1-2. Omo mwatsi ono thukendi kania okuki?

WANGA yowa wuthi munywani wawu oyutholere erikulethera ekindu ekya wukayithagha kutsibu amathendi hikira okwa buthuku obwa wumulindirireko? Iwunemwendi yiponera? Iwangana yowa ngoku Emisyo 13:12 hakabugha: “Amaha awakalindirirawa akaleka omuthima iniasimba.” Kandi ibbwa wamaminya ngoku hane esyonzumwa mbuya esyalekire munywani wawu oyo iniathahikira oko ndambi eya wumulindirireko? Aho iwukendi yithagha erighumisirizya n’erilinda.

² Omo mwatsi ono, thukendi lebya emisingyi mirebe ye Biblia eyanga thuwathikya eribya ithune n’omubere ‘w’erilinda.’ (Mika 7:7) Neryo thukendi lebya esyonzira ibiri esya thutholere ithwalindiramo Yehova eriyira ekyo akakolha ithunaghumisirizirye. Erighunzerera, thukendi lebya emighisa eya Yehova akalhaghanisaya abayitheghekire erimulinda.

3. Omusingyi owali omwa Emisyo 13:11 akakanganayaki?

³ Eky’erileberyako ekikakanganaya ekiyithawa ky’erighumisirizya kine omwa Emisyo 13:11. Hakabugha hathi: ‘Obusoki obukabanika omo lithya-lithya [lhuba-lhuba] bwasyakehibwa; nikwa oyukakuma-kumabo n’ebyalha asyabana erikanya.’ Wanamalhangiramo omusingyi? Ow’amenge akakolha ebindu omw’ighumisirizya, kandi omw’iyithondolya.

4. Omusingyi owali omwa Emisyo 4:18 akakanganayaki?

⁴ Emisyo 4:18 hakathubwira hathi “enzira y’abathunganene yiri ng’ekyakakalha ky’omw’itsange, ekikakoleraya n’erikanya erihika oko kiro kiyima-yima.” Ebinywe ebi bikakanganaya ndeke-ndeke enzira eya Yehova akabisuliramo lyolho-lyolho  ekighendererwa kiwe okwa bandu biwe. Aliwe kandi, omulhondo oyo angana kolesibwa okwa mibere Omukristayo akakulha-kulhaniramu bunyakirimu omo ngebe yiwe. Erikulha-kulhana bunyakirimu siry’eriharabanira. Likathwalha buthuku. Thwamayeghesya ndeke kandi thukaghendera okw’ihabulha eryathukabana omo Kinywe kya Nyamuhanga n’omwa kithunga kiwe, lyolho-lyolho ithukendibya n’emibere eyiri ng’eya Kristo. Kandi eki ikikendi leka ithwongera eriminya Nyamuhanga ya ndeke. Thulebaye eky’erileberyako ekya Yesu aha ekikakanganaya enzumwa eyo.

5. Ni ky’erileberyako kyahi ekya Yesu aha ekihambire okw’ikulha lyolho-lyolho?

⁵ Yesu mwakolesya eky’erileberyako ekikakanganaya ngoku omwatsi w’Obwami owathukathulha ali nga kaghuma kake kutsibu akakakulha lyolho-lyolho omwa b’emithima myolho. Mwabugha athi: “Esyombutho esyo sikalhasa n’erikulha. Nikwa [omubibi] syasi nga sikakulha sithi. Ekithaka kikaleka . . . iyalhasa n’eryera. Erimbere emighera yikahulhuka, enyuma waho yikasoholha, n’enyuma waho amakundi aw’erire.” (Mk. 4:27, 28) Yesu amanyisayaki? Abya iniakasoborera athi ngoku ekirimwa kikanakulha lyolho-lyolho, n’omundu oyukaligha omwatsi w’Obwami kwakanakulha-kulhana athya lyolho-lyolho bunyakirimu. Ng’eky’erileberyako, abigha bethu be Biblia bakabya bakayithunda hakuhi na Yehova, thukatsukiraho erilhangira esyombinduka nyingyi esyuwene esyo bakakolha. (Efe. 4:22-24) Aliwe thutholere ithw’ibuka ngoku Yehova yukaleka akaghuma kake ako ikalhasa.​—1 Kor. 3:7.

6-7. Thuk’ighaki okwa mibere Yehova ahangikiramo ekihugho?

⁶ Omwa byosi ebya Yehova akakolha, omw’ighumisirizya akaghunza obuthuku obukayithaghisibawa okwa mubiiri wiwe eribughagho. Akakolha ekyo busana n’eriha erina liwe ly’olhukengerwa kandi busana n’erighasira abandi. Ng’eky’erileberyako, thalengekania okwa mibere Yehova atheghekanirayamu lyolho-lyolho ekihugho busana n’abandu.

⁷ E Biblia yikabya yikasoborera ngoku Yehova  ahangika ekihugho, yikakanaya okwa mibere ahiraho “olhulengo,” athakulha “ebibanza,” n’erihiraho “eribwe ly’engonde.” (Yobu 38:5, 6) Nibya mwahiraho obuthuku bw’erighanirya okwa mibiiri yiwe. (Enz. 1:10, 12) Mbwino wangana thera akasasani abamalaika nga mubayowa bathi bakalhangira ebya Yehova ahangika bikaghenda bikabyaho lyolho-lyolho? Ka bangabya imubabunyahirwa! Kundi endambi muyahika bamatsuka ‘eryutha obwogho busana n’obutseme.’ (Yobu 38:7) Thuk’ighaki? Ebya Yehova ahangika mubyaghunza esyongumi sy’emyaka erihwa, aliwe Yehova abere akalebya ndeke ebyosi eby’abirihangika omw’iyithondolya, mwabugha athi ‘byowene kutsibu.’​—Enz. 1:31.

8. Lino thukayakanaya okuki?

⁸ Ngoku thwamalhangira omwa by’erileberyako ebiri ahighulhu, thwangana bana emisingyi mingyi omwa Kinywe kya Nyamuhanga eyikakanganaya ku thutholere erighumisirizya. Lino thulebaye esyonzira ibiri esya thutholere ithwabya ithunayitheghekiremo erilinda Yehova.

9. Ni nzira yahi nguma eya thukayithaghiramo erilinda Yehova?

⁹ Thwangana yithagha erilinda Yehova erisubirya emisabe yethu. Omughulhu thukasaba akaghalha k’erighumira ekitsibu kutse obuwathikya bw’erisingura obulemwa bulebe, ithwangana yowa erisaba lyethu nga siryathasubwamo lhuba. Busana naki Yehova syali subiraya emisabe yethu eyosi aho naho?

10. Busana naki erighumisirizya likayithaghisibawa bikahika okwa misabe yethu?

¹⁰ Yehova akahulikirira ndeke emisabe yethu. (Esy. 65:2) Emisabe yethu eyikalhua okwa muthima akalhangirayo ng’eyikakanganaya erikirirya lyethu. (Ebr. 11:6) Yehova kandi anzire inialhangira ku thukathwamu erikolha erikwamana n’emisabe yethu n’erikolha erisonda liwe. (1 Yn. 3:22) Neryo thwangana yithagha erighumisirizya n’erikolha erikwamana n’emisabe yethu thukalengaho erirwanisya omutse mubi kutse obulemwa bwethu. Yesu mwathuwathikya eriminya ngoku eyindi misabe yethu yangana ghana erisubwamo aho n’aho. Mwabugha athi: “Mubulhaye, mwasyahabwakyo; musonda-sondaye, neryo mwasyabanakyo; mukongothe oko lhuyi, neryo mwasyakyungulirwalho. Kusangwa oyukabulhaya, asyangirirakyo; n’oyukasonda-sonda, akabanakyo; n’olhuyi lhwasyakyungukalha oko oyukakongotha oko lhuyi.” (Mt. 7:7, 8) Thukabya thukaghendera okw’ihabulha eri ‘n’eriyihira okw’isaba,’ thukayikethera ngoku Thatha wethu w’elhubulha akowa emisabe yethu n’erisubiryayo.​—Kol. 4:2.

11. Ebiri omu 1 Petero 5:6 bikathuwathikaya bithi omusabe wethu amabya nga syathasubwamo lhuba?

¹¹ Nomwakine indi emisabe yethu yanganabya nga siyithasubwamo lhuba, Yehova akalhaghanisaya erisubiryayo “oko mughulhu atholere.” (Soma 1 Petero 5:6.) Ky’ekikaleka ithwabya isithutholere eritsweba Yehova ekindu kyamathendibya lhuba ngoku thwanzire. Ng’eky’erileberyako, abandu bangyi babirisaba ahabw’emyaka erianza erilhangira Obwami bwa Nyamuhanga bukaghunzaho omughulhu mubi ono. Nibya Yesu mwabugha athi thutholere ithwahira eki ky’omwa misabe. (Mt. 6:10) Aliwe ikikendibya ky’obukiru omundu amalighira erikirirya liwe omu Nyamuhanga eritseka kundi enduli siyithasira okwa buthuku obo abandu balengekenie! (Hab. 2:3; Mt. 24:44) Thukakanganaya amenge thukalholha embere erilinda Yehova n’erimusaba ithun’ikirirye. Enduli yikendi syasira oko ndambi eyonyine-nyine, kundi Yehova abirisombolha ‘ekiro  kutse esaha’ eyo yikendi syasiramo. Kandi ekiro ekyo bukendisyabya ibw’obuthuku obutholere okw’ithwe bosi.​—Mt. 24:36; 2 Pet. 3:15.

12. Ni mughulhu wahi erighumisirizya lyethu lyanga lengwako?

¹² Thwangana yithagha erilinda omw’ighumisirizya thukakolhwa nabi. Mughulhu mungyi abandu omwa kihugho kino bakakolha nabi abathe b’olhubutho ng’olhwabu, ab’eyindi rangyi, omubughe, kutse erihanga. Abandi bakakolhawa nabi busana n’eribya ibawithe obulema okwa mubiri kutse omo bwongo. Abangyi b’okwa bandu ba Yehova babirighumira obuthe bulingirirania busana n’esyonyikirirya syabu esiseghemere okwa Biblia. Thwamakolhwa nabi omo nzira ng’esyo, thutholere ithwabya ithun’ibukire ebinywe bya Yesu. Mwabugha athi: “Omundu oyo wasyayiyinia erihika okwa nduli yo wasyalhamibwa.” (Mt. 24:13) Aliwe ibbwa wanga kolhaki wamaminya ngoku omundu mulebe omwa kithunga abirikolha erilholho erikalire? Abasyakulhu ibakendibya babiribwirwa omwatsi oyo, iwunemwendi balekeragho, omw’ighumisirizya iwalinda ibo erikolha kugho omo nzira ya Yehova? Ni byahi ebyangabya ibikayithaghisibawa oko mwatsi ng’oyu?

13. Ni byahi ebikayithaghisibawa erikania oko lhubanza omo nzira ya Yehova?

¹³ Abasyakulhu bakabya bakaminya ngoku omundu mulebe omo kithunga abirikolha erilholho erikalire, omw’isaba bakasondekanaya “amenge awakalhua endatha” nuku babane amalengekania wa Yehova oko mwatsi oyo. (Yak. 3:17) Ekilhubirirwa kyabu ly’eriwathikya omukolha-nabi oyo “erimulhusya okw’ithalha liwe.” (Yak. 5:19, 20) Kandi banzire erikolha ekyosi-kyosi ekya banga thoka eritheya ekithunga n’erihumulikania ababirihambwako. (2 Kor. 1:3, 4) Bakakania n’omundu oyuwabirikolha erilholho, abasyakulhu batholere ibatsuka eribana okwenene okwosi, ekindu ekyangana thwalha buthuku. Neryo omw’isaba kandi ibanayitheghirye bakaha erihabulha eriseghemere oko Masako n’erihengulha omukolha-nabi “omo libanza lithunganene.” (Yer. 30:11) Nomwakine indi sibali lindiriraya, abasyakulhu sibali harabanira eritswera. Omwatsi amakanibwako ndeke, ekithunga kyosi kikaghasirawa. Aliwe abasyakulhu nomubangakania oko mwatsi omo nzira eyitholere, oyutheko olhubanza angana sighalha inianayowire nabi. Nawu wamabya in’iwe, iwukendi kolhaki erikehya obulhumi?

14. Ni ky’erileberyako kyahi ekye Biblia ekyanga kuwathikya erighuma Omukristayo mulikyenyu amabya iniabirikukolha nabi kutsibu?

 ¹⁴ Omundu ane athakukolha nabi kutsibu, obundi nibya omuramya mulikyenyu? Wangana bana eby’erileberyako ebyuwene omo Kinywe kya Nyamuhanga ebikathukangiriraya ngoku thwanga linda Yehova erilhungulha emyatsi. Ng’eky’erileberyako, nomwakine indi baghalha bobu Yozefu mubamukolha nabi, mwathalighira ebisobyo byabu bikaleka akabya mundu oyuhithene lhughumerere. Omwakanya k’ekyo, mwahwerya amalengekania okwa mubiiri wa Yehova oyuwamutsumulha busana n’eriyiyinia n’erighumisirizya. (Enz. 39:21) Endambi yabere yinemulhaba, Yozefu mwathoka erikyurukya erikolhwa nabi eryo ly’ameso, amathoka erilhangira ngoku Yehova abirimutsumulha. (Enz. 45:5) Nga Yozefu, thukahumulikanibawa thukayithunda hakuhi na Yehova n’erimulinda erihiraho obulingirirania.​—Esy. 7:17; 73:28.

15. Ni kyahi ekyawathikaya mwali wethu erikyurukya ameso erikolhwa nabi eryo abana?

¹⁵ Sibugha ambu erikolhwa nabi eryosi likalire ng’erya Yozefu abana, aliwe erikolhwa nabi lyosi-lyosi lyangana leka ithwayowa nabi. Omundu mulebe amathusoberya, nibya n’oyutheramaya Yehova, ithwangana ghasirwa thwamaghendera okwa misingyi ye Biblia. (Fil. 2:3, 4) Thulebaye ekyalholirweko kighuma. Mwali wethu mwayowa nabi kutsibu akaminya ngoku oyo bakakolha nayu akabwira abandi b’amabehi okw’iyo. Omwakanya k’erithwamu lhuba-lhuba, mwali wethu mwaghanirya okwa ky’erileberyako kya Yesu. Omughulhu abandi bamutsuma, mwathabatsuma. (1 Pet. 2:21, 23) An’ibukire ekyo, mwali wethu mwathwamu erithendi lhanda oko kyamubereko. Enyuma waho, mwali wethu mwaminya ngoku oyo bakakolha nayu alhue alhwere obulhwere obukalire kandi kwalhue awithe ebirengekanio binene. Mwali wethu mwaghunzerera athi oyo bakakolha nayu angabya isyamanyisaya ebyo abugha. Neryo mwali wethu mwatsema kundi omw’ighumisirizya mwaghumira erikolhwa nabi, kandi mwabana obuholho.

16. Ni kyahi ekyanga kuhumulikania wamabya iwune muyiyinirya obuthe bulingirirania? (1 Petero 3:12)

¹⁶ Wamabya iwunemughumira obuthe bulingirirania kutse ekindi ekikaleka iwayowa nabi, wibuke ngoku Yehova akayithunda hakuhi  ‘n’ab’emithima ibbunangikire.’ (Esy. 34:18) Akwanzire busana n’erighumisirizya lyawu kandi busana n’erimughusira amalighe wawu. (Esy. 55:22) Iyo ya Mutsweri w’ekihugho kyosi. Akabya inianalhangire ebyosi ebikabya. (Soma 1 Petero 3:12.) Wamabya iwune omwa bitsibu ebya wuthe wangaghunzaho, wunayitheghekire erilinda Yehova?

17. Ngoku kiri omu Isaya 30:18, ni kakasya lyahi erya Yehova akathuha?

¹⁷ Thatha wethu w’elhubulha akisiya iniathutsumulha ndeke erilhabira omo Bwami bwiwe. Isaya 30:18 hathi: “Omwami Mukulhu akasonda eribaghanyira. Kandi busana n’ekyo akalinda endatha iniabakwira olhukogho. Kusangwa Omwami Mukulhu ni Nyamuhanga w’eribanza lithunganene. Omughisa ali oko bosi abakamukwa olhukando.” Abakalinda Yehova bakendi bana emighisa mingyi lino n’omwa kihugho kihya-kihya ekikasa.

18. Ni mighisa yahi eya thulindirire?

¹⁸ Abandu ba Nyamuhanga bakendi syabya babiringira omo Kihugho kihya-kihya, sibendi sasyaghumira amaghaniryo n’ebitsibu ebyo bakabana munabwire. Obuthe bulingirirania n’obulhumi bikendi syabya isibikiriho. (Erib. 21:4) Ebya thukayithagha sithwendi syabilinda ithune muhangya-hangya kundi bikendi syabya ibineho omo bungyi. (Esy. 72:16; Isa. 54:13) Oyo ka akendi syabya mughisa munene!

19. Lino Yehova anemuthuthegheka lyolho-lyolho busana n’ekyahi?

¹⁹ Yehova anemuthuthegheka lino erisyabya ahisi sy’obuthabali bwiwe omw’ithuwathikya erileka emitse mibi n’eribya n’emibere eyikamutsemesaya. Si wubbunike muthima, kandi siwulhuhirire. Ebibuya binemwasa! Thunemulindirira ebibuya ebikasa, kisi thulhole embere eribya ithunayitheghekire erilinda Yehova omw’ighumisirizya akaghunzerera omubiiri wiwe!