1. Ni kyahi ekya Yehova abirikukolera?

WABYA wuthi Mwema wa Yehova? Obundi watsuka eriowa “engulhu yuwene”​—erilhua okwa babuthi, oyowukakolha nayu kutse oyowukasoma nayu, kutse erilhabira omw’ithulira nyumba okwa nyumba. (Mk. 13:10) Neryo, omundu mulebe mwakolesya obuthuku bunene n’akaghalha erikweghesya e Biblia. Mwabere munemw’igha, muwasa wukanza Yehova n’eriminya ngoku akwanzire. Yehova mwakuletha omo kwenene, kandi lino, iwe ng’omwigha wa Yesu Kristo, wuwithe amaha w’erisyabyaho kera na kera. (Yn. 6:44) Ahathe erithika-thika, wukasima Yehova busana n’erikolesya omundu mulebe erikukangirirya ekwenene kandi busana n’erikuligha ng’omughuma w’okwa baghombe Biwe.

2. Omo mwatsi ono thukendi kania okuki?

² Neryo kundi lino thwabiriminya ekwenene, thuwithe olhusunzo lhw’eriwathikya abandi erithuyiyungako omwa nzira y’engebe. Kyangana thwolhobera erithulira nyumba okwa nyumba, aliwe ithwayowa nga kyamathukalira eritsukisya omwigha n’erigha nayu e Biblia. Mbwino kwa wukayowa wuthya? Byamabya ikwabiri bithya, obundi amaghuma w’okw’amenge awali omwa mwatsi ono angana kuwathikya. Thukendi kania okwa bikathuhira mw’omuhwa w’erisangira omwa mubiiri w’eriyira abigha. Kandi thukendi lebya ngoku thwanga rwanisya ebitsibu ebyanga thulemesya erigha n’omundu e Biblia. Thuthatsuka eriminya ekikaleka ithwabya ithutholere eribya butsira bathuliri lisa aliwe kandi bakangirirya b’engulhu yuwene.

3. Busana naki thukathulira?

³ Omughulhu Yesu abya okwa kihugho, mwaha abigha biwe b’omubiiri owali mw’ebitsweka bibiri. Eky’erimbere, mwabugha  athi bathule engulhu yuwene y’Obwami, kandi mwabakangania ngoku banga kikolha. (Mt. 10:7; Lk. 8:1) Ng’eky’erileberyako, Yesu mwabwira abigha biwe ngoku hakendibya abakaligha n’abakaghana omwatsi w’Obwami. (Lk. 9:2-5) Kandi mwakania okwa bunene bw’omubiiri wabu w’erithulira, akababwira athi banga ‘minyisirye ebihanda byosi.’ (Mt. 24:14; Emib. 1:8) Mbulha abandu bahulikirire kutse eyihi, abigha babya b’eribwira abandu okwa Bwami bwa Nyamuhanga n’ebya bukendi syakolha.

4. Ngoku kiri omu Matayo 28:18-20, ni kindi kyahi ekyo thutholere ithwakolha eryongera okw’ithulhughania Obwami?

⁴ Ekitsweka ekyakabiri eky’omubiiri ogho Yesu aha ky’ekyahi? Mwabwira abigha biwe athi bakangiriraye abandu erikolha ebyosi ebyo abiribahana. Mbwino omubiiri w’erithulira n’erikangirirya angakolirwe n’ab’omwa kighana ky’erimbere basa, ngoku abandi bakabugha? Eyihi, Yesu mwakangania ngoku omubiiri mukulhu oyu angalholire embere erihika munabwire, “erihika okw’ihwererera ly’emighulhu.” (Soma Matayo 28:18-20.) Yesu angabya iniaha ekihano ekyo omughulhu abuthukira okwa bigha biwe abalhabire oku 500. (1 Kor. 15:6) Kandi omw’ibisulirwa eryo aha Yoane, Yesu mwakangania ndeke-ndeke ngoku abigha biwe abosi batholere ibawathikya abandi erigha oku Yehova.​—Erib. 22:17.

5. Ngoku kiri omwa 1 Abanya Korinto 3:6-9, ni ky’erileberyako kyahi ekyo Paulo aha erikangania ngoku erithulira n’erikangirirya bihambene?

⁵ Omukwenda Paulo mwalinganisya omubiiri w’eriyira abigha ng’erihera ekirimwa, erikangania ngoku sithutholere thukasubulira okw’ihera embutho lisa. Mw’ibukya Abanya Korinto athi: “Ingye nahera embutho, Apolo muthulira kuyo kw’amaghetse . . . inywe muli irima lya Nyamuhanga.” (Soma 1 Abanya Korinto 3:6-9.) Ithwe ng’abakoli ‘b’omw’irima lya Nyamuhanga,’ sithuli subulira okw’ihera embutho lisa aliwe kandi thukuthangirira kuyo kw’amaghetse n’eribya ithunemulebya nga yinemukulha. (Yn. 4:35) Kandi thunemukolha ebyo, ithwabya ithunasi ngoku Nyamuhanga yukaleka embutho iyalhasa.

6. Omubiiri wethu ng’abakangirirya mwamuliki?

⁶ Thukasondekanaya abawithe “amalengekania awakaleka ibatholera eribana engebe y’erikotha.” (Emib. 13:48, NWT) Eriwathikya abandu abo eribya bigha, thutholere ithwabawathikya (1) eriyitheghererya, (2) eriligha, na (3) erighendera okwa bya bak’igha omwa Biblia. (Yn. 17:3; Kol. 2:6, 7; 1 Tes. 2:13) Abosi omwa kithunga bangana wathikya abigha be Biblia omwa ky’erileberyako kyabu bakakangania abahyaka b’olhwanzo n’eribathangirira ndeke bakasa okwa mihindano. (Yn. 13:35) Kandi oyuk’eghesaya omwigha anganabya imwakolesya buthuku bunene n’akaghalha erimuwathikya erileka esyonyikirirya kutse emitse eyimukaghathiremo. (2 Kor. 10:4, 5) Kyangana thwalha amezi manene eriwathikya omwigha erikolha esyombinduka esi nuku atholere eribatizibwa. Aliwe akaghalha ako thukahiraho si kali kwira busa.

7. Ni kyahi ekikathuhira mw’omuhwa w’erisangira omwa mubiiri w’erithulira n’eriyira abigha?

⁷ Busana naki thukasangira omwa mubiiri w’erithulira n’eriyira abigha? Eky’erimbere, thwanzire Yehova. Wukabya wukalengaho ngoku wangathoka eriowa ekihano ky’erithulira n’eriyira abigha, wukabya iwukakanganaya ku wanzire Nyamuhanga. (1 Yn. 5:3) Thalengekania oku kino: Olhwanzo olhwa wuwithire Yehova lhwabirileka iwathulira nyumba okwa nyumba. Ekihano ekyo kyanabya kyolho eriowa? Obundi eyihi. Muwanakwa engitsi wukathulira okwa muyi w’erimbere omughulhu watsuka omubiiri w’erithulira? Ahathe erithika-thika  muwakwayo! Aliwe wabya iwunasi ngoku oyu w’omubiiri ogho Yesu anzire iwakolha, kandi muwaghendera okwa kihano ekyo. Kandi obundi lino kyabirikwolhobera erisangira omwa mubiiri w’erithulira oyu. Kandi ibbwa eryeghesya omwigha we Biblia? Ekyo nakyo kikanaleka iwakwa engitsi? Obundi. Aliwe wamasaba Yehova y’obuwathikya bw’erirwanisya engitsi yawu n’erithunga obuthubaha bw’eryeghesya omwigha, Yehova iniangana kuwathikya erighumya eriyisunza lyawu ly’eriyira abigha.

8. Ngoku kiri omu Mariko 6:34, ni kindi kyahi ekyanga leka ithwakangirirya abandi?

⁸ Ekyakabiri, olhwanzo olhwa thuwithire abaliranwa bethu lhukaleka ithwabakangirirya ekwenene. Kiro kighuma, Yesu n’abigha biwe babya ibabirilhuha kutsibu busana n’erikolha omubiiri munene w’erithulira. Mubayithagha omwanya w’erilhuhukiramo, aliwe endeko nene y’abandu muyasa eyo bali. Yesu mwakwira abandu abo b’obulighe neryo amatsuka eribakangirirya ‘emyatsi mingyi.’ (Soma Mariko 6:34.) Mwayikasa kutsibu okwa ndambi eyo. Busana naki? Yesu mwayihira omwa kisuku ky’abandu ababya omwa ndeko eyo. Mwalhangira ngoku bakaghalhawa kutsibu​—ngoku bakayithagha kutsibu amaha​—neryo mwanza eribawathikya. Namunabwire abandu bane omwa mibere eyiri ng’eyo. Emisosere yabu isiyakuthebaya. Bali ng’esyombuli esithere esithawithe kiwathikya, isisiwithe mulisya ow’erisisondolha. Omukwenda Paulo mwakania okwa bandu abali ng’aba ng’abathawithe Nyamuhanga n’abathawithe maha. (Efe. 2:12) Bali omwa ‘nzira nene eyikakolhaya okw’ihera’! (Mt. 7:13) Thukabya thukalengekania okwa mibere y’obunyakirimu ey’abali omwa bulhambu bwethu, olhwanzo n’erikwira abandi b’obulighe bikaleka ithwabawathikya. Kandi enzira eyuwene kutsibu eyo thwanga bawathikiryamo ly’erigha nabu e Biblia.

9. Ngoku kiri omwa Abanya Filipi 2:13, Yehova angakuwathikya athi?

⁹ Obundi wukasagha eritsukisya omwigha we Biblia kundi wunasi ngoku eryeghesya omwigha kikayithagha obuthuku. Byamabya ikwabiri bithya, bwira Yehova y’eriyowa lyawu. Musabe akuwathikaye erikulha-kulhania eriyisunza lyawu ery’eribana omwigha. (Soma Abanya Filipi 2:13.) * Omukwenda Yoane mwathukakasya ngoku Nyamuhanga iniakendi subirya emisabe eyihambangene n’erisonda Liwe. (1 Yn. 5:14, 15) Neryo wangana yikethera ngoku Yehova akendi kuwathikya erikulha-kulhania eriyisunza lyawu ery’erisangira omwa mubiiri w’eriyira abigha.

10-11. Ni kyahi ekyanga thulemesya eryeghesya omwigha we Biblia?

¹⁰ Thukalhangira omubiiri wethu w’erikangirirya mwa mukulhu nomuthwangabana ebitsibu ebyanga thulemesya erikolha bingyi omo mubiiri w’eriyira abigha ngoku thulhue thwanzire. Thulebaye ebighuma by’okwa bitsibu ebyo nga ni byahi kandi ngoku thwanga birwanisya.

¹¹ Emibere eyathulimu yangana leka ithuthakolha bingyi. Ng’eky’erileberyako, abandi bathuliri bakulire omo myaka kutse babiritsotsobera. Nawu mbwino wune omwa mibere ng’eyo? Kyamabya ikwakiri kithya, lengekanaya okw’isomo lighuma eryo thwabirigha omo kihunzo ky’ekorona (COVID-19). Thwabiriminya ngoku thwangana kangirirya abigha be Biblia abakakulha-kulhana erilhabira omwa by’ekielekitroniki! Neryo lino wangana thoka eritsukisya omwigha n’erimweghesya iwune eka. Hane n’owundi mughaso. Abandi bangananza erigha e Biblia, aliwe ibathabya eka okwa ndambi eyo balikyethu bakaghenderamo omw’ithulira.  Aliwe, ibangana banika omwa ngyakya-ngyakya kutse omwa kiro. Mbwino wangana yihayo erigha n’abandu okwa ndambi eyo? Yesu mw’eghesya Nikodemo omo kiro, endambi eyo Nikodemo abya anzire erighiramo.​—Yn. 3:1, 2.

12. Ni byahi ebikaleka ithwasika ngoku thwanganabya bakangirirya babuya?

¹² Thwangana yowa nga sithwanga thoka eryeghesya omwigha we Biblia. Obundi ithwangana yowa nga thutholere ithwatsuka eriminya bingyi kutse eribya bakangirirya abasi ndeke imuthw’igha n’omundu e Biblia. Wamabya ikwawukayowa wuthya, lebaya ebindu bisathu ebyanga kuwathikya. Eky’erimbere, Yehova anasi ku wukendi thoka erikangirirya abandi. (2 Kor. 3:5) Ekyakabiri, Yesu, ‘oyuwabirihebwa ehamuli yosi omo lhubulha n’okwa kihugho’ abirikulhaghira athi wukangiriraye. (Mt. 28:18) N’ekyakasathu, wangana saba abandi b’obuwathikya. Yesu mwaghendera okwa bya Thatha wiwe amukangiriraya eribugha, nawu wangana bighenderako. (Yn. 8:28; 12:49) Eryongera okw’ekyo, iwangana saba omulebererya w’egurupu yenyu y’eriyathulira, omutemburi oyuwasi ndeke, kutse omuthuliri oyuwasi bingyi erikuwathikya eritsukisya omwigha n’erimukangirirya. Enzira nguma eyanga kuwathikya erithoka erigha n’omundu ly’erighenda n’abandi bathuliri okwa bigha babu.

13. Busana naki thukayithagha eribeghera emibere mihyaka ey’eryegheseryamo?

¹³ Kyangana thukalira eritsuka erikolesya esyonzira mbyaka n’eby’erikolesya bihyaka. Lino emibere thukakangirirayamo abigha be Biblia yabirihinduka. Ekitabu kyethu kikulhu eky’eryegheseryamo ekya, Tsemera Engebe Kera na Kera!, kikathuyithaghisayako erithegheka n’eryeghesya omwigha omwa nzira y’embaghane okwa yathwabya thukakolesya. Thukasoma esyonungu nyike aliwe ithwathunga erikanirania linene n’omwigha. Thukabya thukakangirirya, thukakolesya esyovidiyo nyingyi n’emyatsi eyiri okwa muthahulha wethu, nge JW Library^®. Wamabya isiwasi erikolesya eby’erikolesya ebi, kanaya n’oyuwanga kuwathikya erigha eribikolesya. Ithwe ng’abandu thukanza ithwakolha ebindu ngoku thubeghere eribikolha. Kyangana thukalira eribeghera emibere mihyaka y’erikoleramo emyatsi. Aliwe busana n’obuwathikya bwa Yehova n’obw’abandi, kikendi kwolhobera eribeghera emibere mihyaka kandi nibya iwatsemera kutsibu erigha n’abandu e Biblia. Ngoku omutemburi mughuma abugha, enzira mbyaka ey’eryegheseryamo eyi yikaleka “omwigha n’omukangirirya ibatsema.”

14. Thutholere ithwabya ithun’ibukireki thukathulira omwa bulhambu obukalire eritsukisya omwigha, kandi 1 Abanya Korinto 3:6, 7 hakathuhira mw’omuhwa w’erikolhaki?

¹⁴ Thwanganabya ithukathulira omo bulhambu eyo kikalire eritsukisya abigha. Abandu banganabya nga sibanzire erihulikirira omwatsi wethu kutse nibya ibahakanisyagho. Ni kyahi ekyanga thuwathikya eribya ithune n’amalengekania awatholere okwa bulhambu ng’obo? Wibuke ngoku omwa kihugho ekikalire kino, emibere eya bandu balimo yangana lhuaho iyahinduka, n’ababya bakaghana erihulikirira bangana tsuka erilengekania okwa kiyithawa kyabu ky’obunyakirimu. (Mt. 5:3) Kera abandi ababya bakaghana erimya ebitabu byethu endambi muyahika bamaligha erigha e Biblia. Kandi thunasi ngoku Yehova ya Mukama w’erighesa. (Mt. 9:38) Anzire ithwalholha embere erihera n’eryuthangirira, aliwe iyo yuwithe olhukwamirwa lhw’erilhasya. (1 Kor. 3:6, 7) Kandi kikahumulikanaya eryibukibwa ngoku nibya lino nomuthwangabya isithuwithe omwigha, Yehova akathuhemba, erisighikira okwa kaghalha ako thukahiraho butsira okwa bikalhwiririramo! *

15. Yehova akayowa athi omundu akaligha erigha e Biblia n’erighendera okwa by’ak’igha?

¹⁵ Yehova akatsema omundu akaligha ekwenene ye Biblia kandi akabwira kuyo kw’abandi. (Emi. 23:15, 16) Yehova atholere eribya iniakatsema kutsibu akalhangira ebinemubya munabwire! Ng’eky’erileberyako, nomuhanabya ekihunzo omwa kihugho kyosi omwa mwaka w’omubiiri owa 2020, abigha 7,705,765 mubeghesibwa, ekyawathikaya abandu 241,994 eriyihayo oku Yehova n’eribatizibwa. Abigha bahyaka aba, nabu bakendyeghesya abigha be Biblia, n’eriyira abandi bigha bangyi. (Lk. 6:40) Ahathe erithika-thika, thukatsemesaya Yehova thukasangira omwa mubiiri w’eriyira abigha.

16. Thubye n’ekilhubirirwa kyahi ekyuwene?

¹⁶ Omubiiri w’eriyira abigha si mwolho, aliwe busana n’obuwathikya bwa Yehova thwangana kolha owethu ow’erikangirirya abahyaka erianza Thatha wethu w’elhubulha. Mbwino wangana hiraho ekilhubirirwa eky’eritsukisya n’eryeghesya hakiri omwigha mughuma we Biblia? Ithwangana sweka busana n’ekyanga lhwiririra omw’ikolesya akaghisa kosi-kosi eribulya abo thukabana nga bangananza erigha nethu e Biblia. Thwangana yikethera ngoku Yehova akendi tsumulha akaghalha kethu.

17. Ithukendi yowa thuthi thwamathoka eryeghesya omundu ye Biblia?

¹⁷ Olhu ka ni lhusunzo olhwa lhuwithe olhw’erithulira n’erikangirirya abandi ekwenene! Omubiiri oyu akathulethera etseme y’okwenene. Omukwenda Paulo, oyuwawathikaya abangyi eribya bigha e Tesalonika, mwakangania eriyowa liwe omwa nzira eno: “Amaha wethu nindi, n’obutseme bwethu nindi, kutse akakira ak’eriyihalhambira nindi kwehi? Si nina nywe omughulhu thuli embere sy’Omukama wethu Yesu okw’ihika liwe kwehi? Kwenene inywe muli lhukengerwa n’obutseme bwethu.” (1 Tes. 2:19, 20; Emib. 17:1-4) Abangyi munabwire ku bakanayowa bathya. Mwali wethu Stéphanie, oyo iyo na mwira wiwe babiriwathikya abandu nga b’abo erihika okw’ibatizibwa akabugha athi, “Sihali obutseme obw’ingene n’obw’eriwathikya abandu eriyihayo oku Yehova.”