1. Busana naki thutholere ithwayitheghekera eriendereribwa?

OMW’ITHUMBI Omukama wethu Yesu athalyithibwa, mwabugha athi abosi abakathwamu eribya bigha biwe bakendi syaponwa. (Yn. 17:14) Erihika na lino, abakahakanisaya eriramya ly’okwenene babiryendererya Abakristayo abathaleghulha, Abema ba Yehova. (2 Tim. 3:12) Enduli y’omughulhu mubi ono yinemuseghera hakuhi, esyonzighu syethu sikendyongera erithuhakanisya kutsibu.​—Mt. 24:9.

2-3. (a) Busana naki eryubaha ni rya kabi? (b) Omo mwatsi ono thukendi kania okuki?

² Thwanga yitheghekera thuthi lino eryimanira eriendereribwa? Sikiriyithagha erithera akasasani k’ebyosi ebithuwene ebyanga thubyako. Thwamakolha ekyo, obuba n’erihangya-hangya ibikendi thubundamirya. Ithwangana leka n’erikolera Yehova. (Emi. 12:25; 17:22) Obuba ni kindu ky’amaaka ekya “nzighu” yethu, “Sitani,” akalengesaya erikolesya erithulemesya. (1 Pet. 5:8, 9) Thwanga kolhaki lino eriyitheghekera erighumira eriendereribwa?

³ Omo mwatsi ono, thukendi lhangira ngoku thwanga ghumya obughuma bwethu na Yehova kandi n’ekikaleka ikyabya ini kikulhu erikolha ekyo lino. Kandi thukendikania okwa kya thwangakolha eryongera eribya bathubaha. Erighunzerera, thukendi lebya ekya thwangakolha abandu bamathupona.

4. Ngoku kiri omu Abaebrania 13:5, 6, thutholere ithwakakasyaki, kandi busana naki?

⁴ Kakasaya ngoku Yehova akwanzire kandi ngoku syanga kusighania. (Soma Abaebrania 13:5, 6.) Myaka mingyi kera, e Watchtower muyabugha yithi: “Oyuwasi ndeke Nyamuhanga iniakendi muyikethera kutsibu omwa bitsibu.” Kandi oko ni  kwenene! Erighumira ndeke eriendereribwa, thutholere ithwanza Yehova n’erimuyikethera kutsibu n’erithendi thika-thikira olhwanzo olhwa thuwithire.​—Mt. 22:36-38; Yak. 5:11.

5. Ni kyahi ekikendi kuwathikya eriyilhangirira olhwanzo lhwa Yehova?

⁵ Soma e Biblia buli kiro iwunemulhubirira eriyithunda hakuhi na Yehova. (Yak. 4:8) Wukasoma, lhangira emibere ya Yehova eyuwenenga. Lengaho erilhangira olhwanzo lhwiwe wukasoma okwa by’akakolha n’eribugha. (Eri. 34:6) Abandi kyangana bakalira eriligha ngoku Nyamuhanga abanzire busana n’eribya isibali bathakanganibwa olhwanzo. Wamabya ikwa wuli wuthya, lengesaya buli kiro erithondogholha emibere Yehova abirikukanganiryamu olhukogho n’olhukeri. (Esy. 78:38, 39; Abar. 8:32) Wukendibya wune mughanirya okwa bya wukalhabamu n’ebya wukasoma omwa Kinywe kya Nyamuhanga, wukendilhangira bingyi ebya Yehova abirikukolera. Wukendibya wuk’ongera erisima ebya Yehova akakolha, obughuma bwawu nayu bukendi ghuma.​—Esy. 116:1, 2.

6. Ngoku kiri omu Esyonyimbo 94:17-19, erisaba erilhua okwa muthima kyanga kuwathikya kithi?

⁶ Saba buthumbya. Thathera akasasani akalhwana ikane okwa kikuba kya thatha wako. Ikakendi yowa ikali omwa butheya neryo ikathasagha eribwira thatha wako ebyosi ebyuwene n’ebithuwene ebiryakabyako ekiro ekyo. Wanganabya n’obughuma obuli ng’obu wamayithunda hakuhi na Yehova omwa musabe obuli kiro. (Soma Esyonyimbo 94:17-19.) Wukasaba Yehova, ‘uthulha omuthima wawu ng’amaghetse’ n’eribwira Thatha wawu mwanzwa ebyosi ebya wukubaha n’eriyilhalikirira. (Eki. 2:19) Ibikendibya bithi? Iwukendibana ekya Biblia yikahulhamo “obuholho bwa Nyamuhanga, obulhabire amenge wosi.” (Fil. 4:6, 7) Wunemusaba wuthya, nawu kwa wunemwendyongera wuthya eriyowa iwuli hakuhi na Yehova.​—Abar. 8:38, 39.

7. Busana naki wutholere iwaligha ngoku emilhaghe ya Nyamuhanga eyihambire oko Bwami yikendi syabererera?

⁷ Kakasaya ngoku emighisa y’Obwami bwa Nyamuhanga yikendi syabererera. (Emig. 23:19) Wamabya isiwulikiriraya wuthi emighisa eyo yikendisyabererera, ikikendyolhobera Sitani n’abo akakolesaya erikubahisya. (Emi. 24:10, NW; Ebr. 2:15) Wanga ghumya wuthi eriyikethera lyawu omo Bwami bwa Nyamuhanga lino? Hiraho obuthuku bw’erisekulya okwa milhaghe ya Nyamuhanga ey’Obwami bwiwe n’ebyangaleka iwakakasya ku yikendi syabererera. Kiwithe mughaso wahi? Thalebya eky’erileberyako kya Stanley Jones, oyuwabohawa habw’emyaka musanju busana n’erikirirya liwe. * Ni kyahi ekya muwathikaya eriyiyinia buthaleghulha? Mwabugha athi: “Erikirirya lyaghe irighumire kundi inganasi ebihambire oko Bwami bwa Nyamuhanga n’ebya bukendi syakolha, isindi  thika-thika, neryo mukyaleka inabya buthaseghana.” Wamabya iwunawithe erikirirya erighumire omwa milhaghe ya Nyamuhanga, iwukendi yithunda hakuhi-kuhi na Yehova kandi isiwendi lighira obuba erikukakirya erikolera Yehova.​—Emi. 3:25, 26.

8. Amalengekania agho thuwithe okwa mihindano akathubisulha kwaki? Soborera.

⁸ Hindana okwa mihindano y’Ekikristayo mughulhu wosi. Emihindano yikaleka ithwayithunda hakuhi-kuhi na Yehova. Amalengekania agho thuwithe okw’ihindana ni kaminyikalho akuwene akakakanganaya ngoku thukendi thoka erighumira ndeke eriendereribwa ery’omwa buthuku obukasa. (Ebr. 10:24, 25) Busana naki? Thwamalighira ehindu hike-hike erithulemesya erihindana okwa mihindano lino, ibikendisyabya bithi thukayithagha eribya ithutholere eritsama engebe yethu thwanamathahindana n’abalikyethu? Mbaghane n’ekyo, thwamamakirira erithwamu lyethu ery’erihindana, isithwanga leka erihindana abahakani bakalengesya erithuthanga erihindana haghuma. Buno bw’obuthuku bw’erianza kutsibu emihindano. Thwamabya ithwanzire erihindana, sihali erihakanisibwa kutse nibya ekilhaghiro ky’egavumente, ekyangaleka ithuthakenga Nyamuhanga kwilhaba abandu.​—Emib. 5:29.

9. Busana naki erihambira amasako w’omwa muthwe ni nzira mbuya y’eriyitheghekera eriendereribwa?

⁹ Hambira omwa muthwe amasako agho wanzire kutsibu. (Mt. 13:52) Obwongo bwawu sibuhikene, aliwe Yehova anganakolesya omulimu wiwe abuyirire erikw’ibukya amasako ayo. (Yn. 14:26) Hulikirira ebya mughalha wethu mughuma oyuwabya omwa ngomo omwa East Germany n’eriboherwa omwa kisenge mw’eyuwene abugha: “Munatsema eribya inabirihambira omwa muthwe amasako awalhabire oku 200 agho nabya inabirigha! Nomwakine indi nabya ingyuwene, munabya inganawithe eky’erikolha mughulhu wosi erighanirya okwa myatsi muthina-muthina ye Biblia.” Amasako ayo mwawathikya mughalha wethu eribya iniane hakuhi na Yehova​—n’eriyiyinia buthaleghulha.

10. Busana naki thutholere ithwahambira esyonyimbo sy’omwa muthwe?

¹⁰ Hambira omwa muthwe n’eriimba esyonyimbo esikapipa Yehova. Ibane omwa ngomo e Filipi, Paulo na Sila mub’imba esyonyimbo sy’eripipa Yehova esyo babya ibabirihambira omwa muthwe. (Emib. 16:25) N’abalikyethu omwa Soviet Union eyakera babere bathwalhwa e Siberia omwa bunyewa, ni kyahi ekya baghumaya? Mwali wethu Mariya Fedun mwibuka bino: “Muthw’imba esyonyimbo syosi esyo  thwasi, esyonyimbo sy’omwa katabu k’olhwimbo.” Mwabugha athi esyonyimbo esyo musyabaghumya n’eribawathikya eryongera eriyithunda hakuhi na Yehova. Wukabya wuk’imba esyonyimbo sy’obunyakirimu esya wanzire wukanayowa isyamakughumya? Neryo lino hambira esyonyimbo esyo omwa muthwe!​—Lebaya akasanduku “ Wumbe Obuthubaha.”

11-12. (a) Ngoku kiri omu 1 Samweli 17:37, 45-47, busana naki Dawudi abya muthubaha? (b) Eky’erileberyako kya Dawudi kikathweghesaya lisomo lyahi ly’omughaso?

¹¹ Wukayithagha obuthubaha, erithoka erisika wuk’endereribwa. Wangakolhaki wamayowa isiwubuwithe? Wibuke ngoku obuthubaha sibuseghemere okwa kithuthi kyawu, akaghalha, kutse amaaka wawu. Eky’erileberyako y’omulhwana Dawudi akalhwa na Goliata. Erimulinganisya n’embangyi eyo, Dawudi abya muke, oyuthawithe mani, kandi isyawithe eby’erikolesya omo malhwa ebitholere. Dawudi nibya syabya awithe omuyali. Nomwabine, abya muthubaha. Buthasagha, Dawudi mwanguha eriyalhwa n’embangyi y’emiyiheko eyo.

¹² Busana naki Dawudi abya n’obuthubaha bunene? Inikirirye ndeke-ndeke ngoku Yehova ane nayu. (Soma 1 Samweli 17:37, 45-47.) Dawudi mwathahwerya obulengekania okwa bunene bwa Goliata. Iyo mwalhangira ngoku, oku Yehova, Goliata ni kandu kake buyira. Omwatsi oyu akathweghesayaki? Thukendibya bathubaha thwamayikethera ngoku Yehova ane nethu n’eribya ithunayikethere ngoku esyonzighu syethu ni kandu kake thwamalinganisyasyo na Nyamuhanga Omuthoki w’Ebyosi. (2 Emy. 20:15; Esy. 16:8) Thwanga ghumya thuthi lino obuthubaha bwethu​—eriendereribwa lithe lyasa?

13. Thwang’ongera thuthi obuthubaha bwethu? Soborera.

¹³ Thwangan’ongera obuthubaha bwethu lino omw’ibwira abandi engulhu yuwene y’Obwami bwa Nyamuhanga. Busana naki? Kundi erithulira likathweghesaya eriyikethera Yehova n’erisingura ekitsibu ky’erisagha abandu. (Emi. 29:25) Ngoku omubiri akanakalha-kalha thwamakolha ebisasaizi, obuthubaha bwethu bukaghuma thukathulira nyumba okwa nyumba, ahakabya bandu bangyi, kitsumbukirania, n’omwa myanya y’esuburu. Thwamakamathya obuthubaha bw’erithulira lino, ithukendibya ithunayitheghekire erilholha embere erithulira omubiiri wethu nomwangahirwako olhukako.​—1 Tes. 2:1, 2.

14-15. Ni byahi ebya thwang’ighira okwa ky’erileberyako kya Nancy Yuen na Valentina Garnovskaya?

 ¹⁴ Eky’erileberyako kya bali bethu babiri abakanganaya obuthubaha obw’embaghane kyangana thweghesya bingyi. Nancy Yuen abya nga fiti ithano (mita 1.5) omwa buuli, nomwabine ini muthubaha. * Mwathaligha erileka erithulha engulhu yuwene y’Obwami bwa Nyamuhanga. Busana n’ekyo mwabohwa habw’emyaka eyilhabire oku 20 e Chaina. Abathabali abamuthonganisaya mubabugha bathi “ya mundu oyukalire kutsibu” omwa kihugho kyabu.

¹⁵ Valentina Garnovskaya nayu mwahirwa omwa ngomo ngendo isathu omwa Soviet Union eyakera habw’emyaka nga 21 eyosi yamahirwa haghuma. * Busana naki? Abya iniabirithwamu erilholha embere erithulira kyamaleka n’abamubohire ibahika n’okw’ibugha bathi “ni muthwi w’ebilhaghiro omutsibu.” Ni kyahi ekyaleka abakali babiri abathaleghulha aba ibabya n’obuthubaha ng’obu? Babya bayikethere ngoku Yehova ane haghuma nabu.

16. Ni kyahi ekyanga thuha obuthubaha bw’okwenene?

¹⁶ Ngoku thwanabirilhangira, ithwe eribya n’obuthubaha, sithutholere thukayikethera akaghalha n’amaaka wethu. Omwakanya k’ekyo thutholere ithw’ikirirya ngoku Yehova ane haghuma nethu kandi ngoku yukathulhwira. (Ebi. 1:29, 30; Zek. 4:6) Ekyo ky’ekyanga thuha obuthubaha bw’okwenene.

17-18. Ngoku kiri omu Yoane 15:18-21, Yesu mwabugha athiki? Soborera.

¹⁷ Thukasima abandi bamathusikya, aliwe isithwalengekanaya thuthi thuli bandu bbule abandu bamathukwa obusu. Yesu mwabugha athi: “Obutseme buli nenyu omughulhu abandu bakabakwa obusu, n’eribaghana, n’eribatsuma, n’eribahulha bathi, Muli babi, busana n’Omughalha w’Omundu.” (Lk. 6:22) Yesu amanyisayaki?

¹⁸ Yesu syabya akamanyisya athi Abakristayo ibakendi tsema bamaponwa. Aliwe, abya iniakabugha ebyanga thubyako. Sithuli b’ekihugho.  Thukaghendera okw’ikangirirya lya Yesu n’erithulha omwatsi ogho abya akathulha. Busana n’ekyo ekihugho kikathukwa obusu. (Soma Yoane 15:18-21.) Thwanzire eritsemesya Yehova. Abandu bamathupona busana n’eribya ithwanzire Thatha wethu, ebyo ni byabo.

19. Thwanga gherererya thuthi eky’erileberyako ky’abakwenda?

¹⁹ Ebya bandu buyira bakabugha kutse erikolha isiwabilighira bikaleka wukakwa esisoni sy’eribya iwuli mughuma w’okwa Bema ba Yehova. (Mika. 4:5) Thwanganabana ekyanga thuwathikya erikinda ekithegho ky’erisagha abandu omw’ilebya eky’erileberyako ky’abakwenda e Yerusalemu biro bike Yesu imwanamithibwa. Babya ibanasi ndeke ngoku abakulhu b’edini y’Ekiyuda babaponire. (Emib. 5:17, 18, 27, 28) Nomwabine, obuli kiro mubathumbya eriyiminyikalya omwa hekalu n’omwa bandu ku ni bigha ba Yesu. (Emib. 5:42) Mubathalighira obuba erib’imania. Nethu thwanganahwamo erisagha abandu omw’iyiminyikalya mughulhu wosi okwa bandu ku thuli Bema ba Yehova​—okwa mubiiri, okwa sukuru, n’omwa butaka.​—Emib. 4:29; Abar. 1:16.

20. Busana naki abakwenda babya batsemire nomwakine indi mubendereribwa?

²⁰ Busana naki abakwenda mubatsema? Babya ibanasi ekikaleka ibaponwa, kandi mubalhangira ini kitsumbi erikolhwa nabi busana n’erikolha erisonda lya Yehova. (Lk. 6:23; Emib. 5:41) Omukwenda Petero mwahandika enyuma w’aho athi: “Nomo mwanga ghalhwa busana n’erikolha ekithunganene, muli bandu b’obutseme.” (1 Pet. 2:19-21; 3:14) Thwamabya ithunasi ngoku thukaponawa busana n’erikolha ekihikire, isihali kiro thukendisyalighira eriharanwa n’abandu erithwitha obuba.

21-22. (a) Wabirithwamu erikolhaki eriyitheghekera eriendereribwa? (b) Thukendi syakania okuki omo mwatsi owakakwamako?

²¹ Sithwasi nga ni buthuku bwahi abandu bakendi tsuka erithwendererya kutse nibya erithuhirako olhukako lhw’eriramya Yehova. Aliwe thunasi, ngoku thwanganasangwa thwayithegheka omw’ighumya obughuma bwethu na Yehova, omw’ibya bathubaha, n’erigha erighumira eriponwa n’abandu. Eriyithegheka thuthya ikikendileka ithwasika omwa buthuku bw’embere.

²² Kandi ibbwa eriramya lyethu lyamahirwako olhukako? Omo mwatsi owakakwamako, thukendi syakania okwa misingyi eyanga thuwathikya erilholha embere erikolera Yehova nibya n’omughulhu hali olhukako.