1. Ni kyahi ekyanga thuwathikya erigha eritsemera eriyeghesya amaminyereri we Biblia?

 MUGHALHA wethu ya Ben akabugha athi: “Ngatsemera eriyeghesya amaminyereri we Biblia.” Mbwino nawu kwabine bithya? Kutse wukayowa amaminyereri we Biblia ng’akalire eriyitheghererya? Nibya iwangana yowa eriyeghesya okwa maminyereri nga lyangan’itha bulhundu. Aliwe iwukendibya wuk’ongera eriminya ekyaleka Yehova iniahiragho omwa Kinywe kiwe, iwangana hindulha amalengekania wawu.

2. Omwatsi ono akendi hira omuwatho w’okuki?

² Omo mwatsi ono, thukendi kania okwa kikaleka ithwabya b’erigha okwa maminyereri we Biblia kandi nga thwanga yeghesyagho thuthi. Neryo thukendi lebya amaminyereri abiri awali omwa kitabu kya Danieli nuku thulhangire ngoku eriyitheghereryagho lyanga thuwathikya lino.

3. Thutholere ithwakolhaki thwamabya b’eriyitheghererya amaminyereri we Biblia?

³ Thutholere ithwasaba obuwathikya thwamabya b’eriyitheghererya amaminyereri we Biblia. Thalengekania okwa ky’erileberyako kino. Thathera akasasani iwabungira omwa mwanya ogho wuthasi aliwe munywani wawu oyo wuli nayu iniabya inianasigho ndeke. Anasi ndeke aho mwamathahika n’aho obuli nzira yikakolhaya. Ahathe erithika-thika, iwukendi tsema kundi munywani wawu mw’akaligha erighenda haghuma nawu! Kuthya, Yehova anasi aho thwamathahika omwa buthuku buno n’ebiri embere syethu. Neryo erithoka eriyitheghererya amaminyereri we Biblia, omw’iyikehya thutholere ithwasaba Yehova y’obuwathikya.—Dan. 2:28; 2 Pet. 1:19, 20.

4. Ni kyahi ekyaleka Yehova iniahira amaminyereri w’omwa Kinywe kiwe? (Yeremia 29:11) (Lebaya n’ekisasani.)

⁴ Ng’omubuthi owosi-wosi omubuya, Yehova akasunzira abaana  biwe b’obuthuku obuwene obukasa. (Soma Yeremia 29:11.) Aliwe mbaghane n’omubuthi wosi-wosi, Yehova iyo angana thubwira ebikendi syabya obuthuku obukasa kandi ibyabererera. Mwalhangira athi amaminyereri akahandikawa omwa Kinywe kiwe nuku thuminye emyatsi mikulhu-mikulhu yitheyabya. (Isa. 46:10) Amaminyereri we Biblia ni bihembo by’olhwanzo erilhua oku Thatha wethu w’elhubulha. Aliwe wanga minya wuthi ngoku kwenene ebyo e Biblia yalhaghulha bikendi syabererera?

5. Omulere ang’ighaki okwa kyalholirweko kya Max?

⁵ Okwa sukuru, mughulhu mungyi abalere bethu bakabya n’abandu abathasikirye e Biblia. Ebya bakabugha n’erikolha byangana letha omwa Bema balere mw’erithika-thika. Lebaya ekyalholirweko kya mughalha wethu Max. Akabugha athi, “Ingane mulengwa, munatsuka erilengekania indi ebyo ababuthi baghe bakanyikangiriraya si y’edini y’okwenene kandi indi e Biblia siyasondolibawa na Nyamuhanga.” Ababuthi biwe mubakolhaki? Akabugha athi, “Mubasubirya omwa bwolho, nomwakine indi ngabya inganasi ku babiriyibulha-bulha.” Ababuthi ba Max mubasubirya ebibulyo biwe omw’ikolesya e Biblia. Max nayu mwayira eky’akakolha. Akabugha athi, “Munayeghesya amaminyereri we Biblia kandi munabwira abandi balere okwa ebyo nayeghesaya.” Mumwalhwiririraki? Max akabugha athi, “Enyuma waho, munaligha ngoku e Biblia yasondolibawa na Nyamuhanga!”

6. Wutholere iwakolhaki wamabya iwuwithe erithika-thika, kandi busana naki?

⁶ Nga Max, wamatsuka erithika-thikira eky’eribya e Biblia iyiri mw’ekwenene, isiwayowa nabi. Aliwe wutholere iwayira eky’erikolha. Erithika-thika liri ng’amakenge. Amagheghenwa, lyolho-lyolho anganatsandya ekindu ky’obughuli. Eritsuka erilhusya omw’ikirirya lyawu “mw’amakenge” wosi-wosi, wutholere iwayibulya wuthi, ‘Ngan’ikirirye ebyo e Biblia yikabugha okwa buthuku obukasa?’ Wamabya iwukathika-thikira ekyo, neryo wutholere iwayeghesya okwa maminyereri awabiribererera. Wanga kolha ekyo kya wuthi?

7. Ni ky’erileberyako kyahi ekyo Danieli athuhiriraho bikahika okw’iyeghesya amaminyereri? (Danieli 12:10) (Lebaya n’ekisasani.)

⁷ Danieli abirihiraho eky’erileberyako ekyuwene bikahika okw’igha amaminyereri. Iniakayeghesaya amaminyereri inianawithe ekilhubirirwa ekitholere, erianza eriminya ekwenene. Kandi Danieli aby’ayikehirye, inianasi ngoku Yehova akend’iha abamwasi kandi abakaghendera okwa misingyi yiwe eyihenirye b’amaaka w’eriyitheghererya. (Dan. 2:27, 28; soma Danieli 12:10.) Danieli mwakangania kw’ayikehirye omw’iyikethera obuwathikya bwa Yehova. (Dan. 2:18) Kandi Danieli mwasekulya ndeke. Mwasekulya omo Masako awasondolibawa awabyaho omwa buthuku bwiwe. (Yer. 25:11, 12; Dan. 9:2) Wanga gherererya wuthi Danieli?

8. Ni kyahi ekikaleka abandi ibayeghesya okwa maminyereri we Biblia, aliwe thutholere ithwakolhaki?

⁸ Lebaya ndeke ebilhubirirwa byawu. Wukanayeghesaya amaminyereri we Biblia busana n’eriyisunza linene ery’erianza eriminya ekwenene? Kyamabya ikwakiri kithya, Yehova akendi kuwathikya. (Yn. 4:23, 24; 14:16, 17) Ni kindi kyahi ekyanga leka omundu iniayeghesya  amaminyereri we Biblia? Abandi bangana kolha ekyo habw’erianza eribana obwema obukakanganaya ngoku e Biblia siyasondolibawa na Nyamuhanga. Omwa nzira eyo, bakayowa ibangana lhwira okwa ky’eriyihiriraho ebihano byabu ebihambire okwa kihikire n’ekiwire n’eribighenderako. Nomwabine, thutholere ithwabya n’ekilhubirirwa ekitholere. N’ekindi, omubere mukulhu akayithaghisibawa nuku thuyitheghereraye amaminyereri we Biblia.

9. Ni mubere wahi owakayithaghisibawa nuku thuyitheghereraye amaminyereri we Biblia? Soborera.

⁹ Yikehaye. Yehova akayilhagha eriwathikya abayikehirye. (Yak. 4:6) Neryo thutholere ithwamusaba obuwathikya erithoka eriyitheghererya amaminyereri we Biblia. Kandi thutholere ithwaligha ngoku thukayithagha obuwathikya bw’enzira ey’akakolesaya erithuha akalyo kethu k’obunyakirimu okwa buthuku obutholere. (Lk. 12:42) Yehova ni Nyamuhanga w’obuyithondeke, neryo ni ky’amenge eribugha thuthi akakolesaya enzira nguma nyisa erithuwathikya eriyitheghererya ekwenene eyiri omwa Kinywe kiwe.—1 Kor. 14:33; Efe. 4:4-6.

10. Ekyalholirweko kya Esther kyamakweghesyaki?

¹⁰ Sekulhaya. Tsukira okwa buminyereri obukakutsemesaya kandi busekulhayeko. Ekyo kya mwali wethu Esther akolha. Mwatsemera amaminyereri awakakanaya okw’asa lya Masiya. Akabugha athi, “Nabere ingahikya emyaka 15, munatsuka erisekulya erilhangira kwenene amaminyereri aya ng’anahandikawa Yesu isyali asa.” Ebyo igha akasoma emikunzo ye Dead Sea mubyamulighisya. Akabugha athi: “Emighuma y’okw’iyo yahandikawa Kristo isyali asa, neryo amaminyereri awalimo atholere eribya inialhua oku Nyamuhanga.” Esther akaligha athi, “Munabya w’erisoma emyatsi eyo mirundi mingyi nuku ngayitheghererayeyo.” Aliwe atsemire kundi mwahiraho akaghalha. Enyuma w’erisekulya oko maminyereri we Biblia ng’awayo, akabugha athi, “Munayilhangirira ndeke-ndeke ngoku e Biblia yihikire!”

11. Thukaghasirawa thuthi omw’iyikakasirya ngoku e Biblia yihikire?

¹¹ Thukabya thukayilhangirira ngoku amaminyereri malebe awali omwa Kinywe kya Nyamuhanga abiribererera, thukabya n’eriyikethera linene omu Yehova n’omwa nzira ey’akakolesaya erithusondolha. Eryongera okw’ekyo, amaminyereri we Biblia akathuwathikaya eribya ithune n’amaha awuwene aw’obuthuku obukasa, nomuthwangabana ebitsibu ebiri bithi lino. Omwa bikuhi, thulebaye amaminyereri abiri awanemubererera lino agho Danieli ahandika. Eriyitheghereryagho kyangana leka ithwathwamu ndeke.

12. Ebisando ‘by’ekyuma ebithulhungene n’eribumba ly’olhwondo’ bik’imaniraki? (Danieli 2:41-43)

¹² Soma Danieli 2:41-43. Omwa kilhotho kya Nebukadneza ekyo Danieli akumbulha, ebisando by’esanamu nene eya Omwami alhangira byabya ‘by’ekyuma ekithulhungene n’eribumba ly’olhwondo.’ Omw’ilinganisya obuminyereri obu n’awandi awali omwa kitabu kya Danieli na Eribisulirwa, ithwangana ghunzerera thuthi ebisando bikimanira e Anglo-America, obuthabali bw’amaaka obw’ekihugho kyosi obuliho  munabwire. Akakania okwa buthabali bw’amaaka obw’ekihugho kyosi obu, Danieli mwabugha athi ‘obwami obo bwasyabya ekitswe ky’amaaka n’ekindi kitswe kyasyabya kyolho.’ Busana naki ibwabyako ekitswe kyolho? Kundi abandu, abakanibweko ng’eribumba ly’olhwondo bakatsekaya amaaka w’obuthabali obo aw’erikolha ndeke ng’ekyuma. b

13. Ni kwenene yahi ngulhu eyo thwanga minya busana n’eriyitheghererya obuminyereri obu?

¹³ Ebya Danieli abugha okwa sanamu y’ekilhotho, kutsibu-tsibu okwa bisandu byayo, bikathweghesaya ekwenene nyingyi ngulhu. Eky’erimbere, obuthabali bwe Anglo-America bwabirikangania ku buwithe amaaka omwa nzira ndebe. Ng’eky’erileberyako, mubwakolha kutsibu omw’isinga Olhuhi lhw’Ekihugho Kyosi Olhw’Erimbere n’Olhwakabiri. Nomwabine, obuthabali bw’amaaka obu bwabiritsekibwa kandi bukendi lholha embere eritseka busana n’amalhwa awakabya ahakathi-kathi k’esyondulhani syabo. Ekyakabiri, e Anglo-Amerika bw’obuthabali bw’amaaka obw’ekihugho kyosi obukendibya bw’erighunzerera erithabalha, Obwami bwa Nyamuhanga buthe bwaghunzaho amami wosi w’abandu. Nomwakine indi hanganayira ebindi bihugho ibyahakanisya obuthabali obwe Anglo-America obu, sibyanga suba omo mwanya wabo. Thukaminya ekyo kundi “eribwe” erikimanira Obwami bwa Nyamuhanga likendi syathulhanga ebisando, ekitsweka ky’esanamu ekikimanira e Anglo-America.—Dan. 2:34, 35, 44, 45.

14. Eriyitheghererya obuminyereri obuhambire okwa bisandu by’ekyuma n’eribumba lyanga thuwathikya lithi erithwamu ndeke?

¹⁴ Wunalighire ngoku obuminyereri bwa Danieli obuhambire okwa bisandu by’ekyuma n’eribumba ni b’okwenene? Kyamabya ikwakiri kithya, ekyo kikendi hamba okwa mibere wukathwaliramo engebe yawu. Isiwendi sondekania ebindu by’ekinyamubiri omwa kihugho ekikisiya ikyathoghothibwa. (Lk. 12:16-21; 1 Yn. 2:15-17) Kandi eriyitheghererya obuminyereri obu kikendi kuwathikya erilhangira omughaso w’omubiiri w’erithulira n’erikangirirya. (Mt. 6:33; 28:18-20) Enyuma w’eriyeghesya okwa buminyereri obu, busana naki iwuthayibulya ekibulyo kino, ‘Mbwino ebya ngathwamu binemukangania ku nganalighire ngoku Obwami bwa Nyamuhanga bukisiya ibwaghunzaho esyogavumente syosi sy’abandu?’

15. Munabwire, “omwami w’elhuthambi lhw’endatha” “n’omwami w’elhuthambi lhw’eyikwa” babahi? (Danieli 11:40)

¹⁵ Soma Danieli 11:40. Danieli sura 11 hakakanaya okwa bami babiri, kutse amathabali w’ekipolitiki, abo owundi akalhwa n’owundi erianza erithabalha ekihugho kyosi. Omw’ilinganisya obuminyereri obu n’awandi awali omwa Biblia, ithwangana bugha thuthi “omwami w’elhuthambi lhw’endatha” ni Russia n’abakasighikayo, “n’omwami w’elhuthambi lhw’eyikwa” bw’obuthabali bw’amaaka obw’ekihugho kyosi obwe Anglo-America. c

16. Ni bitsibu byahi ebyo abali ahisi ‘sy’omwami w’elhuthambi lhw’endatha’ bakabana?

¹⁶ Abandu ba Nyamuhanga abali ahisi sy’obuthabali ‘bw’omwami w’elhuthambi lhw’endatha” banemuyiyinirya eriendereribwa erilhangirikire erikalhua oko mwami oyu. Abandi Bema babiriswiribwa n’erihirwa omwa ngomo habw’erikirirya lyabu. Omwakanya k’abalikyethu eryubahisibwa busana ‘n’eby’omwami w’elhuthambi lhw’endatha’ akakolha, erikirirya lyabu likaghuma. Busana naki? Kundi balikyethu banasi ngoku eriendereribwa ly’abandu ba Nyamuhanga likaberereraya ebyo Danieli  abugha. d (Dan. 11:41) Ithwe eriminya ekyo kyangana leka ithwabya ithunemughumya amaha wethu n’erikamathya obuthaleghulha bwethu.

17. Ni bitsibu byahi ebyo abandu ba Nyamuhanga abali ahisi sy’obuthabali ‘b’omwami w’elhuthambi lhw’eyikwa’ bakabana?

¹⁷ Kera, “omwami w’elhuthambi lhw’eyikwa” nayu mwabambira abandu ba Yehova. Ng’eky’erileberyako, omwa Lhuhi lhw’Ekihugho Kyosi Olhw’Erimbere n’Olhwakabiri, balikyethu bangyi mubahirwa omwa ngomo busana n’erithendibya na lhuhandi, n’abandi baana Abema mubabingwa okwa syosukuru busana n’enzumwa iyaneyo. Aliwe omwa myaka eya lino-lino, abaghombe ba Yehova abali ahisi sy’obuthabali bw’omwami oyo mubabwene erilengwako lingyi erithalhangirikire busana n’eribya bathaleghulha oko Bwami bwa Nyamuhanga. Ng’eky’erileberyako, omwa buthuku bw’obukome, Omukristayo iniangana lengwako inianza erisighika ekyama kirebe ky’ekipolitiki kutse omundu oyuyitsimbire. Inianganaghana erikoma; aliwe omwa bulengekania n’omwa muthima wiwe iniabya inianawithe  lhuhandi. Ka ni kikulhu erithendibya na lhuhandi omwa mikolere yethu n’omwa bulengekania n’omw’iyowa lyethu!—Yn. 15:18, 19; 18:36.

18. Thukakolhaki bikahika okwa malhwa awali ahakathi-kathi “k’omwami w’elhuthambi lhw’endatha” n’enzighu yiwe? (Lebaya n’ekisasani.)

¹⁸ Abathikirirye amaminyereri we Biblia bangana hangya-hangya kutsibu bakalhangira “omwami w’elhuthambi lhw’eyikwa” ‘akasukumana’ “n’omwami w’elhuthambi lhw’endatha.” (Dan. 11:40, NWT) Abami bosi babiri banawithe esyobbomu sy’eniuklia esyangana tsandya engebe yosi eyiri okwa kihugho. Aliwe thunasi ngoku Yehova syendi syalighira ekyo eribya. (Isa. 45:18) Neryo omwakanya k’ekyo erithulyambya, obuyighu obuli ahakathi-kathi ‘k’omwami w’elhuthambi lhw’endatha’ “n’omwami w’elhuthambi lhw’eyikwa” bukaghumaya erikirirya lyethu. Kikakanganaya ngoku enduli y’omughulhu mubi ono yiri hakuhi.

19. Ni kyahi ekyo thutholere ithwaminya bikahika okwa maminyereri we Biblia?

¹⁹ Sithwasi awandi maminyereri we Biblia ng’akendi syabererera athi. Nibya n’omuminyereri Danieli mwathayitheghererya ebyosi ebyo ahandika nga bikamanyisayaki. (Dan. 12:8, 9) Aliwe erithabya isithuthayitheghererya ndeke obuminyereri nga bukendi syabererera buthi sikirimanyisaya indi sibwendi syabererera. Ahathe erithika-thika, thwangana yikethera ngoku Yehova akendi syathubisulira ebyo thukayithagha eriminya okwa buthuku obutholere, ngoku anakolha kera.—Amo. 3:7.

20. Ni maminyereri wahi we Biblia awakasisimulha agho thukisiya ithwalhangira akabererera, kandi thutholere ithwalholha embere erikolhaki?

²⁰ Erirangirira ‘ly’obuholho n’eriyisyandira’ likendibya. (1 Tes. 5:3) Neryo amathabali w’ekipolitiki akendi bindukira amadini w’amabehi n’erithoghothyagho. (Erib. 17:16, 17) N’enyuma waho akendi syabambira abandu ba Nyamuhanga. (Eze. 38:18, 19) Emyatsi eyi yikendi syathukolya okwa lhuhi lhw’erighunzerera olhwe Harmagedoni. (Erib. 16:14, 16) Thwangana yikethera ngoku emyatsi eyi yikisiya iyabererera. Neryo thunalindirire ekyo, thulhole embere erikangania ku thukasima Thatha wethu w’elhubulha ow’olhwanzo omw’iyithendya okwa maminyereri we Biblia n’eriwathikya abandi erikolha ekyo.