1. Ni kyahi ekyaleka Abanya Babeli ibatsemera omuminyereri Danieli?

 OMUMINYERERI Danieli abya mulere Abanya Babeli bakamuthwalha omwa ngomo mwe Babeli, haali okwa wabu. Aliwe omo kwenene Danieli mwatsemesya abakulhu b’eyo. Mubalhangira “erisosa ly’eyihya”—ngoku Danieli ‘syabyako kithingo, ini mubuya’ kandi kw’alhuire omwa famile eyasibwe. (1 Sam. 16:7) Busana n’ebi, Abanya Babeli mubamuthendeka eribya mughuma w’okwa banya menge ab’omwa kikali.—Dan. 1:3, 4, 6.

2. Yehova mwayowa athi busana na Danieli? (Ezekieli 14:14)

² Yehova mwanza Danieli, isi busana n’emisosere yiwe kutse ekitsumbi kiwe, aliwe busana n’ekya omulhwana oyu athwamu eribya. Danieli angabya iniabya iniakayaghunza emyaka yiwe y’obulengwa kutse eritsuka eya 20 Yehova akamukaniako ndeke akahulha Noa na Yobu, abalhume ababya ibabiriyikolera erina libuya na Nyamuhanga ahabw’emyaka mingyi. (Enz. 5:32; 6:9, 10; Yobu 42:16, 17; soma Ezekieli 14:14.) Kandi omwa ngebe yosi ya Danieli eyithendi syabiriranwa, Yehova mwalholha embere erimwanza.—Dan. 10:11, 19.

3. Thukendi kania okuki omo mwatsi ono?

³ Omo mwatsi ono, thukendi kania okw’ibiri y’okwa mibere ya Danieli eyaleka Yehova iniamusima kutsibu. Erimbere, thukendi kania okwa obuli mubere n’erilebya esyonzira esyo akanganirayaghomo. N’ekindi thukendi lhangira ekyawathikaya Danieli erikulha-kulhania emibere eyo. N’erighunzerera, thukendi lebya ngoku thwanga mugherererya. Nomwakine indi omwatsi ono atheghekirwe busana n’abalere, ithwe bosi thwangan’ighira okwa ky’erileberyako kya Danieli.

4. Danieli mwakangania athi obuthubaha? Iha eky’erileberyako.

⁴ Abandu abathubaha banganakwa obuba, aliwe sibalibulighira  bukabalemesya erikolha ekihikire. Danieli abya mulhwana w’obuthubaha bunene. Thulebaye esyonzira ibiri esyo akanganirayamo obuthubaha. Ey’erimbere yangabya iyabya enyuma w’emyaka ng’ibiri Abanya Babeli balithoghothirye e Yerusalemu. Omwami Nebukadneza mwalhotha ebilhotho ebyamusurusuthaya ebihambire okwa sanamu nene. Mwahayira abalhume biwe bosi ab’amenge imwamune na Danieli, athi bamathendi mubwira ebyo alyalhotha n’erimukumbulirabyo, iniakendi bitha. (Dan. 2:3-5) Danieli abya w’erikolha omwa byalhuba; bithe bithya, bang’ithibirwe. “Mwingira ew’omwami, mwabulya omwami erimuha endambi, iniathoka erikangya omwami eribikulha eryo.” (Dan. 2:16) Danieli mwakangania obuthubaha n’erikirirya. Sihali ekikakanganaya ngoku erilhua enyuma Danieli mwanakumbulha ebilhotho birebe. Mwasaba banywani biwe—abo e Babeli babya bakahulhuamo Sadiraki, Mesaki, na Abedenego—“athi, basondaye erighanyira lya Nyamuhanga w’elhubulha busana n’ekibisire eki.” (Dan. 2:18) Yehova mwasubirya emisabe eyo. Omwa buwathikya bwa Nyamuhanga, Danieli mwakumbulha ekilhotho kya Nebukadneza. Danieli n’abanywani biwe mubalhamibwa.

5. Obuthubaha bwa Danieli mubwathasyalengwako buthi?

⁵ Buthuku bulebe enyuma wa Danieli erikumbulha ekilhotho ky’esanamu nene, obuthubaha bwiwe mubwathasyalengwako. Nebukadneza mwalhotha ekindi kilhotho ekyamulyambaya. Ekilhotho eki kyabya kihambire okwa muthi muli-muli. Omwa buthubaha Danieli mwasoborera omwami ekya ekilhotho eki kikamanyisaya, imwamuli n’erithulhagho ngoku omwami angabere musire n’erilhua okwa bwami bwiwe habw’obuthuku. (Dan. 4:25) Omwami angalhuireho inialhangira Danieli ng’amamuyisamambulhako kandi ang’ithire Danieli. Aliwe Danieli mwakangania obuthubaha kandi amathulhagho.

6. Ni kyahi ekyangabya imukyawathikya Danieli eribya muthubaha?

⁶ Ni kyahi ekyangabya imukyawathikya Danieli eribya muthubaha omwa ngebe yiwe yosi? Omo kwenene, Danieli iniakine mulere mw’ighira okwa ky’erileberyako kibuya kya mama wiwe na thatha wiwe. Ahathe erithika-thika mubaghondera obusondoli obo Yehova aha ababuthi Abaisraeli, kandi mubakangirirya omwana wabu y’Emighambo ya Nyamuhanga. (Ebi. 6:6-9)  Danieli mwathasubulira okw’iminya emyatsi y’emisingyi ey’Emighambo, ng’Ebilhaghiro Ikumi, aliwe kandi abya inianasi bingyi ebihambire okwa ebya Abaisraeli bangalya n’ebya bathe bangalya. b (Law. 11:4-8; Dan. 1:8, 11-13) Danieli kandi mw’igha ebya kera ebihambire okwa bandu ba Nyamuhanga kandi mwaminya ebyabahikako bakalemwa erighendera okwa bihano bya Yehova. (Dan. 9:10, 11) Ebya Danieli ayilhangirira omo ngebe yiwe mubyaleka iniayikethera ngoku Yehova n’abamalaika biwe b’amaaka banemumuwathikya.—Dan. 2:19-24; 10:12, 18, 19.

7. Ni kindi kyahi ekyawathikaya Danieli eribya muthubaha? (Lebaya n’ekisasani.)

⁷ Danieli mw’igha ebyasakawa n’abaminyereri ba Nyamuhanga, imwamune n’amaminyereri wa Yeremia. Busana n’eriyeghesya eryo, enyuma waho Danieli mwaminya ngoku obunyewa obo Abayuda babya ibabirighunzamo buthuku buuli e Babeli bwabya ibukisiya ibwahwa. (Dan. 9:2) Erilhangira amaminyereri we Biblia akabererera, ahathe erithika-thika mukyaghumya eriyikethera lya Danieli omu Yehova, nibya n’abawithe eriyikethera erighumire omu Nyamuhanga bangana thunga obuthubaha bunene. (Thasyalebaya na Abanya Roma 8:31, 32, 37-39.) Ekikulhu kutsibu, Danieli iniakasaba Thatha wiwe w’elhubulha mughulhu wosi. (Dan. 6:10) Iniakabisulira Yehova y’ebisobyo biwe n’erimubwira eriyowa liwe. Kandi Danieli iniakasaba obuwathikya. (Dan. 9:4, 5, 19) Abya mundu ng’ithwe, neryo mwathabuthwa iniane n’obuthubaha. Omwakanya k’ekyo, mwakulha-kulhania omubere oyo omw’iyeghesya n’erisaba n’omw’iyikethera Yehova.

8. Thwanga kulha-kulhania thuthi obuthubaha?

⁸ Erithoka erikulha-kulhania obuthubaha, thutholere ithwakolhaki? Ababuthi bethu bangana thubwira bathi thubye bathubaha, aliwe sibangathusighalirya omubere oyu ng’omwandu. Erithunga obuthubaha liri ng’erigha omubiiri muhyaka. Enzira nguma eya wanga thokeramo ndeke erikolha omubiiri oyo ly’erilebya ndeke ebya omukangirirya wawu akakolha neryo iwakopa eky’erileberyako kiwe. Kuthya, thuk’igha eribya bathubaha omw’ilebya ndeke ngoku abandi bakakanganaya omubere oyu neryo ithwakopa eky’erileberyako kyabu. Neryo, ni byahi ebyo thwamabirith’ighira oku Danieli? Ng’iyo, thutholere ithwaminya ndeke e Biblia. Thutholere ithwabya n’obughuma obukamathire na Yehova omw’ikania nayu ahathe eriyikukumirira kandi mughulhu wosi. Kandi thutholere ithwayikethera Yehova, omw’iligha ngoku mughulhu wosi akendi thuwathikya. Neryo omughulhu erikirirya lyethu likalengawako, ithukendibya bathubaha.

9. Thukaghasirawa thuthi omw’ibya bathubaha?

⁹ Eribya bathubaha likathughasira omwa nzira nyingyi. Thalengekania okwa kyalholirweko kya Ben. Mwasomera esukuru yiwe ye Germany eyo obuli mundu ikirirye omwa bindu eriyibuthukira neryo ibakayowa omwatsi we Biblia ow’erihangika ini binyambwirwa. Kiro kighuma, Ben mwahebwa akaghisa k’eryasa embere sy’eklasi n’erisoborera ekikaleka in’ikirirya athi engebe yahangikawa. Omwa buthubaha mwakania okwa ebyo ikirirye. Mumwalhwiririraki? Ben akabugha athi: “Omuhalimu waghe mwahulikirira ndeke kandi mwalhusya omo myatsi eyo nakolesaya ingalhwira okwa ebya ngikirirye mwesyokopi neryo amaghabirasyo abosi abali omwa klasi.” Ab’omwa klasi ya Ben mubakolhaki? Ben akabugha athi: “Abangyi b’okw’ibo mubanyihulikirira kandi mubabugha bathi bamanyisima.” Ngoku ekyalholirweko kya Ben kyamakangania, mughulhu mungyi abandu abathubaha bakasikibawa.  Bangana leka abandu b’emithima myolho ibasa oku Yehova. Kwesi thuwithe nzumwa mbuya sy’eribya bathubaha.

10. Obuthaleghulha niki?

¹⁰ Omwa Biblia, ekinywe ky’Ekihebrania ekyahindulhawamo “obuthaleghulha,” kutse “olhwanzo olhuthaleghulha,” kikamanyisaya eritsomana kutse eryamakirira omo lhwanzo ekindu ekikakolesibawa mughulhu mungyi erikangania olhwanzo olho Nyamuhanga awithire abaghombe biwe. Ekinywe ikyan’ekyo kikakolesibawa erikangania olhwanzo olhwa baghombe ba Nyamuhanga bawithirene. (2 Sam. 22:26) Obuthaleghulha bwethu bwangan’ongera erighuma obuthuku bunemulhaba. Thulebaye ngoku eki kyalhangirika oku Danieli.

11. Obuthaleghulha bwa Danieli mubwalengwako buthi omwa myaka yiwe y’obukulhu? (Lebaya ekisasani ky’okwa kidipa.)

¹¹ Obuthaleghulha bwa Danieli oku Yehova mubwalengwako omwa ngebe yiwe yosi. Aliwe erighuma ly’okw’ilengwako erikalire kutsibu eryo abana lyabya iniane omo myaka yiwe ye 90. Okwa buthuku obo, Abamedi n’Abapersia babya ibabirihamba e Babeli n’Omwami Dario yuwabya akathabalha. Ab’omwa kikali ibaponire Danieli kandi isibali sikaya Nyamuhanga oyo aby’akaramya. Neryo mubaya embitha y’erithisya Danieli. Mubabugha bathi omwami ahamaye okwa kihamulho ekyangakangenie Danieli ng’akendibya muthaleghulha oku Nyamuhanga wiwe kutse oko mwami. Ekya Danieli abya atholere erikolha erikangania obuthaleghulha bwiwe oku mwami n’eribya ng’abandi lyabya iry’erileka erisaba Yehova habw’ebiro 30. Danieli mwathaleghulha. Ekyalhwiririramo, mwaghuswa omwa kyuna ky’esyondale. Aliwe Yehova mwahemba obuthaleghulha bwa Danieli omw’imulhamya okwa syondale. (Dan. 6:12-15, 20-22) Thwanga kulha-kulhania thuthi obuthaleghulha obuthethwika ng’obu oku Yehova obuli ng’obo Danieli akanganaya?

12. Danieli mwakulha-kulhania athi obuthaleghulha obuthethwika oku Yehova?

¹² Ngoku kinalyakanganibawa okw’itsuka, olhwanzo olhughumire lhukaleka ithwabya bathaleghulha. Danieli aby’awithe obuthaleghulha obuthethwika oku Yehova kundi aby’anzire Thatha wiwe w’elhubulha ya kutsibu. Ahathe erithika-thika Danieli mwakulha-kulhania olhwanzo olhu omw’ilengekania okwa mibere ya Yehova n’omw’ighanirya okwa mibere  akakanganirayayomo. (Dan. 9:4) Kandi omw’isima, Danieli mwaghanirya okwa bibuya byosi ebyo Yehova abya iniabirimukolera n’abandu Biwe.—Dan. 2:20-23; 9:15, 16.

13. (a) Obuthaleghulha bw’abalere bethu bukalengawako buthi? Iha eky’erileberyako. (Lebaya n’ekisasani.) (b) Ngoku kikanganibwe omwa vidiyo, wangakolhaki abandi bamakubulya Abema ba Yehova nga bakanasighika abakathwamu erikolha emyatsi y’engyingo n’ab’olhubutho ng’olhwabo?

¹³ Nga Danieli, abalere bethu bathimbirweko n’abandu abathesikaya Yehova n’ebihano biwe. Abandu ng’abo bangana pona owosi-wosi oyuwanzire Nyamuhanga. Abandi nibya bakatsuka okwa balere bethu kw’omwagha omw’anza bathwe obuthaleghulha bwabu oku Yehova. Ngahathya, lhangira ekyabya okwa mulere ya Graeme, oyuwikere e Australia. Mwabana ekitsibu akatsuka esiniya. Omuhalimu mwabulya abali omwa klasi athi nga bangakolhaki omunywani alyababwira athi ni mughuma w’okwa bakakolha emyatsi y’engyingo n’ab’olhubutho ng’olhwabu. Omuhalimu mwabwira eklasi yosi athi abangasighikire omunywani oyo bahangane baghende okwa lhundi lhuhandi lhw’eklasi; n’abanga ghanire baghende okwa lhundi. Graeme akabugha athi: “Eklasi yosi muyabya okwa lhuhandi lhw’abanga musighikire erihako ingye n’owundi Mwema.” Ekyakwamako mukyalenga okwa buthaleghulha bwa Graeme oku Yehova. Akabugha athi: “Ahabw’esaha nguma abandi abosi abo thukasoma nabu nibya n’omuhalimu mubathusekererya n’erithutsuma-tsuma. Inganathekene kandi omwa nzira nyolho, munalengaho erilhwira okw’ikirirya lyaghe, aliwe mubathahulikirira n’ekighuma okwa ebyo nabugha.” Graeme mwayowa athi obuthaleghulha bwiwe bukalengwako? Akabugha athi, “Munapona abo ngasoma nabu bakanyitsuma-tsuma, aliwe munatsema kutsibu habw’eribya imunathoka erilhwira okwa ebya ng’ikirirye isingathabikyako.” c

14. Ni nzira yahi nguma eya thwanga kulha-kulhaniryamo obuthaleghulha obuthethwika oku Yehova?

¹⁴ Thwangana kulha-kulhania obuthaleghulha obuthethwika oku Yehova, thwamamuthungira olhwanzo olhughumire nga Danieli. Thukakulha-kulhanaya olhwanzo olho omw’igha okwa mibere ya Yehova. Ng’eky’erileberyako, thwangan’igha okwa bindu ebyo abirihangika. (Abar. 1:20) Wamanza erikamathya olhwanzo n’erisikya ebya wuwithire Yehova, iwangana soma emyatsi mikuhi-mikuhi eyikabera eryasira omwa katsweka “Mbwino Kyakolerererawa?” kutse iwalebya esyovidiyo esirimo. Kandi iwangana soma emyatsi eyiri omwa syobrokyuwa Was Life Created? na The Origin of Life—Five Questions Worth Asking. Lhangira ekya mwali wethu omulere ya Esther owe Denmarka akabugha okwa bitabu ebyo: “Emyatsi eyirimu yuwene kutsibu. Esyobrokyuwa esi sisirikubwira ebya wutholere iw’ikirirya; sikakwama ky’erikukangania ekwenene n’erileka wuyithwiremo.” Ben, oyulyakanibawako okw’itsuka, akabugha athi: “Emyatsi eyi muyahimba erikirirya lyaghe lya kutsibu. Muyanyikangania ngoku Nyamuhanga mwahangika engebe.” Wukendibya wabirisoma emyatsi eyi, iwangana lighirana ne Biblia omughulhu yikabugha yithi: “Omukama wethu na Nyamuhanga wethu! Iwe wutholere eribana olhukengerwa, n’erisikya, n’obuthoki, kusangwa wahangika ebindu ebyosi, kandi busana n’erisonda lyawu mubyabyaho kandi mubyahangikwa.”—Erib. 4:11. d

15. Ni yindi nzira yahi eya thwanga kulha-kulhaniryamo obughuma bw’ahakuhi na Yehova?

¹⁵ Eyindi nzira eya thwanga kulha-kulhaniryamo olhwanzo olhukamathire olhwa thuwithire Yehova ly’eriyithendya ndeke okwa ngebe ya Mughalha wiwe, Yesu. Mwali wethu omulere ya Samira, oyuwikere e Germany, mwakolha  eki. Akabugha athi: “Munaminya Yehova ya ndeke erilhabira omu Yesu.” Samira iniakine mwana, ikikamukalira eriyitheghererya Yehova nganawithe eriyowa. Aliwe eky’erileberyako kya Yesu mukyamuwathikya. Akongerako athi; “Munanza Yesu kundi iniakayihira okwa bandu kandi inianzire abaana.” Abere ak’ongera erigha oku Yesu, kwan’ongera athya erithunga obughuma obughumire na Yehova. Busana naki? Akabugha athi: “Lyolho-lyolho munaminya ngoku Yesu akagherereraya ndeke-ndeke Thatha wiwe. Ni bingyi ebyo basosenemo. Munaminya ngoku eyi ni nguma y’okwa syonzumwa esyaleka Yehova iniathuma Yesu y’okwa kihugho, erileka kithokekane abandu eriminya Yehova ya ndeke.” (Yn. 14:9) Wamabya iwanzire erighumya obughuma bwawu na Yehova, busana naki iwuthahiraho obuthuku bw’erigha ebyosi ebya wangathoka ebihambire oku Yesu? Wamakolha ekyo, olhwanzo lhwawu olhwa wuwithire Yehova n’obuthaleghulha bwawu okw’iyo ibikendyongera.

16. Thukaghasirawa thuthi omw’ibya bathaleghulha? (Esyonyimbo 18:25; 37:28)

¹⁶ Mughulhu mungyi abathaleghulha bakabya n’obunywani obughumire kandi obwa kera na kera. (Ruta 1:14-17) Eryongera okw’ekyo, abathaleghulha oku Yehova bawithe nzumwa mbuya eyanga leka ibabya ibanathekene. Busana naki? Kundi Yehova akayilhagha eribya muthaleghulha okwa bathaleghulha okw’iyo. (Soma Esyonyimbo 18:25; 37:28.) Thakilengekaniako—Omuhangiki omuthoki w’ebyosi anayitheghekire eribya n’obughuma obughumire nethu! Kandi amabirikolha ekyo, sihali kitsibu, omuhakani, nibya n’olhuholho, ekyangathwa obughuma obo. (Dan. 12:13; Lk. 20:37, 38; Abar. 8:38, 39) Ka ni kikulhu ithwe erigherererya Danieli n’erisighalha bathaleghulha oku Yehova!

17-18. Ni bindi byahi ebya thwang’ighira oku Danieli?

¹⁷ Omo mwatsi ono, thwamabirikania okw’ibiri y’okwa mibere ya Danieli. Aliwe hakine bingyi ebya thwanga mw’ighirako. Ng’eky’erileberyako, Yehova mwaha Danieli y’esyonzoli n’ebilhotho bingyi ebikwamangene kandi mwamuha amaaka w’erisoborera emyatsi y’obuminyereri. Amangyi w’okwa maminyereri ayo abiribererera. N’awandi akakanaya buuli okwa bikendibya omwa buthuku obukasa ebikendi hamba okwa buli mundu okwa kihugho.

¹⁸ Omo mwatsi owakakwamako, thukendi syalebya amaminyereri abiri agho Danieli ahandika. Eriyitheghereryagho kyangana wathikya ithwe bosi, abalere n’abakulhu, erithwamu ndeke lino. Amaminyereri ayo kandi anganaghumya obuthubaha bwethu n’obuthaleghulha bwethu nuku thuyitheghekere er’imanira erilengwako erikayasa.