neryo eki ikikendi leka ithuthabera eriyilengekaniako, aliwe ithwalengekania okwa bya Yehova anemukolha. Sandra akabugha athi: “Endegheka y’obuli kwezi eyikabya okwa JW Tivi^® yabirithuwathikya eriyithunda hakuhi n’ekithunga kandi yikathuwathikaya eribya ithunatsemire thukakolha esyongwamirwa syethu.”

Yoane Mubatizya mwakolha omubiiri wiwe ow’obuthuku buke “omwa kirimu n’obuthoki bwa Eliya,” kandi nga Eliya “abya mundu nga thwe.” (Lk. 1:17; Yak. 5:17) Thwamagherererya eky’erileberyako kiwe n’erihwerya amalengekania wethu okwa by’obunyakirimu, nethu ithukendibya ithunatsemire omwa mubiiri wethu w’Obwami, nomuhangabyaki.