1, 2. Kikamanyisayaki erihira ameso oku Yehova?

THULI omwa “mighulhu eyikalire.” (2 Timoteo 3:1) Kandi engebe yikendyongera erikalha Yehova athali aherya ekihugho kibi kino n’eriletha obuholho bw’okwenene okwa kihugho. Busana n’eki, thutholere ithwayibulya, ‘Nindi oyo ngasondaya kw’obuwathikya n’obusondoli?’ Ithwangan’anguha eribugha thuthi, “Ni Yehova,” kandi eki kya kitholere.

² Kikamanyisayaki erihira ameso oku Yehova? Kandi thwanga thoka thuthi eribya ithunamuhirireko ameso omughulhu thuwithe ebitsibu? Kera, omuhandiki mughuma we Biblia mwasoborera nga thukayithagha bungahi erisamalira Yehova thukayithagha obuwathikya. (Soma Esyonyimbo 123:1-4.) Mwabugha athi thukabya thukahira oku Yehova kw’ameso, thukabya ng’omughombe oyukahira ameso oko mukama wiwe. Athi? Omughombe akahira oko mukama wiwe kw’ameso, kutse erimuyikethera, ku yukendi muha ebyalya n’obutheya. Kandi atholere iniasamalira omukama wiwe mughulhu wosi eriminya ebya mukama wiwe anzire iniakolha, neryo iniabikolha. Kuthya, obuli kiro thutholere ithw’igha ndeke Ekinywe kya  Nyamuhanga erithoka eriminya ebyo anzire ithwakolha, neryo ithwabikolha. Neryo kyangana leka ithwasika ngoku Yehova akendi thuwathikya.​—Abanya Efeso 5:17.

3. Ni byahi ebyanga thulemesya erihira ameso w’oku Yehova?

³ Nomwakine indi thunasi ku thutholere mughulhu wosi ithwahira ameso wethu oku Yehova, thwangana lengemeribwa. Ekyo ky’ekyahika n’oku munywani wa Yesu ow’okwa ndungu, iya Marata. “Mwahanga-hangya omuthima omwa mibiiri mingyi.” (Luka 10:40-42) Omundu muthaleghulha iya Marata amabya imwanalengemeribwa nomwakine indi abya iniane na Yesu, isithwasweka nethu eribya ithwangana lengemeribwa. Neryo ni byahi ebyanga thulengemerya ithuthahira ameso w’oku Yehova? Omo mwatsi ono, thukendi kania ebya bandi bakakolha nga byanga thulengemerya bithi. Kandi thukend’igha ngoku thwangabya ithunahirire ameso oku Yehova.

4. Busana naki kyangana thuswekya Musa eribya imwaherya olhusunzo lhw’eringira omwa Kihugho Ekyalhaghanisibawa?

⁴ Ahathe erithika-thika Musa iniakahira ameso w’oku Yehova erimuha obusondoli. E Biblia yikathubwira yithi “mwayiyinia iniakalhangira Oyuthelholhawako.” (Soma Abaebrania 11:24-27.) Kandi yikabugha yithi ‘muhathahangana omuminyereri nga Musa Omuisraeli erihika na lino, oyo Mwami Mukulhu alholhako busu okwa busu.’ (Eryibuka Ebihano 34:10) Aliwe nomwakine indi Musa abya munywani wa Yehova ndeke, mwaherya olhusunzo lhw’eringira omwa Kihugho Ekyalhaghanisibawa. (Emiganzo 20:12) Mubyabya bithi?

5-7. Ni kyahi ekyabya Abaisraeli imubanamalhua e Misiri, kandi Musa mwakolhaki?

⁵ Isihali halhaba myezi ibiri Abaisraeli balilhuire e Misiri, kandi isibali bahika okwa Kithwe Sinai, ekindu ekikalire mukyabya. Abandu mubatsuka eriyineghenia busana n’eribulha amaghetse. Mubatsuka eriyineghenia oku Musa n’erihithana kyamaleka ‘Musa inialhakira Omwami Mukulhu athi, Nyikoleki okwa bandu aba kwehi? Bali hakuhi n’erinyitha omwa mabwe!’ (Eriluayo 17:4) Yehova mwaha Musa y’eby’erighenderako ebilhangirikire. Yehova mwabugha athi Musa imaye omutso wiwe n’eriswirya okwa lhukuka olhwabya e Horebu. E Biblia yikabugha yithi: “Musa mwakolha athya omwa meso w’abakulhu ba Israeli.” Neryo amaghetse mwalhuamu, Abaisraeli bamanywa, ekitsibu kyamahwa.​—Eriluayo 17:5, 6.

⁶ E Biblia yikabugha yithi Musa mwahulha omwanya oyo mwa Masa, ekikamanyisaya “Erilenga,” na Meriba, ekikamanyisaya “Erineghena.” Busana naki? “Busana n’erineghena ly’abaana Baisraeli na kandi busana n’erilenga oku Mwami Mukulhu bathi, Omwami Mukulhu ali haghuma nethu kutse eyihi kwehi?”​—Eriluayo 17:7.

⁷ Yehova mwayowa athi okwa kyabya e Meriba eki? Mwayowa Abaisraeli ibabirimuyisamambulhako n’obuthoki bwiwe, butsira oku Musa. (Soma Esyonyimbo 95:8, 9.) Ekya Baisraeli bakolha kyabya kiwire kutsibu. Aliwe Musa mwakolha ekihikire. Mwahira ameso wiwe oku Yehova n’erikwama ndeke obusondoli bwiwe.

8. Ni kyahi ekyabya kyabere Abaisraeli ibakayaghunza olhughendo lhwabu lhw’omo mbwarara?

⁸ Aliwe, mubyabya bithi ekiri ng’ekyo kikathasyabya enyuma w’emyaka 40? Abaisraeli babya ibakayaghunza olhughendo  lhwabu lhw’omo mbwarara. Mubahika hakuhi ne Kadesi, hakuhi n’omuthanu w’Ekihugho Ekyalhaghanisibawa. Omwanya oyu mwaminywa mwa Meriba. * (Lebaya omwatsi ahikwa.) Busana naki? Kundi Abaisraeli kandi mubayineghenia bathi sihali maghetse. (Emiganzo 20:1-5) Aliwe, okwa buthuku obo, Musa mwakolha ekisobyo ekikalire.

9. Yehova mwalhaghira Musa athi akoleki, aliwe ni kyahi ekya Musa akolha? (Lebaya ekisasani ekiri okw’itsuka.)

⁹ Musa mwakolhaki abandu bakayisamambulha? Kandi, mwasaba Yehova y’obusondoli. Aliwe okwa buthuku obu Yehova mwathabwira Musa eriswirya eribwe. Mwabwira Musa athi imaye omutso wiwe, alethe abandu hakuhi n’olhukuka, neryo abughe n’olhukuka. (Emiganzo 20:6-8) Musa mwanakolha ekyo? Eyihi. Abya iniabiriyibulha-bulha n’erikwa ekinigha, kyaleka iniabugha n’abandu athi: “Muhulikirire, inywe mukathupona! Thukendi bahulhukirya amaghetse omw’ibwe eri kwehi?” Neryo mwaswirya eribwe, kutse olhukuka, butsira murundi mughuma, aliwe mirundi ibiri.​—Emiganzo 20:10, 11.

10. Yehova mwayowa athi busana n’ekya Musa akolha?

¹⁰ Yehova mwahithana kutsibu oku Musa. (Eryibuka Ebihano 1:37; 3:26) Ni kyahi ekyaleka Yehova iniahithana? Enzumwa nguma yanganabya kundi Musa mwathaghendera okwa busondoli buhyaka obwa Yehova amuha.

11. Musa eriswirya olhukuka, busana naki kyangabya imukyaleka Abaisraeli ibalengekania bathi Yehova syathakolha ekithiko-thiko?

¹¹ Hanganabya ihane eyindi nzumwa eyaleka Yehova iniahithana. Esyonguka nene-nene esye Meriba y’erimbere ni mabwe awakalhakalire. Omundu nomwangaswirya bungahi amabwe ng’aya, simwangalhua amaghetse. Aliwe esyonguka esye Meriba eyakabiri siri mbaghane kutsibu. Esyonguka nene omw’isyo siri ng’ekibwe eky’olhoberere. Neryo kundi olhukuka olhu lhwolhoberere, amaghetse akabya iniane mulhwingiramu neryo iniabya omwa kithaka. Neryo abandu ibangana bana amaghetse aya omw’ithobolha olhukuka olho. Neryo omughulhu Musa aswiraya olhukuka omwakanya k’eribugha nalho, mbwino Abaisraeli mubalengekania bathi amaghetse alyakwama kyayilhuiramu n’erilengekania bathi Yehova syathakolha ekithiko-thiko? * (Lebaya omwatsi ahikwa.) Sithwasi nga kya n’ekyo.

12. Ni yindi nzumwa yahi eyangabya iyaleka Yehova iniahithana oku Musa na Haruni?

¹² Hanganabya ihakine eyindi nzumwa  eyaleka Yehova iniahithana oku Musa na Haruni. Musa mwabwira abandu athi: ‘Thukendi bahulhukirya amaghetse omw’ibwe eri kwehi?’ Musa eribugha athi “thukendi,” angabya iniamanyisaya iyo na Haruni. Ebya Musa abugha mubyakangania erithendi sikya kundi mwathakangania Yehova ku yuwamakolha ekithiko-thiko ekyo. Esyonyimbo 106:32, 33 hakabugha hathi: ‘Mubamuhithania okw’isoko ye Meriba, kandi Musa mwabana obulighe busana n’omwatsi wabu. Mubaleka Musa iniakalha, kyaleka iniabugha emyatsi yithatholere akabugha.’ * (Lebaya omwatsi ahikwa.) (Emiganzo 27:14) Musa mwathaha Yehova y’erisikya erimutholere. Yehova mwabwira Musa na Haruni athi: “Mumwapona erihana lyaghe.” (Emiganzo 20:24) Eki kyabya kibi ekikalire!

13. Busana naki emibere Yehova asuyiramu Musa yabya yihikire kandi iyitholere?

¹³ Ni bingyi ebya Yehova ayithagha oku Musa na Haruni kundi babya bakasondolha abandu biwe. (Luka 12:48) Kera eki kithe kyabya, Yehova abya iniabirighana erilighira olhulengo lhulebe lhw’Abaisraeli eringira omwa Kihugho Ekyalhaghanisibawa kundi mubamuyisamambulhako. (Emiganzo 14:26-30, 34) Neryo kyabya kihikire kandi ikitholere, Yehova erisuyira Musa yathya akayisamambulha. Ng’abandi bayisamambuli, Musa mwathalighirwa eringira omwa Kihugho Ekyalhaghanisibawa.

14, 15. Ni kyahi ekyaleka Musa iniayisamambulha oku Yehova?

¹⁴ Ni kyahi ekyaleka Musa iniayisamambulha oku Yehova? Thasyalebaya ekiri omwa Esyonyimbo 106:32, 33 kino: ‘Mubamuhithania okw’isoko ye Meriba, kandi Musa mwabana obulighe busana n’omwatsi wabu. Mubaleka Musa iniakalha, kyaleka iniabugha emyatsi yithatholere akabugha.’ Neryo nomwakine indi Abaisraeli babayisamambulha oku Yehova, Musa yuwakalha, kutse erihithana. Mwathayikakirya aliwe mwabugha ahathe erilengekania okwa byanga lhwiririramu.

¹⁵ Musa mwaleka erihira ameso w’oku Yehova kundi mwaligha erilengemeribwa omwa by’abandi bakolha. Omurundi w’erimbere abandu bakayineghenia okwa maghetse, Musa mwakolha ekihikire. (Eriluayo 7:6) Obundi abya alhuhire n’eriyiponera kundi Abaisraeli babya ibabiriyisamambulha habw’emyaka mingyi. Okwa ndambi eyi Musa anganabya iniabya akalengekania okw’iyowa liwe omwakanya k’erilengekania okw’iha Yehova y’olhukengerwa.

16. Busana naki thutholere ithwalengekania okwa ekya Musa akolha?

¹⁶ Omuminyereri muthaleghulha nga Musa amabya imwanalengemeribwa n’erikolha ekibi, nethu ekiri ng’ekyo kyangana thubyako. Musa abya iniakay’ingira omwa Kihugho Ekyalhaghanisibawa, nethu thukisiya ithwingira omwa kihugho kihya-kihya. (2 Petero 3:13) Ahathe erithika-thika sithwanzire thukaherya olhusunzo  lhw’embaghane olho. Aliwe eringira omwa kihugho kihya-kihya, thutholere ithwalholha embere erihira ameso w’oku Yehova n’erimwowa mughulhu wosi. (1 Yoane 2:17) Ni masomo wahi agho thwang’ighira okwa kisobyo kya Musa?

17. Thwanga sighalha thuthi n’omubere w’eriyikakirya omughulhu thwabiriponesibwa?

¹⁷ Isiwalemawa eriyikakirya omughulhu hali ekyabirikuponesya. Hakanayira ithwabana ebitsibu by’olhughumerera. Aliwe e Biblia yikabugha yithi: “Sithulhuhe erikolha ebibuya kusangwa okwa mughulhu atholere thwasyahulhulha thwamathendi leghulha.” (Abanya Galatia 6:9; 2 Abanya Tesalonika 3:13) Ekindu kutse omundu amabera erithuponesya, thukanatsuka erilengekania thuthe thwabugha? Thukanakakiraya ekinigha kyethu? (Emisyo 10:19; 17:27; Matayo 5:22) Abandi bamathuponesya, thutholere ithw’igha erithendi hithana, kutse ithwalighira Yehova erikangania erihithana liwe. (Soma Abanya Roma 12:17-21.) Ekyo kikamanyisayaki? Omwakanya k’erihithana, thukalinda Yehova ayire ekyo akakolha okwa kitsibu kyethu okwa ndambi eyitholere. Thwamalengesya eriyithuhulirya omwakanya k’erihira ameso w’oku Yehova, ithukendibya isithwathamusikya.

18. Thutholere ithw’ibukaki okw’ikwama obusondoli?

 ¹⁸ Kwama ndeke obusondoli obuli okwa buthuku. Thukanakwama buthaleghulha obusondoli obuli okwa buthuku obwa Yehova akathuha? Si thutholere thukabera erikolha ebindu ngoku thwabya thukabikolha kera thuthi kundi ku thubeghere thuthya. Omwakanya k’ekyo, thutholere ithwanguha erikwama obusondoli obwa Yehova akathuha erilhabira omwa kithunga kiwe. (Abaebrania 13:17) Kandi, thutholere ithwayitheya ‘okw’isoha nabi.’ (1 Abanya Korinto 4:6) Thwamakwama ndeke obusondoli bwa Yehova, thukabya ithwamamuhira kw’ameso.

19. Thwanga yitheya thuthi okw’ilighira ebisobyo by’abandi eritsandya obunywani bwethu na Yehova?

¹⁹ Isiwalighira ebisobyo by’abandi eritsandya obunywani bwawu na Yehova. Thwamabya ithunahirire ameso w’oku Yehova, isithwendi tsandya obunywani bwethu nayu kutse erihithana busana n’eby’abandi bakakolha. Kutsibu-tsibu eki ni kikulhu, thwamabya ithuwithe esyonzunzo, nga Musa, omwa kithunga kya Nyamuhanga. Ni kwenene, obuli mundu erilhamibwa, atholere iniakolha kutsibu n’eriowa Yehova. (Abanya Filipi 2:12) Aliwe, Yehova akathuyithaghako bingyi erikwamana n’esyonzunzo esyo thuwithe. (Luka 12:48) Aliwe thwamabya ithunanzire Yehova, sihali ekyanga thuthwikalya kutse erithughabulha oko lhwanzo lhwiwe.​—Esyonyimbo 119:165; Abanya Roma 8:37-39.

20. Thutholere ithwathwamu erikolhaki?

²⁰ Thuli omwa biro ebikalire kandi ebyoswire mw’ebitsibu. Neryo ni kikulhu eribya ithunahirire ameso wethu w’oku Yehova, oyuli ‘endatha elhubulha aho akathabalira,’ nuku thuminye ebyo akanza thukole. Isithwalighira ebya bandi bakakolha bikatsandya obunywani bwethu na Yehova. Ekyabya oku Musa kikathweghesaya erisomo likulhu lino. Omwakanya k’erihiririkana abandi bamasobya, ambi ithwathwamu ‘erihira ameso wethu oko Mwami Mukulhu, Nyamuhanga wethu, erihika aho akendi thughanyira.’​—Esyonyimbo 123:1, 2.