1. Adamu na Eva babere babirisobya, aho n’aho Yehova mwakolhaki? (Enzuko 3:15)

 ADAMU na Eva babere babirisobya, aho n’aho Yehova mwaha abaana babu b’amaha erilhabira omwa buminyereri bukulhu. Ebyo abugha biri omwa Enzuko 3:15.​—Soma.

2. Busana naki obuminyereri obu ni bukulhu?

² Obuminyereri obo buli omwa kitabu ky’erimbere kye Biblia. Aliwe omwa sindi nzira, ebitabu byosi bye Biblia bikakanaya kubo. Ngoku omuhuha akanabohera esyongwe syo haghuma, ebinywe ebiri omwa Enzuko 3:15 bikahira emyatsi eyiri omwa buli kitabu kye Biblia ya haghuma eribya mwatsi mughuma, ni bugha ambu, Omulhamya angathumirwe erisyathoghothya Diabolo n’ababi bosi abakamukwama. * Oyo ka akendi syabya mughisa okwa banzire Yehova!

3. Thukendi kania okuki omo mwatsi ono?

³ Omo mwatsi ono, thukendi subirya ebibulyo bino ebihambire okwa buminyereri obuli omwa Enzuko 3:15: Ni bahi abakanibweko omwa buminyereri obu? Obuminyereri bunemubererera buthi? Kandi bukathughasira buthi?

4. “Enzoka” nindi, kandi thukaminya thuthi?

⁴ Abali omwa mwatsi owali omwa Enzuko 3:14, 15 ni “enzoka,” “ekihanda” ky’enzoka, “omukali,” “n’ekihanda” ky’omukali. E Biblia yikathuwathikaya eriminya obuli mughuma w’okw’ibo. * Thutsuke ‘n’enzoka.’ Enzoka eyonyine-nyine siyanga yitheghererye ebyo Yehova abugha omw’irima  lye Edeni. Neryo Yehova atholere eribya imwatswera ekihangikwa ky’amenge. Ekihangikwa ekyo nindi? Eribisulirwa 12:9 hakakanganaya ndeke-ndeke nga ni nindi. Aho “ekiyoka kya kera” kikanganibwe ndeke-ndeke ngoku ni Sitani Diabolo. Aliwe ekihanda ky’enzoka ni bahi?

5. Ekihanda ky’enzoka ba bahi?

⁵ E Biblia yikabya yikakania okwa kihanda omwa nzira y’omusyo, yikabya iyikamanyisaya abakalengekanaya n’erikolha nga thatha wabu w’omusyo. Neryo ekihanda ky’enzoka mwamuli ebihangikwa bibi eby’ekirimu n’abandu, nabu nga Sitani, bakaghana Yehova Nyamuhanga n’erihakanisya abandu biwe. Omo mwangabere n’abamalaika abasighanaya emibiiri yabu elhubulha omwa biro bya Noa, kuthya n’abandu babi abawithe emitse eyiri ng’eya thatha wabu Diabolo.​—Enz. 6:1, 2; Yn. 8:44; 1 Yn. 5:19; Yuda 6.

6. Busana naki “omukali” angabya isyabya Eva?

⁶ Neryo thulebaye “omukali” nga nindi. Angabya isyabya Eva. Busana naki? Thuthalebya enzumwa nguma eno. Obuminyereri bukabugha buthi ekihanda ky’omukali kyanga ‘bbandire’ omuthwe w’enzoka. Ngoku thwanamabirilhangira, enzoka ni kihangikwa ky’ekirimu, Sitani, kandi sihali omundu oyuthahikene omwa baana ba Eva oyuwanga thokire erimuthoghothya. Habya hakayithaghisibwa oyulengire aho.

7. Ngoku kiri omwa Eribisulirwa 12:1, 2, 5, 10, omukali oyukanibweko omwa Enzuko 3:15 ak’imaniraki?

⁷ Ekitabu ky’erighunzerera omwa Biblia kikabisulha omukali oyukanibweko omwa Enzuko 3:15 nga nindi. (Soma Eribisulirwa 12:1, 2, 5, 10.) Oyu si mukali w’obuli kiro! Ahisi sy’ebisandu biwe hali okwezi n’okwa muthwe wiwe kuli embiitha y’esyongununu 12. Akabutha omwana oyuthe w’obuli  kiro​—Obwami bwa Nyamuhanga. Obwami ni bw’elhubulha, neryo n’omukali nayu atholere eribya ini w’elhubulha. Akimanira ekitsweka ky’ekithunga kya Yehova eky’elhubulha ekirimo ebihangikwa biwe ebithaleghulha eby’ekirimu.​—Gal. 4:26.

8. Ekitsweka kikulhu ky’ekihanda ky’omukali nindi, kandi abya athya mughulhu wahi? (Enzuko 22:15-18)

⁸ Kandi Ekinywe kya Nyamuhanga kikathuwathikaya eriminyerera ekitsweka kikulhu ky’okwa kihanda ky’omukali. Ekitsweka ekyo kyangalhuire omwa kihanda kya Abrahamu. (Soma Enzuko 22:15-18.) Ngoku obuminyereri bwanalhaghulha, ekihanda ekya Yesu alhuamo ky’eky’omulhume muthaleghulha oyo. (Lk. 3:23, 34) Aliwe ekihanda ekyo kyangabere n’amaaka awalhabire aw’abandu b’omubiri kundi kyanga thoghothirye Sitani n’erimughunziraho ighuma. Neryo Yesu, Mughalha wa Nyamuhanga ekyusa, abere akahikya emyaka nga 30, mwahakabibwa n’omulimu abuyirire. Okw’ihakabibwa liwe, Yesu mwabya kitsweka kikulhu ky’ekihanda ky’omukali. (Gal. 3:16) Yesu abere abiriholha n’erilhubuka, Nyamuhanga “mwamusingya omo lhukengerwa n’erisikya ly’omwami” kandi mwamuha “ehamuli yosi . . . omo lhubulha n’omo kihugho,” imwamune n’obuthoki “bw’eriherya emibiiri ya Sitani.”​—Ebr. 2:7; Mt. 28:18; 1 Yn. 3:8.

9-10. (a) Ni bandi bahi abali omwa kihanda ky’omukali, kandi bakabya baghuma b’okw’ikyo mughulhu wahi? (b) Thukathasyayakanaya okuki?

⁹ Aliwe hangabere ekitsweka kyakabiri ky’ekihanda eki. Omukwenda Paulo mwaminyikalya ekitsweka eki omughulhu abwira Abakristayo abahakabibwa Abayuda n’Abanya Bihanda athi: “Mwamabya muli ba Kristo, muli baana ba Abrahamu, mwasyabana ebyosi Nyamuhanga alhagha.” (Gal. 3:28, 29) Yehova akabya akahakabya Omukristayo omwa mulimu abuyirire, omundu oyo akabya mughuma w’okwa kitsweka ky’ekihanda ky’omukali. Neryo ekihanda mwamuli Yesu Kristo nabo akendi syathabalha nabu 144,000. (Erib. 14:1) Abosi aba bakakanganaya emibere eyiri ng’eya Thatha wabu, Yehova Nyamuhanga.

¹⁰ Neryo kundi thwamabiriminya abakanibweko omwa Enzuko 3:15, omwa bikuhi thulebaye ngoku Yehova abirighenda akaberererya obuminyereri obu kandi ngoku bukathughasira.

11. Ekihanda ky’omukali mukyabbandwa okwa “kasinziro” omwa nziraki?

¹¹ Ngoku kiri omwa buminyereri obuli omwa Enzuko 3:15, enzoka yanga bbandire “akasinziro” k’ekihanda ky’omukali. Ekyo mukyabererera Sitani akahongererya Abayuda n’Abanya Roma eritha Mughalha wa Nyamuhanga. (Lk. 23:13, 20-24) Ngoku ekironda ekyonyine-nyine ekiri okwa kasinziro kikaleka omundu iniaghenda akatsukuda habw’akathuku kake, olhuholho mulhwaleka Yesu iniabya isyanga thasyayira eky’erikolha n’eribya omw’isinda ahabw’ebiro bisathu.​—Mt. 16:21.

12. Omuthwe w’enzoka akendi sya bbandwa athi kandi mughulhu wahi?

¹² Obuminyereri obuli omwa Enzuko 3:15 bwamabya ibwabya bw’eribererera, obo Yesu isyanga sighere omw’isinda. Busana naki? Kundi erikwamana n’obuminyereri, ekihanda kyangabbandire omuthwe w’enzoka. Eki mukyamanyisya kithi ekironda kya Yesu ky’okwa kasinziro kyabya kitholere ikyalhama. Kandi kwenene mukyalhama! Okwa kiro kyakasathu aliholire, Yesu mwalhubukibwa ng’ekihangikwa  ky’ekirimu ekithehonda. Okwa buthuku obwa Nyamuhanga abirihiraho, Yesu akendi syathoghotherya ighuma Sitani. (Ebr. 2:14) Abakendisya thabalha na Kristo bakendi syasangira omw’ighunzaho esyonzighu syosi sya Nyamuhanga​—ekihanda ky’enzoka.—​Erib. 17:14; 20:4, 10. *

13. Thunemughasirwa thuthi omw’ibererera ly’obuminyereri obu?

¹³ Wamabya iwuli mughombe wa Nyamuhanga oyuyihereyo, wunemughasirwa omw’ibererera ly’obuminyereri obu. Yesu mwasa okwa kihugho ng’omundu. Akakanganaya ndeke-ndeke emibere ya Thatha wiwe. (Yn. 14:9) Neryo erilhabira omw’iyo, thwabiriminya Yehova Nyamuhanga n’erimwanza. Kandi thwabirighasirwa omwa syongangirirya sya Yesu n’omwa busondoli bwiwe akasondolha ekithunga ky’Ekikristayo munabwire. Abirithukangirirya ngoku thwangabyaho omwa ngebe eyangaleka Yehova iniathusima. Kandi ithwe bosi thwangana ghasirwa omwa lhuholho lhwa Yesu​—eribbandwa liwe okwa kasinziro. Thuthi? Yesu abere akalhubukibwa, mwahayo obughuli bw’omusasi wiwe ng’ekihongo ekihikene ‘ekikathweraya kw’ebibi byosi.’​—1 Yn. 1:7.

14. Thukaminya thuthi ngoku obuminyereri bw’omwa Edeni mubuthabererera aho n’aho? Soborera.

¹⁴ Ebinywe ebya Yehova abugha omwa Edeni mubyakangania ngoku hangalhabire obuthuku bulebe obuminyereri obo imubwabererera omwa buswire. Hangalhabire obuthuku omukali eributha ekihanda ekyalhaghanisibawa, Diabolo erihindania abandu biwe, n’obuyighu (kutse, eriponangana) eribyaho ahakathi-kathi k’esyogurupu ibiri esi. Thukaghasirawa omw’iminya ebihambire okwa buminyereri obu kundi bukathughusa kw’akasali ngoku ekihugho ekikasondolibawa na Sitani kikendi pona abaramya ba Yehova. Enyuma waho Yesu mwaghusa okwa bigha biwe kw’akasali akali ng’ako. (Mk. 13:13; Yn. 17:14) Ahathe erithika-thika thwabiriyilhangirira eribererera ly’ekitsweka ky’obuminyereri obu, kutsibu-tsibu omo myaka 100 eyihwere. Thuthi?

15. Busana naki ekihugho kyabiryongera eripona abandu ba Nyamuhanga, aliwe busana naki sihali nzumwa eyanga leka ithwasagha Sitani?

¹⁵ Buthuku buke Yesu alibere Mwami w’Obwami bw’Ekimasiya omwa 1914, Sitani mwaghuswa erilhua elhubulha. Lino ane okwa kihugho, analindirire erithoghothibwa. (Erib. 12:9, 12) Aliwe syikere buyira. Sitani atsurumire kandi ahithene, anemuhwerya ekinigha kiwe okwa bandu ba Nyamuhanga. (Erib. 12:13, 17) Busana n’ekyo, ekihugho kyabiryongera eripona abandu ba Nyamuhanga. Aliwe sihali nzumwa eyangaleka thukasagha Sitani n’abandu biwe. Omwakanya k’ekyo, thwangana thunga eriyikethera eriri ng’ery’omukwenda Paulo, oyuwahandika athi: “Nyamuhanga amabya ali oko lhuhandi lhwethu, nindi yuwanga syalhwa nethu kwehi?” (Abar. 8:31) Thwangana yikethera Yehova omwa buswire, kundi ngoku thwabirilhangira, ebingyi by’okwa biri omwa buminyereri obuli omwa Enzuko 3:15 byabiribererera.

16-18. Curtis, Ursula, na Jessica babirighasirwa bathi omw’iyitheghererya ebiri omwa Enzuko 3:15?

¹⁶ Omulhaghe wa Yehova owali omwa Enzuko 3:15 angana thuwathikya erighumira ebitsibu byosi-byosi ebya thwanga bana. Curtis, oyukakolha ng’omumisyonare e Guam, akabugha  athi: “Hakanayira ingabana ebitsibu n’ebikaponesaya ebikalenga okwa buthaleghulha bwaghe. Aliwe erighanirya okwa biri omwa Enzuko 3:15 kyabirinyiwathikya eribya inganayikethere Thatha waghe w’elhubulha.” Curtis alindirire ekiro Yehova akendi syaghunzaho ebitsibu byethu byosi.

¹⁷ Mwali wethu e Bavaria oyukahulhawamo Ursula akabugha athi eriyitheghererya ebiri omwa Enzuko 3:15 mukyamuwathikya eriligha ngoku e Biblia yasondolibawa na Nyamuhanga. Mwalhangira ngoku awandi maminyereri wosi ahambene n’obuminyereri obu, kandi ekyo mukyamutsemesya kutsibu. Kandi akabugha athi: “Munatsema ingaminya ngoku Yehova mwalhuaho iniayira ekyo akakolha nuku abandu bangabya ibanawithe amaha.”

¹⁸ Jessica, owe Micronesia, akabugha athi: “Ngakin’ibuka ngoku nayowa ingaminya ku nabiribana ekwenene! Obuminyereri obuli omwa Enzuko 3:15 bwabya ibunemubererera. Kyabirinyiwathikya eriminya ngoku ebya thukalhabamo siya ngebe kundu. Kandi obuminyereri obu bwabirighumya erikirirya lyaghe ngoku erikolera Yehova kikanyiha engebe eyuwene lino n’eyuwenenga omwa buthuku obukasa.”

19. Ni kyahi ekyangaleka ithwayikethera ngoku ekitsweka ky’erighunzerera ky’obuminyereri kikendi syabererera?

¹⁹ Ngoku thwabirilhangira, ebiri omwa Enzuko 3:15 binemubererera na lino. Ekihanda ky’omukali n’ekihanda ky’enzoka byabiriminyikalibwa ndeke-ndeke. Ekironda ky’okwa kasinziro kya Yesu oyuli kitsweka kikulhu ky’ekihanda ky’omukali mukyalhama kandi lino ni Mwami w’olhukengerwa oyuwithe engebe eyithehonda. Erisombolhwa ery’abali omwa kitsweka kyakabiri ky’ekihanda likisiya iryahwa. Kundi ekitsweka ky’erimbere eky’obuminyereri kyabiribererera, thuwithe nzumwa mbuya ey’eriyikethera ngoku ekitsweka ky’erighunzerera, eribbanda omuthwe w’enzoka, nakyo kikendi bererera. Abathaleghulha ka bakendi syahumulikana Sitani akathoghothibwa! Thunalindirire ekyo, sithulhuhirire. Nyamuhanga wethu ni w’eriyikethera. Erilhabira omwa kihanda ky’omukali, akendi syaletha emighisa mingyi okwa “bihanda byosi by’ekihugho.”​—Enz. 22:18.