Ahathe erithika-thika, Yehova anzire abandu babiri abakingira omwa butheke ibatsema kandi ibabya bughuma kera na kera. (Mt. 19:4-6) Wamabya wanzire eringira omwa butheke, wanga bana wuthi omwanze mubuya? Yehova ng’Omuhangiki wethu, anasi ebya thutholere erikolha nuku thuthoke eby’obuthethane n’obutheke. Neryo wamaghendera okwa misingyi eyo abirithuha, imukendi lhwiririra ebibuya. Thulebaye emighuma y’okwa misingyi eyo.

Thutholere ithwatsuka eriminya kino: “Omuthima ni w’eritheba kwilhaba emyatsi yosi, kandi alhwere nabi.” (Yer. 17:9) Omundu akabya akabana n’erianza ow’eringira nayu omwa butheke, esyongumbu syangana yongera kandi isyabalengya amani. Abandu bam’ingira omwa butheke busana n’eriyowa buyira, mughulhu mungyi bakayikubaya bwomo. (Emi. 28:26) Ky’ekikaleka ikyabya isi ky’amenge abandu babiri owundi erikangania owundi y’eby’olhwanzo kutse eribwirana bathi bakendingira omwa butheke isibali baminyana ndeke.

Emisyo 22:3 hakabugha hathi: “Omundu mugherekania amalhangira ebibi akayibisa; nikwa abakiru bakathwangana ibahuthalha busana nabyo.” Ni kabiki akangabya omw’isondya ow’eringira nayu omwa butheke omw’ikolesya emithahulha ye Intaneti? Eky’obulighe, abandi babiribana ebitsibu ebikalire busana n’eringira omwa by’olhwanzo n’abandu abo bathasi okwa Intaneti. Kandi, abathebya bakakyungulha esyo akaunti esithe n’isyo erianza eritheba abathasiki n’eribibako esyosente. Okwa bundi buthuku, abathebya abo bakanabugha bathi ni Bema ba Yehova.

Thalengekania okwa kindi kitsibu. Eyindi mithahulha eyi yikanakolesaya eprogramu y’ekombyuta eyikabaririra erilebya omulhume mulebe n’omukali mulebe ngabanatholerene. Aliwe, sihali ekikakanganaya indi esyonzira ng’esyo sikakolha. Mbwino ikyanabya ky’amenge eriyikethera esyoprogramu ng’esyo esikolirwe n’abandu ng’enzira ey’eribaniramu ekindu kikulhu ng’obutheke? Eprogramu ng’eyi iyanalinganisibwa n’emisingyi ye Biblia?​—Emi. 1:7; 3:5-7.

Omusingyi owali omwa Emisyo 14:15 akabugha athi: “Omukiru akikiriraya obuli kinywe; nikwa omugherekania akalebaya ndeke ngoku angaghenda.” Wuthe wathwamu omundu mulebe ng’awunatholere eringira nayu omwa butheke, wutholere iwatsuka erimuminya ndeke. Aliwe ekyo  kyangana kalha okwa Intaneti. Nomumwanga thumirana ebibahambireko kutse erighunza buthuku imunemuhandikirana esyomeseji, kwenene iwanabugha wuthi wunasi omundu oyo? Abandi ababya bakalengekania bathi babiribana oyo banzire, erighunzerera mubasweka bakaminya ebihambire okwa mundu oyo bakalholhanako.

Omuhandiki w’esyonyimbo mwabugha athi: “Sindisiba n’abandu bathya-bathya, kandi sindirigha erighenda n’abathebya.” (Esy. 26:4) Abanene bakalhangira nga si kibi eriyitheba bakahandika ebibahambireko ebyo bakahira okwa mithahulha y’erisonderyako nuku balhangirike ng’abuwene. Bangana bisa emitse yabu mibi kutse ibaghana erikanganiagho ibane okwa Intaneti. Nomwakine indi abandi bangana bugha bathi ni Bema ba Yehova, mbwino kwenene banabatizibirwe? Banakulire bunyakirimu? Banawithe obughuma obughumire na Yehova? Banasikibirwe omwa kithunga kyabu? Kutse ibo ni by’erileberyako ebithuwene kutse ni banywani babi? (1 Kor. 15:33; 2 Tim. 2:20, 21) Bane bwiranda erikwamana n’Amasako eritholera eringira omwa butheke? Wutholere iwaminya ebyosi ebi, aliwe siwanga thoka eribiminya wuthethakanirania n’abandi Bema abamwasi ndeke. (Emi. 15:22) Kandi omo kwenene, omughombe muthaleghulha wa Yehova syanganza ‘erimathikana’ n’oyuthe Mwema wa Yehova.​—2 Kor. 6:14; 1 Kor. 7:39.

Erikwamana n’ebitsibu ebikalhwiririra omw’ikolesya emithahulha eyi, hane esyonzira esyuwene esy’erisonderyamo ow’eringira nayu omwa butheke kandi imwabya n’obunywani obwanga lhwiririra mw’obutheke obukaha ekitsumbi. Wangabana wuthi ow’eringira nayu omwa butheke oyutholere? Omughulhu erihindana banene lyabya isiririryathangwa, Abema ba Yehova ibangana minyana busu okwa busu omw’ihindana okwa mihindano y’ekithunga, emike-mike n’eminene-minene, n’eyindi mikonga.

Omughulhu erihindana banene eri siryanga thasyathokekana, ng’omwa buthuku bw’ekihunzo ky’ekorona, thukakolesaya eby’ekielekitroniki erihindana okwa mihindano eyo thukabaniramo akaghisa ak’eriminya abandi Bema abahuru. Wangana lhangira ngoku bakasangira omwa mihindano kandi iwowa ngoku bakakanganaya erikirirya lyabu. (1 Tim. 6:11, 12) Kandi imwangana kanirania okwa zoom omwa breakout room emihindano yikahwamo. Omw’ihindana n’Abema ba Yehova omwa nzira eyi, iwangana lhangira emibere eya oyowabiryanza akakolonganiramo n’abandi, kandi ekyo kyangana bisulha emibere y’omundu oyo. (1 Pet. 3:4) Wunemumuminya ndeke, endambi iyangana hika iwalebya ebilhubirirwa n’eby’anzire nga binasosene n’ebyawu n’erithwamu nga munatholerene.

Abahuru bakabya bakasondya ow’eringira nayu omwa butheke oyutholere erikwamana n’emisingyi ye Biblia, bakabya ibangana yilhangirira okwenene kw’omusyo ono: “Oyukabana omukali [kutse iba] akabana ekindu ekyuwene, kandi akabana erighanyira ly’Omwami Mukulhu.”​—Emi. 18:22.