YOSUA abya w’erisondolha ekihanda kye Israeli eribingirya omwa Kihugho Ekyalhaghanisibawa. Eki sikyangabere kyolho. Aliwe, Yehova mwamughumya n’erimuhimba omw’ibugha athi: “Wubye n’amaaka n’eriyisigha kutsibu.” Mwabwira Yosua athi amasoma n’erikenga Emighambo, neryo iniakend’ithwamu ndeke kandi iniaghasirwa.—Yosua 1:7, 8.

Thuli omwa “mighulhu eyikalire,” neryo engebe yethu yangana kalha. (2 Timoteo 3:1) Thwamabya thwanzire erighasirwa nga Yosua, thutholere ithwaghendera okw’ihabulha eryo Yehova amuha. Thutholere ithwasoma e Biblia mughulhu wosi n’erikolesya ebya thuk’igha erithwamu ndeke.

Aliwe abandi omw’ithwe thwanganabya isithwasi eriyeghesya, kutse isithuli tsemera erigha. Aliwe, eriyeghesya e Biblia ni kikulhu kutsibu. Omwa kasanduku “ Lengesaya Amenge Ano,” wukendi bana mw’ebyanga kuwathikya erighasirwa omw’iyeghesya lyawu n’eriritsemera kutsibu.

Omuhandiki w’esyonyimbo mwabugha athi: ‘Wunyisondole omo nzira y’amahano wawu, kusangwa ngabana mugho mw’obutseme.’ (Esyonyimbo 119:35) Nawu wangana tsemera eriyeghesya Ekinywe kya Nyamuhanga. Wukendi bana myatsi mingyi eyuwene wukalholha embere eriyeghesya e Biblia.

Nomwakine indi iwe siwendi sondolha ekihanda nga Yosua, wunawithe ebitsibu byawu. Neryo, nga Yosua, yeghesaye, n’erighendera okwa Kinywe kya Nyamuhanga. Wamakolha ekyo, iwukend’ithwamu ndeke kandi iwaghasirwa.