OMWATSI W’ERIGHA 31
OLHWIMBO 12 Yehova, Nyamuhanga w’Obuthoki
Ekya Yehova Abirikolha Erithusabulha Okwa Kibi n’Olhuholho
“Nyamuhanga mwanza ekihugho kya kutsibu kyamaleka iniahayo Mughalha wiwe ekyusa.”—YN. 3:16.
EKIGHENDERERWA
Ngoku Yehova abiribya inianemuyira eky’erikolha erithuwathikya erirwanisya ekibi kandi ngoku abirileka ikyathokekana okw’ithwe erisyabana engebe y’erikotha, eyithemo kibi.
1-2. (a) Ekibi niki, thwanga singura thuthi amalhwa wethu w’erikirwanisya? (Lebaya “n’erisoborera ekinywe.”) (b) Thukendi kania okuki omo mwatsi ono n’omwa yindi myatsi eyiri omwa gazeti y’Akaleberyo eno? (Lebaya na “Omwatsi Okwa Basomi” omwa gazeti eno.)
WUNANZIRE eriminya Yehova Nyamuhanga ng’akwanzire bungahi? Hano hane enzira eyuwene ey’eriminyiramo eky’erisubirya: Yeghesaye okwa eky’abirikolha nuku akulhamaye okwa kibi n’olhuholho. Ekibi a ni nzighu eyikalire kutsibu, eya wuthe wanga kinda okwa lyawu. Ithwe bosi thukahalhaya obuli kiro kandi thukaholha busana n’ekibi. (Abar. 5:12) Nomwabine, hane engulhu yuwene. Omwa buwathikya bwa Yehova, thwangana kinda ekibi. Omo kwenene, ahathe erithika-thika thukendi syasingura!
2 Yehova Nyamuhanga abiribya inianemuwathikya abandu erirwanisya ekibi ahabw’emyaka nga 6,000. Busana naki? Kundi athwanzire. Abirianza abandu eritsuka okwa nzuko, neryo abirikolha bingyi eribawathikya omwa malhwa aya. Nyamuhanga anasi ngoku ekibi kikakolhaya okwa lhuholho kandi syanzire thukaholha. Anzire ithwabyaho kera na kera. (Abar. 6:23) Ekyo ky’akakusunzira. Omo mwatsi ono, thukendi kania okwa bibulyo bisathu: (1) Ni kyahi ekya Yehova abirikolha nuku abakolha-nabi babye n’amaha? (2) Abakolha-nabi ab’omwa buthuku bwe Biblia mubasimwa bathi na Yehova? (3) Yesu mwasabulha athi abakolha-nabi okwa kibi n’olhuholho?
NI KYAHI EKYA YEHOVA ABIRIKOLHA NUKU ABAKOLHA-NABI BABYE N’AMAHA?
3. Ababuthi bethu b’erimbere mubabya bathi bakolha-nabi?
3 Yehova abere ahangika omulhume n’omukali ab’erimbere, aby’anzire ibatsema. Mwabaha obw’ikalho obuwene, ekihembo ky’obutheke, n’omubiiri owakatsemesaya. Babya b’eryusulya ekihugho mwa b’olhubutho lhwabo, eriyira ekihugho kyosi mwa paradiso ng’eririma lye Edeni. Mwabaha ekihano kighuma kisa eky’olhobire. Kandi mwabakunga athi bamathwa ekihano ekyo omw’iyisamambulha okw’iyo omw’ikighenderera, ekibi kyabo kyanga bakolirye okwa lhuholho. Thunasi ekyabya kyabere. Omumalaika oyuthelhangirawa, oyuthabya anzire Nyamuhanga kutse ibo, mw’ingira omwa mwatsi n’eribalengako nuku bakole ekibi. Adamu na Eva mubaghendera okwa mathebo ayo. Busana n’erilemwa eriyikethera Thatha wabo w’olhwanzo, mubakolha ekibi. Ngoku thunasi, ebinywe bya Yehova mubyabererera. Eritsuka ekiro ekyo, mubabana ebitsibu: Mubatsuka erikekelhuha, n’erighunzerera mubaholha.—Enz. 1:28, 29; 2:8, 9, 16-18; 3:1-6, 17-19, 24; 5:5.
4. Busana naki Yehova aponire ekibi kandi busana naki akathuwathikaya erikirwanisya? (Abanya Roma 8:20, 21)
4 Yehova mwalhangira athi omwatsi w’obulighe oyu akahandikawa busana n’erithughasira. Akaleka ithwayitheghererya ekikaleka iniapona ekibi kya kutsibu. Ekibi kikathughabulha oku Thatha wethu, kandi kikakolhaya okwa lhuholho. (Isa. 59:2) Ekyo ky’ekikaleka Sitani, ekirimu ekiyisamambuli ekyaleka ebitsibu ebyosi ebi ibyabya, iniabya inianzire ekibi kandi inianzire erikikulha-kulhania. Angabya imwalengekania athi omw’irima lye Edeni mwasingura kutsibu. Aliwe syabya asi ngoku Yehova ni w’olhwanzo. Nyamuhanga mwathahindulha ekighendererwa kiwe busana n’ab’olhubutho lhwa Adamu na Eva. Yehova anzire abandu, neryo mwalhuaho iniaha abosi b’amaha. (Soma Abanya Roma 8:20, 21.) Yehova abya inianasi ngoku abaghuma b’okwa b’omwa lhubutho olho bangathwiremo erimwanza kandi bangasondekenie obuwathikya bwiwe erirwanisya ekibi. Kandi iyo nga Thatha wabo kandi Muhangiki angabahere enzira y’eriberamo bwiranda okwa kibi n’eriyithunda okw’iyo. Yehova angakolireki nuku ebyosi ebyo bithokekane?
5. Ni mughulhu wahi Yehova atsuka eriha abakolha-nabi b’amaha? Soborera. (Enzuko 3:15)
5 Soma Enzuko 3:15. Muhatsuka eribya amaha omughulhu Yehova atswera Sitani y’olhw’erikwa. Nyamuhanga mwalhaghulha ngoku “ekihanda” kutse olhubutho kya kindu kikulhu ekyanga lekire ihabya amaha. Erighunzerera, olhubutho olhu lhwanga hinolere Sitani, erighunzaho obubi bwosi obo aletha omwa Edeni. (1 Yn. 3:8) Aliwe olhubutho olho lhwanga bwene ebitsibu lhukaghenda lhukaberererya emyatsi eyi. Sitani angamubbandire, erileka iniaholha. Ekyo kyanga ponesirye Yehova ya kutsibu. Aliwe erighunzerera, obulhumi obu bwangalhwiririremo emighisa kundi abandu bangyi bangalhamibirwe okwa kibi n’olhuholho.
ABAKOLHA-NABI AB’OMWA BUTHUKU BWE BIBLIA MUBASIMWA BATHI NA YEHOVA?
6. Abalhume b’erikirirya nga Abeli na Noa mubakolhaki nuku bayithunde oku Yehova?
6 Omwa bighana ebyakwamako, Yehova mwaghenda akongera erikangania ndeke-ndeke ngoku abakolha-nabi bangayithundire okw’iyo. Abeli, mughalha wa Adamu na Eva owakabiri, yuwabya mundu w’erimbere erikirirya Yehova enyuma w’ekitsibu ekyabya omwa Edeni. Kundi Abeli aby’anzire Yehova kandi mwanza erimutsemesya n’eriyithunda okw’iyo, mwahayo ekihongo. Abeli abya mulisya, neryo mwimya okwa byana by’esyombuli siwe, amabikera, amabihayo oku Yehova. Yehova mwakolhaki? Yehova “mwasima Abeli n’obuhere bwiwe.” (Enz. 4:4) Yehova mwakangania kw’akasima ebihongo ng’ebyo ebyo abandu abamwanzire kandi abakamuyikethera bakahayo—ng’ebya Noa. (Enz. 8:20, 21) Yehova abere akaligha ebihongo ng’ebyo, mwakangania ngoku abandu abakolha-nabi bangana bana erisimwa liwe kandi ibayithunda okw’iyo. b
7. Abrahamu eriligha erihayo mughalha wiwe-wiwe ng’ekihongo kikathweghesayaki?
7 Yehova mwabwira Abrahamu omulhume w’erikirirya linene athi akole ekindu ekikalire kutsibu—erihayo mughalha wiwe-wiwe Isaka ng’ekihongo. Ahathe erithika-thika, Abrahamu mwalhangira eki ini kindu ekikendi letha obulhumi bunene kutsibu. Nomwabine, mwowa Yehova. Aliwe Nyamuhanga mwamubwira athi aleke erikolha ekyo okwa ndambi y’erighunzerera. Nomwabine, eky’erileberyako ekyo kikeghesaya abandu bosi ab’erikirirya b’ekwenene ngulhu. Ahathe erikakwa Yehova angahereyo Mughalha wiwe-wiwe omwanzwa ng’ekihongo. Yehova kw’anzire athya abandu ba kutsibu.—Enz. 22:1-18.
8. Ebihongo bingyi ebyabya bikayithaghisibwa omwa Mighambo byabya bikakanganiaki? (Abalawi 4:27-29; 17:11)
8 Enyuma w’ebighana bingyi, Emighambo eyahebawa Abaisraeli yabya yikabugha yithi abandu ba Nyamuhanga batholere ibahayo ebihongo bingyi nuku baghanyirawe ebibi byabo. (Soma Abalawi 4:27-29; 17:11.) Ebihongo ng’ebyo byabya bikakangania ku hakendi syabya ekihongo kikulhu, ekyanga lhamirye ighuma abandu okwa kibi. Abaminyereri ba Nyamuhanga mubasondolibwa erisoborera ngoku olhubutho olhwalhaghanisibawa, oyuwabya abere Mughalha wa Nyamuhanga ow’embaghane, angaghalibirwe n’erithibwa. Angakerirwe ng’embuli eyikahebawayo ng’ekihongo. (Isa. 53:1-12) Thakilengekaniako: Yehova angahirireho emitheghekere nuku Mughalha wiwe mwanzwa ahebaweyo busana n’erilhamya abandu—okwa kibi n’olhuholho—nawu imwawune!
YESU MWASABULHA ATHI ABAKOLHA-NABI?
9. Ni byahi ebya Yohana Mubatizya abugha oku Yesu? (Abaebrania 9:22; 10:1-4, 12)
9 Omwa kighana ky’erimbere E.K., omughombe wa Nyamuhanga ya Yohana Omubatizya mwakania oku Yesu Omunazareti athi: “Lhangira, Ekyana ky’Embuli kya Nyamuhanga oyukalhusayaho ekibi ky’ekihugho!” (Yn. 1:29) Ebinywe ebyasondolibawa ebi mubyaminyikalya Yesu ng’olhubutho olhwalhaghanisibawa kera. Angahereyo ekihongo ekyalhaghanisibawa. Neryo lino kwilhaba kera, habiribya amaha awaghumire busana n’abakolha-nabi—erikindira ighuma ekibi.—Soma Abaebrania 9:22; 10:1-4, 12.
10. Yesu mwakangania athi ngoku ‘asa eribirikira’ abakolha-nabi?
10 Yesu mwatsomana kutsibu abandu ababya bakayowa ibalithoherwe busana n’ekibi kandi mwabakokya athi babye bigha biwe. Abya inianasi ngoku ekibi y’enzuko y’eriaghalhwa ly’abandu. Neryo mwatsomana abalhume n’abakali ababya basibwe mw’abakolha-nabi. Omw’ikolesya eky’erileberyako, mwasoborera athi: “Abathalhwere sibaliyithagha omuthambiri, aliwe abalhwere bakamuyithagha.” Mwongerako athi: “Nasa eribirikira abakolha-nabi butsira abathunganene.” (Mt. 9:12, 13) Yesu mwaberererya ebinywe ebi. Omwa bwolho-bwolho mwaghanyira ebibi by’omukali oyuwanabaya ebisandu biwe omwa misoni. (Lk. 7:37-50) Mwakangirirya omukali Omusamaria okwa kithehero y’ekwenene ngulhu, nomwakine indi abya inianasi engebe yiwe y’obutswatswa. (Yn. 4:7, 17-19, 25, 26) Nibya Nyamuhanga mwaha Yesu y’amaaka w’erighunzaho ekikalhwirira omwa kibi—olhuholho. Athi? Yesu mwalhubukya abandu—abalhume n’abakali, abaana n’abakulhu.—Mt. 11:5.
11. Busana naki abakolha-nabi mubayithunda oku Yesu?
11 Sikiriswekaya eribya abandu ababya ibabiribya babi kutsibu imubayithunda oku Yesu. Mwabakwira obulighe kandi mwabalhumirirwa. Isikiri bakalira erimuhikira. (Lk. 15:1, 2) Kandi Yesu mwabasima n’eribahemba busana n’erikangania ku bamw’ikirirye. (Lk. 19:1-10) Mwakangania ndeke-ndeke ngoku Thatha wiwe ni w’obughanyiri. (Yn. 14:9) Omo binywe n’omwa mikolere mwakangania ngoku Thatha wiwe oyukakwira abandu b’obulighe kandi ow’obughanyiri anzire abandu kandi anzire eriwathikya obuli mughuma w’okw’ibo erisingura amalhwa w’erirwanisya ekibi. Yesu mwawathikya abakolha-nabi erianza erihindulha esyonzira syabo n’erimukwama.—Lk. 5:27, 28.
12. Ni kyahi ekya Yesu akangiriraya ekihambire okwa lhuholho lhwiwe?
12 Yesu abya inianasi ebikayamubyako embere. Mirundi mingyi mwabwira abigha biwe athi akendi ghobereribwa n’erihanikwa okwa muthi. (Mt. 17:22; 20:18, 19) Abya inianasi ngoku ekihongo kiwe kyanga ghunzireho ekibi ky’ekihugho, ngoku Yohana abya iniabirithulhughania kandi ngoku abaminyereri babya ibabirilhaghulha. Kandi Yesu mwakangirirya athi angabere abirihayo engebe yiwe, ‘angayirethireko abandu b’emisindo yosi.’ (Yn. 12:32) Abakolha-nabi bangatsemesirye Yehova omw’iligha Yesu ng’Omukama wabo n’erimugherererya. Ku bakolha ekyo, bangabere ‘ibakaboholhawa okwa kibi.’ (Abar. 6:14, 18, 22; Yn. 8:32) Neryo ahathe erikakwa kandi omwa buthubaha, Yesu mw’imanira olhuholho olhukalire.—Yn. 10:17, 18.
13. Yesu mwaholha olhuholho olhuli lhuthi, kandi olhuholho lhwiwe lhukathweghesayaki oku Yehova Nyamuhanga? (Lebaya n’ekisasani.)
13 Yesu mwaghoberibwa, amahambwa, amatsumwa, amahangirirwa, amahirwako omusango, nibya n’eriaghalibwa. Abasirikali mubamuthwalha ah’eriyithirwa n’erimukongomerera okwa muthi. Abere anemuyiyinirya obulhumi bwosi obo buthaleghulha, habya ihane Omundu mulebe oyuwabya omwa bulhumi bunene kwilhaba. Abya ini Yehova Nyamuhanga. Iyo ng’ow’amaaka manene, mwayikakirya okw’iyira eky’erikolha. Busana naki? Ni kyahi ekyangaleka Thatha w’olhwanzo iniakolha athya? Kundi Yehova athwanzire. Yesu mwabugha athi: “Kundi Nyamuhanga mwanza ekihugho kya kutsibu kyamaleka iniahayo Mughalha wiwe ekyusa, nuku obuli mundu oyukamwikiriraya syaheribawe aliwe abane engebe y’erikotha.”—Yn. 3:16.
Omw’iligha Mughalha wiwe erithibwa, Yehova mwalhaba omwa bulhumi bunene nuku thuboholhawe okwa kibi n’olhuholho (Lebaya enungu 13)
14. Ekihongo kya Yesu kikakweghesayaki?
14 Ekihongo kya Yesu kikakanganaya ndeke-ndeke Yehova ng’anzire bungahi ab’olhubutho lhwa Adamu na Eva. Kikakanganaya Yehova ng’akwanzire bungahi. Mwakolha bingyi na kwilhaba, eriligha erighumira obulhumi bunene kutsibu anamathakusabulha okwa kibi n’olhuholho. (1 Yn. 4:9, 10) Omo kwenene, anzire eriwathikya obuli mughuma w’okw’ithwe erirwanisya ekibi—n’erikinda!
15. Thutholere ithwakolhaki nuku thughasirawe omwa kihembo kya Nyamuhanga eky’endongolya ey’ekihongo kya Yesu?
15 Ekihembo kya Nyamuhanga, endongolya y’ekihongo kya Mughalha wiwe ekyusa, kikaleka ikyathokekana ithwe erighanyirwa ebibi byethu. Aliwe Nyamuhanga erithughanyira, thutholere ithwayira ekya thukakolha. Ni kyahi? Yohana Omubatizya n’enyuma waho Yesu Kristo iyuwene-wene mubaha eky’erisubirya bathi: “Muyisubemu, kundi Obwami bw’elhubulha bwabirihika hakuhi.” (Mt. 3:1, 2; 4:17) Neryo eriyisubamu kya kindu kikulhu ekikayithaghisibawa thwamabya kwenene ithwanzire erirwanisya ekibi n’eriyithunda oku Thatha wethu w’olhwanzo. Aliwe ni byahi ebikayithaghisibawa bikahika okw’iyisubamo, kandi eki kikathuwathikaya kithi eritsemesya Yehova nomwathune bakolha-nabi? Owundi mwatsi owakakwamako akend’iha eky’erisubirya.
OLHWIMBO 18 Erisima Embanulho
a ERISOBORERA EKINYWE: Omo Biblia, ekinywe “ekibi” kyangana manyisya emikolere mibi, erilemwa erighendera okwa bihano bya Yehova eby’esyongeso. Aliwe ekinywe “ekibi” kandi kyangana thasyamanyisya obuthahikana kutse emibere y’ekibi eyo thwasighalhaya oku Adamu. Ekibi ekya thwabirisighalya ky’ekikaleka ithwe bosi ithwaholha.
b Yehova eriligha ebihongo by’abathaleghulha ababyaho emighulhu y’Ekikristayo yithe yatsuka kyabya kiseghemere okwa kihongo kya Yesu Kristo, eky’omwa buthuku obw’embere, ekyanga ghunzireho ighuma ekibi n’olhuholho.—Abar. 3:25.
