1. Thukamanyisayaki thukabugha ekinywe “ekwenene”?

“WABANA wuthi ekwenene?” “Wakulira omwa kwenene?” “Wamabirighunza omwa kwenene mwa buthuku bungahi?” Obundi wabiribulibwa ebibulyo ng’ebyo​—kutse nawu iwabiribibulya abandi. Thukamanyisayaki thukabugha ekinywe “ekwenene”? Kutsibu-tsibu, thukakikolesaya thukakania okwa bya thwikirirye, emibere thukaramirayamo, n’emibere y’engebe yethu. Abandu abali omwa “kwenene” banasi ebya Biblia yikakangiriraya, kandi bakaghendera okwa misingyi yayu. Busana n’ekyo, bakabya bwiranda okwa mabehi w’amadini kandi ibabya omwa ngebe eyuwene n’omubathahikene.​—Yn. 8:32.

2. Ngoku kiri omu Yoane 13:34, 35, ni byahi ebyangaleka omundu inianza ekwenene?

² Ni kyahi ekyaleka iwanza ekwenene? Obundi yabya iy’emibere mibuya y’abandu ba Yehova. (1 Pet. 2:12) Kutse obundi lhw’olhwanzo olho bakakanganaya. Abangyi babere bakahindana okwa mihindano omurundi w’erimbere, mubayilhangiriralho kandi bakalhw’ibuka kwilhaba ebya kangiriribawa, neryo olhwanzo olho mulhwabahambako kutsibu. Eki sikiriswekaya kundi Yesu mwabugha athi abigha biwe basyaminyikalha busana n’olhwanzo olho bawithirene. (Soma Yoane 13:34, 35.) Aliwe, ithwe eribya n’erikirirya erighumire, hane ebindi ebyo thutholere ithwakolha.

3. Ni byahi ebyangabya erikirirya lyethu lyamabya iriseghemere oko lhwanzo olhwa balikyethu bakakanganaya lhusa?

³ Erikirirya lyethu siritholere likaseghemera okwa ky’erithabya abandu ba Nyamuhanga ibawithe olhwanzo kisa. Busana naki? Thuthabugha thuthi mulikyethu​—obundi omusyakulhu kutse omutemburi​—iniakolha ekibi ekikalire. Kandi ibbwa mughalha wethu kutse mwali wethu amakuthwikalya? Kutse obundi omundu mulebe iniayisamambulha okw’ikirirya, iniabugha athi thwabirithebwa. Ebindu ng’ebyo byamabya, iwunemwendi  thwikalha n’erileka erikolera Yehova? Enzumwa y’eno: Erikirirya lyawu lyamaseghemera okwa bya bandi bakakolha butsira okwa bughuma bwawu na Yehova, isiryendi ghuma. Wukahimba enyumba yawu y’erikirirya, siwutholere wukasubulira okw’iyowa n’amalengekania agho wuwithe oku Yehova n’abandu biwe, aliwe wutholere iwaminya ekwenene eyikalha-kalire n’eriyitheghereryayo ndeke. Ambi iwayikakasya ngoku e Biblia yiri mw’ekwenene eyihambire oku Yehova.​—Abar. 12:2.

4. Ngoku kiri omu Matayo 13:3-6, 20, 21, abandi bakahambawako bathi erikirirya lyabu likalengwako?

⁴ Yesu mwabugha athi abandi bangana ligha ekwenene “n’obutseme,” aliwe erikirirya lyabu iryatseka bakalengwako. (Soma Matayo 13:3-6, 20, 21.) Obundi imubathaminya ngoku erikwama Yesu muli n’erimanira ebitsibu. (Mt. 16:24) Kutse obundi imubalengekania bathi eribya Mukristayo nibya omwa ngebe ey’etseme nyisa-nyisa eyithemo ebitsibu. Aliwe omwa kihugho kibi kino, thuli b’eribana ebitsibu. Emibere yangana hinduka, ikyaleka etseme yethu iyakeha.​—Esy. 6:6; Omu. 9:11.

5. Balikyethu bangyi banemukangania bathi ngoku bakaligha ndeke-ndeke ku babiribana ekwenene?

⁵ Balikyethu bangyi bakakanganaya ngoku bakaligha ndeke-ndeke ku babiribana ekwenene. Bathi? Sibali leghulha mulikyethu nomw’angabathwikalya kutse amayingirya omwa mibere eyithe y’Ekikristayo. (Esy. 119:165) Omwa buli lengwako, erikirirya lyabu likongera erighuma butsira eritseka. (Yak. 1:2-4) Wanga thunga wuthi erikirirya erighumire ng’eryo?

6. Erikirirya ly’abigha ab’omwa kighana ky’erimbere lyabya liseghemere okuki?

⁶ Erikirirya ly’abigha ab’omwa kighana ky’erimbere lyabya liseghemere okw’iminya erihikire ery’Amasako n’esyongangirirya sya Yesu Kristo, ni bugha ambu, “ekwenene y’engulhu yuwene.” (Gal. 2:5) Ekwenene eyi mwamuli ebyosi ebyo ithwe Bakristayo thwikirirye, imwamune n’ekwenene eyihambire okwa kihongwa ky’endongolya ya Yesu n’erilhubuka liwe. Omukwenda Paulo mwaligha ndeke-ndeke ngoku esyongangirirya esi ni kwenene. Busana naki? Kundi mwakolesya Amasako “erikangyabo ndeke ngoku lyabya litholere Kristo iniaghalhwa, n’erilhubuka oko baholi.” (Emib. 17:2, 3) Abigha ab’omwa kighana ky’erimbere mubaligha esyongangirirya esyo kandi mubayikethera omulimu abuyirire eribawathikya eriyitheghererya Ekinywe kya Nyamuhanga. Mubasekulya nuku bakakasaye ngoku esyongangirirya esi siseghemere oko Masako. (Emib. 17:11, 12; Ebr. 5:14) Erikirirya lyabu mulithaseghemera okw’iyowa lisa, kandi mubathakolera Yehova ahabw’erithabya imubayowa ndeke bakabya n’abalikyabo. Omwakanya k’ekyo, erikirirya lyabu lyabya liseghemere okw’iminya erihikire erya Nyamuhanga.​—Kol. 1:9, 10.

7. Erikirirya lyethu omwa kwenene ye Biblia likendi thuwathikya lithi?

⁷ Ekwenene y’Ekinywe kya Nyamuhanga siyirihinduka. (Esy. 119:160) Ng’eky’erileberyako, siyirihinduka mulikyethu amathusoberya kutse erikolha ekibi ekikalire. Kandi siyirihinduka thukabana ebitsibu. Neryo thutholere ithwaminya ndeke esyongangirirya sye Biblia n’eriligha ndeke-ndeke ku y’ekwenene. Erikirirya lyethu erighumire eriseghemere oko kwenene ye Biblia likendi leka ithwasika thukalengwako, ngoku enaanga yikanaleka obwathu ibwabya ibunasikire omwa kiyagha kinene. Wang’ongera wuthi erighumya ku wabiribana ekwenene?

8. Ngoku kiri omu 2 Timoteo 3:14, 15, Timoteo mwaligha athi ndeke kw’abiribana ekwenene?

⁸ Timoteo mwaligha ndeke-ndeke kw’abiribana ekwenene. Ekyo mwakiminya athi?  (Soma 2 Timoteo 3:14, 15.) Mama wiwe na mukaka wiwe mubamukangirirya “Amasako Abuyirire.” Aliwe, ahathe erithika-thika, nayu iyuwene-wene mwahiraho obuthuku n’akaghalha eriyeghesya amasako ayo. Ekyo mukyaleka ‘in’ikirirya ndeke’ ngoku amasako ayo ye kwenene. Enyuma waho, Timoteo, mama wiwe, na mukaka wiwe mubaminya esyongangirirya sy’Ekikristayo. Ahathe erithika-thika, Timoteo mwatsemera olhwanzo olho abigha ba Yesu bakakanganaya, kandi aby’anzire kutsibu eribya haghuma n’abalikyabo ab’obunyakirimu n’eribatsomana. (Fil. 2:19, 20) Aliwe, erikirirya liwe siryabya liseghemere okw’iyowa ery’awithire balikyabo, iryo lyabya liseghemere oko kwenene eyaleka iniayithunda hakuhi na Yehova. Kuthya nawu wutholere iwigha ndeke e Biblia n’eriyikakasya ndeke ngoku ebya wuk’igha oku Yehova bihikire.

9. Ni bindu byahi bisathu ebyo wutholere iwayikakasirya?

⁹ Okw’itsuka, wutholere iwayikakasirya ebindu bisathu bino. Eky’erimbere, wutholere iwaligha ndeke-ndeke ngoku Yehova Nyamuhanga ya Muhangiki w’ebindu byosi. (Eri. 3:14, 15; Ebr. 3:4; Erib. 4:11) Ekyakabiri, wutholere iwakakasya ngoku e Biblia ni mwatsi wa Nyamuhanga agho abiriha abandu. (2 Tim. 3:16, 17) N’ekyakasathu, wutholere iwakakasya ngoku Yehova awithe abandu abayithondekenie abakamuramaya ahisi sy’obusondoli bwa Kristo kandi ngoku Abema ba Yehova b’abandu abo. (Isa. 43:10-12; Yn. 14:6; Emib. 15:14) Iwe eriligha ekwenene eyo, sikiriyithagha eriminya ebyosi ebiri omwa Biblia. Ekilhubirirwa kyawu kitholere ikyabya iry’erikolesya ‘amaaka wawu aw’erighanirya’ erighumya erikakasya lyawu ku wabiribana ekwenene.​—Abar. 12:1, NW.

10. Eryongera okw’iminya ekwenene, ni kyahi ekya thutholere ithwakolha?

¹⁰ Wamabiriminya emyatsi y’ekwenene isathu eyihambire oku Nyamuhanga, e Biblia, n’abandu ba Nyamuhanga, wutholere iwabya iwangana thoka erikolesya Amasako erikangania abandi b’ekwenene eyo. Busana naki? Kundi ithwe ng’Abakristayo thuwithe olhukwamirwa lhw’erikangirirya abandi abakendi thuhulikirira  ekwenene eyo thuk’igha. * (1 Tim. 4:16) Kandi thukabya thukawathikya abandi eriminya ekwenene ye Biblia, thukongera erighumya erikirirya lyethu omwa kwenene eyo.

11. Ni ky’erileberyako kyahi ekya mukwenda Paulo ahiraho akakangirirya?

¹¹ Omukwenda Paulo iniakabya akakangirirya abandu, ‘iniakalenga erisingabo busana n’omwatsi wa Yesu omo Mighambo ya Musa n’amasako w’abaminyereri.’ (Emib. 28:23) Thwanga gherererya thuthi Paulo thukakangirirya abandi b’ekwenene? Sithutholere thukasubulira okw’ibabwira ebya Biblia yikabugha. Thutholere ithwawathikya abigha bethu be Biblia erighanirya ndeke okwa Masako nuku bayithunde hakuhi na Yehova. Thwanzire ibaminya ekwenene, butsira kundi bathwanzire, aliwe kundi babiriyilhangirira ngoku ebyo bak’igha y’ekwenene eyihambire oku Nyamuhanga wethu w’olhwanzo.

12-13. Ababuthi banga wathikya bathi abaana babu eribya ibane omwa kwenene?

¹² Ahathe erithika-thika, ababuthi mwanzire abaana benyu ibabya ibane omo kwenene. Imwangana lengekania muthi bamabya n’abanywani babuya omwa kithunga, ibakendi kulha-kulhana bunyakirimu. Aliwe, eryongera okw’ibya n’abanywani babuya, ni bingyi ebyo abaana benyu bakayithagha, eriligha ku bali omwa kwenene. Batholere ibayithungira obunywani bwabu na Nyamuhanga n’eriligha ngoku ebya Biblia yikakangiriraya ye kwenene.

¹³ Ababuthi bamabya b’erikangirirya abaana babu ekwenene eyihambire oku Nyamuhanga, batholere ibahiraho eky’erileberyako ekyuwene eky’erigha e Biblia. Batholere ibahiraho endambi ey’erighanirya okwa ebyo bak’igha. Neryo ibakendi thoka erikangirirya abaana babu erikolha ekiri ng’ekyo. Batholere ibakangirirya abaana babu ngoku bangakolesya ebya thukakolesaya thukigha e Biblia, ngoku bakanakangiriraya abigha babu be Biblia. Omw’ikolha ekyo, ibakendi wathikya abaana babu erisima Yehova n’enzira eyo akakolesaya erithuha ebyalya by’obunyakirimu, ni bugha ambu, “omughombe oyuthereghulha n’ow’amenge.” (Mt. 24:45-47) Ababuthi, isimwasubulira okw’ikangirirya abaana benyu ekwenene ye Biblia ey’omusingyi. Mubawathikaye bathunge erikirirya erighumire omw’ibakangirirya emyatsi ya Nyamuhanga ey’omwakathi erikwamana n’emyaka n’amaaka wabu.​—1 Kor. 2:10.

14. Busana naki thutholere ithw’igha amaminyereri we Biblia? (Lebaya n’akasanduko “ Wangana Soborera Amaminyereri Aya?”)

¹⁴ Amaminyereri awakanibweko omwa Biblia  ni kitsweka kikulhu ky’Ekinywe kya Nyamuhanga ekikathuwathikaya erighumya erikirirya lyethu omu Yehova. Ni maminyereri wahi awabirighumya erikirirya lyawu? Iwangana hulha obuminyereri obuhambire okwa “biro by’enyuma-nyuma.” (2 Tim. 3:1-5; Mt. 24:3, 7) Aliwe ni wandi maminyereri wahi awabiribererera awangana ghumya erikirirya lyawu? Ng’eky’erileberyako, wangana soborera amaminyereri awali omu Danieli sura 2 kutse omu Danieli sura 11 ng’abiribererera athi kandi ng’anemubererera athi munabwire? * Erikirirya lyawu lyamabya iriseghemere ndeke okwa Biblia, erikirirya ng’eryo siryangahwa. Lengekanaya okwa ky’erileberyako ky’abalikyethu ab’endereribawa kutsibu e Germany omwa Lhuhi Lhwakabiri lhw’Ekihugho Kyosi. Nomwakine indi babya isibali bayitheghererya ndeke amaminyereri we Biblia awahambire okwa biro by’enyuma-nyuma, babya ibanawithe erikirirya erighumire omwa Kinywe kya Nyamuhanga.

15-17. Erigha e Biblia mulyaghumya lithi balikyethu abo Abanazi bendereraya?

¹⁵ Obuthabali bwe Nazi bwabere bukathabalha e Germany, balikyethu bangyi mubahirwa omwa ngomo. Hitler n’owundi mukulhu oyuwasibwe kutsibu ya Heinrich Himmler ibaponire Abema ba Yehova. Mwali wethu mughuma akabugha athi, Himmler mwabwira bali bethu omwa kampu y’abanya ngomo athi: “Yehova wenyu oyo anganathabalha omwa lhubulha, aliwe n’ithwe thukathabalha ekihugho! Thukendi bakangania oyukendibya inianeho, inywe kutse ithwe!” Ni kyahi ekya wathikaya abandu ba Yehova eribya ibane bathaleghulha?

¹⁶ Abigha be Biblia abo babya ibanasi ngoku Obwami bwa Nyamuhanga bwabiritsuka erithabalha omwa 1914. Mubathasweka bakabana erihakanisibwa linene. Aliwe, abandu ba Yehova babya ibanakakasirye ngoku sihali n’egavumente ey’abandu eyangakakirya ekighendererwa kya Nyamuhanga eribererera. Hitler syanga ghunzireho abaramya b’ekwenene kutse erihiraho egavumente eyikalire kwilhaba Obwami bwa Nyamuhanga. Balikyethu babya  ibanasi ndeke-ndeke ngoku erithabalha lya Hitler likendi syahwaho.

¹⁷ Ebya balikyethu abo babya bikirirye byabya bihikire. Enyuma w’obuthuku buke, obuthabali bwe Nazi mubwawa, na Heinrich Himmler​—omulhume oyuwabugha athi “n’ithwe thukathabalha ekihugho”​—mwayibatsira kughulhu eribalya engebe yiwe. Abere anemuthibitha, mweya Mughalha wethu Lübke, amamuminyerera kw’anabya omwa ngomo. Inianahemukire kutsibu, Himmler mwabulya Mughalha wethu Lübke athi: “Iwe Mwigha we Biblia, neryo bikayabya bithi?” Mughalha wethu Lübke mwabwira Himmler athi Abema ba Yehova babya ibanasi ndeke ngoku obuthabali bwe Nazi bwanga lemirwe neryo ibabya bwiranda. Himmler​—omulhume oyuwabya iniabirikania nabi okwa Bema ba Yehova​—mwabya isyakiwithe eky’eribugha. Buthuku buke enyuma waho, mwayitha. Thuk’ighaki? Erigha e Biblia, imwamuli n’amaminyereri, kyangana ghumya erikirirya lyethu omu Nyamuhanga n’erileka ithwasika omwa buthuku bw’ebitsibu.​—2 Pet. 1:19-21.

18. Ngoku kiri omu Yoane 6:67, 68, busana naki thukayithagha “amenge n’eriminya” erihikire ebya Paulo abugha omu Abanya Filipi 1:9?

¹⁸ Obuli mughuma w’okw’ithwe atholere iniakangania olhwanzo​—olhukaminyikalhaya Abakristayo ab’okwenene. Aliwe kandi thukayithagha “amenge n’eriminya” erihikire. (Fil. 1:9) Bithe bithya, “amahunga wosi n’erikangirirya ly’abandu abakatheba,” imwamuli n’abakayisamambulha okw’ikirirya ibyangana thuhambako nabi. (Efe. 4:14) Abigha bangyi ab’omwa kighana ky’erimbere E.K. babere baleka erikwama Yesu, omukwenda Petero mwakangania kw’alighire ndeke-ndeke ngoku Yesu awithe “ebinywe by’engebe y’erikotha.” (Soma Yoane 6:67, 68.) Nomwakine indi okwa buthuku obo Petero abya isyalyayitheghererya ebyosi ebihambire okwa ebinywe ebyo, mwasighalha muthaleghulha kundi abya iniabirilhangira ekwenene eyihambire oku Kristo. Nawu wangana ghumya erikirirya lyawu omwa bya Biblia yikakangiriraya. Wamakolha ekyo, erikirirya lyawu irikendibya irinaghumire nomuhangabya ebitsibu, kandi iwawathikya n’abandi eribya n’erikirirya erighumire.​—2 Yn. 1, 2.