OMWATSI W’ERIGHA 34
OLHWIMBO 107 Nyamuhanga Ni ky’Erileberyako ky’Olhwanzo
Ngoku Abasyakulhu Bakakanganaya Abakolha-nabi b’Olhwanzo n’Obughanyiri
‘Obubuya bwa Nyamuhanga bukakukolhaya okw’ibindulha omuthima n’erileka ebibi.’—ABAR. 2:4.
EKIGHENDERERWA
Ngoku abasyakulhu bakawathikaya abali omwa kithunga ababirikolha erilholho erikalire.
1. Ni kyahi ekyangabya omundu amakolha erilholho erikalire?
OMO MWATSI ow’ahanyuma, muthwalhangire emibere ey’omukwenda Paulo asoheramo erilholho erikalire e Korinto. Omukolha-nabi mwathayisubamu neryo mwabya ini w’erilhusibwa omwa kithunga. Aliwe, ngoku erisako erihirikirire omwatsi wethu likakanganaya, abandi ababirikolha amalholho awakalire bangana bungirwa. Banganakolibwa okw’iyisubamu. (Abar. 2:4) Abasyakulhu banga bawathikya bathi eriyisubamu?
2-3. Thutholere ithwakolhaki thwamaminya ngoku mulikyethu abirikolha ekibi ekikalire, kandi busana naki?
2 Abasyakulhu bathe bawathikya, batholere ibaminya ndeke omwatsi oyo. Neryo, thwanga kolhaki thwamaminya ngoku mulikyethu abirikolha erilholho erikalire—ekindu ekyanganaleka inialhusibwa omwa kithunga? Thutholere ithwahira omwa mukolha-nabi mw’omuhwa ow’eriyasaba obuwathikya okwa basyakulhu.—Isa. 1:18; Emib. 20:28; 1 Pet. 5:2.
3 Kandi ibbwa, omukolha-nabi amaghana erikania n’abasyakulhu? Neryo ithukendi yihikira okwa basyakulhu erilhangira thuthi omundu oyo akabana obuwathikya obukayithaghisibawa. Eki ni kindu ky’olhwanzo ekya thwangakolha kundi sithwanzire eriherya mulikyethu. Omukolha-nabi amalholha embere omwa nzira yiwe nyibi, iniakendyongera eritsandya obughuma biwe na Yehova. Inianganaleka erina ly’ekithunga iryatsanda. Neryo omwa buthubaha thukayira eky’erikolha busana n’olhwanzo olhwa thuwithire Yehova n’omukolha-nabi.—Esy. 27:14.
NGOKU ABASYAKULHU BAKAWATHIKAYA ABAKAKOLHA ERILHOLHO ERIKALIRE
4. Abasyakulhu bakabya n’ekighendererwaki bakayabana omukolha-nabi oyo wabirikolha ekibi ekikalire?
4 Omundu omwa kithunga amakolha erilholho erikalire, akathunga k’abasyakulhu kakayisombolhamo baghalha bethu basathu abatholere abakendi kolha ng’ekomiti. a Abalhume aba batholere ibayikehya kandi ibaminya aho amaaka wabu akasubulira. Bakendibya banemulengaho eriwathikya omukolha-nabi eriyisubamo, bakaminya ngoku sibangakaka omundu erikolha esyombinduka. (Ebi. 30:19) Abasyakulhu bakaminya ngoku abakolha-nabi abosi sibangaligha obuwathikya bwabu ngoku Omwami Dawudi akolha. (2 Sam. 12:13) Abandi bakolha-nabi banganathwamu erigheghena obuhabuli bwa Yehova. (Enz. 4:6-8) Nomwabine, ekighendererwa kya basyakulhu ry’erikolya omukolha-nabi okw’iyisubamo kyamathokekana. Ni misingyi yahi eyo bakaghenderako bakayabanangana n’omukolha-nabi?
5. Ni habulha lyahi eryo abasyakulhu batholere eribya iban’ibukire bakayabanangana n’omukolha-nabi? (2 Timoteo 2:24-26) (Lebaya n’ekisasani.)
5 Abasyakulhu bakalhangira omukolha-nabi ng’embuli y’obughuli eyithere. (Lk. 15:4, 6) Neryo, bakabya bakabanangana n’omundu oyo, sibali kanaya nayu omwa butsurumi kutse erithendi mukangania olhukeri; kutse sibatholere bakalengekania bathi eky’erikolha ly’erimubulya ebibulyo n’eriminya okwenene. Omwakanya k’ekyo, bakakanganaya emibere eyiri omu 2 Timoteo 2:24-26. (Soma.) Bakalengaho erisighalha ibane bolho, ibanahehere, kandi b’olhukeri bakalengaho erihika okwa muthima w’omukolha-nabi.
Ng’abalisya abakera, abasyakulhu bakalengaho erisubulya embuli eyithere (Lebaya enungu 5)
6. Abasyakulhu banga thegheka bathi emithima yabu bathe babanangana n’omukolha-nabi? (Abanya Roma 2:4)
6 Abasyakulhu bakathegheka emithima yabu. Bakalengaho erigherererya Yehova omwa nzira syabo syosi bakakolongana n’omukolha-nabi, iban’ibukire ebinywe bya Paulo bino: ‘Obubuya bwa Nyamuhanga bukakukolhaya okw’ibindulha omuthima n’erileka ebibi.’ (Soma Abanya Roma 2:4.) Abasyakulhu batholere ib’ibuka ngoku ni balisya ahisi sy’obusondoli bwa Kristo. (Isa. 11:3, 4; Mt. 18:18-20) Bathe babanangana n’omukolha-nabi, omw’isaba, ekomiti yitholere iyalengekania okwa kilhubirirwa kyayu: erikolya omukolha-nabi y’okw’iyisubamu. Bakendi sekulya omwa masako n’omwa bitabu byethu kandi ibasaba amenge. Bakendi lengekania okwa ebya batholere ibaminya okwa bihambire okwa mundu oyo ebyangabya iby’ebikaleka iniabya n’amalengekania, emibere, n’emikolere yiwe.—Emi. 20:5.
7-8. Abasyakulhu banga gherererya bathi erighumisirizya lya Yehova bakakolongana n’omukolha-nabi?
7 Abasyakulhu bakagherereraya erighumisirizya lya Yehova. Bakabya iban’ibukire emibere Yehova akolonganiramo n’abakolha-nabi kera. Ng’eky’erileberyako, omw’ighumisirizya Yehova mwaghanirya na Kaina, mwamughusa kw’akasali eriminya ebyangalhwiririra omw’ilholho liwe n’erimuha amaha aw’erithasyasuba-subana. (Enz. 4:6, 7) Yehova mwahabulha Dawudi erilhabira omu muminyereri Natana, oyuwakolesaya omukya owahamba okwa muthima w’omwami. (2 Sam. 12:1-7) Kandi “obuli kiro” Yehova ‘iniakathuma’ okwa kihanda ky’Abaisraeli abamusighanaya kw’abaminyereri biwe. (Yer. 7:24, 25) Mwathalinda athi abandu biwe batholere ibatsuka eriyisubamo imwabawathikya. Omwakanya k’ekyo, mwayira eky’erikolha omw’ibalemba-lemba athi bayisubemo.
8 Abasyakulhu bakakwama eky’erileberyako kya Yehova bakalengaho eriwathikya ababirikolha erilholho erikalire. Ngoku kikanganibwe omu 2 Timoteo 4:2, bakaghaniraya “n’eriyibombeka ndeke” bakakolongana na mulikyethu oyuwabirikolha erilholho erikalire. Eby’eriyeghesya okwa mulhondo oyo bikabugha okwa musyakulhu ng’oyo bithi: “Mughulhu wosi atholere iniakangania eriyikakirya, omw’ighumisirizya akahika okw’iyisunza ly’omukolha-nabi ery’erikolha ekihikire. Omusyakulhu amayiponera kutse akahithana, inianganalekererania omukolha-nabi kutse iniamuthwikalya.”
9-10. Abasyakulhu bangawathikya bathi omukolha-nabi erighanirya okw’ithwamu liwe libi?
9 Abasyakulhu bakalengaho eriminya emibere eyilyamukolhaya okwa kibi. Ng’eky’erileberyako, mbwino Omukristayo mwakaghenda akasebebera busana n’erigheghena endegheka yiwe y’eriyeghesya kutse erithulira? Mbwino alhue isyakisaba Yehova mughulhu wosi? Mbwino alhwe akalighira esyongumbu siwe nyibi erimusondolha? Mbwino abirisombolha abanywani babi n’eby’eriyitsemesya? Erithwamu ng’eryo lyangabya iryabirihamba lithi okwa muthima wiwe? Mbwino anasi ngoku erithwamu liwe erya lino-lino n’ebyakakolha bikahamba oku Thatha wiwe Yehova?
10 Omw’imubulya ebibulyo ebyangana leka inialengekania ahathe ery’ingira kutsibu omwa ngebe yiwe, abasyakulhu b’olhukeri bangana wathikya omukolha-nabi kandi ibaleka iniaghanirya okw’ithwamu liwe libi. (Emi. 20:5) Eryongera okw’ekyo, ibangana kolesya emikya eriwathikya omundu erilengekania n’erilhangira emikolere yiwe mibi ngoku Natana akolha oku Dawudi. Obundi okw’imubana ery’erimbere, omundu inianganatsuka eriyowa nabi busana n’enzira yiwe nyibi eyo abirikwama. Nibya anganayisubamu.
11. Yesu mwakolongana athi n’abakolha-nabi?
11 Abasyakulhu bakalengaho erigherererya Yesu. Yesu oyuwabirilhubukibwa abere akakolongana na Saulo owe Tarso, mwamubulya ekibulyo ekyangalekire iniaminya amalengekania wiwe: “Saulo, Saulo, busana naki wukanyendereraya?” Busana n’ekyo Yesu mwamuwathikya erilengekania okwa nzira yiwe nyibi. (Emib. 9:3-6) Bikahika oko “mukali oyo ye Yezebeli,” Yesu mwabugha athi: “Nabirimuha omughulhu w’eribinduka n’erileka ebibi biwe.”—Erib. 2:20, 21.
12-13. Abasyakulhu bangaha bathi omukolha-nabi y’obuthuku bw’eriyisubamo? (Lebaya n’ekisasani.)
12 Omw’igherererya Yesu, abasyakulhu sibalilhuaho bakaghunzerera bathi omukolha-nabi syendi yisubamu. Nomwakine indi abandi bangana yisubamu ekomiti yikikalha nabo omurundi w’erimbere, abandi bangana yithagha eribanwa emirundi mingyi. Neryo abasyakulhu bangana hiraho emitheghekere y’eribanangana n’omukolha-nabi emirundi eyilhabire okwa mughuma. Obundi enyuma w’eribanangana nayu omurundi w’erimbere, Omukristayo oyuwabirihalya anganatsuka erilengekania buuli okwa ebya balyamubwira. Omw’iyikehya inianganahikira Yehova omwa musabe. (Esy. 32:5; 38:18) Neryo, ibakendibya bakathasyabanangana nayu, omukolha-nabi inianganabya iniabiribya n’amalengekania awali mbaghane okwa agho akanganaya bakabanangana nayu omurundi w’erimbere.
13 Eriwathikya erilholerya omukolha-nabi okw’iyisubamu, abasyakulhu bakakanganaya erilhumirirwa n’olhukeri. Bakabya n’amaha kandi ibasaba Yehova bathi atsumule akaghalha kabu kuthya n’Omukristayo oyuwabirihalya abuke kw’obulengekania n’eriyisubamu.—2 Tim. 2:25, 26.
Abasyakulhu bangana banangana n’omukolha-nabi mirundi mingyi nuku bamuhe obuthuku bw’eriyisubamu (Lebaya enungu 12)
14. Nindi yutholere eripipwa omukolha-nabi amayisubamo, kandi busana naki?
14 Omukolha-nabi amayisubamu, ekyo ka kikaletha obutseme bunene! (Lk. 15:7, 10) Nindi oyutholere eripipwa? Abasyakulhu? Wibuke Paulo mwahandika ebihambire okwa bakolha-nabi athi: ‘Mbwino Nyamuhanga asyahabo eribindulha emithima yabu erireka ebibi.’ (2 Tim. 2:25) Eby’eriyeghesya okw’isako eri bikabugha bithi: “Neryo Yehova butsira omundu wosi-wosi yukawathikaya Omukristayo erihindulha amalengekania n’emibere yiwe. Paulo mwasoborera ebindu ebyuwene ebikabya omundu amayisubamu athya—omundu oyo angan’ongera eribya n’eriminya erihikire ery’ekwenene, iniabuka kw’obulengekania, n’eribalha okwa bithegho bya Sitani.—2Tim 2:26.”
15. Abasyakulhu banga lholha bathi embere eriwathikya omukolha-nabi oyuwabiriyisubamo?
15 Omukolha-nabi akabya akayisubamo, ekomiti yikahiraho emitheghekere ey’erimubungira nuku omundu oyo alhole embere erithunga obuwathikya obo akayithagha erirwanisya ebithegho bya Sitani n’eriterekererya esyonzira siwe. (Ebr. 12:12, 13) Ni kwenene, abasyakulhu sibali bisulira owosi-wosi y’ebihambire okwa kibi ky’omukolha-nabi. Neryo kwesi, ni byahi eby’ekithunga kitholere ikyaminya?
“WUKUNGEBO EMBERE SY’ABANDU BOSI”
16. Ngoku kiri omu 1 Timoteo 5:20, “abandu bosi” abo Paulo akanayako b’abahi?
16 Soma 1 Timoteo 5:20. Paulo ahandikira ebinywe ebyo by’omusyakulhu mulikyabo ya Timoteo ebihambire okwa mibere angawathikiryamo ‘abakolha-nabi.’ Amanyisayaki? Si bugha indi amanyisaya athi ekithunga kyosi ‘b’abandu bosi.’ Omwakanya k’ekyo, amanyisaya abake abangabya ibanasi okwa bibi ebyo. Banganabya ib’abo abalhangira, kutse abo omukolha-nabi abwira okwa bibi ebyo. Omwa menge, abasyakulhu ibakendi bamanyisya abandu abo ngoku omwatsi abirisohwa kandi ngoku omukolha-nabi abirihengulhwa.
17. Erilholho erikalire lyamabya iryabiriminywa kutsibu omwa kithunga kutse irikendi syaminywa, ni kirango ekiri kithi ekyangarangwa, kandi busana naki?
17 Omwa yindi mibere, erilholho lyanganabya iryabiriminywa kutsibu omwa kithunga kutse irikendi syaminywa. Omwa mibere ng’eyo, “abandu bosi” mukabya imwamuli ekithunga ekyosi. Neryo abasyakulhu ibakendi ranga omwa kithunga bathi mughalha wethu kutse mwali wethu abirikungwa [erihirwa omwa karipiyo]. Busana naki? Paulo akasubiraya athi: “Abandi nabo bathoke eryubaha” nuku sibawe omw’ilholho.
18. Omwana omulere oyubatizibirwe amakolha erilholho erikalire abasyakulhu banga kolhaki? (Lebaya n’ekisasani.)
18 Kandi ibbwa abaana ababatizibirwe—abali ahisi sy’emyaka ikumi na munani—ababirikolha erilholho erikalire? Akathunga k’abasyakulhu ikakendihiraho emitheghekere y’abasyakulhu babiri eribanangana n’omwana oyo haghuma n’ababuthi biwe Abakristayo. b Abasyakulhu ibakendianza eriminya ebyo ababuthi babirikolha eriwathikya omwana wabu erihika okw’iyisubamu. Omwana amabya inianawithe amalengekania awuwene n’ababuthi biwe ibane mumuwathikya, abasyakulhu babiri abo ibangana thwamu bathi sikitholere omwatsi erithasyathwalhwa okwa kindi kiika. Kundi nibya, Nyamuhanga abiriha ababuthi b’olhukwamirwa olhw’erihengulha abaana b’abo omo lhwanzo. (Ebi. 6:6, 7; Emi. 6:20; 22:6; Efe. 6:2-4) Neryo abasyakulhu ibakendibya ibanemuhika okwa babuthi erilhangira omwana nga anemuthunga obuwathikya obukayithayisibawa. Aliwe ibbwa, omwana oyubatizibirwe oyutheyisubamu amaghana erikolha esyombinduka? Omwa mibere ng’eyo, ekomiti y’abasyakulhu iyikendikolongana nayu haghuma n’ababuthi biwe Abakristayo.
Omulere amakolha ekibi ekikalire, abasyakulhu babiri bakabanangana nayu iniane n’ababuthi biwe (Lebaya enungu 18)
‘YEHOVA NI W’ERIGHANYIRA KUTSIBU, KANDI AKAGHANYIRA ABANDU’
19. Abasyakulhu bakalengaho bathi erigherererya Yehova bakakania n’omukolha-nabi?
19 Abasyakulhu abakabya okwa syokomiti bawithe olhukwamirwa embere sya Yehova olhw’erilhangira bathi ekithunga kikabya ikinahenirye. (1 Kor. 5:7) Kandi kyamathokekana banzire omukolha-nabi iniahika okw’iyisubamo. Busana n’ekyo, abasyakulhu bakabya ibane n’amalengekania awatholere kandi ibanawithe amaha ngoku akendi kolha esyombinduka. Busana naki? Kundi banzire erigherererya Yehova, ‘ow’erighanyira kutsibu, kandi akaghanyira abandu.’ (Yak. 5:11) Lhangira ngoku omukwenda Yohana oyukulire omwa myaka akanganaya omuthima ng’oyu. Mwahandika athi: “Inywe, abaana baghe balere, ngabasakira emyatsi eyi, isimwakolha ebibi. Nikwa omundu amakolha ekibi, thuwithe embuyi [omuwathikya] oku Thatha, ye Kristo oyuthunganene.”—1 Yn. 2:1.
20. Thukendi kania okuki omwa mwatsi w’erighunzerera ow’emyatsi eyikwamangene eno?
20 Eky’obulighe, hakanayira Omukristayo iniaghana eriyisubamu. Ekyo kyamabya, atholere inialhusibwa omwa kithunga. Abasyakulhu bakasoha bathi emyatsi eyikalire ng’eyo? Thukendi kania okwa mwatsi oyo omo mwatsi w’erighunzerera ow’emyatsi eyikwamangene eno.
OLHWIMBO 103 Abalisya—Ni Balhume b’Olhusunzo
a Kera, esyogurupu esi isikahulhawamo ehithunga ehikatswera ehy’abasyakulhu. Aliwe kundi eritswera siryo abasyakulhu bakakolha lisa, sithukikolesaya ekinywe eki. Omwakanya k’ekyo thukakwama ky’ahulha egurupu eyi mwa ekomiti y’abasyakulhu.
b Ebyamabuwa okwa babuthi bikahamba n’okwa balighirwe omwa bilhaghiro erilembera abaana abathe babo kutse abandi abawithe olhukwamirwa lhw’erilembera abalere.
