OMWATSI W’ERIGHA 33
OLHWIMBO 130 Wubye Mughanyiri
Ngoku Ekithunga Kikakanganaya Amalengekania Agho Yehova Awithe oko Bakolha-nabi
“Omundu amakolha ekibi, thuwithe embuyi [omuwathikya].”—1 YN. 2:1.
EKIGHENDERERWA
Ekya thuk’ighira okwa mibere ekithunga kye Korinto eky’omwa kighana ky’erimbere kya soheramo erilholho erikalire.
1. Ni kyahi ekyo Yehova akasunzira abandu bosi?
YEHOVA abere akahangika abandu mwabaha obughabe obw’eriyithwiramu. Mughulhu wosi wukakolesaya ekihembo eki wukathwamu. Erithwamu likulhu ery’omundu wosi-wosi angakolha ly’erithwamu eriyihayo oku Yehova n’eribya mughuma w’okw’ihiika ly’abaramya biwe. Yehova anzire obuli mundu iniakolha ekyo. Busana naki? Kundi anzire abandu kandi akabasunzira ekibuya. Anzire ibatsemera obunywani haghuma nayu n’eribyaho kera na kera.—Ebi. 30:19, 20; Gal. 6:7, 8.
2. Yehova akayowa athi busana n’abakolha-nabi abatheyisubamu? (1 Yoane 2:1)
2 Nomwabine, Yehova syali kaka owosi-wosi athi amukolere. Akalighira obuli mundu erithwamu ekyo akendi kolha. Kandi ibbwa Omukristayo oyubatizibirwe amathwa ekihano kya Nyamuhanga, omw’ikolha erilholho erikalire? Amathendi yisubamu, atholere inialhusibwa omwa kithunga. (1 Kor. 5:13) Aliwe, Yehova akabya inianawithe amaha manene ngoku omukolha-nabi akendi syamusubako. Kundi nibya, eyo y’enzumwa ngulhu eyaleka iniahayo endongolya—erileka kithokekane oko mukolha-nabi oyukayisubamu erighanyirwa. (Soma 1 Yoane 2:1.) Omo lhwanzo, Nyamuhanga wethu w’olhwanzo akalemba-lemba abakolha-nabi athi bayisubemu.—Zek. 1:3; Abar. 2:4; Yak. 4:8.
3. Thukendi kania okuki omo mwatsi ono?
3 Yehova anzire ithwabya n’amalengekania awali nga wiwe awahambire okwa kibi n’okwa bakolha-nabi. Omwatsi ono akendi kania okwa syonzira esyo thwanga kolera mw’ekyo. Wukasoma omwatsi ono, lebaya (1) emibere ekithunga kye Korinto eky’omwa kighana ky’erimbere kyasoheramo erilholho erikalire, (2) obusondoli obwa omukwenda Paulo aha omukolha-nabi akayisubamu, na (3) ekyo omwatsi we Biblia oyu akabisulha oko malengekania agho Yehova awithe oko Mukristayo oyukakolha erilholho erikalire.
EKYAKOLHAWA OMWA KIGHANA KY’ERIMBERE HAKABYA ERILHOLHO ERIKALIRE
4. Ni mibere yahi eyabya iyabiribya omwa kithunga kye Korinto omwa kighana ky’erimbere? (1 Abanya Korinto 5:1, 2)
4 Soma 1 Abanya Korinto 5:1, 2. Omwa lhughendo lhwiwe olhwakasathu olhw’obumisyonare, Paulo mwowa omwatsi mubi owahambire okwa kithunga kihyaka ekye Korinto. Mulikyethu omwa kithunga ekyo abya akakolha emyatsi y’engyingo n’owundi mukali wa thatha wiwe. Omutse oyo iniakakukubalhaya kandi “abandu b’ebihanda isibali kolhagho”! Ekithunga mukithasubulira okw’ilighira omutse wiwe oyo aliwe kandi kyangabya imukyayisyetheragho. Obundi abandi mubalengekania bathi omutse oyo akakanganaya obughanyiri n’obuyitheghererya obo Nyamuhanga awithire abandu abathahikene. Aliwe Yehova syalitsemera amalholho agho abandu biwe bakakolha. Busana n’emibere mibi ng’eyo, ahathe erithika-thika omulhume oyu abya inialikutsandya erina libuya ly’ekithunga. Kandi angabya iniabya inianemutsandya abandi Bakristayo ababya bakakolongana nayu. Neryo, Paulo mwabwira ekithunga athi kikoleki?
5. Paulo mwabwira ekithunga athi kikoleki, kandi amanyisayaki? (1 Abanya Korinto 5:13) (Lebaya n’ekisasani.)
5 Soma 1 Abanya Korinto 5:13. Omw’isondolibwa na Nyamuhanga, Paulo mwahandika ebaruha eyikakanganaya ngoku omukolha-nabi oyutheyisubamu oyo atholere inialhusibwa omwa kithunga. Abakristayo abathaleghulha bangamuthwere bathi? Paulo mwababwira athi “sibathambe” nayu. Kyamanyisayaki? Paulo mwasoborera athi ekihano eki mwamuli “erithendirya n’omundu ng’oyo.” (1 Kor. 5:11) Erirya haghuma n’omundu lyanganaleka ikyolhoba erikolongana nayu. Neryo ahathe erithika-thika, Paulo amanyisaya athi ekithunga sikitholere kikatsanga n’omulhume oyo ng’omunywani. Eki kyangatheghirye ekithunga okwa mibere yiwe mibi. (1 Kor. 5:5-7) Eryongera okw’ekyo, eriyihighulha okwa mulhume oyo lyangalekire iniaminya kw’abirisighania esyonzira sya Yehova, kandi angayowire iniabirihemuka neryo ikyaleka iniayisubamu.
Erilhabira omwa mulimu wa Nyamuhanga, Paulo mwahandika ebaruha erikangania ngoku omukolha-nabi oyutheyisubamu alhusibawe omwa kithunga (Lebaya enungu 5)
6. Ebaruha ya Paulo muyahamba yithi okwa kithunga n’omukolha-nabi?
6 Paulo abere abirithumira Abakristayo be Korinto b’ebaruha yiwe, mwatsuka eriyibulha-bulha ekithunga nga kikendi yowa kithi. Erighunzerera, Tito mwamulethera omwatsi owamutsemesaya. Ekithunga kyabya ikyabiryangirira ndeke ebaruha ya Paulo. (2 Kor. 7:6, 7) Babya ibabirighendera okwa busondoli bwiwe. Eryongera okw’ekyo, omwa mezi awakwamako Paulo alithumire ebaruha yiwe, omukolha-nabi oyo abya iniabiriyisubamu erilhua omwa nzira yiwe nyibi! Abya iniabirihindulha emibere yiwe n’amalengekania wiwe kandi iniabiritsuka erikwama ebihano bya Yehova ebithunganene. (2 Kor. 7:8-11) Neryo Paulo angabwire ekithunga athi kithasyakolhaki?
NGOKU EKITHUNGA KYANGA KOLONGENE N’OMUKOLHA-NABI OYUWABIRIYISUBAMU
7. Erilhusya omukolha-nabi omwa kithunga mumwalhwirira bibuya byahi? (2 Abanya Korinto 2:5-8)
7 Soma 2 Abanya Korinto 2:5-8. Paulo mwakangania ngoku “omundu oyo abirisuyirwa bingaho n’erisuyirwa ly’abangyi omwa kathi-kathi kenyu.” Ni bugha ambu, erikunga lyabya iryabirikolha ekighendererwa kyalyo okwa mulhume oyo. Ekighendererwaki? Eky’erimuhikya okw’iyisubamu.—Ebr. 12:11.
8. Paulo mwathasyabwira ekithunga athi kikoleki?
8 Neryo Paulo mwabwira ekithunga athi: “Mubuyire n’erikirania” mulikyethu oyuwabirihalya, “erimukangya ndeke olhwanzo.” Lhangira ngoku Paulo aby’anzire ekithunga ikyakolha bingyi kwilhaba erithakwama kyasubya omulhume oyo omwa bandu ba Yehova. Paulo aby’anzire ibakakasya omulhume omukolha-nabi omwa binywe byabu, emibere, n’emikolere ngoku kwenene babirimughanyira kandi ku bamwanzire. Neryo bangabere ibamakikangania ndeke-ndeke ngoku bamatsema akasuba omwa kithunga.
9. Busana naki abandi bangabya imubasaghirira erighanyira omukolha-nabi oyuwabiriyisubamu?
9 Mbwino abandi omwa kithunga mubanalemwa ery’angirira omukolha-nabi oyuwabiriyisubamu akasuba omwa kithunga? E Biblia siyirithubwira, aliwe kyangabya imukyabya. Kundi emikolere yiwe, muyahamba okwa kithunga ekyosi kandi yangabya imuyahemulha abandu balebe. Abandi bangabya imubayowa bathi sikyabya kitholere omulhume oyo eryangirirwa nga mulikyethu kundi n’ibo balengaho erisighalha ibanahenirye omwa by’esyongeso. (Thasyalebaya na Luka 15:28-30.) Neryo busana naki kyabya kikulhu ekithunga erikangania mulikyabo oyuwabirisubulha olhwanzo olhw’okwenene?
10-11. Ni kyahi ekyangabere abasyakulhu ku baghana erighanyira omukolha-nabi oyuwabiriyisubamu?
10 Thalengekania okwa kyangabere abasyakulhu ku baghana erilighira omulhume oyuwayisubamu omo kwenene erisuba omwa kithunga, kutse ekithunga erighana erimukangania olhwanzo abirisubulha. “Obulighe bunene” bwanga mukindire. Angalhuireho iniayowa nga syakiriko malenguliro. Nibya angalekere aho erihiraho akaghalha ak’erisuba-subania obughuma bwiwe na Nyamuhanga.
11 Ekikalire okw’aho, abandi balikyethu omwa kithunga ku baghana erighanyira omukolha-nabi oyuwabiriyisubamo, bangahirire obughuma bwabu na Yehova omw’akabi. Busana naki? Bangabere ibamakangania amalengekania wa Sitani ng’obutsurumi n’erithendi kangania obughanyiri, butsira amalengekania wa Yehova aw’erighanyira omukolha-nabi oyuwabiriyisubamu. Ni bugha ambu, Diabolo angabakolesirye, erithoghothya obunyakirimu bw’omulhume oyo.—2 Kor. 2:10, 11; Efe. 4:27.
12. Ekithunga kyangagherererye kithi Yehova?
12 Neryo ekithunga kye Korinto, kyangagherererye kithi Yehova, butsira Sitani? Erikwama enzira ya Yehova ey’erikolonganiramu n’abakolha-nabi abakayisubamu. Lhangira ebya abahandiki balebe be Biblia babugha ebihambire oku Yehova. Dawudi mwabugha athi: “Ni mubuya kandi anayitheghekire erighanyira.” (Esy. 86:5) Mika mwahandika athi: “Nindi yo Nyamuhanga ng’iwe, oyukabuyira ebibi, n’erikiruka okw’ihona ly’amasighalira w’abandu biwe kwehi?” (Mika 7:18) Na Isaya mwabugha athi: “Omubi aleke enzira yiwe, n’omundu oyuthathunganene aleke amalengekania wiwe. Asube oko Mwami Mukulhu, nayu asyamughanyira; asube ahali Nyamuhanga wethu, kusangwa asyamubuyira ndeke.”—Isa. 55:7.
13. Busana naki kyabya kitholere erisubya omukolha-nabi oyuwabiriyisubamu omwa kithunga? (Lebaya akasanduku “ Omulhume we Korinto Asubibawa Omwa Kithunga Mughulhu Wahi?”)
13 Erithoka erigherererya Yehova, ekithunga kye Korinto kyabya kitholere ikyathangirira omulhume oyuwabiriyisubamu akasubulha n’erimukakasya ku bamwanzire. Omw’ighendera okwa busondoli bwa Paulo obw’erithangirira omukolha-nabi oyuwabiriyisubamu akasubulha, ekithunga kyangakanganirye ku ‘kikamw’owa omo myatsi yosi.’ (2 Kor. 2:9) Ni kwenene, habya ihamathalhaba mezi make alilhusibirwe omwa kithunga. Aliwe erikunga lyabya iryabirimuhikya okw’iyisubamu isihali ekyangaleka ibalindirirya erimusubya omwa kithunga.
ERIKANGANIA OBULINGIRIRANIA N’OBUGHANYIRI BWA YEHOVA
14-15. Thwam’ighaki okwa mibere olhubanza olhwabya kera omwa Korinto lhwasohawamo? (2 Petero 3:9) (Lebaya n’ekisasani.)
14 Omwatsi owahambire okwa mibere olhubanza olhwabya kera omwa Korinto lhwasohawamo mwahandikwa n’eritheghibwa “busana n’erithukangirirya.” (Abar. 15:4) Omwatsi oyo akathweghesaya ngoku Yehova syalilighira oyukakolha erilholho erikalire akabya omwa bandu biwe. “Obughanyiri” bwiwe sibulileka akalighira abakolha-nabi abatheyisubamu erilholha embere erikolongana n’abaramya biwe abathaleghulha. Yehova ni w’obughanyiri, aliwe syalikwama kyalighira emitse mibi; kutse erihindulha ebihano biwe. (Yuda 4) Kundi kwenene, erikolha ekyo sikirikanganaya obughanyiri nahake okwa bosi abali omwa kithunga kundi ikyangana bahira omw’akabi.—Emi. 13:20; 1 Kor. 15:33.
15 Nibya, thuk’igha ngoku Yehova syanzire owosi-wosi akaheribwa. Anzire inialhamya abandu kyamathokekana. Akakanganaya obughanyiri okwa bandu abakabindulha emithima kandi abakanza erisuba-subania obughuma bwabu nayu. (Eze. 33:11; soma 2 Petero 3:9.) Neryo, omulhume we Korinto abere abiriyisubamu n’erileka enzira yiwe nyibi, Yehova mwakolesya Paulo erisoborera ekithunga ngoku omulhume oyo atholere iniaghanyirwa n’erithasyathangirirwa omwa kithunga.
Erighanirya okwa lhwanzo lhwa Yehova n’obughanyiri bwiwe, ekithunga kikathangirira ndeke abakasubibawa mukyo (Lebaya enungu 14-15)
16. Wukayowa wuthi okwa mibere olhubanza olhwabya omwa Korinto lhwasohawamo?
16 Erithasyalebya ndeke emibere eyo olhubanza olhwabya kera omwa Korinto lhwasoherawamo kyabirithuwathikya eriyilhangirira olhwanzo, erithunganene, n’obulingirirania bwa Yehova omwa mikolere. (Esy. 33:5) Mbwino eki sikirikuhira mw’omuhwa ow’eryongera eripipa Nyamuhanga wethu? Kundi nibya, ithwe bosi thuli bakolha-nabi kandi obuli mughuma w’okw’ithwe akayithagha erighanyira liwe. Obuli mughuma w’okw’ithwe awithe enzumwa eyangaleka iniasima Yehova busana n’endongolya, eyikaleka erighanyirwa iryathokekana. Ka kikahumulikanaya eriminya ngoku kwenene Yehova anzire abandu biwe kandi kw’akabasunzira ekibuya!
17. Ni byahi ebikendi syakanibwako omo myatsi eyikakwamako?
17 Kandi ibbwa bikahika okwa mibere amalholho akasoherawamo munabwire? Abasyakulhu b’ekithunga banga kangania bathi eriyisunza lya Yehova ery’erilholerya omukolha-nabi y’okw’iyisubamu? Ekithunga kitholere ikyakolhaki abasyakulhu bamathwamu erilhusya omundu y’omwa kithunga kutse erimusubyamu? Ebibulyo ebi bikendi syakanibwako omo myatsi eyikakwamako.
OLHWIMBO 109 Mwanzane Kutsibu Erilhua Okwa Muthima
