1. Busana naki thwangana bugha thuthi Yehova ya mwinye byosi? (Lebaya ekisasani ekiri okw’itsuka.)

OBULI kindu ni kya Yehova! “Olhubulha, n’obuthuku bw’endatha kutsibu, ekihugho kyosi n’ebyosi ko birimo” ni biwe. (Eryibuka Ebihano 10:14; Eribisulirwa 4:11) Kundi Yehova yuwahangika abandu, ithwe bosi thuli biwe. (Esyonyimbo 100:3) Aliwe omwa bandu bosi ababirithabyaho, Nyamuhanga abirisombolha abandu balebe eribya biwe omwa nzira y’embaghane.

2. Erikwamana ne Biblia, ni bahi ababiribya bandu ba Yehova omwa nzira y’embaghane?

² Ng’eky’erileberyako, Esyonyimbo 135 muhahulha abaramya ba Yehova abathaleghulha omwa Israeli ya kera mwa bandu “busana nayu iyuwene.” (Esyonyimbo 135:4) Kandi, Hosea mwaminyerera ngoku n’abandi balebe abathe Baisraeli endambi yangahikire ibabya bandu ba Yehova. (Hosea 2:23) Obuminyereri obu mubwabererera omughulhu Yehova atsuka  erisombolha abathe Baisraeli erisyathabalha na Kristo omwa lhubulha. (Emibiri 10:45; Abanya Roma 9:23-26) Abakahakabibawa n’omulimu abo bakahulhawa mwa “kihanda ekibuyirire.” Ni bandu ba Yehova ab’embaghane. (1 Petero 2:9, 10) Kandi ibbwa n’Abakrisitayo abosi abathaleghulha abawithe amaha w’erisyabya okwa kihugho kera na kera? Yehova akabahulha mwa “bandu baghe” na “bayisoghawa baghe.”​—Isaya 65:22.

3. (a) Munabwire ni bahi abawithe engolongana y’embaghane na Yehova? (b) Omo mwatsi ono thukendi kania okuki?

³ Munabwire, “ekihyo kike,” abawithe amaha w’erisy’ikalha kera na kera omwa lhubulha, ‘n’esindi mbuli,’ abawithe amaha w’erisyabya kera na kera okwa kihugho, bakaramaya Yehova haghuma ‘ng’ekihangulho kighuma.’ (Luka 12:32; Yoane 10:16) Thukanza erikangania Yehova ku thukasima kutsibu ithwe eribya n’engolongana y’embaghane nayu. Omo mwatsi ono, thukendi kania ngoku thwanga kangania Yehova y’erisima lyethu busana n’olhusunzo lhw’embaghane olhu.

4. Thwanga singya thuthi Yehova erithulighira eribya bughuma nayu, kandi Yesu mwakolha athi ekiri ng’ekyo?

⁴ Thukakanganaya ku thukasima Yehova omughulhu thukayihayo okw’iyo n’eribatizibwa. Neryo abosi ibakendi lhangira ku thuli bandu ba Yehova kandi ngoku thwanzire erimwowa. (Abaebrania 12:9) Yesu mwakolha ekiri ng’ekyo akabatizibwa. Nomwakine indi abya ini w’omwa kihanda ekyabya kiyihereyo oku Yehova, nayu mwayihayo oku Yehova. Mwabya ng’oyukabugha athi: “Nyanzire erikolha erisonda lyawu, iwe Nyamuhanga waghe!”​—Esyonyimbo 40:7, 8.

5, 6. (a) Yehova mwabugha athiki Yesu akabatizibwa? (b) Ni ky’erileberyako kyahi ekya thwangana kolesya eriyitheghererya Yehova ng’akayowa athi thukayihayo?

⁵ Yehova mwayowa athi Yesu akabatizibwa? E Biblia yithi: “Neryo Yesu abere abiribatizibwa, mwalhua omo maghetse. Neryo olhubulha mulhwakyungukalha busana nayu, neryo mwalhangira omulimu wa Nyamuhanga akandaghalha ng’akalikuku, n’erimwikirako. Neryo omulenge mwalhua elhubulha athi: Oyu ni Mughalha waghe mwanze, namamutsemera ndeke.” (Matayo 3:16, 17) Yesu abya inina wa Nyamuhanga. Aliwe Yehova mwatsema akalhangira Yesu inianzire erikolesya engebe yiwe erimukolera iyo musa. Yehova akatsema nethu thukayihayo okw’iyo, kandi akendi thutsumulha.​—Esyonyimbo 149:4.

⁶ Aliwe ibbwa obuli kindu ka ni kya Yehova! Thwangamuhaki? Thalengekania thatha iniaha kali kiwe okwa byalya biwe ebyuwene. Neryo aliwe kali kiwe ako ikamuha okwa byalya ibyan’ebyo. Nomwakine indi ebyalya bilhue bya thatha, thatha w’olhwanzo iniakendi tsemera ekyo. Kikakanganaya ngoku mwali wiwe amwanzire. Ebya mwali wiwe amamuha ebyo ni by’obughuli kwilhaba ebindi. Kuthya, Yehova akatsema thukathwamu erihayo esyongebe syethu okw’iyo.​—Eriluayo 34:14.

7. Malaki mwathuwathikya athi eriyitheghererya eriyowa lya Yehova okw’abakamukolera erilhua okwa muthima?

⁷ Soma Malaki 3:16. Busana naki ni kikulhu iwe eriyihayo oku Yehova n’eribatizibwa?  Ni kwenene engebe yawu yabere yikanatsuka, muwabya iwuli w’Omuhangiki wawu, Yehova. Aliwe thalengekania ng’angatsema bungahi wukamuligha ng’Omuthabali wawu n’eriyihayo okw’iyo! (Emisyo 23:15) Yehova anasi abakamukolera erilhua okwa muthima, kandi akahandika amena wabu omwa “kitabu ky’eryibuka.”

8, 9. Ni kyahi ekya Yehova akayithagha okw’abo abali omwa “kitabu ky’eryibuka”?

⁸ Thwamabya ithwanzire amena wethu abye iniane omwa “kitabu ky’eryibuka” kya Yehova, hane ekya thutholere ithwakolha. Malaki mwabugha athi thutholere ithubaha Yehova n’erighanirya okwa lina liwe. Thwamaramya omundu wosi-wosi kutse ekindi kyosi-kyosi, erina lyethu irikendi lhusibwa omwa kitabu kya Yehova!​—Eriluayo 32:33; Esyonyimbo 69:28.

⁹ Neryo sikirighunza eriyilhagha erikolha erisonda lya Yehova n’eribatizibwa. Ebi ni bindu ebya thukakolha murundi mughuma musa, aliwe eriramya Yehova kikakolhawa buli kiro. Obuli kiro, thwamabya ithuneho, thutholere ithwakangania ku thukowa Yehova omwa mikolere.​—1 Petero 4:1, 2.

10. Ni mbaghane yahi eyitholere iyabya ahakathi-kathi k’abakakolera Yehova n’abathe mukolera?

¹⁰ Omo mwatsi owahwere, muthw’ighire ngoku Kaina, Solomona, n’Abaisraeli ibakabugha bathi bakaramya Nyamuhanga aliwe mubathabya bathaleghulha okw’iyo. Eby’erileberyako ebi mubya thukangenie ngoku sikirighunza eribugha thuthi thukaramaya Yehova. Thutholere ithwapona ekibi n’erianza ekibuya. (Abanya Roma 12:9) Yehova akabugha athi hangabere embaghane “omo kathi-kathi k’abathunganene n’ababi, n’omwa kathi-kathi k’oyukakolera Nyamuhanga n’oyuthe mukolera.”​—Malaki 3:18.

11. Busana naki kitholere ikyolhobera abosi erilhangira ngoku thukaramaya Yehova musa?

¹¹ Thukasima Yehova eribya imwathusombolha eribya bandu biwe! Ambi ikyolhobera abosi erilhangira ku thuli okwa lhuhandi lhwa Yehova. (Matayo 5:16; 1 Timoteo 4:15) Yibulhaye: ‘Abandi bangana lhangira ndeke-ndeke ku ngali muthaleghulha oku Yehova? Ngana yisyethera eribwira abandu ku ngali Mwema wa Yehova?’ Thalengekania Yehova ng’angayowa athi thwamabya ithukakwa esisoni eribwira abandi ku thuli bandu biwe.​—Esyonyimbo 119:46; soma Mariko 8:38.

12, 13. Abandi babirileka ikyakalira kithi abandi eribaminyerera ku ni Bema ba Yehova?

¹² Eky’obulighe, nibya n’abandi Bema ba Yehova bakagherereraya “ekirimu ky’ekihugho.” Neryo, sibali thasyabya mbaghane okw’abo abathe ramaya Yehova. (1 Abanya Korinto 2:12) “Ekirimu ky’ekihugho” kikaleka abandu ibatsomana esyongumbu syabu nyisa. (Abanya Efeso 2:3) Ng’eky’erileberyako, amahano mangaha n’awathukabana, abandi bakathwamu eriambalha nabi. Bakambalha esyongyimba esibamakirire kutse esikakanganaya ebitsuku by’esisoni, nibya n’okwa mihindano. Kutse  ibakolha esyonzwiri esy’ekihugho-hugho. (1 Timoteo 2:9, 10) Neryo, ibaleka ikyabya ikyangana kalira abandi eriminya nabu nga nina Bema ba Yehova kutse eyihi.​—Yakobo 4:4.

¹³ Hane esindi nzira esyo bandi Bema ba Yehova balebe babiribya isibathakangania ndeke-ndeke ku ni ba mbaghane okwa kihugho. Ng’eky’erileberyako, okwa magheni, abandi bakanahotholha omwa mibere eyithatholere okwa Bakristayo. Abandi babirihira okwa mithahulha y’erikanirania kw’ebisasani byabu kutse emyatsi eyikakanganaya amalengekania wabu w’ekinyamubiri. Banganabya isibali bathasuyirwa omwa kithunga busana n’erilholho erikalire, aliwe banganahamba nabi okwa balikyabo abane mulengaho eribya mbaghane okwa kihugho.​—Soma 1 Petero 2:11, 12.

14. Ni kyahi ekya thutholere ithwakolha erithoka eritheya obunywani bwethu bw’embaghane na Yehova?

¹⁴ Ebyosi ebiri omwa kihugho bikolirwe erileka thutsomane ‘esyongumbu sy’omubiri, esyongumbu sy’ameso, n’emiyiheko y’abandu.’ (1 Yoane 2:16) Ithwe thuli bandu ba Yehova, neryo kikaleka ithwabya mbaghane. Thukaghana “emikolere eyithekenga Nyamuhanga, n’esyongumbu sy’ekihugho,” kandi thukayitheghaya “n’erikwama ekithunganene n’erikenga Nyamuhanga omwa mikolere yethu oko mughulhu ono.” (Tito 2:12) Engebe yethu yosi, imwamuli emikanirye yethu, emirire, erinywa, emyambalire, n’omubiiri, bitholere ibyakangania abosi ngoku thuli bandu ba Yehova Nyamuhanga.​—Soma 1 Abanya Korinto 10:31, 32.

15. Busana naki thutholere ithwakangania abandi Bakristayo olhwanzo n’olhukeri?

¹⁵ Thukakanganaya ku thutsomene obunywani bwethu na Yehova omwa mibere thukathwaliramu balikyethu. Ni bandu ba Yehova, ng’ithwe. Thwamabya ithun’ibukire eki, ithukendi bakangania olhukeri n’olhwanzo mughulhu wosi. (1 Abanya Tesalonika 5:15) Busana naki eki ni kikulhu? Yesu mwabwira abigha biwe athi: “Mwamabya n’olhwanzo, omughuma busana n’owundi, abandu bosi basyaminya ku muli bigha baghe.”​—Yoane 13:35.

16. Emighambo ya Musa yikathweghesayaki oko lhwanzo olho Yehova awithire abandu biwe?

¹⁶ Eky’erileberyako ekiri omwa Mighambo ya Musa kyangana thuwathikya erilhangira ngoku thutholere erithwalha abandi omwa kithunga. Omwa hema ya Yehova, mwabya ebindu ebyabya bikakolesibwa okw’iramya liwe lisa. Emighambo muyasoborera ndeke-ndeke Abalawi ngoku banga theya ebindu ebyo, kandi owosi-wosi oyuthe wanga ghendera okwa bihano ebyo abya ini w’erithibwa. (Emiganzo 1:50, 51) Yehova amabya iniabya atsomene kutsibu emibere abandu babya bakathwaliramu ebindu ebyabya bikakolesibwa omw’iramya liwe, ibbwa kwesi atsomene bungahi ngoku abandu bakathwalha abaramya biwe abathaleghulha ababiriyihayo! Akanza thuminye ngoku thuli b’obughuli embere siwe akabugha athi: “Oyukabathulhako akathulha okwa kalhangira k’eriso lyaghe.”​—Zekaria 2:8.

17. Ni kyahi ekya Yehova ‘anatheghire amathwe n’eriowa’?

¹⁷ Malaki mwabugha athi Yehova “mwathegha amathwe mwowa” ebyo bandu biwe bakakolerana. (Malaki 3:16) Yehova “anasi  abandu biwe nga ni bahi.” (2 Timoteo 2:19) Anasi ndeke-ndeke ebyosi ebya thukakolha n’eribugha. (Abaebrania 4:13) Thwamakolha balikyethu ba nabi, Yehova akalhangira. Aliwe thwangana yikethera ngoku Yehova akaminya thwamakokya abandi, thwamabya benge, erighanyira, n’erikangania olhukeri.​—Abaebrania 13:16; 1 Petero 4:8, 9.

18. Thwangaha thuthi Yehova y’ewasingya busana n’erithusombolha eribya bandu biwe?

¹⁸ Thwanzire erikangania Yehova ku thukasima eribya ithuli bandu biwe. Thunasi ngoku omughulhu thwayihayo oku Yehova, lyabya ithwamu eryuwene. Nomwakine indi thwikere “omwa kathi-kathi k’ekihugho ekihengemire n’eky’omwagha,” thwanganabya “abakumayire n’eribya bandu babuya, abaana ba Nyamuhanga abathe kw’omwatsi” n’erikolerya “ng’esyotala omwa kihugho.” (Abanya Filipi 2:15) Neryo thwabirithwamu eriyihighulha okw’ikolha ekyosi-kyosi ekya Yehova aponire. (Yakobo 4:7) Kandi thukanza n’erisikya balikyethu kundi nabu ni bandu ba Yehova.​—Abanya Roma 12:10.

19. Yehova akahemba athi abiwe?

¹⁹ E Biblia yikalhagha yithi: “Omwami Mukulhu syendi syasighania ekihanda kiwe.” (Esyonyimbo 94:14) Eri n’ikakasibwa eriwathire. Ekyosi-kyosi ekyangabya, Yehova akendibya iniane nethu. Nomuthwanga holha, syanga thwibirirwa. (Abanya Roma 8:38, 39) ‘Thwamabyaho thukabyaho busana na Yehova, kandi thwamaholha thukaholha busana na Yehova. Neryo, thwamabyaho kutse thwamaholha, thuli ba Yehova.’ (Abanya Roma 14:8) Thulindirire obuthuku Yehova akendi syalhubukya abanywani biwe abathaleghulha ababiriholha. (Matayo 22:32) Nibya na lino thunemubana ebihembo bingyi erilhua oku Thatha wethu w’elhubulha. Ngoku e Biblia yikanabugha, “obutseme buli okwa kihanda ekiwithe Nyamuhanga mo Mwami Mukulhu, obutseme buli okwa bandu abiriyisogha mo bandu biwe.”​—Esyonyimbo 33:12.