1, 2. (a) Busana naki ni ky’amenge eribya okwa lhuhandi lhwa Yehova? (b) Omo mwatsi ono thukendi kania okuki?

NI KY’AMENGE ithwe eribya ithune bughuma na Yehova. Sihali oyumulengirye obuthoki, amenge, n’olhwanzo! Ni kwenene, mughulhu wosi thukanza ithwabya bathaleghulha oku Yehova n’eribya okwa lhuhandi lhwiwe. (Esyonyimbo 96:4-6) Aliwe abandi ababya baramya ba Nyamuhanga mubalemwa erikolha ekyo.

² Omo mwatsi ono, thukendi kania okwa by’erileberyako eby’abandu balebe ababugha bathi bane okwa lhuhandi lhwa Yehova aliwe ibane mukolha ebyo athanzire. Amasomo agho mughaso agho thuk’ighira okwa by’erileberyako byabu angana thuwathikya eribya bathaleghulha oku Yehova.

3. Ni kyahi ekyaleka Yehova inialengaho eriwathikya Kaina, kandi mwamubwira athiki?

³ Ng’eky’erileberyako, lengekanaya oku Kaina. Isyaliramaya esyonyamuhanga sy’amabehi, nomwabine Yehova  mwathaligha eriramya liwe. Busana naki? Yehova mwalhangira obubi ibune omwa muthima wa Kaina. (1 Yoane 3:12) Yehova mwakunga Kaina athi: “Wamakolha ndeke, siwendi syaliwa kwehi? Neryo wamathendi kolha ndeke, ebibi binasunamire oko lhukyo, iwakolha ekyo wanzire, nikwa wuthabale kubyo.” (Enzuko 4:6, 7) Yehova abya iniakakanganaya Kaina ngoku amayisubamu n’erithwamu eribya okwa lhuhandi lhwa Nyamuhanga, Nayu iniakendibya okwa lhuhandi lhwiwe.

4. Kaina mwakolhaki omughulhu athunga akaghisa k’eribya okwa lhuhandi lhwa Yehova?

⁴ Kaina kw’ahindulha amalengekania wiwe, Yehova angalighire eriramya liwe. Aliwe Kaina mwathahulikirira Nyamuhanga, neryo amalengekania n’esyongumbu siwe nyibi mubyaleka iniakolha ebithuwene. (Yakobo 1:14, 15) Omughulhu Kaina abya mulere, angabya imwathalengekania okw’ibya iniangana syahakanisya Yehova. Aliwe hano mwagheghena erikunga lya Nyamuhanga, amayisamambulha okw’iyo, n’er’itha mughalha wabu!

5. Ni malengekania wahi awangaleka Yehova iniathathusima?

⁵ Nga Kaina, munabwire Omukristayo angana bugha athi akaramaya Yehova aliwe inianemukolha ebyo Yehova aponire. (Yuda 11) Anganabya inianawithe omuhwa omw’ithulira kandi isyali bulha okwa mihindano. Aliwe kandi, inialighira amalengekania w’obutswatswa, aw’obururu, kutse eryusulha mw’amalengekania w’eripona abandi. (1 Yoane 2:15-17; 3:15) Amalengekania ng’ayo angana leka omundu iniakolha ekibi. Abandi banganabya isibasi ebyo thukalengekanaya kutse erikolha, aliwe Yehova iyo anabyasi. Anasi nga thune ndeke-ndeke okwa lhuhandi lhwiwe.​—Soma Yeremia 17:9, 10.

6. Yehova akathuwathikaya athi erirwanisya esyongumbu nyibi?

⁶ N’omughulhu thukasobaya, Yehova syalilhuaho akathulekerania. Thwamabya ithuli okw’ilholha omwa nzira nyibi, Yehova akathubwira athi: “Munyisubeko, naghe nasyabasubako.” (Malaki 3:7) Yehova anasi ku thune murwanisya erilemererwa lyethu. Aliwe anzire ithwasika n’erighana ebibi. (Isaya 55:7) Thwamakolha ekyo, akayilhagha erithuwathikya n’erithuha akaghalha akathukayithagha erirwanisya esyongumbu syethu nyibi.​—Enzuko 4:7.

7. Solomona mwaherya athi obunywani bwiwe na Yehova?

⁷ Solomona iniane mulere, abya awithe obughuma obuwene na Yehova. Nyamuhanga mwaha Solomona y’amenge manene n’erimuha omubiiri mukulhu ow’erihimba ehekalu eyuwene e Yerusalemu. Aliwe Solomona mwaherya obunywani bwiwe na Yehova. (1 Abami 3:12; 11:1, 2) Ekihano kya Nyamuhanga ikikabugha kithi omwami “syasayikanyiraya abakali, omuthima wiwe akasyahinduka.” (Eryibuka Ebihano 17:17) Solomona mwathaghendera okwa kihano eki. Endambi muyahika amathunga abakali 700 n’abahweki 300! (1 Abami 11:3) Abangyi b’okwa bakali aba babya banya-bihanda ababya bakaramya esyonyamuhanga sy’amabehi. Neryo Solomona mwathowa ekihano kya Nyamuhanga ekyabya kikaghania erithahya abakali ab’ebindi bihanda.​—Eryibuka Ebihano 7:3, 4.

8. Solomona mwahithania athi Yehova?

 ⁸ Lyolho-lyolho, Solomona mwaherya olhwanzo olho aby’awithire ebihano bya Yehova. Erighunzerera, mwakolha ebindu bibi. Mwahimba ekiherero busana n’enyamuhanga y’obukali ey’amabehi Asteroti ne nyamuhanga y’amabehi Kemosi, n’enyuma waho iyo na bakali biwe mubaramya esyonyamuhanga sy’amabehi esi. Nibya Solomona mwahimba ebiherero ebi okwa kithwe ekiri embere sye Yerusalemu, aho abya iniabirihimba e hekalu ya Yehova! (1 Abami 11:5-8; 2 Abami 23:13) Obundi Solomona mwayitheba iyuwene-wene omw’ilengekania athi Yehova akendi gheghena ebibi byosi ebyo akolha amabya anemuha obuhere okwa hekalu.

9. Mubyabya bithi Solomona akalemwa erighendera okw’ikunga lya Nyamuhanga?

⁹ Yehova syali gheghena ekibi. E Biblia yithi: “Omwami Mukulhu mwahithana oku Solomona, kusangwa omuthima wiwe abya iniabirikithira ehandi n’erilhua oko Mwami Mukulhu.” Nyamuhanga abya iniabirilengaho eriwathikya Solomona. Yehova ‘abya iniabirimuhulhukira esyongendo ibiri kandi iniabirimuhana busana n’omwatsi oyu athi syakwame esindi nyamuhanga; nikwa mwathabika ebyo Mwami Mukulhu amuhana.’ Neryo, Nyamuhanga mwamupona n’erileka erimusighika. Yehova mwathalighira abitsikulhu ba Solomona erithabalha okwa kihanda kyosi kye Israeli, kandi ahabw’emyaka mingyi mubabana ebitsibu ebikalire.​—1 Abami 11:9-13.

10. Ni kyahi ekyanga tsandya obughuma bwethu na Yehova?

 ¹⁰ Thwamasombolha abanywani abathe yitheghereraya kutse erisikya ebihano bya Nyamuhanga, ibangana thebya obulengekania bwethu n’eritsandya obughuma bwethu na Yehova. Banganabya ibane omwa kithunga, aliwe ibabya isibawithe engolongana eyighumire na Yehova. Kutse banganabya ini bahughu, ini bataka, abathukakolha nabu, kutse abathukasoma nabu abathe ramaya Yehova. Abandu abathukasiba nabu bamabya isibali ghendera okwa bihano bya Yehova, bangana thuhambako kutsibu, ithwaherya obughuma bwethu obuwene na Nyamuhanga.

11. Ni kyahi ekyanga thuwathikya erisombolha abanywani abuwene?

¹¹ Soma 1 Abanya Korinto 15:33. Abandu banene banawithe emibere mirebe eyuwene. Kandi abathe ramaya Yehova banganabya isibali kolha ebithuwene mughulhu wosi. Obundi wunasi abandu ng’abo. Mbwino ekyo kikamanyisaya indi ni banywani abuwene? Ibbwa, bakahamba bathi okwa bughuma bwawu na Yehova? Bakanakuwathikaya eriyithunda hakuhi na Nyamuhanga? Ni byahi ebya bandu aba banzire? Bakakanaya okuki? Mbwino bakabera erikania okwa mulembe w’esyongyimba, esyosente, ebyuma by’etekinologia, eby’eriyitsemesya, n’ebindi ng’ebyo? Bakanabera erikuthya abandi? Banzire erisekya abandu omw’ikania ebithuwene? Yesu mwakunga athi: “Obuno bukabugha ebyoswire omo muthima.” (Matayo 12:34) Wamalhangira abo wukasiba nabu ibali mutsandya obughuma bwawu na Yehova, yira ekya wukakolha! Kehaya obuthuku obwa wukaghunza nabu, kandi kyamayithaghisibwa, iwathwa obunywani obo.​—Emisyo 13:20.

12. (a) Ni kyahi ekya Yehova abwira Abaisraeli bakanalhua e Misiri? (b) Abaisraeli mubabugha bathiki Nyamuhanga akabugha athi babye bathaleghulha?

¹² Thwangan’igha erisomo okwa kyabya Yehova abir’iha Abaisraeli be Misiri. Abandu babere bakahindana embere sye Kithwe Sinai, Yehova mwayikangya embere syabu omwa nzira eyikathikaya! Mubalhangira ekithu ekikinire, ehirabyo, n’omuki, kandi mubowa emilhumo n’omulenge munene w’engubi. (Eriluayo 19:16-19) Neryo mubowa Yehova akabugha athi iyo ni “Nyamuhanga w’obuha.” Mwayilhagha eribya muthaleghulha okw’abo abamwanzire n’abakatheghaya ebihano biwe. (Soma Eriluayo 20:1-6.) Yehova abya akanza Abaisraeli baminye ngoku bamabya okwa lhuhandi lhwiwe, nayu iniakendibya okwa lhuhandi lhwabu. Ku wabya omwa ndeko eyo, wanga yowire wuthi wukowa ebinywe bya Yehova? Obundi nawu wangasubiremu ng’Abaisraeli ababugha bathi: “Ebinywe byosi ebyo Mwami Mukulhu abiribugha, thwasyakolhabyo.” (Eriluayo 24:3) Aliwe buthuku buke enyuma waho muhabya ekyalenga okwa buthaleghulha bw’Abaisraeli. Ni kyahi?

13. Ni kyahi ekyalenga okwa buthaleghulha bw’Abaisraeli?

¹³ Abaisraeli mububaha busana n’enzira eyo Nyamuhanga akanganirayamu obuthoki bwiwe, neryo Musa mwahethukira okwa Kithwe Sinai n’eriyabakanirya na Yehova. (Eriluayo 20:18-21) Aliwe Musa mwasibayo, mwathasa lhuba, erisuba omwa kilhaliriro. Abandu mubabya nga babirisighalha omwa  mbwarara butsira musondoli. Bangakolireki? Abaisraeli banganabya ibabya bayikethere kutsibu omusondoli Musa, omundu w’omubiri. Mubahangya-hangya n’eribwira Haruni bathi: “Wuthukokotheraye esyonyamuhanga esikendi syathubera embere; kusangwa Musa oyo wathulhusaya omo kihugho kye Misiri sithwasi ng’abereyo athi.”​—Eriluayo 32:1, 2.

14. Abaisraeli mubayitheba bathi omwa malengekania, kandi Yehova mwakolhaki?

¹⁴ Abaisraeli babya ibanasi ngoku ni kibi eriramya esyosanamu. (Eriluayo 20:3-5) Aliwe mubalhuaho ibatsuka eriramya ekyana ky’ende eky’ehoro! Nomubanabya ibabirithwa ekihano kya Nyamuhanga, omwa bukiru mubalengekania bathi bakine okwa lhuhandi lhwa Yehova. Nibya Haruni mwahulha eriramya ekyana ky’ende eri mwa ‘kiro kikulhu busana na Yehova’! Yehova mwakolhaki? Mwabwira Musa athi abandu “babiriyitsandya” n’erisighania enzira eyo ‘ahanabo.’ Yehova mwahithana erihika n’okwa kiika ky’erianza erighunzaho ekihanda kyosi.​—Eriluayo 32:5-10.

15, 16. Musa na Haruni mubakangania bathi ku bali okwa lhuhandi lhwa Yehova? (Lebaya ekisasani ekiri okw’itsuka.)

¹⁵ Aliwe Yehova ni Nyamuhanga w’erighanyira. Mwathwamu erithendi ghunzaho ekihanda. Aliwe, mwaha Abaisraeli b’akaghisa k’erikangania ku banzire eribya okwa lhuhandi lhwiwe. (Eriluayo 32:14) Musa abere akalhangira abandu bakutha obwogho, eriimba, n’erihotholha embere sy’esanamu, mw’imya esanamu eyo amaswayo, n’eriyira mw’ibu. Neryo mwabugha athi: “Oyuli okwa lhuhandi lhw’Omwami Mukulhu, ase kw’ingye! N’abaghalha bosi ba Lawi mubahindana okw’iyo.”​—Eriluayo 32:17-20, 26.

¹⁶ Nomwakine indi Haruni mwakolha ekyana ky’ende ky’ehoro, mwayisubamu, kandi n’abaghalha ba Lawi, mubathwamu eribya okwa lhuhandi lhwa Yehova. Abathaleghulha aba mubakikangania ndeke-ndeke ngoku sibali okwa lhuhandi lhw’abakolha-nabi. Eri lyabya ithwamu ly’amenge, kundi enyuma waho ekiro ekyo, abandu bangyi abaramaya ekyana ky’ende mubithibwa. Aliwe ababya okwa lhuhandi lhwa Yehova mubalhama, kandi Nyamuhanga mwayilhagha eribatsumulha.​—Eriluayo 32:27-29.

17. Thuk’ighaki okwa bya Paulo ahandika okwa kyana ky’ende eky’ehoro?

¹⁷ Thuk’ighaki? Omukwenda Paulo mwabugha athi: “Emyatsi yosi eyi yabiribya biminyisyo busana nethu,” nuku sithubye “basabi b’esyosanamu.” Paulo mwasoborera athi emyatsi ng’eyo “muyasakwa busana n’erithukunga. Kusangwa thw’ikere hakuhi n’enduli y’omughulhu ono. Neryo oyukaghaniraya athi imene ndeke ayitheghaye akasyayihinda.” (1 Abanya Korinto 10:6, 7, 11, 12) Ngoku Paulo anakanganaya, nibya nabo abakaramaya Yehova bangana yisanga ibabirisangira omwa bithuwene. Bangana lengekania bathi Yehova akinabalighire. Aliwe omundu erithabya inianzire eribya munywani wa Yehova kutse eribugha athi ni muthaleghulha sikiri manyisaya kithi  mughulhu wosi Yehova akamuligha.​—1 Abanya Korinto 10:1-5.

18. Ni kyahi ekyangana leka ithwaseghera haali oku Yehova, kandi mwanga lhwiririraki?

¹⁸ Musa abere abirisiba e Sinai, Abaisraeli mubahangya-hangya. Enduli y’omughulhu ono yamathendiasa lhuba ngoku thulengekenie, nethu ithwangana hangya-hangya. Ithwangana tsuka erilengekania thuthi ebibuya ebyo Yehova abirithulhagha biri haali kutse thuthi sibyanga bererera, neryo ithwatsuka erikolha ebyo thwanzire omwakanya k’ebya Yehova anzire. Thwamathendi yitheya, ithwangana seghera haali oku Yehova n’erikolha ebyo thuthabya thukalengekania thuthi thwangana kolha.

19. Mughulhu wosi thutholere ithwabya ithun’ibukireki, kandi busana naki?

¹⁹ Yehova akanza ithwamwowa n’omuthima wethu wosi n’erimuramya iyo musa. (Eriluayo 20:5) Ni kyahi ekikaleka iniabugha athi thukole eki? Kundi athwanzire. Thwamathendi kolha ebyo Yehova anzire, ithukendibya ithukakolha ebya Sitani anzire, kandi ekyo ikikendi thulethera ebitsibu. Paulo mwabugha athi: “Simwanga thoka eripulya okwa lhuthehi lhw’Omukama n’okwa lhuthehi lhw’esyombinga; simwanga thoka erisangira eby’emeza y’Omukama n’eby’emeza y’esyombinga.”​—1 Abanya Korinto 10:21.

20. Yehova anga thuwathikya athi nibya ithwabirisobya?

²⁰ Kaina, Solomona, n’Abaisraeli abosi babya ibanawithe akaghisa k’eriyisubamu n’erihindulha emibere yabu. (Emibiri 3:19) Ahathe erithika-thika, Yehova syali anguha erileka abandu busana n’erithabya imubakasobaya. Mwanaghanyira Haruni. Munabwire, Yehova akathughusa kw’akasali omo lhwanzo erithutheya okw’ikolha ebithuwene. Akakolesaya e Biblia, ebitabu byethu, nibya n’abandi Bakristayo. Thwamahulikirira erikunga lya Yehova, ahathe erithika-thika iniakendi thukangania olhukogho.

21. Thutholere ithwakolhaki obuthaleghulha bwethu bwamalengwako?

²¹ Olhukogho lhwa Yehova lhunawithe ekighendererwa. (2 Abanya Korinto 6:1) Lhukathuha akaghisa k’erighana “emikolere eyithekenga Nyamuhanga, n’esyongumbu sy’ekihugho.” (Soma Tito 2:11-14.) Omwa mughulhu ono, hakendibya ihane mubanika ebikalenga okwa buthaleghulha bwethu oku Yehova. Ithwamu eribya iwune ndeke-ndeke okwa lhuhandi lhwa Yehova, kandi wibuke ngoku “wasyubaha Omwami Mukulhu Nyamuhanga wawu; wasyamukolera iyuwene;” kandi ngoku “wasyamumakirirako”!​—Eryibuka Ebihano 10:20.