1. Ni lengwako lyahi eryo Yozefu abana, kandi mwakolha kyahi?

 YOZEFU mughalha wa Yakobo mwabana erilengwako erikalire. Omukali mwamubwira athi, “Ghotsera naghe.” Abya mukali w’omukama wiwe ya Potifari. Yozefu mwaghana ekyo. Munabwire omundu iniangana bugha athi, ‘Ni kyahi ekyaleka Yozefu iniaghana ekyo?’ Potifari syabyaho. Ebyo bine aho, Yozefu abya mukobe omo nyumba eyi; ahathe erithika-thika, omukali oyu angabya imwamukalirya engebe busana n’erimughana. Nomwabine, Yozefu mwalholha embere erimughana nomwanamuhathikana. Busana naki? Mwabugha athi: “Nangakolha erilholho lingaha eri ryo nyithi, n’erihalya oku Nyamuhanga kwehi?”​—Enz. 39:7-12.

2. Yozefu mwaminya athi ngoku obusingiri n’ihalya oku Nyamuhanga?

² Yozefu mwaminya athi ngoku Nyamuhanga wiwe angalhangire obusingiri ng’erilholho “erikalire”? Emighambo ya Musa eyabyamo ekihano ekilhangirikire ekya “Isiwasingira,” yahandikawa myaka nga bikumi bibiri enyuma waho. (Eri. 20:14) Nomwabine, Yozefu abya inianasi Yehova ya ndeke kyamaleka iniaminya Yehova ng’angayowa athi okwa by’obutswatswa. Ng’eky’erileberyako, Yozefu abya inianasi ndeke ngoku Yehova ahiraho obutheke ini bw’eribyamo omulhume mughuma n’omukali mughuma. Kandi angabya iniabya iniabiriowa ngoku mirundi ibiri Yehova mwayira eky’erikolha eritheya ekitsumbi kya ma-mukulhu wiwe ya Sara omughulhu abya omwa kabi k’erikolhwa nabi. Omwa nzira iyan’eyo, Nyamuhanga mwayira eky’erikolha eritheya mukali wa Isaka ya Rebeka. (Enz. 2:24; 12:14-20; 20:2-7; 26:6-11) Yozefu abere anemughanirya oko myatsi ng’eyi mwathoka eriminya ekihikire n’ekithahikire embere sya Nyamuhanga. Kundi Yozefu aby’anzire Nyamuhanga wiwe, aby’anzire ebihano bya Yehova ebithunganene, kandi iniabirithwamu eribighenderako.

3. Thukendi kania okuki omo mwatsi ono?

 ³ Wunanzire ekithunganene? Ahathe erithika-thika wunanzirekyo. Aliwe sithuhikene, neryo thwamathendi yitheya amalengekania agho ekihugho kiwithe okwa kithunganene inianganalhuaho iniathuhambako. (Isa. 5:20; Abar. 12:2) Neryo thukendi lebya ekithunganene nga niki kandi ngoku thwanga ghasirwa omwanza ebithunganene. N’enyuma waho ithwakania okwa biika bisathu ebyo thwanga kolha erighumya olhwanzo olhwa thuwithire ebihano bya Yehova.

4. Ni malengekania wahi awathahikire agho abangyi bawithe okwa kithunganene?

⁴ Abandu bakabya bakalengekania oko mundu oyuthunganene, abangyi ibangana lengekania oko mundu ow’emiyiheko, oyukatsweba-tsweba abandi, kutse oyukayithwalha nga thunganene. Aliwe Nyamuhanga syanzire nahake emibere eyi. Omughulhu Yesu abya okwa kihugho, mwatsweba kutsibu abakulhu b’amadini ab’omwa biro biwe busana n’eriyihiriraho amathegheko awahambire okwa kithunganene. (Omu. 7:16; Lk. 16:15) Oyukakolha ekithunganene syali yowa ng’alengire abandi.

5. Erikwamana ne Biblia, obuthunganene niki? Iha eby’erileberyako.

⁵ Obuthunganene ni mubere mubuyanga. Omwa bikuhi, kikamanyisaya erikolha ebihikire embere sya Yehova Nyamuhanga. Omwa Biblia, ebinywe ebikamanyisaya “ekithunganene” mwamuli erighendera okwa bihano bya Yehova. Ng’eky’erileberyako, Yehova mwabugha athi abasuburi batholere ibakolesya ‘ekilo ekithunganene.’ (Ebi. 25:15) Neryo kwesi, Omukristayo oyuwanzire eribya muthunganene embere sya Nyamuhanga atholere iniabya w’okwenene omo suburu yiwe yosi. Kandi oyuthunganene anzire obulingirirania​—akapona omundu akakolhwa nabi. Kandi erithoka ‘erikolha ebiro byosi ebikatsemesaya’ Yehova, omundu oyuli kwenene muthunganene akalengekanaya Yehova ng’akendi lhangira athi erithwamu liwe.​—Kol. 1:10.

6. Busana naki thwayikethera ebihano bya Yehova ebihambire okwa kihikire n’ekithahikire? (Isaya 55:8, 9)

⁶ E Biblia yikakanaya oku Yehova ng’Enzuko y’obuthunganene. Busana n’enzumwa eyo, akahulhawamo “ah’erikalha ly’erithunganene.” (Yer. 50:7) Ng’Omuhangiki, Yehova musa yuwanga thoka ndeke erihiraho eby’erighenderako ebihambire okwa kihikire n’ekithahikire. Kundi Yehova ahikene, amalengekania agho awithe okwa kihikire n’ekithahikire alengire kutsibu awethu, awakahambawako mughulhu mungyi busana n’obuthahikana bwethu n’ekibi. (Emi. 14:12; soma Isaya 55:8, 9.) Aliwe, kundi thuhangikirwe omwa kisosekanio kya Nyamuhanga, thukathoka erighendera okwa bihano biwe ebithunganene. (Enz. 1:27) Kandi thwanzire erikolha ekyo. Olhwanzo olhwa thuwithire Thatha wethu lhukaleka ithwanza erimugherererya ngoku thwanga thoka.​—Efe. 5:1.

7. Busana naki thukayithagha eby’erighenderako eby’eriyikethera? Iha eky’erileberyako.

⁷ Thukaghasirawa thukaghendera okwa bihano bya Yehova ebihambire okwa kihikire n’ekithahikire. Mbwino wangana lhangira ekikaleka? Thalengekania nga byangabya bithi obuli kampuni y’obuhimbe yiryayihiriraho eby’eripimamo byayu. Ebindu ibikendibya kimbunzange. Kandi abathambiri bamathendi ghendera okwa by’erighenderako ebyabirihirwaho eby’emithambirire, abandi balhwere ibangana holha. Ahathe erithika-thika, eby’erighenderako eby’eriyikethera ni butheya. Kuthya ebihano bya Nyamuhanga ebihambire okwa kihikire n’ekithahikire bikathutheghaya.

8. Abanzire erikolha ekihikire balindirire mighisaki?

⁸ Yehova akatsumulha abakalengaho erighendera okwa bihano biwe. Akalhaghanisaya athi: “Abathunganene basyikalha omo kihugho mo  buholho, n’erisighalyakyo kera na kera.” (Esy. 37:29) Mbwino wangana thera akasasani abandu nga bakendi syabya bathi omwa bughuma, obuholho, kandi ibanatsemire omughulhu obuli mundu akendi syaghendera okwa bihano bya Yehova? Yehova anzire iwatsemera engebe eyiri ng’eyo. Ahathe erithika-thika, obuli mughuma w’okw’ithwe awithe esyonzumwa mbuya esyanga leka inianza obuthunganene! Thwanga ghumya thuthi olhwanzo olhwa thuwithire omubere oyu? Thukanaye okwa biika bisathu ebyo thwanga kwama.

9. Ni kyahi ekikendi thuwathikya erianza ekithunganene?

⁹ Ekiika 1: Anza oyukahiraho eby’erighenderako. Erithoka erianza ekithunganene, thutholere ithwongera olhwanzo olhwa thuwithire oyukahiraho eby’erighenderako ebihambire okwa kihikire n’ekithahikire. Thukendibya thukongera erianza Yehova, kwa thunemwendyongera thuthya erianza erighendera okwa bihano biwe ebithunganene. Ng’eky’erileberyako: Adamu na Eva kubabya ibabya bawithire Yehova y’olhwanzo, sibanga lemirwe eriowa ekihano kiwe ekithunganene.​—Enz. 3:1-6, 16-19.

10. Abrahamu mwakolhaki erithoka eriyitheghererya ndeke amalengekania wa Yehova?

¹⁰ Ahathe erithika-thika, sithwanzire thukasuba omwa kisobyo ekyo Adamu na Eva bakolha. Thwangana yihighulha okw’ekyo omw’ilholha embere erigha oku Yehova, erianza emibere yiwe, n’erilengaho eriyitheghererya amalengekania wiwe. Thukendibya thunemukolha ekyo, ahathe erithika-thika olhwanzo olhwa thuwithire Yehova lhukendyongera. Thalengekania oku Abrahamu. Aby’anzire Yehova ya kutsibu. Nibya n’omughulhu kyamukalira eriyitheghererya erithwamu lya Yehova, Abrahamu mwathayisamambulha. Omwakanya k’ekyo, mwalengaho eriminya Yehova ya ndeke. Ng’eky’erileberyako, abere abiriminya okw’ithwamu lya Yehova ery’erithoghothya e Sodomo ne Gomora, okw’itsuka Abrahamu mubaha athi “Omutsweri w’ekihugho kyosi” angana thoghothya abathunganene akathoghothya ababi. Oku Abrahamu, ekyo mukyabya nga sikitholere, neryo omw’iyikehya mwabulya Yehova y’ebibulyo binene. Omw’ighumisirizya Yehova mwamusubirya. Erighunzerera, Abrahamu mwaminya ngoku Yehova akalebaya omuthima w’obuli mundu kandi ngoku syanga thoghothya abatheko lhubanza akathoghothya abali kw’olhubanza.​—Enz. 18:20-32.

11. Abrahamu mwakangania athi kw’anzire Yehova kandi kw’amuyikethere?

¹¹ Erikanirania eryo Abrahamu athunga na Yehova erihambire okwa muyi we Sodomo ne Gomora mulyamuhambako kutsibu. Ahathe erithika-thika, mwongera erianza n’erisikya Thatha wiwe kwilhaba kera. Myaka mirebe enyuma waho, amaaka wa Abrahamu aw’eriyikethera Yehova mwalengwako kutsibu. Yehova mwamubwira athi aheyo mughalha wiwe mwanzwa ya Isaka ng’obuhere. Aliwe lino Abrahamu abya iniabiriminya Nyamuhanga wiwe ya ndeke, neryo okwa ndambi eyi abya isyawithe eby’erimubulya. Abrahamu mwakwama kyahongoka n’eriyakolha ekya Yehova amubwira athi akole. Nomwabine, thalengekania ng’abya omwa bulhumi bungahi akathegheka eriyakolha omubiiri oyu! Abrahamu atholere eribya imwalengekania kutsibu okwa by’abya iniabirigha oku Yehova. Abya inianasi ngoku Yehova syanga kolha ekindu kyosi-kyosi ekithathunganene kutse ekithemo olhwanzo. Erikwamana n’omukwenda Paulo, Abrahamu mwaghanirya athi Yehova angalhubukirye mughalha wiwe mwanzwa ya Isaka. (Ebr. 11:17-19) Kundi nibya, Yehova abya iniabirilhaghanisya athi Isaka angabere thatha w’ekihanda, kandi okwa buthuku obo, Isaka abya isyawithe mwana. Abrahamu aby’anzire Yehova, neryo mwayikethera ngoku  Thatha wiwe angakolire omwa lithunganene. Omw’ikirirya Abrahamu mwabya mwowa, nomwakine indi sikyabya kyolho.​—Enz. 22:1-12.

12. Thwanga gherererya thuthi Abrahamu? (Esyonyimbo 73:28)

¹² Thwanga gherererya thuthi Abrahamu? Nga Abrahamu, thutholere ithwalholha embere erigha oku Yehova. Thwamakolha ekyo, ithukendi yithunda okw’iyo kandi ithwongera erimwanza. (Soma Esyonyimbo 73:28.) Obunyamuthima-thima bwethu ibukendi kangiriribwa erithoka erikolha erikwamana n’amalengekania wa Nyamuhanga. (Ebr. 5:14) Busana n’ekyo, omundu amanza erithulengako erikolha ekithahikire, ithukendi ghana. Ithukendi pona erikolha ekindu kyosi-kyosi ekyanga lethera Thatha wethu y’obulhumi kandi ekyanga tsandya obughuma bwethu nayu. Aliwe kandi thwanga kangania thuthi ku thwanzire ekithunganene?

13. Thwanga kwamirira thuthi ekithunganene? (Emisyo 15:9)

¹³ Ekiika 2: Lengaho buli kiro erikulha-kulhania olhwanzo olhwa wuwithire ekithunganene. Thwangana kulha-kulhania olhwanzo olhwa thuwithire ebihano bya Yehova ebithunganene ngoku thukanakalha-kalhaya omubiri wethu​—omw’ihiraho akaghalha erikolha ebisasayizi mughulhu wosi. Oyu ni mubiiri ogho wanga kolha obuli kiro. Yehova ni w’obuyitheghererya, syanga bugha athi thukole kwilhaba ngoku thwanga thoka. (Esy. 103:14) Akathukakasaya athi ‘anzire oyukakwama ekithunganene.’ (Soma Emisyo 15:9.) Thwamabya ithunemulhandamirira ekilhubirirwa kirebe omo mubiiri wa Yehova, thutholere ithwalholha embere erihiraho akaghalha erikihikako. Kwabine bithya n’omughulhu thukakwamirira ekithunganene. Kandi omw’ighumisirizya, Yehova akendi lholha embere erithuwathikya erikulha-kulhana.​—Esy. 84:5, 7.

14. ‘Ekindu ky’amalhwa ekikatheghaya ekikuba eky’erithunganene’ niki, kandi busana naki thukayithaghakyo?

¹⁴ Omo lhwanzo Yehova akathwibukaya athi erikolha ebithunganene si muheke. (1 Yn. 5:3) Mbaghane n’ekyo, ni butheya, ekindu ekyo thukayithagha buli kiro. Ibuka ekyambalho ky’amalhwa eky’obunyakirimu ekyo mukwenda Paulo akanayako. (Efe. 6:14-18) Ni kitsweka kyahi  ekyabya kikatheya omuthima w’omusirikali? Kyabya iky’ekindu ‘ky’amalhwa ekikatheghaya ekikuba eky’erithunganene,’ ekikimanira ebihano bya Yehova ebithunganene. Ngoku ekindu ky’amalhwa ekikatheghaya ekikuba kikanatheghaya omuthima wonyine-nyine, n’ebihano bya Yehova ebithunganene byangana theya omuthima wawu, omundu oyo wuli omwakathi. Kwesi kolha ekyosi-kyosi erilhangira wuthi ekyambalho kyawu ky’amalhwa mukabya imune ekindu ky’amalhwa ekikatheghaya ekikuba eky’erithunganene!​—Emi. 4:23.

15. Wanga mbalha wuthi ekindu ky’amalhwa ekikatheghaya ekikuba eky’erithunganene?

¹⁵ Wanga mbalha wuthi ekindu ky’amalhwa ekikatheghaya ekikuba eky’erithunganene? Wangana kolha ekyo omw’ilengekania okwa bihano bya Nyamuhanga omw’ithwamu erya wukakolha buli kiro. Wukathwamu nga wukanaye okuki, nga ni muziki wahi owawuhulikirire, nga ni yitsemesya lyahi erya wulebaye, kutse nga ni bitabu byahi ebya wusome, tsuka eriyibulya: ‘Ngendibya iningahira omwa muthima waghe mwaki? Mbwino eki Yehova akanakirigha? Kutse mbwino kikakulha-kulhanaya eby’obutswatswa, eby’obwithi, omururu, eriyitsomana iwuwene​—ebindu ebyo Yehova akalhangira ng’ebithathunganene?’ (Fil. 4:8) Ebya wukathwamu byamabya ibinahambene n’erisonda lya Yehova, iwukendibya iwamalighira ebihano biwe ebithunganene eritheya omuthima wawu.

16-17. Ebiri omu Isaya 48:18 bikathukakasaya bithi ngoku thwangana ghendera okwa bihano bya Yehova kera na kera?

¹⁶ Wunewathabulha nga wangana thoka erighendera okwa bihano bya Yehova ebithunganene obuli kiro, obuli mwaka? Thalengekania okwa ky’erileberyako ekya Yehova akakolesaya, ekiri omu Isaya 48:18. (Soma.) Yehova akalhaghanisaya athi erithunganene lyethu lyanganabya “ng’ebisunda by’omwa ngetse.” Thathera akasasani iwunimene okwa musike w’engetse nene, iwunasamalire ebisunda ibinemwasa ahathe erihwayo, ekindi omwa kindi. Omwa mibere eyithekene eyo, mbwino iwanalengekania wuthi kiro kighuma bikendi syakwama kyahwayo? Eyihi. Kundi wunasi ngoku ebisunda ebyo byabiribya ibine okwa ngetse eyo habw’emyaka n’emyaka, kandi ahathe erithika-thika bikendisyabya ibinemwasa.

¹⁷ Erithunganene lyawu lyanganabya ng’ebisunda by’okwa ngetse! Lithi? Omughulhu wuwithe erithwamu, tsuka erilengekania Yehova ng’anganza iwakolhaki. Neryo ghendera okw’ekyo. Mbulha erithwamu likalire bungahi, mughulhu wosi Thatha wawu w’olhwanzo akendibya inianeho erikuwathikya erisighalha iwunasikire n’erighendera okwa bihano biwe ebithunganene omo ngebe yawu yosi.​—Isa. 40:29-31.

18. Busana naki thutholere ithwayihighulha okw’itswera abandi erikwamana n’amathegheko wethu?

¹⁸ Ekiika 3: Leka Yehova yutswere. Thukalengaho erighendera okwa bihano bya Yehova ebithunganene, thutholere ithwayihighulha okw’itswera abandi n’okw’iyithwalha nga thuthunganene. Omwakanya k’erighaya abandi eriyowa nga thuwithe obughabe bw’eribatswera erikwamana n’amathegheko wethu, thutholere ithw’ibuka ngoku Yehova ya “Mutsweri w’ekihugho kyosi.” (Enz. 18:25) Yehova syali athathuha ehamuli ey’eritswera eryo. Erithwalira haghuma, Yesu akalhaghira athi: “Simutswere abandi, mukasyatswerwa na Nyamuhanga.”​—Mt. 7:1. *

19. Yozefu mwakangania athi kw’akayikethera eritswera lya Yehova?

¹⁹ Thuthasyalengekanaya okwa ky’erileberyako  ky’omulhume muthunganene ya Yozefu. Mwayihighulha okw’itswera abandi, nibya n’abamukolha nabi. Baghalha babu-babu mubamukolha nabi, bamamughulya omwa bukobe, kandi bamaleka thatha wabu alighe athi Yozefu abirikwa. Myaka mirebe enyuma waho, Yozefu mwathasyabya haghuma n’ab’eka yabu. Lero lino Yozefu abya iniabiribya muthabali w’amaaka, angana tswere baghalha babu omwa nzira y’obutsurumi kandi inianza erithuhulya. Baghalha bobu Yozefu mububaha bathi anganakolha ekyo, nomwakine indi babya ibabiriyikubyabwomo erilhua oko muthima busana n’ekyo bakolha. Aliwe Yozefu mwabakakasya athi: “Simubahe, kusangwa ingye, indi omo mwanya wa Nyamuhanga kwehi?” (Enz. 37:18-20, 27, 28, 31-35; 50:15-21) Omw’iyikehya Yozefu mwalekera Yehova y’eritswera.

20-21. Thwanga yihighulha thuthi okw’iyithwalha nga thuthunganene?

²⁰ Nga Yozefu, thukaleka Yehova yutswere. Ng’eky’erileberyako, sithuli anza erilengekania thuthi thunasi ekiryaleka balikyethu ibakolha ngoku balyakolha. Sithwanga minya ebiri omwa mithima; ‘Yehova musa yukalenga ebirimo.’ (Emi. 16:2) Anzire abandu b’emisindo yosi, abalhuire omwa mibere n’esyokalikya muthina-muthina. Kandi Yehova akathuhira mw’omuhwa ‘w’erikangya ebiri omwa mithima yethu.’ (2 Kor. 6:13) Thukalengaho erianza abosi abali omw’ihiika lyethu ery’obunyakirimu, butsira eribatswera.

²¹ Kandi eki kikamanyisaya kithi sithutholere thukatswera abathe omo kithunga. (1 Tim. 2:3, 4) Mbwino iwanatswera omuhughu wawu oyo muthe nayu omw’ikirirya lighuma, omw’ibugha wuthi, “Omundu oyo syendi syasa omo kwenene”? Eyihi, eyo iyikendibya ini miyikangiriro, eriyithwalha nga wuthunganene. Yehova akinaha “bandu bosi, ehosi” b’akaghisa k’eriyisubamo. (Emib. 17:30) Mughulhu wosi ambi iwibuka ngoku eriyithwalha nga wuthunganene kikakanganaya ku si wuthunganene.

22. Busana naki iwathwamu erianza ekithunganene?

²² Ambi olhwanzo olhwa thuwithire ebihano bya Yehova ebithunganene ilhwongera etseme n’erihira omwa bandi mw’omuhwa, eribawathikya eriyithunda okw’ithwe na Nyamuhanga wethu. Ambi isithwaleka erianza “kutsibu erikolha ekithunganene.” (Mt. 5:6) Ibya iwunasi ngoku Yehova akalhangira akaghalha ako wukahiraho kandi ngoku mughulhu wosi akatsema wukakulha-kulhana. Ekihugho kino kinemulholha embere eriyihwerya omwa bithathunganene, iwe sika! Mughulhu wosi ibuka ngoku ‘Yehova anzire abandu biwe abathunganene.’​—Esy. 146:8.