1-2. (a) Erikwamana n’ekihano kya Yesu ekiri omu Matayo 28:18-20, omubiiri mukulhu w’ekithunga ky’Ekikristayo w’owahi? (b) Ni bibulyo byahi ebya thukendi kaniako omo mwatsi ono?

ABAKWENDA babere bakahindana okwa kithwe bangabya ibabya balindirire kutsibu ekyo bakendibwirwa. Yesu abere abirilhubuka, mwathegheka erihindana nabo omwa mwanya oyo. (Mt. 28:16) Obo bwangabya ibw’obuthuku “ahulhukira abalikyethu bangyi kwilhaba maghana athano okwa ndambi nguma.” (1 Kor. 15:6) Ni kyahi ekyaleka Yesu iniabwira abigha athi bahindane nayu? Eribaha omubiiri mubuyanga: “Neryo mughende, muyire abigha okwa bihanda byosi.”​—Soma Matayo 28:18-20.

² Abigha abowa ebinywe bya Yesu enyuma waho mubabya baghuma b’okwa kithunga ky’Ekikristayo eky’omwa kighonye ky’erimbere. Omubiiri mukulhu w’ekithunga ekyo abya iry’eryongera eriyira abigha ba Kristo. * Munabwire, omwa kihugho muli ebithunga bingyi by’Abakristayo ab’okwenene, kandi ebithunga ebyo omubiiri wabyo mukulhu wan’oyo. Omo mwatsi ono thukendi lebya ebibulyo bbini: Busana naki ni kikulhu eriyira abigha? Omubiiri oyo mwamuli erikolhaki? Mbwino Abakristayo abosi bakana sangira omw’iyira abigha? Kandi busana naki omubiiri oyu akayithagha erighumisirizya kutse eriyitsingirira?

3. Erikwamana na Yoane 14:6 na 17:3, busana naki omubiiri w’eriyira abigha ni mukulhu?

³ Busana naki omubiiri w’eriyira abigha ni mukulhu? Kundi abigha ba Kristo basa babangabya banywani ba Nyamuhanga. Eryongera okw’ekyo, abakakwama Kristo bawithe esyongebe esyuwene lino kandi bawithe amaha w’erisyatsemera engebe kera na kera obuthuku obukasa. (Soma Yoane 14:6; 17:3.) Ahathe erithika-thika, Yesu abirithuha omubiiri mukulhu, aliwe sithuli kolhagho ithw’ibene. Omukwenda Paulo mwayikaniako n’abandi banywani biwe athi: “Nyamuhanga yo thukakolha haghuma nayu.” (1 Kor. 3:9) Olhu ka ni lhusunzo lhunene olhwa Yehova na Yesu babiriha abandu abathahikene!

4. Eky’erileberyako kya Ivan na Matilde kyanga thweghesyaki?

⁴ Omubiiri w’eriyira abigha angana thulethera etseme nene. Eky’erileberyako ni Ivan na mukali wiwe, Matilde, abe Colombia. Mubathulira omulhume oyukahulhawamo Davier, oyuwababwira athi: “Nganzire erikolha esyombinduka, aliwe sinangathoka.” Davier abya mulhwi omwa masatha w’esyongumi oyukakolesaya ebibatsi ebikathamiraya, ini mukundirya, kandi inian’ikere n’omusika ya Erika . Ivan akabugha athi: “Muthwatsuka eribya thukayamulebya omwa kyalhu kyabu ekyabya haali, neryo ikikayithagha erighenda okwa syoggali habw’esyosaha nyingyi omwa syonzira esiri mw’ebyondo. Erika abere abirilhangira Davier akakolha esyombinduka omwa mibere n’omwa malengekania nayu mwatsuka erigha e Biblia.” Endambi muyahika, Davier amaleka ebibatsi ebikathamiraya, obwabu, n’eby’erilhwa. Kandi mwalunga na Erika. Matilde akabugha athi: “Davier na Erika babere bakabatizibwa omwa 2016, muthw’ibuka ngoku Davier anabya akabugha athi, ‘Nganzire erikolha esyombinduka, aliwe sinangathoka.’ Etseme muyabya nene erihika n’okw’irira.” Ahathe erithika-thika, thukatsema kutsibu thukawathikya abandu eribya bigha ba Kristo.

5. Ni kindu kyahi eky’erimbere ekya thukakolha omw’iyira abigha?

⁵ Eky’erimbere ekya thukakolha eriyira abigha ly’erisondya abanzire erigha oku Yehova. (Mt. 10:11) Thukakanganaya ngoku thuli Bema ba Yehova, thukathulira abosi abo thukabana. Thukakanganaya ku thuli Bakristayo ab’okwenene omw’ighendera okwa kihano kya Kristo ky’erithulira.

6. Ni kyahi ekyanga thuwathikya erithoka ndeke omubiiri w’erithulira?

⁶ Abandi bandu bananzire erigha ekwenene ye Biblia, aliwe abangyi abathukabana okw’itsuka banganabya nga sibanzire. Ithwangana yithagha eribahira mw’omuhwa w’erigha. Erithoka ndeke omubiiri w’erithulira, thutholere ithwathegheka ndeke. Sombolha emyatsi mirebe eyangananzisya abo wukendibana. Neryo thegheka ngoku wanga tsuka obuli mwatsi.

7. Wanga tsuka wuthi omukania n’omundu, kandi busana naki ni kikulhu erihulikirira n’erisikya?

⁷ Ng’eky’erileberyako, iwangana bulya omundu: “Nganza eriminya amalengekania wawu oko mwatsi ono? Ebitsibu bingyi ebya thukabana munabwire bikahika okwa buli mundu. Wukalengekanaya hane egavumente yosi-yosi eyanga ghunzaho ebitsibu ebiri omwa kihugho?” Neryo iwangana kania oku Danieli 2:44. Kutse iwangana bugha n’omutaka wuthi: “Wukalengekanaya ni nzira yahi eyitholere ey’erikuliryamu abaana abawithe syongeso? Wanga bugha wuthiki.” Neryo mukanaye  oku Eryibuka Ebihano 6:6, 7. Mbulha wamasombolha kyahi eky’erikaniako, ambi iwalengekania okwa bandu abo wukendi kibwira. Lengekanaya nga banga ghasirwa bathi bak’igha ekya Biblia yikakangiriraya. Wukakania nabu, ni kikulhu eribahulikirira n’erisikya amalengekania wabu. Aho iwukendi bayitheghererya ndeke, nabo obundi ibanza erikuhulikirira.

8. Busana naki erisubayo likayithagha erihathikana?

⁸ Omundu athali athwamu erigha e Biblia, kyangana yithagha endambi n’akaghalha omw’isubayo ngendo nyingyi. Busana naki? Kundi abandu banganabya isibaliyo thukathasyababungira. Kandi, wangana yithagha erisubayo ngendo nyingyi omundu erikubeghera n’eriligha erigha e Biblia. Wibuke, ekirimwa ikikendi kulha kyamabya ikinemubana amaghetse mughulhu wosi. Kuthya, oyuwanzisibirwe eryongera erianza Yehova na Kristo irikendiongera thwamabera erimukanirya okwa Kinywe kya Nyamuhanga.

9-10. Busana naki ithwabugha thuthi obuli Mukristayo akawathikaya omw’isondekania ab’emithima myolho?

⁹ Obuli Mukristayo akawathikaya omw’isondekania ab’emithima myolho. Thwangana linganisya eki n’omubiiri w’erisondya omwana oyuthere. Omu nziraki? Thalengekania okwa kyabya omughulhu omulhwana w’emyaka isathu athalha. Abandu nga 500 mubamusondya. Erighunzerera, ihamabirilhaba esyosaha nga 20 inianathere, omundu mwamubana omw’irima ly’ebikusa. Omundu oyo mwathanza eripipwa busana n’eribana omwana. Mwabugha athi: “Ni bandu bangyi abalyamusondaya.”

¹⁰ Abandu bangyi bali ng’omwana oyo. Bathere. Sibawithe amaha, bakayithagha obuwathikya.  (Efe. 2:12) Ithwe bandu abalhabire omu miliyoni munani thunemukolha haghuma erisondya abandu aba. Wangana ghana eribana ow’eryeghesya e Biblia. Aliwe, abandi bathuliri abakakolha obulhambu ibwan’obo bangana bana omundu oyuwanzire erigha ekwenene eyiri omwa Kinywe kya Nyamuhanga. Mulikyethu amabana omundu oyuwanzire eribya mwigha wa Kristo, obuli mundu oyulyasangira omw’isondya atholere iniatsema.

11. Nomuwangabya isiwuwithe ow’eryeghesya e Biblia, ni sindi nzira syahi esya wanga wathikiryamu eriyira abigha?

¹¹ Nomuwangabya isiwuwithe ow’erigha nayu e Biblia, wangana wathikya eriyira abigha omwa sindi nzira. Ng’eky’erileberyako, wangana thangirira n’erinywana abahyaka bakasa okwa Kisenge ky’Obwami. Omwa nzira eyo, iwangana leka ibalhangira ku thuli Bakristayo b’okwenene. (Yn. 13:34, 35) Erisubirya lyawu okwa mihindano nomulyangabya omwa bikuhi, lyangan’eghesya abahyaka ngoku banga kangania erikirirya lyabu erilhua okwa muthima n’omw’isikya. Kandi wangana kolha n’omuthuliri omuhyaka n’erimuwathikya erikolesya Amasako erikangirirya abandi. Omw’ikolha ekyo, iwukendibya iwukamukangiriraya erigherererya Kristo.​—Lk. 10:25-28.

12. Mbwino thukayithagha amenge w’embaghane erithoka eriyira abigha? Soborera.

¹² Isithwalengekanaya thuthi thukayithagha amaaka w’embaghane erikangirirya abandi eribya bigha ba Yesu. Busana naki? Thulebaye eky’erileberyako kya Faustina, oyuwikere e Bolivia. Abya isyasi erisoma akabana Abema ba Yehova. Neryo lino angana soma. Lino abiribatizibwa, kandi anzire erikangirirya abandi. Mughulhu mungyi, akasondolha abigha be Biblia bathano obuli yenga. Nomwakine indi abangyi b’okwa bigha ba Faustina bakasoma ndeke kwilhaba iyo, abiriwathikya abandu mukagha erihika okw’ibatizibwa.​—Lk. 10:21.

13. Nomuthwangabya ithuhathathene kutsibu, ni mighisa nga yahi eya thwangabana omwa mubiiri w’eriyira abigha?

¹³ Abakristayo bangyi bahathathene busana n’esyongwamirwa esirithohire. Nomwabine, bakabana endambi y’erisondolha abigha be Biblia, kandi kikabalethera etseme nyingyi. Thalebya eky’erileberyako kya mwali wethu e Alaska ya Melanie. Ini omubuthi oyuli iyuwene oyuwithe kali kiwe ak’emyaka munani. Iniawithe omubiiri w’obuthuku bwosi kandi iniakalembera omubuthi wiwe oyulhwere ekansa. Melanie musa abya iya Mwema wa Yehova omwa tawuni yabu eyabya haali okwa sindi tawuni. Iniakabera erisaba Yehova amuhe akaghalha k’erighumira ekihuhiriro n’eriyathulira kundi inianzire kutsibu eribana omundu ow’eryeghesya e Biblia. Erighunzerera mwabana Sara, oyuwatsema kutsibu akaminya  ngoku Nyamuhanga anawithe erina. Enyuma w’obuthuku bulebe, Sara mwaligha erigha e Biblia. Melanie akabugha athi: “Kyakathano omw’igholho iningabya inabirilhuha, aliwe ingye na mwali waghe ithukaghasirawa eriyigha n’omwigha oyo. Ithukatsemera erisekulya okwa bibulyo biwe, kandi muthwatsema kutsibu thukalhangira akabya munywani wa Yehova.” Omwa buthubaha Sara mw’imanira erihakanisibwa, amalhua omwa dini yiwe, neryo amabatizibwa.

14. (a) Eriyira abigha liri lithi ng’erisoha? (b) Ebinywe bya Paulo ebiri omu 2 Timoteo 4:1, 2 bikakuhambako bithi?

¹⁴ Nomuwangabya isiwuli wabana ow’erigha nayu, isiwahwa amani. Wibuke Yesu mwalinganisya omubiiri w’eriyira abigha n’obusohe. Abasohi banganasalha babana esiswi ihamabirihwa esyosaha nyingyi. Mughulhu mungyi bakakolha omwa kiro kutse omwa ngyakya-ngyakya, kandi hakanayira ibaghenda lhughendo lhuuli. (Lk. 5:5) Kuthya, abandi bathuliri omw’ighumisirizya kandi okwa ndambi n’omwa myanya muthina-muthina bakakolesaya saha nyingyi omwa “busohe.” Busana naki? Nuku bangathoka eribana bandu bangyi. Abakahiraho akaghalha ng’ako mughulhu mungyi bakahembawa omw’ibana abandu abakatsemera omwatsi wethu. Wanganalengesya erithulira okwa ndambi eyo abandu banga banikiramu kutse erithulira omwa mwanya ogho bangabya igho bakabanikamo?​—Soma 2 Timoteo 4:1, 2.

15. Busana naki eryeghesya abigha be Biblia kikayithagha erighumisirizya?

 ¹⁵ Busana naki erisondolha abigha likayithagha erighumisirizya kutse eriyitsingirira? Enzumwa nguma yiri yithi sithulisubulira okw’iwathikya omwigha eriminya n’erianza ebya Biblia yikakangiriraya. Thutholere ithwawathikya omwigha eriminya n’erianza Yehova, Omwinye Biblia. Eryongera okw’eghesya omwigha ebya Yesu akayithagha okwa bigha biwe, thutholere ithwawathikya omwigha eriminya ngoku angaghendera okwa bya ak’igha. Omw’ighumisirizya thutholere ithwamuwathikya akalengaho erighendera okwa misingyi ye Biblia. Abandi bakathoka erihindulha amalengekania n’emibere yabu omwa mezi make buyira; n’abandi ibaghunza mughulhu muuli.

16. Eky’erileberyako kya Raúl kikathweghesayaki?

¹⁶ Omumisyonare e Peru mwayilhangirira omughaso w’erighumisirizya. Akabugha athi: “Nabya inabirigha ebitabu bibiri n’omwigha oyukahulhawamo Raul. Aliwe abya iniakinawithe ebitsibu ebikalire omwa ngebe yiwe. Obutheke bwiwe imuli amalhwa, iniakabugha kithya-kithya, n’abaana biwe isibamusikirye busana n’emibere yiwe. Iniakahindana mughulhu wosi, neryo munalholha embere erimubungira eriyamuwathikya n’eka yiwe. Erighunzerera, habere halhaba emyaka eyilhabire okw’isathu, mwatholera eribatizibwa.”

17. Thukendi syakania okuki omo mwatsi owakakwamako?

¹⁷ Yesu mwathubwira athi “mughende, muyire abigha okwa bihanda byosi.” Eriberererya omubiiri oyu, thutholere mughulhu wosi ithwakania n’abandu abawithe amalengekania awali mbaghane oko wethu, imwamuli n’abathawithe dini kutse ab’ikirirye bathi sihali Nyamuhanga. Omwatsi owakakwamako akendi kania ngoku thwanga thulha engulhu yuwene okwa bandu ab’emibere muthina-muthina.