1. Ngoku kiri omwa 1 Abanya Tesalonika 5:11, ni mubiiri wahi ogho ithwe bosi thukasangiramo?

 EKITHUNGA kyenyu kine kyathahimba kutse erisuba-subania Ekisenge ky’Obwami? Kyamabya ikwa kiri kithya, ahathe erithika-thika wuk’ibuka omurundi wawu w’erimbere wukahindanira omwa Kisenge kihyaka. Muwasima Yehova ya kutsibu. Obundi etseme yawu yangabya imuyabya nene kutsibu kyamaleka iwalemwa n’eriimba okwa lhwimbo olhukatsuka. Ebisenge byethu by’Obwami ebihimbire ndeke bikaleka Yehova iniapipwa. Aliwe thuk’ongera erimupipa thukasangira omwa wundi mulingo w’obuhimbe. Omubiiri oyo muli ekindu ky’obughuli bunene kwilhaba obuhimbe obwonyine-nyine. Mwamuli erihimba abandu abakasa okwa myanya y’eriramiryamo eyo. Omukwenda Paulo abya inian’ibukire omulingo w’obuhimbe oyu akahandika ebiri omwa 1 Abanya Tesalonika 5:11, erisako erihirikirire omwatsi wethu.​—Soma.

2. Thukendi kania okuki omo mwatsi ono?

² Omukwenda Paulo ni ky’erileberyako ekyuwene eky’omundu oyuwabya asi ngoku angahimba abikirirya balikyabu. Iniakabalhumirirawa. Omo mwatsi ono, thukendi lebya ngoku awathikaya balikyabu (1) erighumira ebitsibu, (2) eribya ibanawithe obuholho omwakathi-kathi kabo, na (3) erighumya erikirirya lyabu omu Yehova. Leka thulebaye ngoku thwanga mugherererya nuku thwanga himba balikyethu munabwire.​—1 Kor. 11:1.

3. Ni malengekania wahi awatholere agho Paulo aby’awithe?

³ Paulo aby’anzire balikyabu ba kutsibu. Nayu iniakanabana ebitsibu; neryo ky’ekyaleka iniathoka erikwira balikyabu b’obulighe n’eribalhumirirwa bakabana ebitsibu. Buthuku bughuma, Paulo mwayisanga isyawithe okwa sente neryo  abya w’erisondya omubiiri w’erimusighika n’abo abya nabo. (Emib. 20:34) Abya mulhuki w’esyohema. Abere akahika e Korinto, okw’itsuka mwakolha haghuma na Akwila na Pirisila nabu ababya balhuki b’esyohema. Aliwe “obuli sabato” iniakathulira Abayuda n’Abagiriki. Neryo Sila na Timoteo babere bahika, “Paulo mwasiba omughulhu wosi akathulha engulhu yuwene.” (Emib. 18:2-5) Paulo mwath’ibirirwa ekighendererwa kiwe kikulhu omwa ngebe, erikolera Yehova. Kundi Paulo abya mukoli w’omuhwa mukyaleka iniabya iniangana thoka erihimba balikyabu. Mwab’ibukya ngoku sibatholere bakalighira ebitsibu by’engebe n’ekiyithawa ky’eritsomana eka yabu bikaleka bakagheghena “ebikulhu kutsibu”​—ebyosi ebihambene n’eriramya Yehova.​—Fil. 1:10, NWT.

4. Paulo na Timoteo mubawathikya bathi balikyabo erighumira eriendereribwa?

⁴ Ekithunga kye Tesalonika kyabere kikanatsuka, abikirirya bahyaka abo mubabana erihakanisibwa erikalire. Ekingungu ky’abahakani abatsurumire kyabere kyabulha Paulo na Sila mukyakurira “abandi balikyethu embere sy’abakulhu b’omuyi,” ikinemulhaka kithi: Abosi “bakapona amahano wa Kaisari.” (Emib. 17:6, 7) Thalengekania Abakristayo bahyaka abo nga mububaha bungahi bakaminya ngoku abandu b’omwa muyi babiribahindukira? Eki kyanga lekire ibasubirira enyuma omw’ikolera Yehova, aliwe Paulo mwathanza ekyo kikabya. Nomwakine indi iyo na Sila babya b’erilhuayo, mubalhangira bathi ekithunga kihyaka ekyo kikatsomanawa ndeke. Paulo mw’ibukya Abanya Tesalonika athi: ‘Muthwathuma mulikyethu Timoteo, muthwamuthuma eribasikya n’eribahamirya omw’ikirirya lyenyu, sihabye mundu oyukasuba enyuma busana n’amalighe aya.’ (1 Tes. 3:2, 3) Timoteo angabya imwayilhangirira eriendererya omwa tawuni y’ewabu e Listra. Abya iniabirilhangira ngoku Paulo aghumaya balikyabu ab’eyo. Kundi mwayilhangirira obuwathikya obwa Yehova aha, Timoteo mwathoka erighumya balikyabu abo ngoku nabu emyatsi yikendyuwana.​—Emib. 14:8, 19-22; Ebr. 12:2.

5. Mughalha wethu oyukahulhawamo Bryant mwaghasirwa athi omwa buwathikya bw’omusyakulhu?

⁵ Ni yindi nzira yahi eyo Paulo aghumirayamu balikyabo? Babere basuba e Listra, Ikonio, ne Antiokia, Paulo na Barnaba “mubahira abakulhu busana nabo omo buli kanisa.” (Emib. 14:21-23) Ahathe erithika-thika, abalhume abasombolhawa abo batholere eribya imubahumulikania ebithunga, ngoku abasyakulhu munabwire bakakolha. Lhangira ebya mughalha wethu oyukahulhawamo Bryant akabugha: “Nabere ingahikya emyaka 15, thatha waghe mwasighania eka yethu na mama waghe amahighithwa. Munayowa ingabirisighanibwa kandi munahwa amani.” Ni kyahi ekyawathikaya Bryant erighuma omwa buthuku obukalire obo? Akabugha athi: “Tony, omusyakulhu w’ekithunga iniakabya inianemukanirania naghe okwa mihindano n’okwa bundi buthuku. Iniakambwira okwa bandi ababiribana ebitsibu aliwe ibabya ibanatsemire. Iniakambwira okwa biri omwa Esyonyimbo 27:10 kandi iniakabya inianemukania oku Hezekia, oyuwakolha buthaleghulha nomwakine indi thatha wiwe syabya ky’erileberyako kibuya.” Obuwathikya obu mubwahamba buthi oku Bryant? Akabugha athi: “Busana n’obuwathikya bwa Tony, erighunzerera munatsuka omubiiri w’omughulhu wosi owakatsemesaya.” Abasyakulhu, mubye imunayitheghekire eriwathikya abali nga Bryant, abanga yithagha “ekinywe kibuya” ky’eribahira mw’omuhwa.​—Emi. 12:25.

6. Paulo mwakolesya athi ebyalholirweko by’abandi erihimba balikyabo?

⁶ Paulo mw’ibukya abaramya balikyabu  ngoku busana n’obuwathikya bwa Yehova “endeko nene y’abalhangiri,” muyaghumira ebitsibu. (Ebr. 12:1) Paulo mwaminya ngoku ebyalholirweko ebya kera eby’abathoka erighumira ndeke ebitsibu muthina-muthina byanga lekire balikyabo ibathunga obuthubaha n’eribawathikya erilholha embere erihira amalengekania okwa “muyi wa Nyamuhanga oyuliho.” (Ebr. 12:22) Kwabine bithya namunabwire. Nindi oyuthe ghumibawa akasoma okwa mibere Yehova awathikirayamu Gideoni, Baraka, Dawudi, Samweli, n’abandi bangyi? (Ebr. 11:32-35) Kandi ibbwa ebihambire okwa by’erileberyako by’abawithe erikirirya abamunabwire? Mughulhu mungyi okwa kyaghanda kikulhu thukabya ithunemubana esyobaruha sy’abalikyethu, abo erikirirya lyabu lyaghumibawa babisoma eriyikaniako ly’omughuma w’okwa baghombe ba Yehova abathaleghulha abamunabwire.

7. Erihabulha lya Paulo eriri omwa Abanya Roma 14:19-21 likakweghesayaki?

⁷ Thukahimba balikyethu thukabugha n’erikolha ebikakulha-kulhanaya obuholho omwa kithunga. Sithulilighira eky’erithendi hambangana omwa malengekania kikathughabulha. Kandi sithulilhwira okwa bughabe bwethu hamabya isihali omusingyi we Biblia ow’amathwika. Thalengekania oku kino. Ekithunga kye Roma kyabyamo Abakristayo Abayuda n’Abanya Bihanda. Emighambo ya Musa yabere yikahwaho, ebikakiryo ebya yabya yikahira okw’irya ebyalya birebe mubyahwaho. (Mk. 7:19) Eritsuka okwa buthuku obo, abandi Abakristayo Abayuda mubayowa ibali bwiranda erirya okwa mihanda yosi y’ebyalya. Aliwe abandi Abakristayo Abayuda mubayowa nga sibatholere erikolha ekyo. Ekithunga mukyaghabulhana busana n’omwatsi oyu. Paulo mwahira omuwatho oko mughaso w’erilholha embere erihiraho obuholho kandi mwabugha athi: “Siryowene erirya [enyama] kutse eripulya ebinyu, kutse erikolha ekinduki ekikaleka mulikyenyu iniakolha ebibi.” (Soma Abanya Roma 14:19-21.) Neryo Paulo mwawathikya abikirirya balikyabo erilhangira ngoku erithendi yitheghererania ng’eryo lyangatsandirye abandi n’ekithunga kyosi. Kandi abya inianayitheghekire erihindulha emibere yiwe nuku syathwikalhaye abandi. (1 Kor. 9:19-22) Nethu kuthya thwangana himba abandi n’erilholha embere erihiraho obuholho thwamathendianza thuthi emyatsi yikolhawe ngoku thwanzire.

8. Paulo mwakolhaki omughulhu habya omwatsi owahamba nabi okwa buholho bw’ekithunga?

⁸ Paulo mwahiraho eky’erileberyako ekyuwene omw’ilhangira athi akabya iniane buholho n’abathalighirana oko myatsi mikulhu-mikulhu. Ng’eky’erileberyako, abandi omwa kithunga ky’omwa kighana ky’erimbere mubahathikana bathi Abanya Bihanda ababiribya Bakristayo babanibawe, obundi erisagha bathi abandi Bayuda baleke eribatsweba. (Gal. 6:12) Paulo mwathalighirana n’amalengekania ayo n’ahake, aliwe omwakanya k’erihathikana athi amalengekania wiwe w’aghenderaweko, omw’iyikehya mwabugha athi omwatsi oyo athumirawe abakwenda n’abasyakulhu e Yerusalemu. (Emib. 15:1, 2) Busana n’ekyo, erikolha oko myatsi eyo omo nzira eyi mukyawathikya Abakristayo abo erilhangira bathi omwa kithunga mukabya imune obutseme n’obuholho.​—Emib. 15:30, 31.

9. Thwanga kwama thuthi eky’erileberyako kya Paulo?

⁹ Hamabya erithendi yitheghererania erikalire, thukakulha-kulhanaya obuholho omw’isondekania obusondoli okwa abo Yehova abirisombolha  eritheya ekithunga. Mughulhu mungyi, obusondoli obuseghemere okwa Biblia bwangana banika omwa bitabu byethu kutse omwa by’erighenderako ebya ekithunga kikaha. Thwamahwerya amalengekania w’okw’ighendera okwa busondoli obu omwakanya k’erighendera okwa malengekania wethu, ithukendi leka omwa kithunga imwabya obuholho.

10. Ni kindi kyahi ekya Paulo akolha erikulha-kulhania obuholho omwa kithunga?

¹⁰ Paulo mwakulha-kulhania obuholho omw’ikania oko mibere mibuya y’abalikyabu, butsira okwa mibi. Ng’eky’erileberyako, akaghunzerera ebaruha yiwe okwa Banya Roma, Paulo mwahulha abandu bangyi okwa mena kandi mughulhu mungyi iniak’ongerako eribasima kutse iniabugha ebibahambireko. Thwangana gherererya Paulo omwahulha emibere mibuya y’abalikyethu. Thukabya thukakolha ekyo, thukaleka balikyethu ib’ongera eribya n’enzumwa eyikaleka ibabya bughuma, ekindu ekikahimba ekithunga omo lhwanzo.

11. Thwanga suba-subania thuthi obuholho hakabya erithendi yitheghererania?

¹¹ Okwa bundi buthuku, nibya n’Abakristayo abakulire bunyakirimu bangana ghana erilighirana kutse ibakakalhukana. Ekyo mukyabya oku Paulo na munywani wiwe w’okwa ndungu ya Barnaba. Abalhume babiri aba mubathalighirana n’ahake okwa ky’erilebya nga baghende na Mariko okwa lhughendo lhwabu lhw’obumisyonare olhwakwamako. “Mubakubisanania obuhaka” kandi bamaghabulhana. (Emib. 15:37-39) Aliwe Paulo, Barnaba, na Mariko mubasuba-subania obughuma bwabu, erikangania ngoku mubalhangira obuholho n’obughuma bw’ekithunga mwa by’obughuli. Enyuma waho, Paulo mwakania ndeke oku Barnaba na Mariko. (1 Kor. 9:6; Kol. 4:10) Nethu kuthya thutholere ithwaghunzaho erithendi yitheghererania lyosi-lyosi erya thwanga thunga n’abandi omwa kithunga n’erilholha embere erihwerya amalengekania okwa mibere yabu mibuya. Omwa nzira eyo, ithukendi kulha-kulhania obuholho n’obughuma.​—Efe. 4:3.

12. Ni bitsibu nga byahi ebya balikyethu bakabana?

¹² Thwangana himba balikyethu omw’ighumya erikirirya lyabu omu Yehova. Abandi abahughu babu abathikirirye kutse abo bakakolha nabu kutse abo bakasoma nabu bakabasiningulira. Abandi banemughumira amalhwere awakalire kutse banemulengaho erirwanisya eriponesibwa. N’abandi babirighunza emyaka ibane Bakristayo ababatizibirwe kandi bamabirighunza buthuku buuli ibanalindire erihwaho ly’omughulhu mubi ono. Emibere eyi yangana lenga okw’ikirirya ly’Abakristayo munabwire. Ab’omwa kithunga ky’omwa kighana ky’erimbere mubabana ebitsibu ebiri ng’ebyo. Paulo mwakolhaki erighumya balikyabo?

13. Paulo mwawathikya athi abasiningulirawa busana n’ebyo b’ikirirye?

¹³ Paulo mwakolesya Amasako erihimba erikirirya ly’abalikyabo. Ng’eky’erileberyako, Abakristayo Abayuda bangabya imubayowa isibawithe eky’eribugha abahughu babu abathikirirye bakabatsambulikania bathi edini y’Ekiyuda yilengire Ekikristayo. Ahathe erithika-thika, ebaruha ya Paulo okwa Baebrania muyaghumya kutsibu Abakristayo abo. (Ebr. 1:5, 6; 2:2, 3; 9:24, 25) Banga kolesirye erisoborera eryo Paulo aha eribawathikya erihunia abahangiriri abo. Munabwire thwangana wathikya balikyethu abakasiningulirawa ngoku banga kolesya ebitabu byethu ebiseghemere okwa Biblia ibo erithoka erisoborera ebyo bikirirye. Kandi abalere bamasekereribwa busana  n’erikirirya omw’ihangika, ithwangana bawathikya eribana emyatsi omwa syobrokyuwa Was Life Created? na The Origin of Life​—Five Questions Worth Asking erikangania ekikaleka ib’ikirirya bathi engebe yahangikawa.

14. Nomwakine indi Paulo aby’awithe bingyi by’erikolha omwa mubiiri w’erithulira n’erikangirirya, mwakolhaki?

¹⁴ Paulo mwahira omwa balikyabo mw’omuhwa w’erikangania olhwanzo omwa “mibiiri eyuwene.” (Ebr. 10:24) Mwawathikya balikyabo omwa by’abugha n’omwa by’akolha. Ng’eky’erileberyako, omughulhu balikyabo e Yudea babya omo nzalha, Paulo mwasangira omo mubiiri w’eribaghabira obuwathikya obwa bahebawa. (Emib. 11:27-30) Nomwakine indi Paulo aby’awithe bingyi by’erikolha omw’ithulira n’erikangirirya, mughulhu wosi iniakasondekanaya esyonzira sy’eriwathikiryamo abawithe obuyithawa bw’ekinyamubiri. (Gal. 2:10) Omw’ikolha ekyo, mwaghumya eriyikethera ly’abalikyabo ngoku Yehova akendi batsomana. Munabwire thukabya thukahayo endambi, akaghalha, n’ebya thwasi eriwathikya hakabya ebitsinduli, nethu thukahimba erikirirya ly’abalikyethu. Kwa bikanabya bithya thukahayo mughulhu wosi erisighika omubiiri w’ekihugho kyosi. Omwa syonzira esi n’esindi, thukawathikaya balikyethu eriyikethera ngoku Yehova syendi syabasighania.

15-16. Thutholere ithwathwalha thuthi abo erikirirya lyabu lyabiritseka?

¹⁵ Paulo mwathalhuhirira okwa babya bawithe erikirirya eritsekire. Mwabakwira obulighe kandi iniakakanaya nabu omwa nzira y’olhwanzo kandi eyikahimba. (Ebr. 6:9; 10:39) Ng’eky’erileberyako, omwa baruha yiwe yosi okwa Baebrania mughulhu mungyi iniakakolesaya ekinywe ‘ithwe’ na “nethu,” erikangania ngoku nayu abya w’erighendera okw’ihabulha eryo aha. (Ebr. 2:1, 3) Nga Paulo, sithuli lhuhirira okwa bawithe erikirirya eritsekire. Omwakanya  ky’ekyo, thukabahimba omw’ibatsomana erilhua okwa muthima. Omwa nzira eyi, thukakanganaya ku thubanzire. Omulenge wethu owalimu olhwanzo kandi owahehere angana leka ithwahimba abandi.

¹⁶ Paulo mwakakasya balikyabo ngoku Yehova anasi emibiiri yabu mibuya. (Ebr. 10:32-34) Thwangana kolha ekiri ng’ekyo thukawathikya omwikirirya mulikyethu oyo erikirirya liwe lyabiritseka. Ithwangana mubwira thuthi athubwire ng’aminya athi ekwenene kutse ithwamuhira mw’omuhwa ow’erilengekania okwa buthuku obwa Yehova amuwathikirayamo. Thwangana kolesya akaghisa ako erimukakasya ngoku Yehova syali athibirirwa emibiiri yiwe ey’olhwanzo eya kera kandi ngoku syendi sya musighania n’omwa buthuku obukasa. (Ebr. 6:10; 13:5, 6) Erikanirania eri lyangana hira omwa balikyethu banzwa mw’omuhwa w’erilholha embere erikolera Yehova.

17. Ni byahi ebya thwanga lholha embere erikolha?

¹⁷ Ngoku omuhimbi akanabya iniane muwania emihimbire yiwe, nethu thwangan’ongera eryuwania emibere thukahimbiramo abandi. Thwangana wathikya abandi erithasyabana akaghalha k’erighumira ebitsibu omw’ibabwira okwa by’erileberyako ebya kera eby’abayiyinaya. Thwangana kulha-kulhania obuholho omw’ahulha ebibuya by’abandi, erilhangira thuthi obuholho bukabya ibuneho, n’eribusuba-subania omughulhu hali erithendi yitheghererania. Kandi thwangana lholha embere erihimba erikirirya ly’abalikyethu omw’ibabwira okwa kwenene eyiri omwa Biblia, omw’ibawathikya, n’eriwathikya owosi-wosi oyuwabiritseka bunyakirimu.

18. Wamathwamu erikolhaki?

¹⁸ Abakakolha okwa mubiiri w’obuhimbe bw’ekiteokrasi bakabana etseme n’eriyowa ndeke. Thwangana bana etseme n’eriyowa ndeke thukawathikya okwa buhimbe bw’obunyakirimu omwa kithunga. Erithendibya ng’amanyumba awakendi syahwaho, ebikalhwiririra omwa mubiiri wethu byangana syabyaho kera na kera! Ka thuthwemu erilholha embere ‘erisibikania, n’erihimbana.’​—1 Tes. 5:11.