Omukwenda Paulo mwahandikira Abakristayo abanya Tesalonika athi: “Hamabya omundu omwakathi-kathi kenyu oyukaghana erikenga ekinywe kyethu omwa baruha eyi, muminye omundu oyo, kandi simuthambe nayu nahake, abane erihemuka.” (2 Tes. 3:14) Omwa buthuku bw’ahanyuma, muthwabugha thuthi bwabya busondoli bw’abasyakulhu. Omundu amalholha embere erigheghena emisingyi ye Biblia nomo ane mukungwa mughulhu wosi, abasyakulhu bangana lhabya omukania w’erikunga ekithunga. Enyuma waho, obuli muthuliri ahabwiwe isyatholere akatsanga n’omundu oyo ng’omunywani.

Nomwabine, embinduka yikayithaghisibawa. Kilhangirikire ngoku erihabulha lya Paulo lyabya likakania okwa eky’obuli Mukristayo atholere iniakolha omwa mibere mirebe. Neryo abasyakulhu sibaliyithagha erilhabya omukania w’erikunga. Busana naki ihabya embinduka? Thalengekania okwa ebya Paulo abya akakaniako akaha erihabulha eri.

Paulo mwalhangira ngoku abandi omwa kithunga babya ‘bakaghalha-ghanda.’ Ibakaghana erihabulha eryasondolibawa n’omulimu. Omwa lhubungo lhwiwe lhw’ahanyuma, mwalhaghira athi: “Oyuthanzire erikolha omubiiri, syahabawe akalyo.” Nomwabine, abandi babya ibakinaghana erikolha erithoka eriyisighika, nomubanabya ibangana thoka erikolha. Kandi babya ibanemuyingirya omwa myatsi y’abandi. Abakristayo babya batholere erithwalha bathi abakaghalha-ghanda aba?—2 Tes. 3:6, 10-12.

Paulo mwabugha athi: “Muminye omundu oyo.” Ekinywe ky’Ekigiriki kikamanyisaya eriminyerera omundu oyo n’erimuyihighulhako. Paulo aha erihabulha eri ly’ekithunga ekyosi, butsira abasyakulhu basa. (2 Tes. 1:1; 3:6) Neryo obuli Mukristayo oyuwangabya imwalhangira mulikyabo akaghana erighendera okw’ihabulha eryasondolibawa iniakaleka ‘erithamba’ n’oyukaghalha-ghanda.

Mbwino eki kyabya kikamanyisya kithi omundu oyo abya akathwalhwa ng’oyuwabirilhusibwa omwa kithunga? Eyihi, kundi Paulo mw’ongerako athi: “Mumuhane ng’omulikyenyu.” Neryo obuli Mukristayo iniakakolongana n’oyuwabiriminyikalibwa okwa muhindano n’omw’ithulira, aliwe ibakathwamu erithendi kolongana nayu okw’iyitsemesya. Busana naki? Paulo mwabugha athi: “Abane erihemuka.” Busana n’eriminyikalibwa, Omukristayo oyukaghalha-ghanda iniakahemuka n’erihindulha emibere yiwe.—2 Tes. 3:14, 15.

Munabwire, Abakristayo bangaghendera bathi okw’ihabulha eri? Eky’erimbere, thutholere ithwakakasya nga nina kwenene indi omubere ogho awithe ni “ghalha-ghanda,” ngoku Paulo abugha. Syabya akakania okwa bali mbaghane okw’ithwe bikahika okwa myatsi y’obunyamuthima-thima kutse eby’obuli mughuma anzire. Kandi syabya akakwama ky’akania okwa babirithuponesya. Omwakanya k’ekyo, Paulo abya akakania okwa bakaghana erihabulha erilhangirikire erikalhua oku Nyamuhanga, omw’ikighenderera.

Munabwire, thwamalhangira mulikyethu akakangania omuthima w’erithendiowa, a ithwangana thwamu erithendi sangira nayu omw’iyitsemesya. Kundi eri ni y’ithwiramo, isithwendi kikaniako n’abandi abathe b’omwa famile yethu eyonyine-nyine. Kandi ithukendi sighalha ithune mukolongana n’omundu oyo okwa muhindano n’omw’ithulira. Iniakendibya akahindulha emibere yiwe, neryo ithukendi thasya kolongana nayu omwa buswire.