1. Abangyi banemulengaho bathi erikolha bingyi omwa mubiiri wa Yehova?

 THUWITHE mubiiri munene w’erikolha enduli y’omughulhu ono yinemuseghera hakuhi. (Mt. 24:14; Lk. 10:2; 1 Pet. 5:2) Ithwe bosi thwanzire ithwakolera Yehova omwa buswire. Abangyi banemukanyirirya omubiiri wabu w’Obwami. Abandi banzire erikolha obutemburi. Abandi banzire erikolera okwa Beteli kutse erisangira omwa by’obuhimbe. Kandi baghalha bethu bangyi banemusimbirira eritholera erikolha ng’abaghombe abawathikya kutse ng’abasyakulhu b’ekithunga. (1 Tim. 3:1, 8) Yehova atholere eribya iniakatsema akalhangira omuthima w’eriyihayo oyu omwa bandu biwe!​—Esy. 110:3; Isa. 6:8.

2. Thwanga yowa thuthi thwamathendi hika okwa bilhubirirwa byethu birebe eby’obunyakirimu?

² Aliwe ithwanganahwa amani hamalhaba buthuku buuli isithuthahika okwa bilhubirirwa byethu birebe eby’obunyakirimu. Kutse ithwanganahwa amani thwamathendi hebwa esindi nzunzo busana n’erikulha omo myaka kutse busana n’eyindi mibere. (Emi. 13:12) Ekyo ky’ekyabiribya oku Melissa. * Omubiiri we Beteli kutse erighenda okwa Sukuru y’Abathuliri b’Obwami biri okwa muthima wiwe, aliwe akabugha athi: “Nabirikulha omo myaka. Lino okw’ingye, esyonzunzo esyo ni bilhotho buyira. Hakanayira ingahwa amani.”

3. Ni byahi ebya bandi banga kolha nuku batholere erihebwa esindi nzunzo?

³ Abandi abalere kandi abanawithe amaghalha awuwene bangana yithagha eritsuka erikulha n’eribya n’emibere mirebe eritholera erihebwa esindi nzunzo. Okwa lhundi lhuhandi, banganabya ibanawithe amenge, ibanasi erithwamu, kandi ibanawithe omuhwa; okwa lhundi lhuhandi, ibabya  ibakinayithagha eryongera erigha erighumisirizya, eriyithondolya oko mubiiri, kutse eribya n’erisikya. Wamahiraho akaghalha eribya n’emibere eyikayithaghisibawa, iwangana hebwa olhusunzo isiwuyitsulirye nibya. Thalengekania okwa ky’erileberyako kya Nick. Abere ahikya emyaka 20, mwayiponera kundi mubathamusombolha ng’omughombe omuwathikya. Akabugha athi, “Munayowa ingatholere eribya inganawithe ekitsibu.” Aliwe Nick mwathalhuhirira. Mwalholha embere erikolha n’omuhwa esyonzunzo esyo aby’awithe. Lino, akakolha ng’omughuma w’okwa Komiti y’Ekyaghanda ky’Omuthahulha.

4. Thukendikania okuki omo mwatsi ono?

⁴ Mbwino wabiribbunika muthima kundi siwuli wahika okwa kilhubirirwa kirebe eky’obunyakirimu? Kyamabya ikwa kiri kithya, bwira Yehova y’eriyowa lyawu. (Esy. 37:5-7) Eryongera okw’ekyo, saba balikyethu abakulire bunyakirimu amenge awangakuwathikya eryuwania ebya wukakolha omwa mubiiri wa Nyamuhanga, n’erilengaho erighendera kugho. Wamakolha ekyo, iwukendi thunga olhusunzo olho kutse iwahika okwa kilhubirirwa ekyo. Aliwe, nga Melissa oyo thulyakanayako, lino wanganabya isiwangahika okwa lhusunzo olho wanzire. Wukole kyahi ibbwa? Wanga sighalha wuthi iwune n’etseme? Erisubirya ekibulyo ekyo, omwatsi ono akendikania okwa (1) aho wangabana etseme, (2) ngoku wang’ongera etseme yawu, na (3) ebilhubirirwa ebya wangahiraho ebyang’ongera etseme yawu.

5. Ithwe eritsema, ni byahi ebya thutholere ithwahweryako amalengekania? (Omugambuli 6:9)

⁵ Ngoku kiri omwa Omugambuli 6:9 (NWT), thwangana bana etseme thwamasonderyayo omo mwanya owatholere. Erisako eryo lithi: “Kyuwene eritsemera ebyo ameso akalhangira kwilhaba omundu erighanga-ghanga busana n’esyongumbu siwe.” Omundu oyukatsemera “ebyo ameso akalhangira” akatsemera eby’awithe, ng’emibere eyalimu. Aliwe, oyukaghanga-ghanga busana n’esyongumbu siwe akabera erikandira erithunga ekindu ekyo athe angabana. Neryo erisomo ni ryahi? Eribana etseme, thutholere ithwahwerya amalengekania okwa byathuwithe n’okwa byathunakakasirye ku thukendisya bana.

6. Ni musyo wahi owathukaya kanayako, kandi ni kyahi ekya thukendihirako amalengekania?

⁶ Kinathokekene eritsemera ebya wuwithe lino? Abangyi bakalengekanaya bathi sikyangathokekana, kundi thukabya ithunemwanza eriminya ebihyaka. Aliwe okwenene kuli kuthi kithokekene. Thwangana tsemera ndeke ebya thuwithe lino. Ekyo thwangakikolha thuthi? Eriminya ekyo, thulebaye omusyo wa Yesu ow’esyotalanta owali omu Matayo 25:14-30. Thukendihira amalengekania okwa bya musyo oyo angathweghesya okwa mibere thwanga baniramo etseme nibya kandi n’eryongera etseme yethu omwa mibere eya thulimu lino.

7. Omwa bikuhi kanaya okwa musyo wa Yesu ow’esyotalanta.

⁷ Omwa musyo, omulhume abya iniakayaghenda okwa lhughendo. Athali aghenda, mwabirikira abaghombe biwe n’eriha obuli mughuma esyotalanta sy’erikolhamo esuburu. * Omw’ibya inian’ibukire amaaka w’obuli mughombe, omulhume mwaha omughuma y’esyotalanta ithanu, owundi ibiri, n’owundi nguma. Abaghombe babiri mubakolesya ndeke esyotalanta syabu. Aliwe omughombe awakasathu, mwathakolesya esyosente esyo ahebawa, neryo mwabingwa okwa mubiiri w’omukama wiwe.

8. Ni kyahi ekyangalekire omughombe w’erimbere iniatsema?

 ⁸ Omughombe w’erimbere atholere eribya imwayowa ini lhusunzo mukama wiwe erimuha esyotalanta ithano. Esyo syabya sente nene kutsibu, kandi mukyakangania mukama wiwe ng’amuyikethere bungahi! Kandi ibbwa omughombe wakabiri? Anganaponire busana n’erithendihebwa esyotalanta singaha n’esy’ow’erimbere. Aliwe mwakolhaki?

9. Ni kyahi ekya Yesu athabugha okwa mughombe wakabiri? (Matayo 25:22, 23)

⁹ Soma Matayo 25:22, 23. Yesu mwathabugha athi omughombe wakabiri mwahithana kutse erikwa ekinigha habw’erihebwa esyotalanta ibiri nyisa. Kandi Yesu mwathakania okwa mughombe oyo ng’oyukayineghenaya athi: ‘Ebi bisa byawukamba? Naghe nanganathoka ng’omughombe oyulyahebawa esyotalanta ithano! Omukama waghe amabya isyali nyisima, naghe inangana yabisa esyotalanta ibiri esi sy’omwa kithaka neryo inayikolera ebyaghe.’

10. Omughombe wakabiri mwakolesya athi esyotalanta siwe?

¹⁰ Ng’omughombe w’erimbere, omughombe owakabiri nayu mwalhangira olhukwamirwa olho ahebawa mwa lhukulhu kandi mwakolha kutsibu erikolera mukama wiwe. Ekyalhwiririramu mwathundisya esyotalanta ibiri mw’ini. Omughombe oyu mwahembwa kutsibu busana n’omuhwa n’amenge wiwe. Omukama wiwe mwathatsema lisa aliwe kandi mwamw’ongera esindi ngwamirwa!

11. Thwang’ongera thuthi etseme yethu?

¹¹ Kuthya nethu, thwangan’ongera etseme yethu omw’iyihwerya omwa lhusunzo lhwosi-lhwosi  olhwa thukahebawa omwa mubiiri wa Yehova. Yihweraye omwa mubiiri w’erithulira n’erisangira ndeke omwa mibiiri y’ekithunga. (Emib. 18:5; Ebr. 10:24, 25) Ghenda okwa mihindano iwunayitheghekire erisubirya ebikendi himba abandi. Lhangira ekitsweka kyosi-kyosi eky’omwigha ekyo wukahebawa omwa mihindano y’ahakathi-kathi k’eyenga mwa kikulhu. Wamasabwa eriwathikya okwa omubiiri mulebe omwa kithunga, koleragho okwa buthuku kandi ibya muyiketherwa. Isiwalhangira olhusunzo lhwosi-lhwosi olhwa wukahebawa nga lhukalya obuthuku bwawu bwa bbule. Lengaho eryuwania emikolere yawu. (Emi. 22:29) Wukabya wukongera eriyihwerya omwa mibiiri y’obunyakirimu, kwawukananguhirawa wuthya erikulha-kulhana n’etseme yawu iyayongera. (Gal. 6:4) Kandi ikikendi kwolhobera eritsema haghuma n’abandi bakathunga olhusunzo olho wulhue wanzire.​—Abar. 12:15; Gal. 5:26.

12. Ni byahi ebya Bema babiri bakolha eryongera etseme yabu?

¹² Wun’ibukire Melissa, mwali wethu oyuwabya akayisunza erikolera okwa Beteli kutse erighenda okwa Sukuru y’Abathuliri b’Obwami? Nomwakine indi mwathaberererya eriyisunza liwe eryo, akabugha athi: “Ngalengaho eriyihwerya omwa mubiiri waghe w’obutemburi n’erisangira omwa syonzira syosi sy’erithulira. Eki kyabirinyilethera etseme nene.” Kandi ibbwa Nick mwaghumira athi eriyowa nabi ery’erithendi sombolhwa ng’omughombe omuwathikya? “Munahwerya amalengekania waghe okwa syonzunzo esyo nabya nasyo​—erisangira omw’ithulira n’erisubirya ndeke okwa mihindano. N’ekindi, munusulirirya efomu ye Beteli kandi mubanyisubirya omwaka owakwamako.”

13. Ni byahi ebyangabya wamayihwerya omwa lhusunzo olho wuwithe lino? (Omugambuli 2:24)

¹³ Wamayihwerya omwa lhusunzo olho wuwithe lino, iwunemwendi syahebwa esindi nzunzo obuthuku obukasa? Ekyo kyanganabya, ngoku kyanabya oku Nick. Aliwe kyamathendibya, nga Melissa, nawu etseme yawu paka iyikendi yongera, kandi iwayowa buholho busana n’ebya wukakolera Yehova. (Soma Omugambuli 2:24.) Eryongera okw’ekyo, ahathe erithika-thika wukendi bana etseme nene eriminya ngoku akaghalha ako wukahiraho kakatsemesaya Omukama wethu, Yesu Kristo.

14. Bikahika okwa bilhubirirwa byethu by’obunyakirimu, ni kyahi ekya thutholere ithwabya ithun’ibukire?

¹⁴ Mbwino erihwerya amalengekania wethu okwa syonzunzo esyo thuwithe lino kikamanyisaya kithi sithutholere thukasondya esyonzira esy’erikoleramo bingyi omo mubiiri wa Yehova? Kwa bithe bithya! Thutholere ithwahiraho ebilhubirirwa ebyanga thuwathikya eribya bathuliri kandi bakangirirya babuya n’eryongera eriwathikya balikyethu. Thukaghasirawa omughulhu omo menge n’omw’iyikehya thukahweraya amalengekania okw’ikolera abandi omwakanya k’eriyihwerya ghoko.​—Emi. 11:2; Emib. 20:35.

15. Ni bilhubirirwa nga byahi ebyanga kuwathikya eryongera etseme yawu?

¹⁵ Ni bilhubirirwa byahi ebya wanga yihiriraho? Saba Yehova akuwathikaye eriminya ebilhubirirwa ebya wangana thoka erihikako. (Emi. 16:3; Yak. 1:5) Mbwino wangana hika okwa kighuma ky’okwa bilhubirirwa ebiri omwa  nungu y’erimbere omo mwatsi ono​—eribya mutemburi omuwathikya kutse ow’omughulhu wosi, erikolera okwa Beteli, kutse erisangira omwa buhimbe? Kutse obundi iwangana thoka erigha owundi mubughe nuku wuthulhughanaye engulhu yuwene kutse eriyathulira omwa bulhambu bw’ehandi. Wangana minya eky’erikolha omw’ilebya esura 10 ey’ekitabu Organized to Do Jehovah’s Will n’omw’ikania  n’abasyakulhu ab’omwa kithunga kyenyu. * Wukendibya wukalengaho erihika okwa bilhubirirwa ng’ebi, erikulha-kulhana lyawu likendi lhangirika n’etseme yawu iyayongera.

16. Wangakolhaki lino wamabya isiwanga thoka erihika okwa kilhubirirwa kirebe?

¹⁶ Kandi ibbwa lino wamabya isiwanga thoka erihika okwa kighuma ky’okwa bilhubirirwa ebya thwamabirikaniako? Eky’erikolha ly’eriyihiriraho ekindi kilhubirirwa ekya wangana thoka erihikako. Thalengekania okwa bino.

17. Ngoku kiri omu 1 Timoteo 4:13, 15, mughalha wethu angakolhaki eribya mukangirirya mubuya?

¹⁷ Soma 1 Timoteo 4:13, 15. Wamabya iwuli mughalha wethu oyubatizibirwe, iwangana hiraho akaghalha k’eribya mbuyi kandi mukangirirya mubuya. Busana naki? Kundi iwe ‘erikwamirira’ kutse eriyihwerya omw’isoma, erikania, n’erikangirirya ikikendi ghasira abakakuhulikirira. Lengaho eriyihiriraho ekilhubirirwa ky’erigha n’erikolesya obuli mubere w’erikania owali omwa brokyuwa Wuyihire okw’Isoma n’Erikangirirya. Yeghesaye emibere eyi mughuma okwa mughuma, yibegheresaye ndeke iwune eka, kandi lengaho erikangania omubere oyo wukalhabya emikania. Saba amenge okwa muhabuli omuwathikya kutse abasyakulhu “abakakolha kutsibu omo mubiiri w’erithulha engulhu yuwene n’erikangirirya abandu.” * (1 Tim. 5:17) Isiwasubulira okw’ihwerya amalengekania w’okw’isomo lisa aliwe kandi wutholere iwawathikya abahulikiriri bawu erighumya erikirirya lyabu kutse eribahira mw’omuhwa  w’eriyira ekya bakakolha. Omw’ikolha ekyo, iwukendyongera etseme yawu n’eyabu.

18. Ni byahi ebyanga thuwathikya erihika okwa bilhubirirwa omwa mubiiri wethu w’erithulira?

¹⁸ Ithwe bosi thuwithe olhukwamirwa lhw’erithulira n’eriyira abigha. (Mt. 28:19, 20; Abar. 10:14) Wunanzire eryuwania emibere yawu y’erikangirirya omwa mubiiri mukulhu oyu? Wukayeghesya ebrokyuwa Erikangirirya, yihirireho ebilhubirirwa birebe ebyanga kuwathikya erighendera okwa bya wuk’ighamo. Wangana bana awandi menge omwa Katabu k’Omuhindano ak’Engebe Yethu n’Omubiiri Wethu n’omwa syovidiyo esya ebya thwanga bugha esikakanganibawa omwa mihindano ey’ahakathi-kathi k’eyenga. Lengesaya amenge muthina-muthina eriminya awakendi kolha ndeke omwa bulhambu bwenyu. Wamaghendera okwa menge aya, ahathe erithika-thika iwukendi bana etseme nene ey’eribya muthuliri mubuya.​—2 Tim. 4:5.

19. Wanga kulha-kulhania wuthi emibere y’Ekikristayo?

¹⁹ Wukalebya ebilhubirirwa ebya wanga yihiriraho, isiwagheghena ekighuma ky’okwa bindu bikulhu​—erikulha-kulhania emibere y’Ekikristayo. (Gal. 5:22, 23; Kol. 3:12; 2 Pet. 1:5-8) Wanga kikolha wuthi? Ng’eky’erileberyako, thubughe thuthi wukanza eryongera erighumya erikirirya lyawu. Iwangana soma emyatsi omwa bitabu byethu eyikaha amenge awanga ghumya erikirirya lyawu. Iwangana ghasirwa omw’ilebya ehitsweka hye JW Broadcasting^® ehikakanganaya ngoku balikyethu babirikangania erikirirya erighumire bakabana ebitsibu muthina-muthina. Neryo lebaya esyonzira esya wanga gherereryamu erikirirya lyabu omo ngebe yawu.

20. Thwangongera thuthi etseme yethu n’erikehya eriyiponera?

²⁰ Ahathe erithika-thika ithwe bosi thwanzire ithwongera erikolera Yehova ya bingyi kwilhaba ku thukakolha lino. Omwa kihugho kihya-kihya kya Nyamuhanga, thukendi syathoka erimukolera omo buswire. Thunalindirire ekyo, thwamakolha n’omuhwa ekyosi-kyosi ekyo thukakolha lino, ithwanganongera etseme yethu kandi ithwakehya eriyowa lyosi-lyosi ery’eriyiponera. Kandi n’ekikulhu kutsibu, ithukendiha Yehova, ‘Nyamuhanga wethu oyutsemire’ y’olhukengerwa n’eripipa. (1 Tim. 1:11, NWT) Kwesi ka thubane etseme omo syonzunzo esyo thuwithe!