1. Ni kyahi ekya Yehova abiriha obuli mughuma w’okwa baghombe biwe abathaleghulha?

OMO LHWANZO, Yehova akaha obuli mughombe wiwe omuthaleghulha y’omwanya omwa kithunga kiwe. Nomwakine indi thuwithe esyongwamirwa esithasosene, ithwe bosi thuli b’obughuli kandi thukayithaghangana. Omukwenda Paulo akaleka ithwalhangira erisomo likulhu eri. Athi?

2. Ngoku kiri omwa Abanya Efeso 4:16, busana naki thutholere ithwalhangirana mwa b’obughuli kandi ithwakolha haghuma?

² Ngoku kiri omwa lisako erihirikirire omwatsi ono, Paulo mwakangania ngoku okw’ithwe sihali oyuwangabwira owundi mughombe wa Yehova athi “Sindi kuyithagha.” (1 Kor. 12:21) Obuholho eribya omwa kithunga, thutholere ithwalhangirana mwa b’obughuli kandi ithwakolha haghuma. (Abanya Efeso 4:16.) Thwamakolha haghuma omwa bughuma, ekithunga kikakulha-kulhana n’olhwanzo ilhwongera.

3. Omo mwatsi ono thukendi kania okuki?

³ Ni nzira syahi esyo thwanga kanganiryamu ku thusikirye abandi Bakristayo omwa kithunga? Omo mwatsi ono, thukendi lebya ngoku abasyakulhu bangasikania. Kandi, thukendi lebya ngoku ithwe bosi thwanga kangania ku thukalhangira balikyethu abahuru mwa b’obughuli. N’erighunzerera, thukendi lhangira ngoku thwanga kangania ku thusikirye abak’igha omubughe wethu.

4. Ni habulha lyahi eriri omwa Abanya Roma 12:10 erya Paulo aha eryo abasyakulhu batholere ibaghenderako?

⁴ Abasyakulhu abosi omwa kithunga bakasombolhawa n’omulimu abuyirire wa Yehova. Aliwe, obuli mughuma awithe ebihembo n’amaaka muthina-muthina. (1 Kor. 12:17, 18) Abandi banganabya ibasombolhawa lino-lino neryo ibasi bike. Abandi ibangana lemwa erikolha bingyi busana n’erikulha omo myaka n’ebitsibu by’amaghalha. Neryo, omusyakulhu syatholere akabwira owundi musyakulhu athi, “Sindi kuyithagha.” Omwakanya k’ekyo, obuli musyakulhu atholere iniaghendera okw’ihabulha lya Paulo eriri omwa Abanya Roma 12:10.​—Soma.

5. Abasyakulhu banga kangania bathi ku bakasikanaya, kandi busana naki ni kikulhu ibo erikolha ekyo?

⁵ Abasyakulhu bakakanganaya ku bakasikaya abandi basyakulhu omw’ibahulikirira. Eki kikayithaghisibawa kutsibu omughulhu akathunga k’abasyakulhu kakakanaya oko myatsi mikulhu. Busana naki? Lebaya ebyo e Watchtower ey’Okwerikumi 1, 1988, yabugha: “Abasyakulhu batholere ibaminya ngoku Kristo akakolesaya omulimu abuyirire erisondolha omusyakulhu wosi-wosi ow’okwa kathunga k’abasyakulhu eriha obusondoli obuseghemere okwa Biblia obwanga bawathikya omwa mibere mirebe kutse okw’ithwamu lirebe likulhu. (Emib. 15:6-15) Omulimu abuyirire syali wathikaya omusyakulhu mughuma aliwe akawathikaya abosi.”

6. Abasyakulhu bakakolha bathi haghuma omwa bughuma, kandi ekithunga kikaghasirawa kithi bamakolha ekyo?

⁶ Omusyakulhu oyukasikaya abandi basyakulhu syalianza eribera eribya w’erimbere erikania omwa muhindano w’abasyakulhu. Syaliyighangira omukania, kandi syali bera eribugha athi ebiwe bya bihikire. Omwakanya ky’ekyo, akaha amalengekania wiwe omwa bwolho n’omw’iyikehya. Akahulikirira ndeke ebyo bandi bakabugha. Ekikulhu kutsibu, akabya inianayitheghekire erikolesya emisingyi ye Biblia n’erighendera okwa busondoli ‘bw’omughombe oyuthereghulha n’ow’amenge.’ (Mt. 24:45-47) Abasyakulhu bakabya  bamakania oko myatsi omwa lhwanzo n’omw’isikya, omulimu abuyirire wa Nyamuhanga akabya haghuma nabu, kandi akabawathikaya erithwamu ebyanga himba ekithunga.​—Yak. 3:17, 18.

7. Yesu mwalhangira athi obuhuru?

⁷ Munabwire omwa kithunga muli abathahenie n’abawithe abaana. Aliwe kandi, muli baghalha bethu n’abali bethu bangyi abahuru. Abahuru thutholere ithwabalhangira thuthi? Lengekanaya ngoku Yesu abya akalhangira obuhuru. Omw’ithulira liwe okwa kihugho, Yesu mwathathahya. Mwabya muhuru kandi mwahwerya obuthuku n’amalengekania okwa mubiiri ow’ahebawa. Yesu mwathakangirirya athi Abakristayo batholere ib’ingira omwa butheke kutse athi ibabya bahuru. Aliwe, mwanabugha athi abandi Bakristayo bangana thwamu erithend’ingira omwa butheke. (Mt. 19:11, 12) Yesu mwasikya abahuru. Isyali lhangira abahuru mwa bahisi kutse ababulirweko.

8. Ngoku kiri omwa 1 Abanya Korinto 7:7-9, ni kyahi ekya Paulo abugha athi Abakristayo ibalengekaniako?

⁸ Nga Yesu, omukwenda Paulo mwakolha omubiiri wiwe w’erithulira iniane muhuru. Paulo mwathakangirirya athi ni kibi Omukristayo eringira omwa butheke. Abya inianasi ngoku oyu ni mwatsi w’eriyithwiramo. Nomwabine, Paulo mwahira omwa Bakristayo mw’omuhwa w’erilebya nga bangana kolera Yehova ibane bahuru. (Soma 1 Abanya Korinto 7:7-9.) Ahathe erithika-thika, Paulo mwathaghaya Abakristayo abahuru. Mwasombolha Timoteo, mughalha wethu omuhuru, erikolha olhukwamirwa olhulithohire. * (Fil. 2:19-22) Neryo kwesi, ikikendibya ikiwire, erilengekania wuthi mughalha wethu atholere kutse syatholere olhukwamirwa lhulebe kundi ali omwa butheke kutse kundi ni muhuru.​—1 Kor. 7:32-35, 38.

9. Thwanga bugha thuthiki okw’ingira omwa butheke n’eribya muhuru?

⁹ Yesu na Paulo mubathakangirirya bathi Abakristayo batholere ibathahya kutse ibabya bahuru. Neryo thwanga bugha thuthiki okw’ingira omwa butheke n’eribya muhuru? E Watchtower ey’Okwerikumi 1, 2012, muyakibughako ndeke yithi: “Omo kwenene, ebyosi bibiri [er’ingira omwa butheke n’eribya muhuru] ni kihembo erilhua oku Nyamuhanga. . . . Yehova syali lhangira [obuhuru] ng’ekihemu  kutse ng’obulighe.” Busana n’ekyo, thutholere ithwasikya omwanya w’abahuru omwa kithunga.

10. Thwanga kangania thuthi ku thusikirye balikyethu abahuru?

¹⁰ Thwanga kangania thuthi ku thusikirye eriyowa n’emibere eyo balikyethu abahuru balimu? Thutholere ithwabya ithun’ibukire ngoku abandi Bakristayo abahuru babirithwamu erithend’ingira omwa butheke. Abandi Bakristayo abahuru bananzire eringira omwa butheke, aliwe sibali babana oyutholere. N’abandi abanze babu bangabya ibabiriholha. Neryo kwesi, sihali ekyanga leka abali omwa kithunga bakabulya Abakristayo abahuru nga ni kyahi ekyalekire ibath’ingira omwa butheke kutse eribabwira bathi nga babasonderaye. Nomwabine, abandi Bakristayo abahuru bangana saba obuwathikya ng’obo. Aliwe bamabya isibathabusaba, ekyo kyanga bahambako kithi? (1 Tes. 4:11; 1 Tim. 5:13) Thulebaye ebyo balikyethu abahuru abathaleghulha bakabugha.

11-12. Abahuru thwanga baghunza thuthi amani?

¹¹ Omulebererya mughuma ow’omuthimbo omuhuru oyukakolha ndeke omubiiri wiwe akayowa eribya muhuru ikiwithe mighisa mingyi. Aliwe, akabugha athi kikaghunza mani omughulhu balikyethu abanawithe ebighendererwa ebyuwene bakamubulhaya bathi: “Busana naki siwuthahirye?” Mughalha wethu omuhuru oyukakolera okwa kyaghanda ky’omuthahulha mwabugha athi: “Hakanayira balikyethu ibaleka ingayowa abahuru nga ni b’erikwira obulighe. Eki kyangana leka obuhuru ibwalhangirika nga si kihembo aliwe nga ni kitsibu.”

¹² Mwali wethu omuhuru oyukakolera okwa Beteli mwabugha athi: “Abandi bathuliri bakalengekanaya bathi abahuru abosi bakasondaya ow’eringira nayu omwa butheke kutse bathi abahuru bakalhangira obuli yitsemesya ng’akaghisa k’erisonderyamu. Nabere ingaghenda omwa kindi kihugho eriyakolha omubiiri waghe we Beteli, munahikayo ekiro ky’emihindano. Mwali wethu oyo nabya ewiwe mwambwira athi omwa kithunga mune baghalha bethu babiri ab’emyaka yaghe. Mwambwira athi sibugha ambu akanyisonderaya ow’erinyithahya. Thwabere thukanahika okwa Kisenge ky’Obwami, mwanyikura n’erinyithwalha ahali baghalha bethu babiri abo. Omo kwenene, kyabya kindu ekikahemulha okw’ithwe basathu.”

13. Ni by’erileberyako byahi ebya himba mwali wethu mughuma omuhuru?

¹³ Owundi mwali wethu omuhuru oyukakolera okwa Beteli mwabugha athi: “Nganasi abatemburi abahuru abakulire abasikire, abawithe ebilhubirirwa, abakayihayo, kandi abakatsemera omubiiri wabu kandi abakawathikaya ekithunga kya kutsibu. Bayiwitheko amalengekania awatholere, sibali yowa ngabalengire abandi kundi ni bahuru kutse eriyowa mwa bahisi kundi sibali omwa butheke kandi kundi si bawithe abaana.” Kikatsemesaya eribya omwa kithunga ekyo obuli mundu akayowa iniasikibirwe kandi ini w’obughuli. Wukabya iwunasi ngoku si wuli w’erikwira obulighe kutse ow’eriyighomba, kutse si wuli w’erigheghena kutse erilhangirwa nga wulengire abandi. Wukabya iwunasi ngoku bakwanzire.

14. Thwanga kangania thuthi ku thukasikaya abahuru?

¹⁴ Balikyethu abahuru ibakendi tsema thwamabalhangira mwa b’obughuli busana n’emibere yabu mibuya butsira kundi ni bahuru. Omwakanya k’eribakwira obulighe, thukabasima busana n’obuthaleghulha bwabu. Neryo isihendi syabya ekiro na kighuma balikyethu abahuru eriyowa nga thukababwira thuthi: “Sindi kuyithagha.” (1 Kor. 12:21) Aliwe, ibakendi minya ngoku thubasikirye kandi ku  thukalhangira omwanya wabu omwa kithunga mwa w’obughuli.

15. Ni mbinduka syahi esyo abandi babirikolha erikanyirirya omubiiri wabu w’erithulira?

¹⁵ Omo myaka eya lino-lino, abathuliri bangyi babiriyihiriraho ekilhubirirwa eky’erigha owundi mubughe nuku bongere omubiiri wabu w’erithulira. Erikolha ekyo, mubayithagha erikolha esyombinduka omwa ngebe yabu. Balikyethu aba babirisighania ebithunga ebikakolesaya emibughe yabu nuku bayakolere omwa kindi kithunga ekikakolesaya owundi mubughe ekiri mw’obuyithawa bw’abathuliri b’Obwami. (Emib. 16:9) Eri ni yithwiramo eryo Abakristayo aba bakakolha nuku balholhaye omubiiri w’Obwami w’embere. Nomwakine indi kyangana bathwalira myaka mingyi erithendererya omubughe, bakawathikaya ekithunga omwa nzira nyingyi. Emibere yabu mibuya n’ebyabalholireko bikaghumaya n’erisikya ekithunga. Thukalhangira balikyethu abakayihayo aba mwa b’obughuli!

16. Ni byahi ebyo abasyakulhu batholere ibalebya mughalha wethu ng’anamatholera eribya musyakulhu kutse omughombe omuwathikya?

¹⁶ Akathunga k’abasyakulhu sikatholere kakaghana erihamya oku mughalha wethu eritholera eribya musyakulhu kutse omughombe omuwathikya ambu kundi syali athendererya omubughe ow’ekithunga ekyo alimu. Abasyakulhu ibakendi lebya mughalha wethu ng’anamatholera eribya musyakulhu kutse omughombe omuwathikya erikwamana n’ebiri omwa Masako butsira ng’anasi ndeke omubughe w’ekithunga ekyo alimu.​—1 Tim. 3:1-10, 12, 13; Tito 1:5-9.

17. Ni bibulyo byahi ebyo ababuthi batholere ibalengekaniako bakahumira omwa kindi kihugho?

¹⁷ Awandi maka w’Ekikristayo abirihumira omwa bindi bihugho erisondya obusaghiro kutse omubiiri. Busana n’ekyo, abaana bangana somerayo ibigha omubughe mukulhu w’ekihugho ekyo. Kandi ababuthi bangana yithagha erigha omubughe mukulhu oyo nuku babane emibiiri. Kandi ibbwa yamabya iyine ekithunga kutse egurupu eyikakolesaya omubughe wabu? Ni kithunga kyahi ekyo eka eyo yitholere iyahindaniramo? Mbwino yitholere yabya omwa kithunga ekikakolesaya omubughe mukulhu w’ekihugho ekyo kutse ekiri omwa mubughe wabu?

18. Ngoku kiri omwa Abanya Galatia 6:5, thwanga sikya thuthi erithwamu ly’omuthwe w’eka?

¹⁸ Omuthwe w’eka atholere iniathwamu eka yiwe nga yikendibya yikahindanira omwa kithunga kyahi. Kundi oyu ni mwatsi w’eriyithwiramo, atholere iniathwamu ekikendi wathikya eka yiwe. (Soma Abanya Galatia 6:5.) Thutholere ithwasikya erithwamu ly’omuthwe w’eka. Mbulha amathwamu athiki, thutholere ithwaligha erithwamu liwe n’eriangirira eka eyo omw’ilhangirayo mwa y’obughuli omwa kithunga kyethu.​—Abar. 15:7.

19. Ni kyahi ekya omuthwe w’eka atholere iniahira omwa musabe?

 ¹⁹ Awandi maka anganabya iniane omwa bithunga ebikakolesaya omubughe w’ababuthi, aliwe abaana babu isibasi ndeke omubughe oyo. Ekithunga ekyo kyamabya ikiri omwa mwanya owakakolesaya omubughe mukulhu w’ekihugho ekyo, ikyangana kalira abaana eriyitheghererya emihindano n’erikulha-kulhana bunyakirimu. Busana naki? Kundi abaana banganabya ibakasomera okwa syosukuru esikakolesaya omubughe mukulhu w’ekihugho ekyo butsira owa babuthi babu. Omwa mibere ng’eyo, omw’isaba kutsibu omuthwe w’eka atholere inialengekania okwa ky’angakolha eriwathikya abaana biwe eriyithunda hakuhi na Yehova n’abandu biwe. Ibangana thwamu eryeghesya abaana babu b’omubughe wabu kutse ibathwamu erihumira omwa kithunga ekikakolesaya omubughe ogho abaana babu bakayitheghereraya ndeke. Ekyosi-kyosi ekya muthwe w’eka angathwamu, abali omwa kithunga ekyo angahumiramo batholere ibasikya n’erilhangira iyo n’eka yiwe mwa b’obughuli.

20. Thwanga kangania thuthi ku thukasikaya balikyethu abak’igha owundi mubughe?

²⁰ Omwa byosi ebyo thwamabirikaniako, omwa bithunga bingyi mukendibya imune balikyethu abakalengaho erigha owundi mubughe. Kyangana bakalira eribugha amalengekania wabu. Aliwe, thwamathendi hwerya amalengekania okwa mibere bakakanirayamo omubughe, ithukendi lhangira olhwanzo olhwa bawithire Yehova n’eriyisunza lyabu ly’erimukolera. Thwamalhangira emibere mibuya eyi, ithukendi sikya balikyethu abo n’eribalhangira mwa b’obughuli. Isithwendi bugha thuthi “Sindi kuyithagha” kundi sibasi ndeke omubughe wethu.

21-22. Ni lhusunzo lhwahi lhubuya olhwa thuwithe?

²¹ Yehova abirithuha olhusunzo lhubuyanga olhw’erithunga omwanya omwa kithunga kiwe. Mbulha thuli balhume kutse bakali, bahuru kutse thuli omwa butheke, abalere kutse bakulhu kutse thwasi ndeke omubughe mulebe kutse eyihi, thuli b’obughuli embere sya Yehova n’abalikyethu.​—Abar. 12:4, 5; Kol. 3:10, 11.

²² Kwesi thulhole embere erighendera okwa masomo awuwenenga agho thwamabirigha omwa ky’erileberyako kya Paulo eky’omubiri w’omundu. Omwa nzira eyo, ithukendi lengaho erisondekania esyonzira esyo thwanga lhangiriramo omwanya wethu n’ow’abandi mwa w’obughuli omwa kithunga kya Yehova.