Ibya n’Omubere w’Erikwira “Abandu Bosi” b’Obulighe”
YESU abere akakangirirya abigha biwe erithulhughania engulhu yuwene, mwababwira athi si bugha indi mughulhu wosi abandu bakendisyanza eribahulikirira. (Luka 10:3, 5, 6) Ekiri ng’eki kya thukanabana omw’ithulira. Abandi abathukabana bangana thugheghena kutse nibya n’erithutsurumira. Kandi bamakolha ekyo, kyangana thukalira erikwa obulighe n’erianza eribathulira.
Oyukakwira abandi b’obulighe akalhangira ebiyithawa n’ebitsibu by’abandi, iniabaghanya, n’erianza eribawathikya. Aliwe ibikendibya bithi thwamathendi kwira abo thukeghaya omw’ithulira b’obulighe? Ithukendi herya omuhwa wethu, ni bugha ambu, ithuthanza eribathulira, kandi isithwendi thoka eribawathikya. Thwangana linganisya omuhwa wethu n’omuliro. Omuliro eryaka ndeke, akayithagha esyongwe. Kuthya nethu omuhwa wethu erighuma, thukayithagha eribya n’omubere w’erikwira abandi b’obulighe!—1 Abanya Tesalonika 5:19.
Thwangabya thuthi abakakwira abandi b’obulighe, nibya n’omughulhu kikalire? Thukanaye okwa by’erileberyako bisathu ebya thwanga gherererya: Yehova, Yesu, n’omukwenda Paulo.
GHERERERAYA OMUBERE WA YEHOVA OW’ERIKWIRA ABANDI B’OBULIGHE
Habw’esyongumi sy’emyaka, abandu babirithulha oku Yehova kw’amabehi. Aliwe akasighalha inina “mwenge okwa bathesima n’abandu babi.” (Luka 6:35) Akakanganaya athi olhukeri lhwiwe? Akaghumisirizaya obuli mundu. Yehova anzire “abandu abosi balhamibawe.” (1 Timoteo 2:3, 4) Nomwakine indi Nyamuhanga aponire obubi, abandu ni b’obughuli embere siwe kandi syanzire n’omughuma akaholha.—2 Petero 3:9.
Yehova anasi ngoku Sitani asi erithebererya abandu. (2 Abanya Korinto 4:3, 4) Abangyi babirikangiriribwa amabehi oku Nyamuhanga eritsuka bulere. Neryo amalengekania n’eriyowa lyabu byangana leka ikyabakalira eriligha ekwenene. Aliwe Yehova anzire eribawathikya. Thukaminya thuthi?
Ng’eky’erileberyako, thalengekania ngoku Yehova abya akayowa okwa bandu be Ninawe. Nomwakine indi babya ini bandu abanzire eby’obwithi, Yehova mwabugha na Yona athi: “Naghe sinangaghanyira e Ninawe, omuyi munene oyo, omuli abandu bangyi kwilhaba elfu erighana n’amakumi abiri (120,000), abathasi erisombolha ebyalha by’amali okwa byalha byabu by’amalembe?” (Yona 4:11) Yehova mwakwira abandu abo b’obulighe, abandu abathabya basi ekwenene eyimuhambireko. Neryo mwabathumira Yona eriyabakunga.
Nethu thukakwira abandu b’obulighe nga Yehova. Ni b’obughuli. Nga Yehova, thukanza kutsibu eribawathikya erigha ekwenene eyimuhambireko nibya n’omughulhu kikalhangirika nga sibendi ligha ekwenene.
GHERERERAYA OMUBERE WA YESU W’ERIKWIRA ABANDI B’OBULIGHE
Nga Thatha wiwe, Yesu nayu mwakwira abandu b’obulighe “kusangwa mubaghalhwa n’erilhuha ng’esyombuli sithawithe mulisya.” (Matayo 9:36) Yesu mwaminya ekyaleka ibabya omwa mibere eyo. Babya omwa mibere eyo kundi abasondoli babu ibakabakolha nabi n’eribakangirirya amabehi. Kandi nomwakine indi Yesu abya inianasi ngoku abandi abakasyahulikirira sibendi mukwama busana n’esyonzumwa ndebe, mwabakangirirya myatsi mingyi.—Mariko 4:1-9.
Isiwahwa amani abandi bamathendi hulikirira okw’itsuka
Emibere y’engebe yikabya yikahinduka, abandu bangan’angirira ekwenene
Abandu bamathusubirya nabi thukabathulira, thutholere ithwalengesya eriyitheghererya ekyamaleka. Obundi banganabya ibawithe amalengekania awathatholere okwa Biblia kutse okwa Bakristayo busana n’eribya ibabirilhangira abandi abakayahulhamo Bakristayo bakakolha ebithuwene. Abandi banganabya ibabiriowa amabehi okwa bya thwikirirye. N’abandi banganabya ibakasagha bathi abahughu babu kutse abataka babu bakendi basekerera bamakania nethu.
Abandi abo thukasanga omw’ithulira banganabya ibabiribana ebitsibu ebikalire ebyabiribahambako kutsibu. Omumisani oyukahulhawa mwa Kim akabugha athi abangyi omwa bulhambu bwiwe balhama okwa lhuhi kandi mubaherya ebindu byabu ebyosi. Sibawithe maha busana n’obuthuku bw’embere. Bakayibulha-bulha kandi sibali yikethera mundu wosi-wosi. Abandu omwa bulhambu obu mughulhu mungyi bakalengaho erikakirya erithulira ly’Abema ba Yehova. Kiro kighuma nibya mubaghombekera Kim iniane omw’ithulira.
Kim akalholha athi embere erikwira abandi b’obulighe, nomwakine indi abandu bakamukolha nabi? Mughulhu wosi akalengaho eryibuka Emisyo 19:11, ahakabugha hathi: “Amenge w’eriyisunako ly’omundu akaleka iniathahithana lhuba.” Erilengekania okwa ebya bandu b’omwa bulhambu bwiwe balhabamu, kikaleka iniabakwira obulighe. Kandi sibugha indi obuli mundu oyo akasangana ni mutsurumi. Omwa bulhambu ibwan’obo anawithe ab’erisubako abuwene.
Ithwangana yibulya: ‘Ku nabya isingasi ekwenene, ambi ngayithwalha indi Abema ba Yehova bakanyihikako erinyithulira?’ Ng’eky’erileberyako, ibbwa thwamathabya ithwabiriowa amabehi mangyi okwa Bema ba Yehova? Obundi nethu ithukendi ghana omwatsi n’eribya ithutholere erikwirwa obulighe. Yesu mwabugha athi thutholere ithwakolha abandi ngoku thwanzire ibathukolha. Neryo thutholere ithwalengaho eriyitheghererya eriyowa ly’abandi n’eribaghumisirizya, n’omukyangabya ikikalire.—Matayo 7:12.
GHERERERAYA OMUBERE WA PAULO OW’ERIKWIRA ABANDI B’OBULIGHE
Omukwenda Paulo mwakwira abandi b’obulighe, nibya n’ababya bakahakanisya erithulira liwe. Busana naki? Kundi mwibuka ngoku abya kera. Mwabugha athi: “Kera nabya nga mutsumi, n’oyukamwendereraya, n’erimulethera omwagha. Nikwa Nyamuhanga mwanyighanyira kusangwa nakolha omwa buthaminya, isindi n’ikirirya.” (1 Timoteo 1:13) Paulo mwaminya ngoku Yehova na Yesu mubamukangania olhukogho lhunene. Iniakayitheghereraya abandu ababya bakamukakirya erithulira kusangwa nayu mwanayowa ng’ibo.
Ihakanayira Paulo inieya abikirirye kutsibu esyongangirirya sy’amabehi. Eki mukyaleka iniayowa athi? Emibiri 17:16, hakathubwira hathi Paulo iniane e Atene, “ekirimu kiwe mukyabya n’obulighe, kusangwa alhangira omuyi inioswire mw’esyosanamu.” Aliwe, Paulo mwakolesya ekindu ekyamwitha obulighe ekyo erikangirirya abandu. (Emibiri 17:22, 23) Iniakahindulha emibere y’erikangirirya, kandi iniakakanaya omwa mibere muthina-muthina akakania n’abandu abalhuire omwa mibere muthina-muthina nuku athoke “omwa nzira syosi erisunga abandu ba kubo.”—1 Abanya Korinto 9:20-23.
Omughulhu thukathulira abandu abathanzire omwatsi wethu kutse abawithe esyonyikirirya sy’amabehi, thwangana kolha nga Paulo. Thwangana kolesya ebya thubasiko eribawathikya eriminya “engulhu yuwene y’eritsema.” (Isaya 52:7) Mwali wethu oyukahulhawa mwa Dorothy akabugha athi: “Omwa bulhambu bwethu, abandu bangyi babirikangiriribwa ambu Nyamuhanga atsurumire kandi akatsweba-tsweba abandu. Abandu ng’abo ngabasingaya busana n’eribya ibikirirye omo Nyamuhanga neryo enyuma w’aho inalholya amalengekania wabu okwa kya Biblia yikabugha okwa mibere ya Yehova ey’olhwanzo n’emilhaghe yiwe ey’obuthuku obukasa.”
“WUKINDE EKIBI OMWA KIBUYA”
Thukendibya thune museghera hakuhi n’enduli, n’amalengekania w’abandu akendi yongera eribya mabi. (2 Timoteo 3:1, 13) Aliwe isithwaheraya omubere wethu w’erikwira abandi b’obulighe kutse obutseme busana n’emibere abandi bakayithwamu. Yehova angana thuha amaaka w’erilholha embere erikinda “ekibi omwa kibuya.” (Abanya Roma 12:21) Omutemburi oyukahulhawa mwa Jessica akabugha athi mughulhu mungyi akasangana abandu abawithe emiyiheko n’abakathusekerera n’omwatsi ogho thukathulha. Ak’ongerako athi: “Eki kyangana hithania. Ngabya ingatsuka omukania, ngasaba Yehova kikuthu-kuthu n’erimusaba obuwathikya erilhangira omundu ngoku akamulhangira.” Eki kikawathikaya Jessica erithendi tsomana eriyowa liwe aliwe akatsomana emibere angawathikiryamu omundu oyo.
Thukasondaya abanzire eribana ekwenene
Endambi iyikendihika, abandu balebe ibaligha obuwathikya bwethu n’erigha ekwenene
Kandi thutholere ithwaghumya balikyethu thukathulira nabu. Jessica akabugha athi omughulhu akathulira n’abandi neryo omughuma w’okw’ibo iniabya imwathakolhwa ndeke omw’ithulira, akalengaho erithendi kihweryako amalengekania. Omwakanya k’ekyo akalengaho erikania okwa kyuwene, obundi ng’ebibuya ebikalhwiririra omw’ithulira lyethu abandi bandu nomubanga subirya nabi.
Yehova anasi ndeke-ndeke ngoku hakanayira ikyathukalira erithulira. Aliwe akatsema thukagherererya olhukeri lhwiwe! (Luka 6:36) Aliwe Yehova syendi ghumisirizya n’erikwira abandu b’ekihugho kino b’obulighe erihika kera na kera. Thwangana yikethera ngoku anasi endambi ey’enyine-nyine eyo akendi lethera mw’enduli. Endambi eyo yithe yahika, erithulira lyethu ni ry’eryanguhya. (2 Timoteo 4:2) Neryo thulhole embere erithulira n’omuhwa n’erikwira “abandu bosi” b’obulighe.
