Omo mwatsi oyo, muthw’igha ngoku hali omwatsi mughuma musa owahambire okwa bihangikwa byosi eby’amenge: eriyira erina likulhu erya Yehova mwa libuyirire. Omwatsi w’ehamuli ya Yehova ey’erithabalha—ni bugha ambu, emithabalire ya Yehova y’eyuwene kutsibu—ni kighuma ky’okwa biri omo mwatsi mughuma mukulhu oyo. N’ekindi ekiri omo mwatsi mughuma mukulhu oyo, w’omwatsi w’erithunganene ery’abandu.

Busana naki lino thukahira omuwatho okwa ky’eribugha indi omwatsi mukulhu oyo ahambire okwa lina lya Yehova n’eriyiralyo mwa libuyirire? Thulebaye esyonzumwa isathu.

Ey’erimbere, Sitani mwatsandya oku Yehova kw’erina, omw’irima lye Edeni. Ekibulyo eky’amabehi ekyo Sitani abulhaya Eva kyabya ikyamamanyisya kithi Yehova ni Nyamuhanga omukurungu oyukahira oko bandu biwe kw’ebikakiryo ebithatholere. Neryo Sitani mwahakanisya ebinywe bya Yehova kinyamwisi, omw’ibugha athi Nyamuhanga ni mubehi. Neryo mwabugha oko lina lya Yehova kw’amabehi. Mwabya “Diabolo,” ekikamanyisaya “omuhangiriri.” (Yn. 8:44) Kundi Eva mwaligha amabehi wa Sitani, Eva mwathowa Nyamuhanga, amayisamambulha okwa buthabali bwiwe. (Enz. 3:1-6) Erihika namunabwire, Sitani anemutsandya oku Nyamuhanga kw’erina, erilhalhania oku Yehova kw’amabehi. Abakaligha amabehi ng’ayo bakabya ibangana ghana eriowa Yehova. Neryo oko bandu ba Nyamuhanga, amabehi awahambire okwa lina lya Yehova eribuyirire ni buthebulingirirania obukalire. Y’enzuko y’eriaghalhwa eryosi n’obubi obuli omwa kihugho.

Eyakabiri, ebihangikwa ebyosi erithoka erighasirwa, Yehova abirithwamu eriyira erina liwe mwa libuyirire, erilhusya kulyo kw’amabehi wosi. Ekyo ni kikulhu kutsibu embere sya Yehova. Busana n’ekyo akabugha athi: “Nasyimira ekibuyirire ky’erina lyaghe linene.” (Eze. 36:23) Kandi Yesu mwakangania ndeke-ndeke ekitholere ikyabya embere omwa misabe y’abaghombe ba Yehova abosi abathaleghulha omughulhu abugha athi: “Erina lyawu libye libuyirire.” (Mt. 6:9) Ngendo nyingyi e Biblia yikahira omuwatho w’okwa mughaso w’eriha erina lya Yehova ly’olhukengerwa. Thulebaye eby’erileberyako bike: ‘Muhe [Yehova] y’olhukengerwa olhutholere erina liwe.’ (1 Emy. 16:29; Esy. 96:8) “Mwimbe olhukengerwa lhw’erina liwe.” (Esy. 66:2) ‘Nasyakangania obukulhu [bw’erina] lyawu kera na kera.’ (Esy. 86:12) Omughuma w’okwa mirundi eyo Yehova iyuwene-wene abughira elhubulha w’owabya okwa hekalu e Yerusalemu aho Yesu abughira athi: “Thatha, wulethe olhukengerwa oko lina lyaghu!” Na Yehova mwasubirya athi: “Nabirihamyalyo, kandi nasyaswahamyalyo.”—Yn. 12:28. a

Eyakasathu, ekighendererwa kya Yehova ekithulhaho kihambene n’erina liwe. Lengekanaya oku kino: Enyuma w’erilengesibwa ery’erighunzerera erikendi syakwama Erithabalha lya Kristo ery’Emyaka Rukumi, ni kyahi ekikendi syakwamako? Mbwino ebihangikwa by’amenge bikendi syalholha embere eribya ibinaghabulene oko mwatsi mukulhu ow’eriyira erina lya Yehova mwa libuyirire? Erithuwathikya erisubirya ekibulyo ekyo, thuyibukaye ebindu bibiri ebihambene —erithunganene ly’abandu n’ehamuli y’erithabalha obuhangwa bwosi. Mbwino erithunganene ly’abandu ababirikangania obuthaleghulha likendi syalholha embere erilengwako? Eyihi. Bakendisyabya ibabirihikana kandi ibabirilengesibirwa ighuma. Bakendi syabya ibabiribana engebe y’erikotha. Omwatsi w’ehamuli ya Yehova ow’erithabalha obuhangwa bwosi anemwendi syalholha embere eribya mwatsi ogho ebihangikwa by’amenge bikakanayako, kutse nibya erileka ibyaghabulhana? Eyihi. Emithabalire ya Yehova eyitholere kandi eyilengireyo yikendi syabyaho kera na kera. Kandi ibbwa erina lya Yehova?

Okwa buthuku obo, erina lya Yehova likendi syabya iryabiriyirirwa ighuma mwa libuyirire, iryabirilhusibwako amabehi awosi. Aliwe likendi syalholha embere eribya inina kikulhu embere sy’abathaleghulha abosi omwa lhubulha n’okwa kihugho. Busana naki? Kundi bakendi syalhangira Yehova akalholha embere erikolha ebindu ebikaswekaya. Thalengekania oku kino: Kundi omw’iyikehya Yesu akendi syasubulirya Yehova y’erithabalha eryosi, Nyamuhanga “asyathabalha ndeke oko byosi.” (1 Kor. 15:28) Enyuma waho, abandu okwa kihugho bakendi syatsema “omo bwiranda n’olhukengerwa lhw’abaana ba Nyamuhanga.” (Abar. 8:21) Kandi Yehova akendi syaberererya ighuma ekighendererwa kiwe ekithulhaho eky’erihindania haghuma ebihangikwa byosi eby’amenge ebiri omwa lhubulha n’okwa kihugho ng’erihiika linene eriri bughuma.—Efe. 1:10.

Ebyosi ebyo bikendi syahamba bithi okw’ihiika lya Yehova omo lhubulha n’oko kihugho? Omo kwenene, thukendi syabya ithune n’eriyisunza linene ery’erilholha embere eripipa erina lya Yehova eryuwenenga. Omuhandiki w’esyonyimbo ya Dawudi mwasondolibwa erihandika athi: “Mupipe Omwami Mukulhu Nyamuhanga . . . Mupipe erina liwe ly’olhukengerwa kera na kera.” (Esy. 72:18, 19) Erihika kera na kera, thukendisyabya ithunemubana esyonzumwa mbyaka kandi esikatsemesaya esy’erikolha ekyo.

Kundi nibya, erina lya Yehova likimanira ebyosi ebimuhambireko. Ekikulhu kutsibu, erina liwe likathwibukaya olhwanzo lhwiwe. (1 Yn. 4:8) Thukendi syabya ithune mwibuka ngoku Yehova athuhangika busana n’olhwanzo, ahayo ekihongo ky’endongolya busana n’olhwanzo, kandi ku mwakangania emithabalire yiwe eyithunganene busana n’olhwanzo. Aliwe thukendi syalholha embere erilhangira Yehova akakangania ebihangikwa biwe by’olhwanzo lhunene. Erihika kera na kera, thukendi syabya n’omuhwa w’eryongera eriyithunda hakuhi nayu nga Thatha wethu n’eryimba esyonyimbo sy’eripipa erina liwe ery’olhukengerwa.—Esy. 73:28.