1. Ni lhusunzo lhwahi olhwa thuwithe?

NI LHUSUNZO eribya baghuma b’okwa kithunga kya Yehova! Thuli omwa paradiso y’obunyakirimu eyiri mw’abandu ab’obuholho, abatsemire. Wuwithe mwanyaki omwa kithunga?

2. Ni ky’erileberyako kyahi ekya omukwenda Paulo akolesaya omwa syobaruha siwe nyingyi esyo asondolibawa erihandika?

² Thwangan’igha bingyi oko mwatsi oyu omw’ilebya eky’erileberyako ekyo Paulo akolesaya omwa syobaruha siwe nyingyi esyo asondolibawa erihandika. Omwa buli baruha, Paulo mwalinganisya ekithunga n’omubiri w’omundu. Kandi mwalinganisya abandu omwa kithunga n’ebitsuko by’omubiri.—Abar. 12:4-8; 1 Kor. 12:12-27; Efe. 4:16.

3. Ni masomo wahi asathu agho thukendi kaniako omo mwatsi ono?

³ Omo mwatsi ono, thukendi lebya amasomo asathu aw’omughaso agho thwang’ighira okwa ky’erileberyako ekyo Paulo akolesaya. Ery’erimbere, thukendiminya ngoku obuli mughuma w’okw’ithwe anawithe omwanya * omwa kithunga kya Yehova. Eryakabiri, thukendikania okwa ekyo thwangakolha kyamathukalira eriminya omwanya wethu omwa kithunga. N’eryakasathu, thukendilebya ekikaleka ithwabya ithukayithagha eriyihwerya omwa mubiiri ogho Yehova abirithuha omwa kithunga kiwe.

4. Abanya Roma 12:4, 5 hakathukangirirayaki?

⁴ Erisomo ly’erimbere eryo thuk’igha omwa ky’erileberyako ekya Paulo akolesaya liri lithi obuli mundu awithe omwanya w’obughuli omw’ihiika lya Yehova. Paulo akatsuka eky’erileberyako kiwe omw’ibugha athi: “Thuwithe ebitsuko bingyi oko mubiri mughuma, n’obuli kitsuko kiwithe omubiiri wakyo. Nethu thuthya thuli bangyi, thuli mubiri mughuma ithumathikene na Kristo, kandi thuwathene haghuma ng’ebitsuko misindo-misindo by’omubiri mughuma.” (Abar. 12:4, 5) Paulo amanyisayaki? Obuli mughuma w’okw’ithwe anawithe olhukwamirwa olhuli mbaghane omwa kithunga, aliwe ithwe bosi thuli b’obughuli.

5. Ni bahi abo Yehova abirihira omwa kithunga ng’olhusunzo?

⁵ Wukabya wukalengekania okwa bawithe omwanya omwa kithunga, wanganalhuaho iwalengekania okwa bawithe olhukwamirwa lhw’erisondolha. (1 Tes. 5:12; Ebr. 13:17) Ni kwenene erilhabira omu Kristo, Yehova abirihira omwa kithunga Kiwe mw’abalhume b’olhusunzo. (Efe. 4:8) Abalhume b’olhusunzo aba mwamuli ab’okwa Kathunga Akakasondolha, abawathikya ab’Akathunga Akakasondolha, ab’okwa Kathunga k’Omuthahulha, abalebererya b’omuthimbo, baghalha bethu abakathendeka okwa syosukuru sy’ekiteokrasi, abasyakulhu b’ebithunga, n’abaghombe bawathikya. Baghalha bethu abosi aba bakasombolhawa n’omulimu abuyirire nuku batheghaye esyombuli sya Yehova esy’obughuli n’erighumya ekithunga.—1 Pet. 5:2, 3.

6. Ngoku kiri omwa 1 Abanya Tesalonika 2:6-8, balikyethu abakasombolhawa n’omulimu abuyirire bakalengaho erikolhaki?

⁶ Baghalha bethu bakasombolhawa n’omulimu abuyirire erikolha esyongwamirwa muthina-muthina. Ngoku ebitsuko muthina-muthina by’omubiri, ng’ebyalha n’ebisandu, bikaghasira omubiri owosi, baghalha bethu abakasombolhawa n’omulimu abuyirire bakakolha kutsibu erighasira ekithunga ekyosi. Sibaliyisonderaya eripipwa. Omwakanya k’ekyo, bakalengaho erihimba n’erighumya balikyethu. (Soma 1 Abanya Tesalonika 2:6-8.) Thukasima Yehova busana n’erithuha abalhume ng’aba abakayihayo, kandi abatholere bunyakirimu!

7. Ni mighisa yahi eyo abali omwa mubiiri w’omughulhu wosi bakabana?

⁷ Abandi omwa kithunga banganasombolhwa erikolha ng’abamisyonare, abatemburi ab’embaghane, kutse ab’omughulhu wosi. Nibya n’abandi balikyethu erithimba omwa kihugho kyosi babirilhangira bathi omubiiri w’erithulira n’eriyira abigha w’akabya mubiiri mukulhu omwa ngebe yabu yosi. Omw’ikolha ekyo, babiriwathikya abangyi eribya bigha ba Kristo Yesu. Nomwakine indi abathuliri b’omughulhu wosi aba sibalibya n’ebindu bingyi eby’ekinyamubiri, Yehova abiribatsumulha omwa nzira nyingyi. (Mk. 10:29, 30) Thwanzire balikyethu banzwa aba, kandi thutsemire eribya haghuma nabu omwa kithunga!

8. Busana naki obuli muthuliri w’engulhu yuwene ni w’obughuli embere sya Yehova?

⁸ Mbwino baghalha bethu abasombwerwe n’abalikyethu abali omwa mubiiri w’omughulhu wosi basa babawithe omwanya omwa kithunga? Eyihi nahake! Obuli muthuliri w’engulhu yuwene ni w’omughaso embere sya Nyamuhanga n’ekithunga. (Abar. 10:15; 1 Kor. 3:6-9) Kundi nibya, ekighuma ky’okwa bilhubirirwa bikulhu by’ekithunga ly’eriyira abigha b’Omukama wethu Yesu Kristo. (Mt. 28:19, 20; 1 Tim. 2:4) Abosi abali omwa kithunga, ababatizibirwe n’abathuliri abathabatizibirwe,  bakalengaho eriyira omubiiri oyu mwa mukulhu omwa ngebe yabu.—Mt. 24:14.

9. Busana naki thukalhangira bali bethu Abakristayo mwa b’obughuli?

⁹ Yehova akaha bali bethu Abakristayo omwanya w’obughuli omwa kithunga. Akalhangira bali bethu abathahibwa, abamama, abakwakali, n’abali bethu abahuru abakamukolera buthaleghulha mwa b’obughuli. Amasako akabya inianemukania oko bakali balebe abatsemesaya Nyamuhanga. Bakasimawa habw’eky’erileberyako kibuya omw’ikangania amenge, erikirirya, omuhwa, obuthubaha, omubere w’erikokya, n’emibiiri mibuya. (Lk. 8:2, 3; Emib. 16:14, 15; Abar. 16:3, 6; Fil. 4:3; Ebr. 11:11, 31, 35) Thukasima Yehova erithunga omwa bithunga byethu mw’abakali Abakristayo abawithe emibere mibuyanga ng’eyi.

10. Busana naki thukalhangira abakulire mwa b’obughuli?

¹⁰ Kandi thuwithe akaghisa k’eribya ithunawithe abalikyethu bangyi abamabirikulha omo myaka. Omwa bindi bithunga mune balikyethu abakulire ababirikolera Yehova buthaleghulha omwa ngebe yabu yosi. Abandi abakulire banganabya ibaminya ekwenene ya lino-lino. Abangyi b’okwa bakulire aba bawithe ebitsibu by’amaghalha busana n’erikekelhuha. Ebitsibu ebyo byangana leka ibathakolha bingyi omwa kithunga n’omwa mubiiri w’erithulira. Aliwe, abakulire aba bakakolha ebya bangathoka omwa mubiiri w’erithulira, n’erikolesya akaghalha kabu erighumya n’erithendeka abandi! Kandi thukaghasirawa omo bya basi. Omo kwenene ni babuya embere sya Yehova n’embere syethu.—Emi. 16:31.

11-12. Abalere omwa kithunga kyenyu babirikuhimba bathi?

¹¹ Thasyalengekanaya n’okwa balere. Bakabana bitsibu bingyi bakakulira omwa kihugho ekithaberweko na Sitani Diabolo kandi ekyuswire mw’amalengekania wiwe awathuwene. (1 Yn. 5:19) Aliwe, kikathuhimba thukalhangira abalere bakasubirya omwa mihindano, bakasangira omw’ithulira, n’erilhwira buthubaha okwa bya bikirirye. Abalere muwithe omwanya ow’omughaso omwa kithunga kya Yehova!—Esy. 8:2.

 ¹² Aliwe, abandi balikyethu kikanabakalira eriligha ngoku ni b’omughaso omwa kithunga. Ni kyahi ekyanga thuwathikya eriminya ngoku obuli mundu ahabwiwe anawithe omwanya omwa kithunga? Thulebaye.

13-14. Ni kyahi ekyanga leka abandi ibayowa nga si b’obughuli omwa kithunga?

¹³ Thulebaye erisomo eryakabiri eryo thwang’igha omwa ky’erileberyako ekya Paulo akolesaya. Mwakania okwa kitsibu ekya bangyi bawithe munabwire; kikabakalira eriligha ngoku ni b’obughuli omwa kithunga. Paulo mwahandika athi: “Ekisandu kyamabugha kithi, ingye kusangwa sindi byalha, neryo sindi w’omubiri, ekyo sikyangaleka kikathendibya kitsuko ky’omubiri. Kandi okuthu kwamabugha kuthi, kusangwa sindi riso, neryo sindi w’oko mubiri, ekyo sikyangaleka okuthu ikuthabya kitsuko ky’omubiri.” (1 Kor. 12:15, 16) Paulo amanyisayaki?

¹⁴ Wamayilinganisya n’abandi omwa kithunga, iwanganatsuka eriyowa nga siwuli w’obughuli omwa kithunga. Abandi omwa kithunga banganabya ibasi erikangirirya ndeke, abandi ibasi eritheghekania ndeke emyatsi, kutse abandi ibasi ndeke erihimba n’erihumulikania abandi. Obundi iwangana yowa nga siwangabya ng’ibo. Eki kikakanganaya ngoku wuyikehirye. (Fil. 2:3) Aliwe wutholere iwayitheya. Wamabera eriyilinganisya n’abawithe amaaka ng’ayo, iwangana yighunza amani. Nibya iwangana yowa wuthi siwuwithe mwanya wosi-wosi omwa kithunga. Ni kyahi ekyanga kuwathikya erirwanisya eriyowa ng’eryo?

15. Ngoku kiri omwa 1 Abanya Korinto 12:4-11, ni kyahi ekya thutholere ithwaminya okwa bihembo ebyo thuwithe?

¹⁵ Lengekanaya oku kino: Yehova mwathokesya abandi Bakristayo omwa kighana ky’erimbere erikolha ebithiko-thiko erilhabira omwa mulimu abuyirire, aliwe Abakristayo abosi mubathathunga olhuhembo lhughumerera. (Soma 1 Abanya Korinto 12:4-11.) Yehova mwabaha ebihembo n’amaaka muthina-muthina, aliwe obuli Mukristayo abya ini w’obughuli. Munabwire, omulimu abuyirire  syalithuthokesaya erikolha ebithiko-thiko. Nethu munabwire ebya thwangathoka erikolha sibighumerera, aliwe ithwe bosi thuli b’obughuli embere sya Yehova.

16. Ni habulha lyahi ery’omukwenda Paulo erya thwanga ghenderako?

¹⁶ Omwakanya k’eriyilinganisya n’abandi Bakristayo, thutholere ithwaghendera okw’ihabulha ly’omukwenda Paulo lino: “Obuli mundu alenge omubiiri wiwe iyuwene, neryo iniabana eky’eriyihalhambira mugho, butsira eriringiriraniagho n’omubiiri w’owundi mundu.”—Gal. 6:4.

17. Thwanga ghasirwa thuthi thwamaghendera okw’ihabulha lya Paulo?

¹⁷ Thwamaghendera okw’ihabulha lya Paulo n’erilebya ndeke ebya thukakolha, ithwangana tsuka erilhangira ngoku thuwithe ebihembo n’amaaka eby’embaghane. Ng’eky’erileberyako, omusyakulhu anganabya isimukangirirya mubuya omwa mihindano, aliwe iniasi ndeke omubiiri w’eriyira abigha. Kutse anganabya isyasi erithondekania emyatsi yo ndeke ng’abandi basyakulhu omwa kithunga, aliwe iniabya iniasibwe ndeke ngoku ni mulisya oyo kik’olhobera abathuliri erimuhikako erimusaba erihabulha eriseghemere okwa Biblia. Kutse iniabya iniasibwe ng’omundu oyukakokaya. (Ebr. 13:2, 16) Thwamayilhangirira ndeke-ndeke amaaka n’ebihembo ebyo thuwithe, ithukendi minya ekyangaleka ithwatsemera ebyo thwangathoka erikolha omwa kithunga. Kandi ikikendi leka ithuthakwa obuha okwa balikyethu abawithe ebihembo ebiri mbaghane okwa byethu.

18. Thwang’uwania thuthi amaaka wethu?

¹⁸ Mbulha thuwithe mwanyaki omwa kithunga, ithwe bosi thutholere ithwalengaho erithasyuwania ebyo thukakolha n’erikulha-kulhania amaaka wethu. Erithuwathikya eryuwania ebi, Yehova akathuthendeka ndeke erilhabira omwa kithunga kiwe. Ng’eky’erileberyako, okwa mihindano y’omwa kathi-kathi k’eyenga, thukathunga obusondoli ngoku thwangabya bathuliri babuya. Wunemughendera okw’ithendeka eryo?

19. Wangahika wuthi okwa kilhubirirwa ky’erighenda okwa Sukuru y’Abathuliri b’Obwami?

¹⁹ Eyindi nzira eyuwene eya thukathendekerawamo ndeke y’Esukuru y’Abathuliri b’Obwami. Esukuru eyi yikaghendako balikyethu abali omwa mubiiri w’omughulhu wosi kandi abawithe emyaka 23 erihika okwa 65. Iwangana yowa nga siwendisyahika okwa kilhubirirwa eki. Aliwe omwakanya k’erithondogholha ebyangaleka iwuthaghenda kuyo, thondogholha ebyanga leka iwanza erighenda kuyo. Neryo hiraho emitheghekere eyikendileka iwatholera. Busana n’obuwathikya bwa Yehova n’akaghalha ako wukahiraho, iwukendithoka erikolha ekyo wulhue wukalengekania nga siwangathoka.

20. Ebiri omwa Abanya Roma 12:6-8 bikathweghesayaki?

²⁰ Erisomo eryakasathu erya thuk’igha omwa ky’erileberyako ekya Paulo akolesaya liri omu Abanya Roma 12:6-8. (Soma.) Hano kandi Paulo mwakangania ngoku abali omwa kithunga bawithe ebihembo ebithasosene. Aliwe lino akathuhira mw’omuhwa athi thutholere ithwakolesya ekihembo kyosi-kyosi ekya thuwithe erihimba n’erighumya ekithunga.

21-22. Thuk’ighaki oku Robert na Felice?

²¹ Lengekanaya oko kyabya oku mughalha wethu oyo thukendyahulhamo Robert. Abere abirikolera omwa kindi kihugho, mwathumwa okwa Beteli ey’omwa kihugho kyabu. Nomwakine indi balikyethu mubamubwira ngoku embinduka omwa mubiiri wiwe sibugha ambu alemirwe, akabugha athi: “Munaghunza  mezi mangyi inganawithe amalengekania mabi aw’eriyowa ng’angalemirwe. Muhanayira namanza erilhua okwa Beteli.” Mwathasyabana athi etseme? Omusyakulhu mulikyabu mwamubwira athi Yehova akathuthendeka omwa buli lhukwamirwa olhwathwabirikolha nuku thukole ndeke olhwa thuwithe lino. Robert mwaminya ngoku syatholere akabera erilengekania oko bya kera aliwe okwa by’angakolha lino.

²² Mughalha wethu Felice Episcopo mwabana ekitsibu ekiri ng’ekyo. Iyo na mukali wiwe mubaghunza esukuru ye Gileadi omwa 1956 kandi mwakolha omubiiri w’obulebererya bw’omuthimbo e Bolivia. Omwa 1964 mubabutha. Felice akabugha athi: “Mukyathukalira erisighania omubiiri wethu ogho thwanzire kutsibu. Ngaligha ngoku mun’itha omwaka wa bbule ingayilengekaniako. Busana n’obuwathikya bwa Yehova, munahindulha amalengekania waghe n’erilengekania okwa lhukwamirwa lhwaghe olhuhyaka olhw’eribya mubuthi.” Wukanayowa nga Robert kutse nga Felice? Wanabirihwa amani kundi siwukikolha olhusunzo olho wabya wukakolha kera? Kyamabya ikwakiri kithya, iwukendi tsema wamahindulha amalengekania wawu n’erihwerya amenge okwa kya wangakolera Yehova n’abalikyethu lino. Kolesaya ndeke ebihembo n’amaaka ebya wuwithe eriwathikya abandi, neryo iwukendi bana etseme wukahimba ekithunga.

23. Ni kyahi ekya thutholere ithwakolha, kandi thukendi syakania okuki omo mwatsi ow’akakwamako?

²³ Obuli mughuma w’okw’ithwe ni w’obughuli embere sya Yehova. Anzire ithwabya baghuma b’okw’ihiika liwe. Thwamalengaho erighanirya okwa bya thwangakolha erihimba balikyethu n’erilengaho eriberererya olhukwamirwa lhwethu, isithwendi yowa nga sithuwithe mwanya omwa kithunga! Kandi ibbwa emibere thukathwaliramo abandi omwa kithunga? Thwanga kangania thuthi ku thubanzire kandi ku thubasikirye? Omo mwatsi wethu ow’akakwamako, thukendi syakania oko mwatsi mukulhu oyo.