1. Ni kyahi ekya mukwenda Paulo aligha?

OMUKWENDA PAULO mwaligha ndeke-ndeke ngoku ihakanayira iniayowa iniabirilemererwa. Mwabugha athi omubiri wiwe abya ‘inianemukulha,’ athi isikyolho erikolha ekihikire, kandi athi ihakanayira Yehova iniathasubirya emisabe yiwe ngoku alhue akalengekania. (2 Kor. 4:16; 12:7-9; Abar. 7:21-23) Kandi Paulo mwabugha athi ababya bakamuhakanisya ibakamulhangira ng’omutseke. * Aliwe mwathalighira amalengekania awathatholere aw’abandi n’obutseke bwiwe bikaleka akayowa mo wabbule.​—2 Kor. 10:10-12, 17, 18.

2. Ngoku kiri omu 2 Abanya Korinto 12:9, 10, n’isomo lyahi likulhu eryo Paulo igha?

² Paulo mw’igha erisomo likulhu​—omundu anganabya inianaghumire nibya inianemuyowa nga ni mutseke. (Soma 2 Abanya Korinto 12:9, 10.) Yehova mwabwira Paulo athi amaaka Wiwe ‘akahikana omo bwolho bwiwe,’ erimanyisya ngoku Yehova akendiha Paulo y’amaaka agho akayithagha. Thutsuke eriminya ekyangaleka ithuthayowa nabi abahakani bakathutsuma.

3. Busana naki ithwatsemera eritsumwa?

³ Sihali oyuwanganza eritsumwa. Nomwabine, esyonzighu syethu syamathutsuma neryo thukalengekania kutsibu okwa bya bakabugha, ithukendihwa amani. (Emi. 24:10) Neryo kwesi,  thutholere ithwalhangira thuthi ebitsumi by’abakathuhanisaya? Nethu nga Paulo, thutholere ‘ithwatsemera eritsumwa.’ (2 Kor. 12:10) Busana naki? Kundi ebitsumi n’erihakanisibwa bikakanganaya ku thuli bigha ba Yesu ab’okwenene. (1 Pet. 4:14) Yesu mwabugha athi abakamukwama bakendi sy’endereribwa. (Yn. 15:18-20) Ekyo mukyabya omwa kighana ky’erimbere. Kera, ababya bahambirire emibere y’Abagiriki ibakalhangira Abakristayo ng’abandu abathawithe menge kandi ng’abandu bbule. Kandi omwa Bayuda, Abakristayo ibakalhangirawa ng’abandu “abathakangiriribawa, isibanyima-nyima,” ng’omukwenda Petero na Yoane. (Emib. 4:13) Abakristayo ibakalhangirawa ng’abandu bbule; isibaliyingiraya omwa by’epolitiki kutse eby’amalhwa, neryo ibabaghayire.

4. Abakristayo abakera ibakalhangira bathi amalengekania awathatholere agho abahakani babu babya babawitheko?

⁴ Mbwino Abakristayo abakera mubanalighira amalengekania awathatholere agho abahakani babu babya babawitheko abalemesaye? Eyihi. Ng’eky’erileberyako, omukwenda Petero na Yoane, mubalhangira ini kitsumbi eriendereribwa busana n’erikwama Yesu n’eribwira abandi okwa syongangirirya siwe. (Emib. 4:18-21; 5:27-29, 40-42) Sihabya ekyangaleka abigha bakayowa ng’abahemukire. Erighunzerera, Abakristayo abo mubalenga kutsibu abahakani babu abo omw’ikolera abandu b’ebibuya bingyi. Ng’eky’erileberyako, ebitabu bye Biblia ebyo abaghuma b’okwa Bakristayo abo bahandika binemuwathikya esyomiliyoni sy’abandu n’eribaha amaha. N’Obwami obo babya bakathulhughania buneho kandi bukisiya ibwathabalha oko bandu bosi. (Mt. 24:14) Obuthabali bw’amaaka obw’endereraya Abakristayo bwahwaho kera-kera, aliwe, abigha abathaleghulha abo lino ni bami omwa lhubulha. Kandi, abahakani babu babiriholha; neryo bamabya b’erilhubuka, ibakendi syabya ahisi sy’Obwami obwa Bakristayo abo babya baponire babya bakathulhughania.​—Erib. 5:10.

5. Ngoku kiri omu Yoane 15:19, busana naki abandu ba Yehova bakaghayawa?

⁵ Munabwire, hakanayira abandu ibaghaya n’erisekererya abandu ba Yehova n’eribalhangira ng’abathawithe menge kandi ng’abandu bbule. Busana naki? Kundi sithuli ghendera okwa malengekania w’abathuthimbireko. Thukalengaho eriyikehya, eribya bolho, kandi bowa. Nomwabine, ekihugho kikayighomba abandu abawithe emiyiheko, abakayowa ng’abalengire abandi, n’abayisamambuli. Eryongera okw’ekyo, ithwe sithuli yingiraya omwa by’epolitiki, kandi sithuli sangira omwa by’amalhwa eby’ekihugho kyosi-kyosi. Kundi sithuli b’ekihugho, thukalhangirawa mw’abandu bahisi.​—Soma Yoane 15:19; Abar. 12:2.

6. Yehova anemuthokesya abandu biwe erikolhaki?

⁶ Nomwakine indi abandu bakathulhangira mw’abahisi, Yehova anemuthuthokesya erikolha ebindu ebikalha-kalire. Anemuberererya omubiiri munene ow’erithulhughania owamathakolhwa aho abandu bakathaberaho. Abaghombe biwe munabwire bakahulhukaya esyogazeti esikahindulhawa n’erighabwa kutsibu omwa kihugho kyosi n’erikolesya e Biblia eriwathikya esyomiliyoni sy’abandu eryuwania esyongebe syabu. Ebyosi ebi bikathokekana busana na Yehova oyukakolesaya abandu abakalhangirawa mw’abahisi erikolha omubiiri munene oyu. Kandi ibbwa obuli mughuma w’okw’ithwe? Mbwino Yehova angana thuha amaaka? Kyamabya ikwakiri kithya, thwanga kolhaki eribana obuwathikya bwiwe? Thulebaye bindu bisathu ebyo thwang’ighira okwa ky’erileberyako ky’omukwenda Paulo.

7. N’isomo lyahi erya thukighira okwa ky’erileberyako kya Paulo?

⁷ Ekighuma ky’okwa bya thukighira oku Paulo kiri kithi: Isiwayikethera akaghalha n’amaaka wawu wukakolera Yehova. Erikwamana n’amalengekania w’abandu, hane ekyanga lekire Paulo iniayiheka. Akulira e Tarso, omuyi mukulhu owe Kilikia, eprovinsi ye Roma. E Tarso yabya tawuni eyikulha-kulene kandi eyiri mw’esyosukuru ngulhu-ngulhu esyasibwe kutsibu. Paulo abya somire​—omukangirirya wiwe abya ini Gamalieli omughuma w’okwa basondoli b’Abayuda abasikibirwe kutsibu. (Emib. 5:34; 22:3) Kandi buthuku bughuma, Paulo mwanabya mundu w’ekitsumbi omwa Bayuda. Mwabugha athi: “Nabya inabirilhaba abangyi b’omwa lhulengo lhwaghe omwa myatsi y’Abayuda.” (Gal. 1:13, 14; Emib. 26:4) Aliwe Paulo mwathayikethera amaaka wiwe.

8. Ngoku kiri omwa Abanya Filipi 3:8, Paulo mwalhangira athi ebyo asighanaya, ni kyahi ekyaleka iniatsemera obwolho bwiwe?

⁸ Paulo mwasighania ebindu ebyabya bikaleka inialhangirika mo w’amaaka. Nibya mwalhangira ebindu ebyo aby’awithe “ng’ebibaya” kutse ekyabu. (Soma Abanya Filipi 3:8.) Paulo mwabana ebitsibu bingyi busana n’erikwama Kristo. Ab’ewabu mubamupona. (Emib. 23:12-14) Kandi ab’ikalhani balikyabo, Abaroma, ibikamuswiraya n’erimuhira omwa ngomo. (Emib. 16:19-24, 37) Eryongera okw’ekyo, Paulo mwayowa nabi busana n’erilemererwa liwe. (Abar. 7:21-25) Omwakanya k’erilighira abahakani biwe kutse erilemererwa liwe bikamulemesya, ‘mwatsemera obwolho bwiwe.’ Busana naki? Kundi iniakayilhangirira amaaka wa Yehova omughulhu ali mwolho.​—2 Kor. 4:7; 12:10.

9. Thutholere ithwalhangira thuthi ebindu ebikaleka ithwayowa mwa bahisi?

⁹ Thwamanza erithunga amaaka wa Yehova, sithutholere thukalengekania thuthi amaaka wethu, esukuru, aho thulhuire, kutse ebya thuwitheko by’ebikaleka ithwabya b’omughaso. Ebindu ebi by’ebitheleka thukabya b’omughaso embere sya Yehova. Nibya, omwa bandu ba Yehova, ni bake “abakahulhawa mo bandu b’amenge, kutse esyombangyi, kutse  abakulhu.” Aliwe, Yehova abiriyisogha erikolesya “emyatsi myolho y’ekihugho.” (1 Kor. 1:26, 27) Neryo eribya isiwuwithe ebindu ebyo isikyaleka wukayowa nga siwanga kolera Yehova. Omwakanya k’ekyo, bilhangire ng’akaghisa k’eriyilhangirira amaaka wa Yehova omw’iwe. Ng’eky’erileberyako, wamayowa nga wukasagha abakaleka iwathika-thikira ebyo wikirirye, saba Yehova akuhe obuthubaha bw’erilhwira okw’ikirirya lyawu. (Efe. 6:19, 20) Wamabya iwulhwere obulhwere obuthelhama, ambi iwasaba Yehova akuhe akaghalha akawukayithagha eribya iwunemumukolera ngoku wanga thoka. Obuli lhangira obuwathikya bwa Yehova, erikirirya lyawu likayongera kandi iryaghuma.

10. Busana naki thutholere ithw’igha okwa by’erileberyako by’abathaleghulha ab’omwa Biblia, ng’abali omwa Abaebrania 11:32-34?

¹⁰ Paulo iniakayeghesaya ndeke Amasako. Mw’igha emyatsi minene, n’erighira okwa by’erileberyako by’abandu ba Yehova ebiri omwa Kinywe kya Nyamuhanga. Paulo abere akahandikira Abakristayo Abaebrania, mwababwira athi ambi ibagherererya eby’erileberyako by’abaghombe ba Yehova abathaleghulha abakera. (Soma Abaebrania 11:32-34.) Thulebaye omughuma w’okwa baghombe aba, Omwami Dawudi. Esyonzighu siwe n’abanabya banywani biwe mubamuhakanisya. Thukendibya thukalebya eky’erileberyako kya Dawudi, thukendi lhangira Paulo ng’angabya imwaghumibwa athi akaghanirya okwa ngebe ya Dawudi kandi nethu nga thwanga gherererya thuthi Paulo.

11. Busana naki Dawudi mwalhangirika ng’oyuthawithe ndeghe? (Lebaya ekisasani ky’okwa kidipa.)

¹¹ Omulhwi mbangyi Goliata mwalhangira Dawudi ng’akalhume bbule. Goliata abere alhangira Dawudi, “mwamupona” ni bugha ambu erimughaya. Kundi nibya, Goliata abya munene, iniawithe eby’amalhwa, kandi iniasi erilhwa. Dawudi, iyo, abya kalhwana akathasi eby’amalhwa akalhangirika nga sikanga thoka. Aliwe Dawudi nomwanalhangirika ng’oyuthawithe ndeghe mwabya mundu w’amaaka. Mwayikethera amaaka wa Yehova, kandi amakinda enzighu yiwe.​—1 Sam. 17:41-45, 50.

12. Ni kindi kitsibu kyahi ekya Dawudi abana?

¹² Dawudi mwabana n’ekindi kitsibu ekyangalekire inialhangirika nga syawithe ndeghe n’amaaka. Omwa buthaleghulha, Dawudi mwakolera Saulo oyo Yehova abya iniabirisombolha eribya mwami we Israeli. Erimbere, Omwami Saulo mwasikya Dawudi. Enyuma waho, emiyiheko muyaleka Saulo iniakwa Dawudi y’obuha. Saulo mwakolha Dawudi ya nabi, nibya n’erianza erimwitha.​—1 Sam. 18:6-9, 29; 19:9-11.

13. Dawudi mwakolhaki Omwami Saulo akamukolha nabi?

¹³ Nomwakine indi Omwami Saulo mwakolha Dawudi ya nabi, Dawudi mwalholha embere erisikya omwami oyo Yehova asombolha. (1 Sam. 24:6) Dawudi mwathatsweba Yehova busana n’ebindu bibi ebyo Saulo akolha. Omwakanya k’ekyo, Dawudi mwayikethera Yehova erimuha amaaka agho akayithagha erighumira ekitsibu ekikalire eki.​—Esy. 18:1 n’ehinywe ehiri ahighulhu okwa sura.

14. Ni byahi ebyahika okwa mukwenda Paulo ebiri ng’ebyahika oku Dawudi?

¹⁴ Ebiri ng’ebyahika oku Dawudi mubyahika n’okwa mukwenda Paulo. Esyonzighu sya Paulo syabya simulengirye kutsibu amaaka. Abasondoli bangyi ab’amadini n’ab’ekipolitiki ab’omwa buthuku bwiwe ibamuponire. Ngendo nyingyi, ibakalhangira bathi akaswiribawa n’erihirwa omwa ngomo. Nga Dawudi, Paulo nayu abangabere banywani biwe  mubamukolha nabi. Abandi omwa kithunga ky’Ekikristayo mubamuhakanisya. (2 Kor. 12:11; Fil. 3:18) Aliwe Paulo mwasingura abosi ababya bakamuhakanisya. Athi? Mwalholha embere erithulira, nomwanahakanisibawa. Mwathaleghulha oku balikyabo nibya n’omughulhu bakolha ebikamuponesaya. Kandi ekikulhu kutsibu, mwasighalha muthaleghulha oku Nyamuhanga erihika okwa lhuholho. (2 Tim. 4:8) Mwathoka butsira kundi abya awithe amaaka aliwe kundi abya ayikethere Yehova.

15. Ekilhubirirwa kyethu ni kyahi, kandi thwanga kiberererya thuthi?

¹⁵ Abawukasoma nabu, abawukakolha nabu, kutse abahughu bawu abathe Bema ba Yehova banemukutsuma kutse erikwendererya? Omundu omwa kithunga ane athakukolha nabi? Kyamabya ikwakiri kithya, ibuka Dawudi na Paulo. Wangana lholha embere ‘erikinda ekibi omo kibuya.’ (Abar. 12:21) Iwe ekilhubirirwa kyawu siry’eryongobererya eribwe ly’omwa muthwe w’omundu, nga Dawudi kw’akolha, aliwe ly’eryongobererya Ekinywe kya Nyamuhanga omwa bulengekania n’omwa mithima y’abakahulikirira. Wangana thoka ekyo omw’ikolesya e Biblia wukasubirya ebibulyo by’abandu, omw’isikya n’erikangania olhukeri abakakukolha nabi, n’erikolera abosi b’ebibuya, nibya n’esyonzighu syawu.​—Mt. 5:44; 1 Pet. 3:15-17.

16-17. Ni kyahi ekya Paulo abya inian’ibukire?

¹⁶ Omukwenda Paulo athali abya mwigha wa Kristo, abya mulhwana oyuthayisikirye oyuk’endereraya abakakwama Yesu. (Emib. 7:58; 1 Tim. 1:13) Paulo oyuwabya asibwe mwa Saulo, Yesu iyuwene-wene mwamukakirya okw’itsutsubya ekithunga ky’Ekikristayo. Yesu iniane elhubulha mwakania na Paulo n’erimuyira mwa ndimethime. Paulo erithasyalhangira, abya w’erisaba obuwathikya abandu abo abya ak’enderererya. Omw’iyikehya, Paulo mwaligha obuwathikya bw’omwigha oyukahulhawa mwa Anania oyuwalibulha ameso wiwe.​—Emib. 9:3-9, 17, 18.

¹⁷ Enyuma waho, Paulo mwabya Mukristayo oyuwasibwe, aliwe mwath’ibirirwa erisomo eryo Yesu amukangiriraya omwa nzira eyikaya  e Damasiki. Paulo mwasighalha inianayikehirye, kandi mwaligha obuwathikya bw’abalikyabo. Mwaligha ngoku mubamuwathikya kutsibu.​—Kol. 4:10, 11.

18. Busana naki hanganayira ithuthaligha obuwathikya bw’abandi?

¹⁸ Thuk’ighaki oku Paulo? Thwabere thukatsuka erihindana n’abandu ba Yehova, thwangabya ithwabya thwanzire kutsibu eriligha obuwathikya bw’abandi, ithunasi ngoku thuli baana bunyakirimu kandi ku ni bingyi ebyo thutholere ithw’igha. (1 Kor. 3:1, 2) Kandi ibbwa lino? Thwamabya ithwamabirikolera Yehova habw’emyaka mingyi kandi ithwabiriminya bingyi, ikyangana thukalira eriligha obuwathikya, kutsibu-kutsibu oyukathuhabo amabya isyali aghunza omwa kithunga mw’obuthuku bungaha n’obwethu. Aliwe, mughulhu mungyi, Yehova akakolesaya balikyethu erithuhimba. (Abar. 1:11, 12) Thutholere ithwaminya ekyo, thwamabya thwanzire erithunga amaaka agho Yehova akaha.

19. Ni kyahi ekyathokesaya Paulo?

¹⁹ Paulo abere abiribya Mukristayo mwakolha bingyi. Busana naki? Kundi mwaminya ngoku akaghalha, esukuru, obughuda, kutse eya thulhuire, siby’ebikamuthokesaya, aliwe ly’eriyikehya n’eriyikethera Yehova. Ithwe bosi thugherereraye Paulo (1) omw’iyikethera Yehova, (2) omw’ighira okwa by’erileberyako ebiri omwa Biblia, na (3) eriligha obuwathikya bw’abalikyethu. Neryo, nomuthwanga yowa nga sithuwithe ndeghe, Yehova akendi thuha amaaka!