1. Busana naki Yesu mwasaba Yehova athi atheghaye abigha biwe?

 OMW’ITHUMBI athali aholha, Yesu mwasaba Thatha wiwe w’elhubulha y’ekindu eky’embaghane. Mwasaba Yehova athi atheghaye abigha biwe. (Yn. 17:15, 20) Ni kwenene, mughulhu wosi Yehova akatheghaya n’eritsomana abandu biwe. Aliwe, Yesu abya inianasi ngoku abigha biwe bangabwene erihakanisya linene erilhua oku Sitani. Kandi Yesu abya inianasi ngoku bakendi yithagha obuwathikya bwa Yehova erithoka erirwanisya ebithegho bya Diabolo.

2. Ngoku kiri omwa Esyonyimbo 33:18-20, busana naki sithutholere thukasagha ebitsibu?

² Ekihugho kya Sitani kikalethera Abakristayo b’okwenene b’emihitho minene munabwire. Thukabana ebitsibu ebyanga thughunza amani kandi nibya ebyanga lenga okwa buthaleghulha bwethu oku Yehova. Aliwe ngoku thukendi lhangira omo mwatsi ono, sihali ekyanga leka thukasagha. Yehova anemuthutheya​—analhangire ebitsibu ebya thukalhabamu, kandi akabya inianayitheghekire erithuwathikya eribighumira. Thulebaye eby’erileberyako bibiri bye Biblia ebikakanganaya ngoku Yehova “akatheghaya abakamubaha.”​—Soma Esyonyimbo 33:18-20.

3. Ni mughulhu wahi thwanga yowa nga thuli ithwibene?

³ Nomwakine indi thuli omw’ihiika linene ery’abaramya balikyethu, hanganayira ithwayowa ithuli ithwibene. Ng’eky’erileberyako, abalere bangana yowa ng’abali ibobene omughulhu bakasoborera ebya bikirirye embere sy’abo bakasoma nabu okwa sukuru kutse omughulhu bakahumira omwa kindi kithunga. Abangyi omw’ithwe thwanganahwa amani kutse thwanganabya ithunemurwanisya eriyowa erithatholere, erilengekania thuthi thwangana rwanisya eriyowa eryo ahabwethu. Ithwangana sagha  eribwira abandi b’okw’iyowa lyethu kundi thukayowa thuthi bangana ghana erithuyitheghererya. Okwa bundi buthuku, ithwangana bulha nga hane oyuthutsomene. Eriyowa ithuli ithwibene​—mbulha ni busana n’enzumwa yahi—​kyangana leka ithwayowa nga sithuwithe kiwathikya kandi ithwabya omwa birengekanio. Yehova syali athanza thukayowa thuthya. Busana naki ithwabugha ekyo?

4. Ni kyahi ekyaleka omuminyereri Eliya iniabugha athi: ‘Naghe, n’ingye nyikinasiya’?

⁴ Thuthalengekania okwa ky’erileberyako ky’omulhume omuthaleghulha ya Eliya. Yezebeli abya iniabirilhahirya athi akendi mwitha, neryo Eliya abya iniane muthibitha ahabw’ebiro ebilhabire oku 40 eribalya engebe yiwe. (1 Bam. 19:1-9) Erighunzerera, iniane iyuwene omo mwangalhu mwalhakira Yehova athi: ‘Naghe, n’ingye [ng’omuminyereri] nyikinasiya.’ (1 Bam. 19:10) Habya ihane abandi baminyereri omwa Israeli; Obadia abya iniabirithoka erilhamya abaminyereri 100 omwa byalha by’omwithi Yezebeli. (1 Bam. 18:7, 13) Neryo kwesi, ni kyahi ekyaleka Eliya iniayowa ng’ali iyuwene? Mbwino mwalengekania athi abaminyereri abo Obadia alhamaya abosi babya ibabiriholha? Mbwino angabya imwayowa iniali iyuwene kundi abandi mubathamuyiyungako omw’ikolera Yehova enyuma wa Baali erilhangirika ku ni nyamuhanga w’amabehi okwa Kithwe Karmeli? Mbwino mwayowa isihali oyuwasi ebitsibu eby’anemulhabamu, kutse erilengekania nga sihali n’oyutsomene? E Biblia siyiri soborera ebyosi ebihambire okw’iyowa lya Eliya. Aliwe ekya thwasi kiri kithi Yehova mwayitheghererya ekyaleka Eliya iniayowa ng’ali iyuwene kandi abya inianasi enzira eyonyine-nyine eyo angamuwathikiryamu.

5. Yehova mwakakasya athi Eliya ngoku syali iyuwene?

⁵ Yehova mwawathikya Eliya omwa syonzira nyingyi. Mwahira omu Eliya mw’omuhwa w’erikania. Mirundi ibiri mwabulya Eliya athi: “Wukakolha hano hoki kwehi?” (1 Bam. 19:9, 13) Okwa buli murundi, Yehova iniakahulikirira Eliya akamubwira ebyosi ebiri okwa muthima. Yehova mwasubirya Eliya omw’iyibisulha okw’iyo n’erimukangania amaaka wiwe. Kandi mwakakasya Eliya ngoku anawithe abandi bangyi abakamuramaya. (1 Bam. 19:11, 12, 18) Ahathe  erithika-thika, Eliya mwahumulikana enyuma w’eribwira Yehova y’ebyosi ebiri okwa muthima n’eriowa erisubirya Liwe. Yehova mwaha Eliya y’emibiiri mingyi mikulhu-mikulhu. Mwamubwira athi ahakabaye Hazaeli ng’omwami we Suria, Yehu ng’omwami we Israeli, na Elisa ng’omuminyereri. (1 Bam. 19:15, 16) Omw’iha Eliya y’emibiiri eyi, Yehova mwamuwathikya erihira amalengekania w’okwa myatsi eyitholere. Kandi Nyamuhanga mwamuha omunywani w’okwa ndungu, ya Elisa. Wanga bana wuthi obuwathikya bwa Yehova wamayowa nga wuli iwuwene?

6. Ni byahi ebya wanga hira omwa musabe wamayowa nga wuli iwuwene? (Esyonyimbo 62:8)

⁶ Yehova anzire iwamusaba. Akabya inianalhangire ebya wukalhabamu, akakukakasaya ngoku akendi hulikirira emisabe yawu okwa ndambi yosi-yosi. (1 Tes. 5:17) Akatsemera erihulikirira baramya biwe. (Emi. 15:8) Ni byahi ebya wanga hira omwa musabe wamayowa nga wuli iwuwene? Bwira Yehova y’ebyosi ebiri okwa muthima, ngoku Eliya akolha. (Soma Esyonyimbo 62:8.) Mubwire ebikakulyambaya kandi ngoku bikaleka iwayowa. Saba Yehova wuthi akuwathikaye erighumira eriyowa lyawu. Ng’eky’erileberyako, wamayowa nga wuli iwuwene kandi iwukasagha erithulira okwa sukuru, saba Yehova akuhe obuthubaha obo wukayithagha erithoka erikania okw’ikirirya lyawu. Nibya iwangana musaba wuthi akuhe amenge w’erisoborera ebya wikirirye omo menge. (Lk. 21:14, 15) Wamayowa iwuhwere amani, bwira Yehova wuthi akuwathikaye wanakibwirako Omukristayo oyukulire bunyakirimu. Kandi wangana saba Yehova wuthi awathikaye oyo wukayihanuzayako akuhulikirire n’erikuyitheghererya. Bwira Yehova y’ebyosi ebiri okwa muthima, lhangira emibere akasubirayamo emisabe yawu, kandi ligha obuwathikya bw’abandi; siwendi thasyayowa nga wuli iwuwene.

7. Eky’erileberyako kya Mauricio kikakweghesayaki?

⁷ Ithwe bosi Yehova abirithuha omubiiri w’omughaso ow’erikolha. Wangana yikethera ngoku akabya inianalhangire kandi ngoku akasima ebyosi ebyo wukakolha eriberererya esyonzunzo syawu omwa kithunga n’omw’ithulira. (Esy. 110:3) Eriyihwerya omwa mubiiri oyu kyanga kuwathikya kithi wukayowa nga wuli iwuwene? Thulebaye eky’erileberyako kya mughalha wethu omulere oyukahulhawamo Mauricio. * Buthuku buke Mauricio alibatizibirwe, omughuma w’okwa banywani biwe b’okwa ndungu lyolho-lyolho mwatsuka erisighania ekwenene. Maurico akabugha athi: “Erilhangira akayisununulha oku Yehova mukyanyihambako kutsibu. Munabulha nga ng’anemwendi thoka eriberererya eriyihayo lyaghe oku Yehova n’erisighalha omw’ihiika liwe. Munayowa ingali ingyuwene kandi munalengekania indi sihali oyukayitheghereraya eriyowa lyaghe.” Ni kyahi ekya wathikaya Mauricio? Akabugha athi,  “Munakanyirirya omubiiri waghe w’erithulira. Ekyo mukyaleka ingaleka eriyilengekaniako n’erilhusya amalengekania w’okw’iyowa lyaghe erithuwene. Munatsema kandi iningayowa isindi ingyuwene ingakolha n’abandi omw’ithulira.” Ni kwenene, nibya n’omughulhu sithulithulira haghuma n’abalikyethu busu okwa busu, erisangira haghuma nabu omwa mibiiri ng’erihandika esyobaruha n’erithulira okwa simu bikathughumaya. Ni kindi kyahi ekyawathikaya Mauricio? Akongerako athi: “Kandi munayihwerya omwa mibiiri y’ekithunga. Munahira omuthima waghe w’okw’ithegheka n’erilhabya ebitsweka by’abigha. Emibiiri eyo muyaleka ingayowa Yehova n’abandi ibakanyilhangira mw’omughaso.”

8. Ebitsibu ebikalha-kalire byanga thuhambako bithi?

⁸ Thunasi ku thukendi bana ebitsibu omwa biro by’enyuma-nyuma bino. (2 Tim. 3:1) Nomwabine, ekitsibu kirebe kyangana thuhikako isithuyitsulirye. Kitsumbukirania thwangana bana ekitsibu ky’obunakwa, obulhwere obukalire, kutse ithwaholerwa. Okwa buthuku obo, ithwanganabya omwa bulighe n’erihwa amani, kutsibu-tsibu ebitsibu byamabya nga byamasa ekindi omwa kindi kutse nibya okwa buthuku bughumerere. Aliwe wibuke, Yehova anathuhirire kw’eriso liwe, kandi busana n’obuwathikya bwiwe thwangana ghumira ekitsibu kyosi-kyosi ithunasikire.

9. Kanaya okwa bighuma by’okwa bitsibu ebyo Yobu abana.

⁹ Thalengekania okwa mibere Yehova awathikirayamu omulhume muthaleghulha Yobu. Omwa kathuku kake mwabana ebitsibu binene ebikalire. Omwa kiro kighuma, Yobu mwaminya ngoku habiribya ebindu ebikakukubalhaya ebyaghunzaho ebisoro biwe, byamitha abaghombe biwe, n’eky’obulighe ibbwa eritha n’abaana biwe banzwa. (Yobu 1:13-19) Buthuku buke enyuma waho, iniakine omwa bulighe bunene kutsibu, mwalhwalha obulhwere obukalhuma kutsibu kandi obukanubaya. (Yobu 2:7) Emibere Yobu abyamu yabya yikalire kyamaleka iniayisunza olhuholho omw’ibugha athi: “Sinendisyakotha.”​—Yobu 7:16.

10. Yehova mwaha athi Yobu y’eby’akayithagha erithoka erighumira ebitsibu biwe? (Lebaya ekisasani ky’okwa kidipa.)

¹⁰ Yehova abya inianahirire oku Yobu kw’eriso liwe. Kundi Yehova aby’anzire Yobu, mwamuha eby’akayithagha erithoka erighumira ebitsibu biwe. Yehova mwakania na Yobu erimw’ibukya amenge Wiwe manene n’eritsomana ly’olhwanzo eryo awithire ebihangikwa Biwe. Mwakania okwa bisoro bingyi ebikaswekaya. (Yobu 38:1, 2; 39:9, 13, 19, 27; 40:15; 41:1, 2) Kandi Yehova mwakolesya omulhwana muthaleghulha oyukahulhawamo Elihu erighumya n’erihumulikania Yobu. Elihu mwamukakasya ngoku mughulhu wosi Yehova akahemba abaramya biwe busana n’eriyiyinia lyabu. Aliwe Yehova mwahira omu Elihu mw’omuhwa w’erimuha erihabulha lirebe ery’olhwanzo. Elihu mwawathikya Yobu erihira amalengekania w’okwa mwatsi mukulhu omw’imubukya omwanya wiwe embere sya Yehova, Omuhangiki w’obuhangwa bwosi. (Yobu 37:14) Kandi Yehova mwaha Yobu y’omubiiri; abya w’erisabira banywani biwe basathu ababya ibabirihalya. (Yobu 42:8-10) Munabwire, Yehova akathuwathikaya athi thukabana ebitsibu ebikalire?

11. Ni humulikania lyahi eryo e Biblia yikathuha omughulhu thuwithe ebitsibu?

¹¹ Yehova syali kanaya nethu busu okwa busu ngoku akanaya na Yobu, aliwe akakanaya nethu erilhabira omwa Kinywe kiwe, e Biblia. (Abar. 15:4) Akathuhumulikanaya omw’ithuha amaha w’obuthuku obukasa. Thulebaye emyatsi mike omwa Biblia eyanga thuhumulikania thukabana ebitsibu. Omo Masako, Yehova akathukakasaya  athi sihali kindu​—nomubyangabya bitsibu ebikalire—​“ekyanga thoka erithughabulha oko lhwanzo [lhwiwe].” (Abar. 8:38, 39) Kandi akathukakasaya ngoku “ali hakuhi oko bosi abakamubirikira” omw’isaba. (Esy. 145:18) Yehova akathubwira athi thwamamuyikethera, ithwangana ghumira ekitsibu kyosi-kyosi kandi nibya ithwabya ithunawithe etseme okwa lhulengo lhulebe thukaghalhwa. (1 Kor. 10:13; Yak. 1:2, 12) Kandi Ekinywe kya Nyamuhanga kikathwibukaya ngoku ebitsibu byethu ni by’obuthuku buke byamalinganisibwa n’ekihembo kya kera na kera ekyo akathuha. (2 Kor. 4:16-18) Yehova akathuha amaha w’ekwenene ngoku akendi syaghunzaho enzuko y’ebitsibu byethu ebyosi​—Sitani Diabolo n’abosi abakagherereraya emibere yiwe mibi. (Esy. 37:10) Wunahambire amasako malebe awanga kuwathikya erighumira ebitsibu eby’obuthuku obukasa?

12. Yehova anzire ithwakolhaki thwamabya b’erighasirwa ndeke omwa Kinywe kiwe?

¹² Yehova anzire ithwahiraho obuthuku obw’eriyeghesya e Biblia mughulhu wosi n’erilengekania ndeke okwa bya thukasoma. Thukabya thukaghendera okwa bya thuk’igha, erikirirya lyethu likayongera kandi ithwongera eriyithunda hakuhi na Thatha wethu w’elhubulha. Busana n’ekyo, thukabana amaaka w’erighumira ebitsibu byethu. Kandi Yehova akaha abakayikethera Ekinywe kiwe b’omulimu wiwe abuyirire. Kandi omulimu oyo angana thuha “obuthoki bunene” obw’erighumira ekitsibu kyosi-kyosi.​—2 Kor. 4:7-10.

13. Ebyalya by’obunyakirimu ebya “omughombe oyuthereghulha n’owamenge” akathuha byanga thuwathikya bithi erighumira ebitsibu?

¹³ Busana n’obuwathikya bwa Yehova, “omughombe oyutheleghulha n’ow’amenge” akahulhukaya emyatsi mingyi, esyovidiyo, n’emiziki ebyanga thuwathikya erighumya erikirirya lyethu n’erisighalha ithunatheghirye bunyakirimu. (Mt. 24:45) Thutholere ithwakolesya ndeke emyatsi ng’eyi eyikasira okwa buthuku. Mwali wethu erilhua e United States, lino-lino mwakanakangania erisima liwe busana n’ebyalya ebyosi ebi eby’obunyakirimu. Mwabugha athi: “Omwa myaka yaghe 40 inganemukolera Yehova, obuthaleghulha bwaghe bwabirilengwako ngendo nyingyi.” Mwabana ebitsibu ebikalire​—sokulhu wiwe mwaholha omufuyi oyuthamire akamutomera, ababuthi biwe mubalhwalha obulhwere obukalire obwa bitha, nayu mwalhwalha ekansa emirundi ibiri. Ni kyahi ekya muwathikaya erighuma? Akabugha athi: “Mughulhu wosi Yehova abya inianemunyitsomana. Ebyalya eby’obunyakirimu ebyo abiribya  inianemuthuha erilhabira omwa mughombe oyuthereghulha n’ow’amenge byabirinyiwathikya erighuma. Busana nabyo, nangana yowa ngoku Yobu ayowa, oyuwabugha athi: ‘Erihika okw’iholha lyaghe sindiendisyaghana erithunganene lyaghe!’”​—Yobu 27:5.

14. Yehova akakolesaya athi abaramya balikyethu erithuwathikya omwa mughulhu w’ebitsibu? (1 Abanya Tesalonika 4:9)

¹⁴ Yehova abirithendeka abandu biwe erianzana n’erihumulikangania omwa mughulhu w’obulighe. (2 Kor. 1:3, 4; soma 1 Abanya Tesalonika 4:9.) Omw’igherererya Elihu, balikyethu banzire kutsibu erithuwathikya erisighalha bathaleghulha omughulhu thukabana ebitsibu. (Emib. 14:22) Ng’eky’erileberyako, thalhangira ngoku ab’omwa kithunga kya Diane bamuhumulikanaya n’erimuwathikya erisighalha inianaghumire bunyakirimu mwira wiwe abilhwalha obulhwere obukalire kutsibu. Akabugha athi: “Sikyabya kyolho. Aliwe muthwayilhangirira amaboko wa Yehova aw’amaaka n’olhwanzo omwa mezi awakalire ayo. Ekithunga kyethu mukyayira eky’erikolha erithuwathikya. Ibakathubungira, ibathutherera, kandi ibathuwako, ebindu ebyo thwabya thukayithagha erithoka erighuma. Kundi singasi erifugha ematoka, balikyethu bakalhangira bathi ngaghenda okwa mihindano n’omw’ithulira ingathoka.” Ka ni mughisa eribya omw’ihiika ly’obunyakirimu ery’olhwanzo ng’eri!

15. Busana naki ithwakakasya ngoku thwangana ghumira ebitsibu?

¹⁵ Ithwe bosi thukendi bana ebitsibu. Aliwe ngoku thwamabirilhangira, sithwanga thoka erighumira ebitsibu ahabwethu. Nga thatha ow’olhwanzo, mughulhu wosi Yehova akathutheghaya. Ane okwa lhuhandi lhwethu, anayitheghekire erithuhulikirira thukamusaba obuwathikya. (Isa. 43:2) Thuyikethere ngoku thwangana thoka erighumira ebitsibu kundi abirithuha ebyosi ebyo thukayithagha eribighumira. Abirithuha ekihembo ky’omusabe, e Biblia, ebyalya bingyi by’obunyakirimu, n’olhughanda lhw’abalikyethu olhuli mw’olhwanzo erithuwathikya omwa mughulhu w’ebitsibu.

16. Thwanga sighalha thuthi omwa butheya bwa Yehova obw’olhwanzo?

¹⁶ Ka thutsemire eribya ithuwithe Thatha wethu ow’elhubulha oyukathutheghaya! “Emithima yethu yasyatsema busana nayu.” (Esy. 33:21) Thwangana kangania Yehova ku thukasima eritsomana liwe ly’olhwanzo omw’ikolesya ndeke ebyosi eby’akathuha erithuwathikya. Kandi thutholere ithwakolha owethu ow’erisighalha omwa butheya bwa Nyamuhanga. Ni bugha ambu, thwamalholha embere erikolha ngoku thwanga thoka eriowa Yehova n’erikolha ebihikire embere siwe, iniakendi thutheya kera na kera!​—1 Pet. 3:12.