Nabuthirawa e St. Paul, Minnesota, U.S.A., omwa 1954 omw’eka y’Ekikatuliki eyithe nyiggaga kutse nyinakwa. Ningye wakabiri omwa baana bathano. Ingakine mulere, munasomera okwa sukuru y’Ekikatuliki, kandi nabya muherezya omwa Kelezia. Aliwe, sinabya ngasi bingyi okwa Biblia. Nomwakine indi nabya ng’ikirirye ngoku hane Nyamuhanga oyuwahangika obuli kindu, sinabya ngayikethere Ekikatuliki.

Omo mwaka waghe w’erimbere okwa Yunivasite y’Ebilhaghiro e William Mitchell, Abema ba Yehova mubathubungira. Nabya inganemwoya esyongyimba, n’Abema abathahenie abo ibanathekene mubaligha erisubulha. Babere basubulha, munababulya ebibulyo bibiri: “Busana naki omwa kihugho abandu babuya sibalibya omwa ndeke?” na “Abandu bangabana bathi etseme?” Munaligha ekitabu The Truth That Leads to Eternal Life ne Biblia eya New World Translation of the Holy Scriptures, eyiwithe ekidipa ekyuwene eky’erangyi y’egurini. Kandi munaligha erigha e  Biblia. Eki mukyaleka ingaminya bindu bingyi. Munatsema ingaminya ngoku Obwami bwa Nyamuhanga ni gavumente eyikayithaghisibawa kutsibu eyikendi syaghunzaho ebitsibu by’abandu okwa kihugho. Munalhangira ngoku obuthabali bw’abandu bwabirilemerwa ighuma kandi ngoku bwabiriletha omwa kihugho mw’obulhumi, eriaghalhwa, obuthe bulingirirania, n’ebitsibu.

Munayihayo oku Yehova okw’itsuka ly’omwaka wa 1982 n’eribatizibwa okwa Lhuhindano olhwa “Kingdom Truth” olhwabya omwa St. Paul Civic Center. Eyenga eyakwamako munasuba omwa mwanya iwan’oyo eriyakolha ekizamu ky’eribya muthonganiri. Okwerikumi kukanatsuka, munaminya ngoku nabirilhaba ekizamu, eribya inamatholera eribya muthonganiri.

Okwa Lhuhindano olhwa “Kingdom Truth” (Ekwenene y’Obwami) munabana mughalha wethu Omunya Beteli ow’okwa Beteli ye Brooklyn ya Mike Richardson oyuwanyibwira ngoku okwa kyaghanda kikulhu kw’abiritsuka e ofisi y’eby’ebilhaghiro. Mun’ibuka ebinywe by’Omutiopia ebiri omu Emibiri 8:36 n’eriyibulya nyithi, ‘Ni kyahi ekyanga nyikakirya erisaba eriyakolera omwa Ofisi y’Ebilhaghiro?’ Neryo munusulirirya efomu ye Beteli.

Ababuthi baghe mubathatsema ingabya Mwema wa Yehova. Thatha waghe mwanyibulya athi erikolera okwa Beteli nga likendi nyighasira lithi omwa mubiiri waghe. Munamubwira ngoku ngayakolha omubiiri w’eriyihayo. Munamubwira indi ngendibya ingathunga dola 75 obuli kwezi, esente esyabya sikahebwa Abanya Beteli eribawathikya.

Nabere nabirighunzerera eby’okwa mubiiri, munatsuka omubiiri we Beteli e Brooklyn, New York, omwa 1984. Munahirwa omwa Ofisi y’Ebilhaghiro. Eribya ingabirikolera omwa koti, mukyaleka ingathoka.

Okwerikuminakughuma 1983, enyumba eya Stanley Theater omwa Jersey City, New Jersey muyaghulhwa. Baghalha bethu mubusaba erihebwa ebaruha eyikabalighira erisuba-subania eby’amasenyerezi n’eby’amaghetse w’enyumba eyo. Baghalha bethu babere bakakania n’abathabali, mubababwira ngoku bakanza erikolera olhuhindano lhw’Abema ba Yehova omwa nyumba eyo. Muhabya ekitsibu. Ebilhaghiro by’etawuni ebihambire okwa mikolesirye y’amanyumba ibikabugha bithi amanyumba w’eriramiryamu atholere iniabya eyo bandu bikere hasa butsira omwa tawuni. E Stanley Theater yabya omwa mwanya owakakolerawamo esuburu, neryo abathabali  b’etawuni mubathabalighira. Baghalha bethu mubatsombya, aliwe mubyalema.

Omwa wiki yaghe y’erimbere okwa Beteli, ekithunga mukyathwalha omusango w’omwa koti. Kundi nabya imunanamaghunza myaka ibiri ingane mukolera omwa koti omwa St. Paul, Minnesota, nabya inganasi eby’erikania okwa misango ng’eyo. Omughuma w’okwa bathonganiri bethu mwabugha athi e Stanley Theater yanabirikolerwamo emikonga muthina-muthina eyikabyako abandu bangyi, emisathu n’emiziki. Busana naki iyithakolerwamo eby’edini? Ab’ekoti mubakania okwa musango n’eribugha bathi e Jersey City muyithasikya obughabe bwethu bw’eriramya. Ekoti muyahamulha yithi abe Jersey City balighe erisaba lyethu, kandi munatsuka erilhangira ngoku Yehova akatsumulha omubiiri w’eby’ebilhaghiro eby’ekithunga kiwe erilholya omubiiri wiwe w’embere. Munatsema kundi munasangira omo mwatsi oyu.

Balikyethu mubatsuka omubiiri munene ow’erisuba-subania omwanya oyo, n’omukonga w’erighunzerera ekilasi ye Gileadi mwabera omwa Jersey City Assembly Hall biro 8, Okwomwenda 1985, isihali halhaba mwaka erisuba-subania lyalitsukire. Munatsema erikolha haghuma n’akathongole k’ab’ebilhaghiro erisighika emyatsi y’Obwami, kandi etseme eyo nathunga yabya nene kwilhaba eyo nabya nayu ngathengasa okwa Beteli. Sinabya ngasi ngoku Yehova akendi nyikolesya kutsibu omwa by’ebilhaghiro.

Omo myaka ya 1980, abadokita n’esyosipatara isibalisikaya erithwamu ly’Omwema oyunakulire ery’erithambirwa butsira musasi. Abakule ibakabana ekitsibu kinene kundi ab’ebilhaghiro ibakalengekanaya bathi sibawithe obughabe bw’erighana omusasi. Ab’ebilhaghiro ibakalengekanaya bathi omukule amaghana erihiribwa mw’omusasi omwana iniangana sighalha mwa ngubi.

Omwa Kwerikuminibiri biro 29, 1988, Mwali wethu Denise Nicoleau mwalhua mw’omusasi munene abiributha omwana wiwe w’obulhume. Embaririra y’omusasi wiwe muyakima kutsibu erihika ahisi okwa syopointi ithanu, kandi dokita mwamubwira athi alighe erihirwako omusasi. Mwali wethu Nicoleau mwaghana. Engyakya eyakwamako, ab’esipatara mubasaba ekoti y’ehamuli ey’erihira oku mwali wethu kw’omusasi. Ahathe n’erithongana, ekoti muyalighira ab’esipatara erihira oku Mwali wethu Nicoleau kw’omusasi isibathanamubwira kutse eribwira mwira wiwe.

Kyakathano biro 30, Okwerikuminibiri, ab’esipatara mubahira okwa Mwali wethu Nicoleau kw’omusasi nibya mwira wiwe n’abandi b’okw’iyo ibabirighana. Erigholho eryo, abahughu biwe n’abasyakulhu balebe mubahirwa omwa ngomo busana n’erighana erilighira Mwali wethu Nicoleau  erihirwako omusasi. Kyamukagha omwa ngyakya biro 31 Okwerikuminibiri, abamakuru, okwa syotivi, n’okwa radio e New York City n’omwa bitsweka ebithimbire kuyo, mubakania oko mwatsi ow’erihirwa omwa ngomo.

Kyabbalaza omwa ngyakya, munakania n’omutsweri ow’omwa koti ngulhu ya Milton Mollen. Munamubwira okwenene, n’erimubwira ngoku omutsweri w’omwa koti y’ahisi mwahamulha erihira oku Mwali wethu kw’omusasi isibathathonganisibwa. Omutsweri Mollen mwambwira athi ngendisuba omwa ofisi yiwe omw’ithungyi erimubwira okwenene kw’omwatsi oyo n’erikania okwa bilhaghiro ebihambire kugho. Erigholho eryo munaghenda n’omulebererya waghe ya Philip Brumley omwa ofisi ya Mutsweri Mollen. Omutsweri Mollen mwabugha athi n’omuthonganiri w’esipatara nayu ase. Omwatsi mwakalha. Muhanayira, Mughalha wethu Brumley amahandika okwa katabu kiwe erinyibwira athi: “Thekana.” Eryo lyabya erihabulha eritholere kundi nabya ingali okw’itsuruma inganza erikangania ngoku omuthonganiri w’esipatara abya awire.

Ihamabirilhaba eyiri nga saha, Omutsweri Mollen mwabugha athi omwatsi oyo wathukendi syatsukirako omungya. Thwabere thunemuhulhuka omwa ofisi yiwe, Omutsweri Mollen mwabugha athi omuthongoniri w’esipatara awithe “mubiiri munene omungya.” Eki mukyakangania ngoku kikendi kalira omuthonganiri w’esipatara erisighika erithwamu lyabu. Munayowa Yehova iniali ku nyikakasya ku thukayasinga. Munasweka ingalhangira ngoku Yehova ali okw’ithukolesya eriberererya erisonda liwe.

Omwa kiro omo muthwathegheka eby’erisyabugha omwa ngyakya. Ekoti yiri hakuhi ne Beteli ye Brooklyn, neryo hakuhi abosi ab’omwa Ofisi yethu y’Ebilhaghiro mubathambukiraho. Abatsweri bbani babere babiriowa ebyo thwamabugha, mubabugha bathi sikyabya kitholere erimuhirako omusasi. Ab’ekoti ngulhu bakakania okwa mwatsi wa Mwali wethu Nicoleau, mubabugha bathi erihamya okwa mithambirire mirebe butsir’ibulya omulhwere n’ithwa ekilhaghiro eky’obughabe bw’abandu.

Ekoti ngulhu kutsibu omwa New York muyabugha yithi Mwali wethu Nicoleau awithe obughabe bw’erithambirwa butsira musasi. Oyu abya mughuma w’okwa myatsi ini eyihambire okwa by’omusasi eyabya omwa syokoti ngulhu sye Amerika  agho nathunga olhusunzo lhw’erikaniako. (Lebaya akasanduko “ Erisinga Emisango Omwa Koti Ngulhu e Amerika.”) Nabirikolha n’abandi bathonganiri okwa Beteli okwa myatsi eyihambire okwa bulembere bw’abaana hamabya erithwa embeta, n’okwa bilhaghiro eby’emikoleserye y’ebithaka n’amanyumba.

Ingalholha oku mukali waghe Dawn omurundi w’erimbere, abya iniabirikomolhwa kandi iniawithe abaana basathu. Inianawithe akabiiri kandi ini mutemburi. Iniabirilhaba omwa ngebe eyikalire, neryo munanza kutsibu omuhwa wiwe w’erikolera Yehova. Omwa 1992, muthwahindana okwa Lhuhindano lhwe Disitrikiti olhwa “Light Bearers” olhwabya omwa New York City, neryo munamubwira indi thutsuke nayu obuthethane. Enyuma w’omwaka munamuherukya, aliwe namalholha embere erikolera okwa Beteli. Yehova abirinyiha ekihembo ky’omukali oyuwanzire eby’obunyakirimu kandi oyutsangire. Dawn abirinyilethera etseme omwa biro byosi ebyo thwamaghunza haghuma.—Emi. 31:12.

Ingamuherukya, abaana habya ow’emyaka 11, 13, na 16. Ngabya nganzire eribya thatha wabu mubuya, neryo iningasoma ndeke n’erighendera okwa byangabana omwa bitabu byethu ebihambire okw’ibya mubuthi w’abaana abo wuthabuthire. Muthwanabana ebitsibu habw’emyaka, aliwe ngatsemire kundi abaana babirinyilhangira ng’omunywani kandi thatha wabu w’olhwanzo omuyiketherwa. Ithukathangirira ndeke banywani b’abaana bethu, kandi ithukatsema eribya n’abalengwa abakaghalha aba.

Omwa 2013, Ingye na Dawn muthwahumira e Wisconsin eriyalembera ababuthi bethu abakulire. Aliwe eky’eriswekya, mubanyilighira eribya inganemukolera okwa Beteli. Munalighirwa erilholha embere eriwathikya ekithunga omwa by’ebilhaghiro ng’oyukayihayo habw’obuthuku buke.

Omwa Kwomwenda 2018, munathunga ekitsibu omwa mumeru. Omudokita mwanyilebya, aliwe mwathabana ekitsibu. Enyuma waho, omwa Kwokubanza 2019, owundi dokita mwambwira athi endambi yanganasyahika obulhwere bwaghe ibwakalha kandi ibwahamba omubiri owosi.

Enyuma w’ebiro bisathu, inganemusatha omusathu ogho nganzire munayithinira n’eribbunika omwa kuboko. Omwa ngebe yaghe yosi iningasathagho kandi ingasigho kutsibu. Neryo munaminya ngoku omubiri waghe syendithasyakolha ndeke. Munasweka ingalhangira ngoku obulhwere bwaghe bwabiriyongera kutsibu. Mukyanyikalira erikania, erighenda, n’erimera.

Ngatsemire eribya imunathoka eriwathikya ekithunga omwa mubiiri waghe ng’omuthonganiri. Kandi ngatsemire eribya imunathoka erihandika emyatsi omwa syogazeti esikasomawa n’abadokita, abathonganiri, n’abatsweri n’erikanirya abandu erithimba omwa kihugho kyosi okwa by’emithambirire, ingalhwira okwa bughabe bw’abandu ba Yehova obw’erithwamu erisemezibwa n’erithambirwa ahathe erikolesya omusasi. Naghe nangana bugha ebiri ng’ebiri omu Luka 17:10 indi: ‘Ngali mughombe oyuthatholere; Nabirikolha ebyo ngatholere inakolha.’