1. Thukaghasirawa thuthi thukakania nga thwaminya thuthi “ekwenene”?

 “WAMINYA wuthi ekwenene?” Ahathe erithika-thika, wabirisubirya ekibulyo ekyo mirundi mingyi. Ni kighuma ky’okwa bibulyo by’erimbere-mbere ebyo omwikirirya mulikyethu akathubulhaya akanza erithuminya. Thukanza ithwaminya balikyethu nga baminya bathi Yehova n’erimwanza, kandi thukatsemera eribabwira ekikaleka ithwanza ekwenene. (Abar. 1:11) Busana n’erikanirania eryo, thuk’ibukibawa ngoku ekwenene ni y’obughuli bunene. Kandi kikaleka ithwongera erithwamu ‘erikwama ndeke omwatsi w’ekwenene’​—ni bugha ambu, erilholha embere eribya omo ngebe eyikendi leka ithwabana emighisa ya Yehova kandi iniathusima.​—3 Yn. 4.

2. Thukendi kania okuki omo mwatsi ono?

² Omo mwatsi ono, thukendi lebya esyonzumwa ndebe esikaleka ithwanza ekwenene. Neryo ithwalhangira ngoku thwanga lholha embere erikangania ku thwanzire ekihembo ky’obughuli eki. Ahathe erithika-thika, erikania oko myatsi eyi kikendi leka ithwongera erisima ekya Yehova abirikolha erithuletha omo kwenene. (Yn. 6:44) Kandi kikendi ghumya eriyisunza lyethu ery’eribwira abandi oko kwenene.

3. Ni nzumwa yahi ngulhu eyikaleka ithwanza ekwenene?

³ Thwanzire ekwenene habw’esyonzumwa nyingyi. Ekikulhu kutsibu, thwanzire Yehova Nyamuhanga, Enzuko y’ekwenene. Erilhabira omo Kinywe kiwe, e Biblia, thwabirimuminya ng’Omuhangiki w’amaaka ow’olhubulha n’ekihugho kandi nga Thatha w’elhubulha ow’olhwanzo oyuthutsomene. (1 Pet. 5:7) Thunasi ngoku Nyamuhanga wethu ni ‘w’erighanyira n’ow’olhukogho, sianguhire okw’ihithana, oyo woswire n’obwenge  bw’olhwanzo n’omwatsi w’ekwenene.’ (Eri. 34:6) Yehova anzire obulingirirania. (Isa. 61:8) Akapona akalhangira thukaghalhwa, kandi anayitheghekire kutsibu erighunzaho ebyosi ebikathwaghalhaya okwa buthuku obo abirihiraho. (Yer. 29:11) Ekyo ka kikahumulikanaya! Kwesi ky’ekikaleka ithwanza Yehova ya kutsibu!

4-5. Busana naki omukwenda Paulo mwalinganisya amaha wethu n’enaanga?

⁴ Ni yindi nzumwa yahi eyikaleka ithwanza ekwenene? Ekwenene yikathughasira kutsibu. Thulebaye eky’erileberyako. Ekwenene ye Biblia mwamuli amaha wethu aw’obuthuku obukasa. Erikangania omughaso w’amaha ayo, omukwenda Paulo mwahandika athi: “Thuwithe amaha aya ng’enaanga ey’engebe, ni w’okwenene kandi asikire.” (Ebr. 6:19, NWT) Ngoku enaanga yikanaleka obwathu ibwabya ibunasikire, amaha wethu awaseghemere oko Biblia anganaleka ithwabya ithunasikire thukabana ebitsibu.

⁵ Omwa mulhondo oyu, Paulo abya akakania okwa maha w’elhubulha agho Abakristayo abahakabibwa banzire kutsibu. Aliwe kandi ebinywe biwe bikahamba n’okwa Bakristayo abalindirire erisyabyaho kera na kera okwa kihugho paradiso. (Yn. 3:16) Omo kwenene, erigha okwa maha w’engebe y’erikotha kyabirithuha engebe eyiwithe ekighendererwa.

6-7. Yvonne abirighasirwa athi omw’iminya ekwenene eyihambire okwa buthuku obukasa?

⁶ Thulebaye ekyalholirweko kya mwali wethu Yvonne. Syakulira omo kwenene, kandi iniakine mulere iniasaghire olhuholho. Ak’ibuka akasoma ebinywe ebyakwama kyabya omwa bulengekania bwiwe bino: “Ekiro kikendi syahika ihabya isihakiri omungya.” Akabugha athi: “Ebinywe ebyo mubyaleka ingathaghotsera ingalengekania okwa buthuku obukasa. Munalengekania indi, ‘Ahathe erithika-thika engebe yitholere iyabya iyinawithe ekighendererwa. Busana naki ngwithe engebe?’ Mwindanza eriholha!”

⁷ Enyuma waho, Yvonne iniamabiribya mulengwa, mwabanangana n’Abema ba Yehova. Akabugha athi: “Munatsuka eriligha ngoku nanganabya n’amaha w’erisyabya okwa kihugho Paradiso kera na kera.” Erigha ekwenene lyabirighasira lithi mwali wethu oyu? Akongerako athi: “Singakibulha othulho habw’erilengekania okwa buthuku obukasa kutse okwa lhuholho.” Wamathakilengekaniako, oku Yvonne, ekwenene ni y’obughuli bunene, kandi akatsema kutsibu eribwira abandi okwa maha wiwe aw’obuthuku obukasa.​—1 Tim. 4:16.

8-9. (a) Omwa musyo wa Yesu, omulhume mwalhangira athi omughaso w’eby’obughuli ebyo abana? (b) Okw’iwe, ekwenene ni y’obughuli bungahi?

⁸ Kandi ekwenene ye Biblia mwamuli engulhu yuwene eyihambire oko Bwami bwa Nyamuhanga. Yesu mwalinganisya ekwenene eyihambire oko Bwami obo n’eby’obughuli ebibisamire. Ngoku kiri omu Matayo 13:44, Yesu mwabugha athi: “Obwami bw’elhubulha bulingene n’ebindu ebibisamire omw’irima. Omundu mwabana ebindu ebyo neryo mwabisabyo busana n’obutseme, omundu oyo akayaghulhaya ebyosi ebyo awithe, neryo akaghulha eririma eryo.” Lhangira ngoku omulhume oyo syabya akasondya eby’obughuli. Aliwe abere akabibana, mwayithalya okwa bindi anamathabithunga. Erithwalira haghuma, mwaghulya obuli kindu ekyo aby’awithe. Busana naki? Abya inianasi ngoku ni bindu by’obughuli bunene. Byabya by’obughuli kwilhaba ekindi kindu kyosi-kyosi ekyo abya w’eriyithalyako.

⁹ Mbwino nawu kwa wukanalhangira wuthya ekwenene? Ahathe erithika-thika! Thunasi ngoku sihali ekyo ekihugho kino kyangaha ekyanga linganisibwa n’obutseme obwa thukabana thukakolera Yehova lino, n’amaha  w’engebe y’erikotha aw’obuthuku obukasa ahisi sy’obuthabali bw’Obwami. Olhusunzo olhwa thuwithe olhw’eritsemera obughuma bw’ahakuhi obwa thuwithe na Yehova lhulengire ekyosi-kyosi ekya thwanga yithalyako. Etseme yethu nene ly’erikolha “ebikamutsemesaya.”​—Kol. 1:10.

10-11. Ni kyahi ekyaleka Michael iniahindulha engebe yiwe?

¹⁰ Abangyi omw’ithwe babiriyithalya okwa bindu binene-binene nuku basimawe na Yehova. Abandi babirisighania emibiiri eyuwene kutsibu ey’ekihugho. N’abandi babirileka erikwamirira eby’obugaga. Kandi n’abandi babere babirigha oku Yehova mubahindulira ighuma engebe yabu. Ekyo kya Michael akolha. Mwathakulira omo kwenene. Iniane mulere mw’eghesibwa ekarate. Akabugha athi: “Iningayisyethera eky’eribya inganemukalya-kalya omubiri waghe. Okwa bundi buthuku, iningayowa isihali oyuwanga nyisinga.” Aliwe Michael abere akatsuka erigha e Biblia, mwaminya amalengekania wa Yehova okwa by’amalhwa. (Esy. 11:5) Akakania okwa abathahenie Abema abamweghesaya, Michael akabugha athi: “Mubathambwira bathi ngatholere ingaleka ekarate; mubakwama kyalholha embere erinyeghesya ekwenene ye Biblia.”

¹¹ Michael abere akongera erigha oku Yehova, n’olhwanzo olhw’amuwithire ku lhwanongera lhuthya. Ekyamuhambako kutsibu w’omubere wa Yehova ow’erikwira abaramya biwe b’obulighe. Endambi muyahika, Michael amaminya ngoku atholere iniakolha erithwamu erikendi hindulha engebe yiwe. Akabugha athi: “Munaminya ngoku erileka ekarate ky’ekindu ekikalire ekyo nangakolire. Aliwe kandi nabya inganasi ngoku kyanga tsemesirye Yehova, kandi nabya inganalighire ngoku erikolera Yehova kilengire ekyosi-kyosi ekya nangayithalyako.” Michael mwalhangira ngoku ekwenene eyo abana ni y’omughaso, kandi ekyo mukyaleka iniakolha esyombinduka nene-nene omo ngebe yiwe.​—Yak. 1:25.

12-13. Ekwenene ye Biblia muyawathikya yithi Mayli?

¹² Erikangania omughaso owali omwa kwenene, e Biblia yikalinganisaya ekwenene n’etara eyinemwaka omwa mwirimya. (Esy. 119:105; Efe. 5:8) Mayli, erilhua Azerbaijan, akasima kutsibu obuwathikya obo abana omwa Kinywe kya Nyamuhanga. Akulira omw’eka eyighabene omwa by’edini. Thatha wiwe abya Musilamu na mama wiwe abya w’edini y’Ekiyuda. Akabugha athi: “Nomwakine indi isindi thika-thikira eribyaho lya Nyamuhanga, habya myatsi mingyi eya ngatheyitheghereraya. Iningayibulhaya, ‘Busana naki Nyamuhanga mwahangika abandu, kandi ni kyahi ekyangaleka omundu iniaghalhwa omwa ngebe yiwe yosi kandi n’enyuma waho iniasyaghenda omwa muliro wa kera na kera?’ Kundi abandi ibakabugha bathi obuli kindu ekikabya n’isonda lya Nyamuhanga, iningayibulhaya, ‘Mbwino Nyamuhanga ni mundu oyukasathisaya abandu ng’ebiddole neryo kandi iniatsema akalhangira bakaghalhwa?’”

¹³ Mayli mwalholha embere erisondya eby’erisubirya okwa bibulyo biwe. Endambi muyahika, amaligha erigha e Biblia neryo amasa omo kwenene. Akabugha athi: “Emyatsi ye Biblia eyikakengeka muyahindulha amalengekania waghe oko ngebe. Erisoborera erikayitheghereribawa ndeke erya nabana omwa Kinywe kya Nyamuhanga mulyaleka ingathekana.” Nga Mayli, ithwe bosi thukapipa Yehova, ‘oyuwathubirikira erilhua omwa mwirimya n’eryingira omo kyakakalha kiwe ky’eriswekya.’​—1 Pet. 2:9.

14. Thwanga ghumya thuthi olhwanzo olhwa thuwithire ekwenene? (Lebaya n’akasanduku “ Erindi Linganisya.”)

¹⁴ Ebi ni bike by’okwa by’erileberyako ebikakanganaya omughaso w’eribana ekwenene.  Ahathe erithika-thika wangana lengekania okwa bindi bingyi. Busana naki iwuthakihira okwa ndegheka yawu y’eriyeghesya e Biblia eribana esindi nzumwa esikaleka ithwabya ithutholere erianza ekwenene? Thukabya thuk’ongera erianza ekwenene, kwa thukan’ongera thuthya eribana esindi nzira sy’erikanganiryamo ku thwanzireyo.

15. Ni nzira yahi nguma eya thwanga kanganiryamu ku thwanzire ekwenene?

¹⁵ Thwangana kangania ku thwanzire ekwenene omw’iyeghesya e Biblia mughulhu wosi n’ebitabu ebiseghemere okwa Biblia. Mbulha thwamaghunza buthuku bungahi omo kwenene, mughulhu wosi thukabya ithunawithe bingyi eby’erigha. Egazeti y’Akaleberyo ey’erimbere-mbere muyabugha yithi: “Ekwenene yiri ng’akamole akuwene akali omwa mbwarara, akathimbirweko n’ebindi bithi binene ebiboroghonyire ebikaleka ikathalhangirika. Wamabya w’erikabana wutholere iwalholha embere erisondekania. . . . Wamabya wanzire eriyithungirako wutholere iwahiraho akaghalha. Isiwayowa akamole kaghuma ak’ekwenene nga kakaghunza. . . . Sondekanaya ehindi.” Erigha ni mubiiri owakalire, aliwe akaghalha akakahirawaho kakaghanduka.

16. Ni nzira yahi y’eriyeghesya eyikakukolera ndeke? (Emisyo 2:4-6)

 ¹⁶ Sibugha indi ithwe bosi thwanzire erisoma n’erigha. Aliwe Yehova akathukokaya athi thulhole embere ‘erisondya’ nuku thuyitheghereraye ekwenene y’omwakathi. (Soma Emisyo 2:4-6.) Thwamahiraho akaghalha ng’ako, mughulhu wosi thukaghasirawa. Akakania okw’isoma liwe lye Biblia, Corey akabugha athi akalengekanaya okwa mulhondo mughuma ahabwagho. Akasoborera athi: “Ngasoma obuli mwatsi wahikwa, ingalebya obuli masako awahambangene nagho, n’eryongera erisekulya kugho. . . . Enzira eyi yikaleka ingaminya bingyi omw’isoma lyaghe!” Mbulha thukakolesaya enzira eyo kutse eyindi, thukakanganaya ku thukasima ekwenene thukahiraho endambi n’akaghalha eriyeghesyayo.​—Esy. 1:1-3.

17. Kikamanyisayaki erighendera okwa kwenene? (Yakobo 1:25)

¹⁷ Erithwalira haghuma, thunasi ngoku erith’igha ekwenene sikirighunza. Erithoka erighasirwa ndeke thutholere ithwaghendera okwa kwenene omwa ngebe yethu. Neryo aho ibbwa ekwenene imuyikendi thulethera etseme kundu. (Soma Yakobo 1:25.) Thwanga kakasya thuthi ku thunemughendera oko kwenene? Mughalha wethu mughuma akabugha athi thutholere ithwabya ithunemuyilebya eriminya aho thunemukolha ndeke n’aho thwanzire eryuwania. Omukwenda Paulo mwakibughako omo nzira eno: “Nikwa aho thwabirihika, thusike erikwamirirabyo thuthya.”​—Fil. 3:16.

18. Busana naki thukakolha ngoku thwanga thoka ‘erikwama ndeke omwatsi w’ekwenene’?

¹⁸ Thalengekania okwa mighisa eyikalhwiririra omw’ikolha ngoku thwanga thoka ‘erikwama ndeke omwatsi w’ekwenene’! Siyirileka thukuwania engebe yethu lisa aliwe kandi yikaleka ithwatsemesya Yehova n’abalikyethu. (Emi. 27:11; 3 Yn. 4) Mbwino thunawithe esindi nzumwa esilengire esi esyanga leka ithwanza ekwenene n’erighendera okwa kwenene?