1. Ni bibuya byahi ebyo abalere bangyi babirithakolha?

 OBULI mwaka, esyongumi sy’Abakristayo abalere bakabatizibawa. Wune wakolha ekiika eki? Wamabya iwabirikikolha, balikyenyu ab’obunyakirimu bakatsema busana nawu, na Yehova kuthya! (Emi. 27:11) Thalengekania hake okwa bya wamabirithakolha. Wabir’igha e Biblia n’omuhwa munene, obundi ahabw’emyaka nga y’eyo. Ebya wabir’igha byabirileka iwaligha ngoku e Biblia ni Kinywe kya Nyamuhanga. Aliwe ekikulhu kutsibu, wabiriminya n’erianza Omwinye ekitabu kibuyirire ekyo. Olhwanzo olhwa wuwithire Yehova lhwabiryongera erihika okw’ibya lino iwuli mughuma w’okwa baghombe biwe abayihereyo, ababatizibirwe. Ekyo ka ni kindu ekyuwene ekyo wabirikolha!

2. Thukendi kania okuki omo mwatsi ono?

 ² Ahathe erithika-thika, erikirirya lyawu mulyalengwako omwa nzira nyingyi wukakulha-kulhana erihika okw’ibatizibwa. Aliwe wukendibya wunemukulha, wukendi bana ebindi bitsibu. Sitani akendianza eritsekya olhwanzo olho wuwithire Yehova n’erikulemesya erimukolera. (Efe. 4:14) Isiwalighira nahake ekyo eribya. Ni byahi ebyanga kuwathikya erisighalha muthaleghulha oku Yehova n’eriberererya eriyilhagha lyawu ly’eriyihayo? Wutholere iwalholha embere erikulha-kulhana​—erihika okw’ibya Mukristayo oyukulire bunyakirimu. (Ebr. 6:1) Aliwe ekyo wanga kikolha wuthi?

3. Ni kulha-kulhana lyahi eryo Abakristayo abosi batholere ibakolha enyuma w’eribatizibwa?

³ Enyuma w’eribatizibwa, ithwe bosi thutholere ithwaghendera  okw’ihabulha eryo mukwenda Paulo aha abikirirya balikyabo abe Efeso. Mwabahira mw’omuhwa w’eribya Bakristayo abakulire ndeke bunyakirimu. (Efe. 4:13) Eyo ni yindi nzira ey’eribugha wuthi, ‘Lholha embere erikulha-kulhana.’ Thwangana yitheghererya ekya Paulo amanyisaya akalinganisya erikulha bunyakirimu n’erikulha kinyamubiri ery’omwana. Omwana akabya akabuthwa akatsemesaya ababuthi biwe kandi ibamuyisyethera. Aliwe syalibya inina mwana erihika kera. Endambi yikahika, inialeka “emyatsi y’obwana.” (1 Kor. 13:11) Kwabine bithya n’okwa Bakristayo. Enyuma w’eribatizibwa, thutholere ithwalholha embere erikulha-kulhana. Thulebaye amenge malebe awakendi thuwathikya erikolha ekyo.

4. Ni mubere wahi owanga kuwathikya erikulha bunyakirimu? Soborera. (Abanya Filipi 1:9)

⁴ Ongera olhwanzo olhwa wuwithire Yehova. Wunanzire Yehova ya kutsibu. Aliwe olhwanzo olhwa wumuwithire lhwangan’ongera. Lhuthi? Omukwenda Paulo akakanganaya enzira nguma, ngoku kiri omwa Abanya Filipi 1:9. (Soma.) Paulo mwasaba athi olhwanzo lhw’Abanya Filipi “lhukanyirire kutsibu.” Kwesi thwangan’ongera olhwanzo lhwethu. Thwangana kolha ekyo omw’ithunga “amenge n’eriminya.” Thukabya thukongera eriminya Yehova, kwa thukan’ongera thuthya erimwanza n’erisima emibere yiwe n’enzira eyo akakoleramo emyatsi. Thukongera erianza kutsibu erimutsemesya, isithwanzire erikolha ekyosi-kyosi ekyanga muponesya. Thukalengaho eriminya erisonda liwe nga ni ryahi kandi ngoku thwanga likolha.

5-6. Thwang’ongera thuthi olhwanzo olho thuwithire Yehova? Soborera.

⁵ Thwangan’ongera olhwanzo olhwa thuwithire Yehova omw’iminya ndeke Mughalha wiwe, oyukakanganaya ndeke-ndeke emibere ya Thatha wiwe. (Ebr. 1:3) Enzira eyuwene eyo thwanga minyiramu Yesu ly’erigha emyatsi eyiri omwa bitabu bbini eby’Enjiri. Wamabya isiwuli wabya n’endegheka eyuwene ey’erisoma e Biblia buli kiro, busana naki iwuthatsuka lino? Wukasoma oko myatsi eyihambire oku Yesu, lengekanaya ndeke okwa mibere yiwe. Ikyolhobire erimuhikira; omo lhwanzo iniak’angirira abaana. (Mk. 10:13-16) Iniakaleka abigha biwe ibayowa buholho; ibakayowa bwiranda erimubwira amalengekania wabu. (Mt. 16:22) Omwa nzira eyi, Yesu mwagherererya Thatha wiwe w’elhubulha. Na Yehova nayu kyolhobire erimuhikira. Thwangana muhikira omwa musabe. Omughulhu thukasaba, thwangana mubwira ebyosi ebiri okwa muthima. Thukabya ithunayikethere ngoku syendi thutsweba. Athwanzire; athutsomene.​—1 Pet. 5:7.

⁶ Yesu mwakwira abandu b’obulighe. Omukwenda Matayo mwahandika athi: “Yesu abere alhangira esyondeko, mwakwira sy’obulighe, kusangwa mubaghalhwa n’erilhuha ng’esyombuli sithawithe mulisya.” (Mt. 9:36) Na Yehova nayu akayowa athi? Yesu mwabugha athi: “Thatha waghe oyuli elhubulha syanzire omughuma w’okwa baana balere aba akahera.” (Mt. 18:14) Ekyo ka kikahumulikanaya! Thukabya thukongera eriminya Yesu ya ndeke, olhwanzo olho thuwithire Yehova lhukongera.

7. Eribya haghuma n’Abakristayo abakulire bunyakirimu kyanga kuwathikya kithi?

⁷ Kandi wangan’ongera erianza Yehova n’erilholha embere eribya Mukristayo oyukulire bunyakirimu omw’iminya balikyethu abakulire bunyakirimu abali omwa kithunga kyenyu. Thungerera etseme eyo bawithe. Sibali yikubayabwomo busana n’erithwamu lyabu ery’erikolera Yehova. Basabe wuthi bakubwire ebighuma by’okwa byabalholireko omwa mubiiri wa Yehova. Wamabya w’erikolha erithwamu likulhu, basabe amenge. Kundi  nibya, “omo bungyi bw’abahani hali buholho.”​—Emi. 11:14.

8. Wanga kolhaki wamabya iwanathika-thikire ebya e Biblia yikabugha?

⁸ Rwanisaya erithika-thika lyawu. Ngoku kiri omo  nungu eya 2, Sitani akendi lengaho erianza erikulemesya erilholha embere erikulha-kulhana bunyakirimu. Enzira nguma eyo angakoleramo ekyo ly’erikuhira mw’erithika-thikira esyongangirirya ndebe sye Biblia. Ng’eky’erileberyako, endambi iyahika iwowa oko mwatsi owathesikaya Nyamuhanga ow’ebindu eriyibuthukira. Wangabya imuwathalengekania oko mwatsi oyu iwukine mulere, aliwe kundi lino wamabirikulha, obundi iwakangiriribwagho okwa sukuru. Ebyo abasomesya bakabugha ebikasighika omwatsi w’ebindu eriyibuthukira byanganabya nga ni by’amenge kandi ebyangaliwa. Aliwe, bangabya isibali bathalengekania ndeke oko bwema obukakanganaya ngoku hane Omuhangiki. Ibuka omusingyi owali omwa Emisyo 18:17, hathi: “Oyukatsuka erithonda akabya ng’athunganene; nikwa omulikyabu akasa n’erimusonda-sonda.” Omwakanya k’eriligha kitura muthwe emyatsi eya wukowa okwa sukuru nga ni kwenene, yithendaye oko kwenene eyiri omwa Kinywe kya Nyamuhanga, e Biblia. Sekulhaya omwa bitabu byethu. Kanaya n’abalikyethu ababya bikirirye kera omwatsi w’ebindu eriyibuthukira. Babulhaye ebyaleka ibaligha ngoku hane Omuhangiki oyuthwanzire. Erikanirania erikahimba ng’eryo lyangana kuwathikya erihira amalengekania w’okwa kwenene.

9. Ekyalholirweko kya Melissa kikakweghesayaki?

⁹ Mwali wethu oyukahulhawamo Melissa mwaghasirwa kutsibu omw’isekulya eryo akolha erihambire okw’ihangika. * Akabugha athi: “Okwa sukuru, omwatsi w’ebindu eriyibuthukira akakanibawako omwa nzira eyikaleka iniabya ngahikire. Okw’itsuka, munathanza erisekulya, kundi munasagha indi nangana bumbura emyatsi eyanga leka ingalengekania indi omwatsi w’ebindu eriyibuthukira ahikire. Aliwe munalengekania ngoku Yehova syanzire thukamukolera kitura muthwe. Neryo munatsukiraho erisekulya. Munasoma ekitabu Is There a Creator Who Cares About You? n’ebrokyuwa Was Life Created? n’eya The Origin of Life​—Five Questions Worth Asking. Ekyo kyo nabya ngayithagha. Kunanathakolha ekyo kyalhuba.”

10-11. Ni byahi ebyanga kuwathikya erisighalha iwunahenirye omwa by’esyongeso? (1 Abanya Tesalonika 4:3, 4)

 ¹⁰ Ghana emitse mibi. Omwa kanyethu kabehi, esyongumbu sy’emyatsi y’engyingo syangana yongera, kandi wangana yithagha erirwanisya akahathikano k’erikolha obusingiri. Sitani anzire iwaghendera okwa syongumbu syawu. Ni kyahi ekyanga kuwathikya erisighalha iwunahenirye omwa by’esyongeso? (Soma 1 Abanya Tesalonika 4:3, 4.) * Omwa misabe yawu, bwira Yehova y’eriyowa lyawu kandi mubwire wuthi akuhe akaghalha. (Mt. 6:13) Wibuke ngoku Yehova anzire erikuwathikya, butsira erikutsweba. (Esy. 103:13, 14) Kandi wangana sondya obuwathikya omwa Kinywe kya Nyamuhanga. Melissa, oyo thulyakanayako, mwahiraho akaghalha kanene erirwanisya amalengekania aw’eby’obutswatswa. Akabugha athi: “Erisoma e Biblia buli kiro mukyanyiwathikya erithendi lhuhirira. Muyanyibukya ngoku ngali wa Yehova kandi ngoku ngamuyithagha omwa ngebe yaghe.”​—Esy. 119:9.

¹¹ Isiwalengaho eriyighunzira ebitsibu byawu. Bwira ababuthi bawu okwa bya wunemulhabamu. Ni kwenene, si kyolho erikania oko myatsi ng’eyo eyikuhambireko, aliwe ni kikulhu erikolha ekyo. Melissa akabugha athi: “Munasaba Yehova y’obuthubaha kandi munakania na thatha waghe oko kitsibu kyaghe. Nabere nabirikolha ekyo, munahumulikana. Munaminya ngoku Yehova akanyiyisyethera.”

12. Wanga thwamu wuthi ndeke?

¹² Leka emisingyi ye Biblia yikusondole. Wukendibya wunemukulha, wukendyongera eribya n’obwiranda bw’eriyithwiramu. Aliwe ebya wasi bikine bike. Wanga yihighulha wuthi okw’ikolha ekisobyo ekyanga hamba okwa bunywani bwawu na Yehova? (Emi. 22:3) Mwali wethu oyukahulhawamo Kari akasoborera ebya muwathikaya erithwamu ndeke. Mwaminya ngoku Abakristayo abakulire bunyakirimu sibali yithagha ebilhaghiro omwa buli mwatsi. Akabugha athi: “Munayithagha eriyitheghererya emisingyi ye Biblia omwakanya k’ebilhaghiro.” Wukasoma e Biblia, yibulhaye: ‘Omwatsi oyu akanyibwiraki oko malengekania wa Yehova? Mbwino mune emisingyi eyo nangakolesya erinyisondolha? Yamabya iyinemo, ngendi ghasirwa indi namakolesyayo?’ (Esy. 19:7; Isa. 48:17, 18) Omw’isoma e Biblia n’erighanirya okwa misingyi eyirimo, ikikendi kwolhobera erithwamu ebikatsemesaya Yehova. Wukendibya wunemulholha embere erikulha-kulhana, wukendi lhangira ngoku siwuli yithagha ebilhaghiro omwa buli mwatsi kundi wukendi yitheghererya amalengekania wa Yehova oko myatsi.

13. Abanywani abuwene banga kuhambako bathi? (Emisyo 13:20)

¹³ Sombolha abanywani abanzire Yehova. Ngoku kyabirikanibwako, abanywani abo wukasombolha bakahamba kutsibu okw’ikulha-kulhana lyawu ng’Omukristayo. (Soma Emisyo 13:20.) Mwali wethu oyukahulhawamo Sara abya iniali kubulha etseme. Neryo muhabya ekindu ekya muwathikaya erihindulha amalengekania wiwe. Sara akabugha athi: “Munabana abanywani abuwene okwa buthuku obutholere. Ingye na dada omulere ithukathegheka Akaleberyo ka haghuma obuli wiki. Owundi munywani waghe mwangwathikya eritsuka erisubirya okwa mihindano. Busana n’obuwathikya bw’abanywani baghe, munatsuka erilhangira eriyeghesya n’erisaba mwa bindu bikulhu. Munatsuka erithunga obughuma obughumire na Yehova, kandi namathasyabana etseme.”

14. Julien mwabana athi abanywani abuwene?

 ¹⁴ Wanga bana wuthi abanywani abakendi kuhambako ndeke? Julien, oyo lino ni musyakulhu w’ekithunga, akabugha athi: “Ingakine mulere, munabana abanywani abuwene omw’isangira omw’ithulira. Abanywani abo babya bawithe omuhwa, kandi mubangwathikya erilhangira ngoku erithulira lyangana tsemesya. Munatsuka erikolha omubiiri w’omughulhu wosi mwa kilhubirirwa kyaghe. Kandi munaminya ngoku ngalhue ingayithalya okwa bunywani obuwene omw’ikwama kyabya n’abanywani ab’emyaka yaghe basa. Enyuma waho, munabana abanywani abuwene okwa Beteli. Eky’erileberyako kyabu mukyangwathikya erisombolha eby’eriyitsemesya ebyuwene, kandi eki kyabirinyithunda hakuhi na Yehova.”

15. Ni kunga lyahi erihambire okwa banywani eryo Paulo aha Timoteo? (2 Timoteo 2:20-22)

¹⁵ Kandi ibbwa wamaminya ngoku omundu omwa kithunga si munywani mubuya? Paulo mwaminya ngoku abandi omwa kithunga ky’Ekikristayo eky’omwa kighana ky’erimbere si babya b’obunyakirimu, neryo mwakunga Timoteo athi abayihighuleko. (Soma 2 Timoteo 2:20-22.) Obughuma bwethu na Yehova ni bw’obughuli. Kundi thwabirihiraho akaghalha kanene erithunga obughuma na Thatha wethu w’elhubulha, sithutholere thukalighira omundu wosi-wosi akabutsekya.​—Esy. 26:4.

16. Ni bilhubirirwa byahi ebyo wanga hiraho?

¹⁶ Hiraho ebilhubirirwa ebyanga kughasira. Sombolha ebilhubirirwa ebikendi ghumya erikirirya lyawu n’erileka iwakulha bunyakirimu. (Efe. 3:16) Ng’eky’erileberyako, wangana thwamu eryuwania endegheka yawu y’eriyeghesya n’erisoma e Biblia. (Esy. 1:2, 3) Kutse iwangana lebya nga wukasaba mirundi mingahi kandi emisabe yawu nga yiri yithi. Obundi iwangana yithagha eriyikakirya linene erisombolha eby’eriyitsemesya n’emibere wukakoleserayamu obuthuku bwawu. (Efe. 5:15, 16) Yehova akendibya akalhangira wukahiraho akaghalha eryongera erikulha-kulhana, akendi tsema.

17. Ni tseme yahi eyikalhwiririra omw’iwathikya abandi?

¹⁷ Wukendibya Mukristayo oyukulire wukawathikya abandi. Yesu mwabugha athi: “Erihithya  likaletha obutseme kwilhaba erihebwa.” (Emib. 20:35) Iwukendi ghasirwa kutsibu wamakolesya obuthuku bwawu n’akaghalha kawu k’obunyethu eriwathikya abandi. Ng’eky’erileberyako, wangana kolha mwa kilhubirirwa kyawu eriwathikya abakulire omo myaka n’abatseke abali omwa kithunga kyenyu. Obundi iwangana baghendera omwa kathali kutse eribawathikya erikolesya ebyuma byabu by’ekielekitroniki. Wamabya iwuli mughalha wethu, hiraho ekilhubirirwa ky’eribya mughombe muwathikya, iwunawithe amalengekania w’erikolera balikyethu. (Fil. 2:4) Kandi wukakanganaya ku wanzire abathe omwa kithunga omw’ibabwira okwa ngulhu yuwene y’Obwami. (Mt. 9:36, 37) Kyamabya ikyangana thokekana, kolha mwa kilhubirirwa kyawu erisangira omwa mulingo mulebe ow’omubiiri w’omughulhu wosi.

18. Erikolha omubiiri w’omughulhu wosi kyanga kuwathikya kithi erikulha-kulhana?

¹⁸ Omubiiri w’omughulhu wosi angana leka iwabana ehighisa hingyi ehy’erikulha-kulhana bunyakirimu. Erikolha ng’omutemburi kyangana kukyungulira olhukyo lhw’erighenda okwa Sukuru y’Abathuliri b’Obwami. Wangana kolera okwa Beteli kutse omwa by’obuhimbe. Mwali wethu omutemburi omulere oyukahulhawamo Kaitlyn akabugha athi: “Erisiba omw’ithulira n’abalikyethu abasi bingyi kyabya kindu kikulhu ekyangwathikaya erikulha-kulhana bunyakirimu enyuma w’eribatizibwa. Eky’erileberyako kyabu mukyanyihira mw’omuhwa w’eryongera erigha e Biblia n’eryuwania emibere yaghe y’erikangirirya.”

19. Ni mighisa yahi eyo wukendi bana wukalholha embere erikulha-kulhana bunyakirimu?

¹⁹ Wukendibya wune mulholha embere erikulha-kulhana bunyakirimu, wukendi bana mighisa mingyi. Siwendi tsandya obunyethu bwawu omw’ikwamirira ebilhubirirwa ebithawithe mughaso. (1 Yn. 2:17) Wukendi yibalya oko bulhumi obukasa busana n’erithwamu nabi. Omwakanya k’ekyo, wukendi ghasirwa kandi iwatsema. (Emi. 16:3) Eky’erileberyako kyawu ekyuwene kikendi himba balikyethu, abalere n’abakulhu. (1 Tim. 4:12) Kandi ekikulhu kutsibu, wukendi bana obuholho n’etseme ebikasa busana n’erikolera Yehova n’eribya bughuma nayu.​—Emi. 23:15, 16.