1. Ni kakasya lyahi erya thuwithe, kandi busana naki?

 WUKABYA wukasamalira emibere y’ekihugho, kikanaleka iwahwa amaha? Omo syofamile simukiri olhwanzo. Erithwalira haghuma, abandu bakongera eribya batsurumi, abayitsomene ibobene, kandi batsururu. Kikakalira abangyi eriyikethera abawithe obuthoki. Aliwe emibere eyi yangana leka iwasika. Busana naki? Kundi emibere y’abandu munabwire yan’eyo eyalhaghulhawa omwa buminyereri obuhambire okwa “biro by’enyuma-nyuma.” (2 Tim. 3:1-5) Eribererera ly’obuminyereri obu, eryo mundu wosi-wosi oyuli mw’okwenene athe angaghania, likaha obwema ngoku Kristo Yesu abiritsuka erithabalha ng’Omwami w’Obwami bwa Nyamuhanga. Aliwe obu ni bughuma b’okwa maminyereri mangyi awahambire okwa Bwami. Neryo kikendi ghumya erikirirya lyethu thuk’igha okwa wandi maminyereri awabererera omwa myaka ya lino-lino.

2. Thukendi kania okuki omo mwatsi ono, kandi busana naki? (Kanaya oko kisasani ky’okwa kidipa.)

² Omo mwatsi ono, thukendi lebya (1) obuminyereri obukathuwathikaya eriminya Obwami nga bwasinga mughulhu wahi, (2) amaminyereri awakathuwathikaya eriminya ngoku Yesu abiribya Mwami w’Obwami bwa Nyamuhanga, na (3) amaminyereri awakabisulha esyonzighu sy’Obwami bwa Nyamuhanga nga sikendi syahwaho sithi. Thukendi lhangira ngoku amaminyereri aya akamathanibawa haghuma ng’obuhandi-buhandi bw’ekisasani obukamathanibawa erithukangania ndeke aho thwamathahika okwa ndegheka ya Yehova ey’eriberererya amaminyereri.

3. Obuminyereri obuli omu Danieli 7:13, 14 bukathukakasayaki oko Mwami w’Obwami bwa Nyamuhanga?

³ Obuminyereri obuli omu Danieli 7:13, 14 bukathukakasaya ngoku Kristo Yesu yuwangabere Muthabali oyutholere ow’Obwami bwa Nyamuhanga. Abandu erilhua omwa bihanda byosi ‘bangamukolere,’ kandi sihali oyuwangasubire omwa bwiwe ng’Omuthabali. Obundi buminyereri omwa kitabu kya Danieli mubwalhaghulha buthi Yesu angahebirwe Obwami bwiwe okw’ighunzerera ly’obuminyereri obuhambire okwa mighulhu musanju. Mbwino kinathokekene eriminya ekindu ekikatsemesaya ekyo nga kyabya mughulhu wahi?

4. Soborera Danieli 4:10-17 nga hakathuwathikaya hathi eriminya omwaka ogho Kristo atsuka erithabaliramu ng’Omwami. (Lebaya n’omwatsi ahikwa.)

⁴ Soma Danieli 4:10-17. “Emighulhu irinda” yikimanira obuthuku bw’emyaka 2,520. Obuthuku obo bwatsuka omwa 607 E.K.K. omughulhu abanya Babeli balhusayaho omwami w’erighunzerera okwa kithumbi ky’obuthabali bwa Yehova omwa Yerusalemu. Obuthuku obo bwahwa 1914 E.K. omughulhu Yehova ahira Yesu y’okwa kithumbi ng’Omwami w’Obwami bwa Nyamuhanga. *​—Eze. 21:25-27.

5. Obuminyereri obuhambire okwa “mighulhu irinda” bwanga thughasira omwa nziraki?

⁵ Obuminyereri obu bwanga thughasira buthi? Eriminya ebihambire okwa “mighulhu irinda” kikathukakasaya ngoku Yehova akaberereraya emilhaghe yiwe okwa buthuku obutholere. Ngoku anahiraho obuthuku obo Obwami bwiwe bwanga tsukire erithabaliramu, kandi akendi lhangira athi awandi maminyereri awosi akabererera erikwamana n’endegheka yiwe. Ahathe erithika-thika, ekiro kya Yehova ‘si kyendi syamalha.’​—Hab. 2:3.

6. (a) Ni bwema bwahi obulhangirikire obukakanganaya ngoku Kristo anemuthabalha elhubulha? (b) Obuminyereri obuli omwa Eribisulirwa 6:2-8 bukaghumaya buthi obwema obu?

⁶ Iniakisiya iniaghunza omubiiri wiwe w’erithulira okwa kihugho, Yesu mwalhaghulha ebindu birebe ebyanga wathikirye abigha biwe eriminya ngoku abiritsuka erithabalha elhubulha. Ebighuma by’okw’ibyo, mwahulha esyonyuhi, enzalha, n’emisiki. Kandi mwalhaghulha athi hangabere esyondwalha, “ehandi n’ehandi”​—ng’eky’erileberyako ekya lino-lino ky’ekihunzo ky’ekorona (COVID-19). Ebindu ebi ni bighuma by’okwa ebyo e Biblia yikahulhamo “ekiminyikalho” ky’erihika kutse eribyaho lya Kristo ng’omwami. (Mt. 24:3, 7; Lk. 21:7, 10, 11) Emyaka eyilhabire omu 60 aliholire n’erisuba elhubulha, Yesu mwaha omukwenda Yoane y’erindi kakasya erikakanganaya ngoku ebindu ebi byangabere. (Soma Eribisulirwa 6:2-8.) Ebindu byosi ebi byabiribya eritsuka aho Yesu akathabera Mwami omwa 1914.

7. Busana naki erithabalha lya Yesu lyabirilhwiririramo obulighe okwa kihugho?

⁷ Busana naki emibere okwa kihugho muyongera eritsanda Yesu akatsuka erithabalha? Eribisulirwa 6:2 hakasoborera ekyo​—omubiiri wa Yesu ow’erimbere ng’Omwami muhyaka lyabya iry’erilhwa olhuhi. Erilhwa nandi? Erilhwa na Diabolo n’esyombinga siwe. Ngoku kiri omwa Eribisulirwa sura 12, Sitani mwakindwa, neryo iyo n’esyombinga siwe mubaghuswa ahisi okwa kihugho. Omwa kinigha, Sitani mwatsuka erihwerya erihithana liwe ly’okwa  bandu, ekyabirilhwiririramo “obulighe oko kihugho.”​—Erib. 12:7-12.

8. Erilhangira amaminyereri awahambire okwa Bwami akabererera, kyanga thughasira kithi?

⁸ Amaminyereri aya angathughasira athi? Ebikabya omwa kihugho n’embinduka omwa mibere y’abandu bikathuwathikaya eriminya ngoku Yesu abiribya Mwami. Neryo omwakanya k’erihithana thukalhangira abandu bakabya mw’eriyitsomana ibobene kandi abakapona abandi, thuk’ibuka ngoku emibere yabu yikaberereraya obuminyereri bwe Biblia. Obwami buneho! (Esy. 37:1) Kandi thutholere ithwabya ithunasi ngoku emibere y’ekihugho yikendi lholha embere erikalha e Harmagedoni yinemuseghera hakuhi-kuhi. (Mk. 13:8; 2 Tim. 3:13) Mbwino siwanga sima Thatha wawu w’elhubulha ow’olhwanzo busana n’erikuwathikya eriminya ngoku thuli omwa mighulhu eyikalire?

9. Obuminyereri obuli omu Danieli 2:28, 31-35, bukabugha buthiki okwa buthabali obw’erighunzerera obw’amaaka omo kihugho kyosi, kandi bwatsuka erithabalha mughulhu wahi?

⁹ Soma Danieli 2:28, 31-35. Thukalhangira obuminyereri obu bukabererera munabwire. Esyonzoli sya Nebukadneza musyakangania ebyangabere “oko biro by’enyuma,” Kristo alitsukire erithabalha. Esyonzighu sya Yesu okwa kihugho mwangabere obuthabali bw’amaaka omo kihugho kyosi obw’erighunzerera obukanibweko omwa Biblia, obukimanirawa ‘n’ebisandu by’ekyuma n’eribumba.’ Obuthabali bw’amaaka obu bunemuthabalha. Bwatsuka erithabalha omwa buthuku bw’Olhuhi lhw’Ekihugho Kyosi Olhw’Erimbere omughulhu e Britain ne United States byatsuka eribya omwa bughuma​—obughuma bwe  Anglo-America. Esyonzoli sya Nebukadneza esihambire okwa sanamu musyalhaghulha ebindu bibiri ebihambire okwa buthabali obu ebyanga lekire ibwabya mbaghane okwa wandi mathabali owabirithabyaho.

10. (a) Obuminyereri bwa Danieli bukabisulhaki okwa buthabali obwe Anglo-America? (b) Ni kabi kahi ako thutholere ithwayihighulhako? (Lebaya akasanduku “ Yitheghaye Okwa Libumba!”)

¹⁰ Eky’erimbere, erithendibya ng’awandi mathabali w’ekihugho kyosi awabirithabyaho awali omwa syonzoli, obuthabali bwe Anglo-America, ibo sibukanibweko ng’ekyuma eky’esyamaghetse kutse ebitsipa, aliwe bukanibweko ng’ekyuma ekithulhungene n’eribumba. Eribumba likimanira “abandu.” (Dan. 2:43) Ngoku kilhangirikire ndeke-ndeke munabwire, amani agho bawithe omwa by’obukome, esyokampeyini sy’erilhwira obughabe bw’abandu, eriyisamambulha, n’ebithongole by’abakoli kikatsekaya amaaka w’obuthabali obu aw’erihira ebilhaghiro byabu by’omwa mikolere.

11. Erithabalha ly’Obuthabali bw’amaaka omo kihugho kyosi obwe Anglo-America likaghumaya lithi eriyikethera lyethu ngoku thuli omwa mughulhu w’enduli?

¹¹ Ekyakabiri, ngoku kyalhaghulhawa omwa Biblia, ebisandu by’esanamu nene bikimanira e Anglo-America, obuthabali bw’amaaka omwa kihugho kyosi obw’erighunzerera. Sihali obundi buthabali bw’ekipolitiki obukendi syasuba omwa mwanya wabo. Omwakanya k’ekyo, bukendi syalhua ibwahwaho okwa Harmagedoni, Obwami bwa Nyamuhanga bukathoghothyabo n’awandi mathabali wosi w’abandu. *​—Erib. 16:13, 14, 16; 19:19, 20.

12. Ni bundi bwema bwahi obuli omwa buminyereri bwa Danieli obukathuhumulikanaya n’erithuha amaha?

¹² Obuminyereri obu bwanga thughasira buthi? Obuminyereri bwa Danieli bukathasyaha obundi bwema obukakanganaya ngoku thuli omwa biro by’enduli. Emyaka eyilhabire omu 2,500 kera, Danieli mwalhaghulha athi awandi mathabali ani aw’amaaka omo kihugho kyosi awanga subukire Babeli angahambire nabi okwa bandu ba Nyamuhanga. Eryongera okw’ekyo, mwakangania ngoku okwa mathabali aya, obwe Anglo-America, bwo bwangabere bw’erighunzerera. Eki kikathuhumulikanaya n’erithuha amaha ngoku Obwami bwa Nyamuhanga bukisiya ibwaghunzaho amathabali awosi w’abandu neryo ibwathabalha ekihugho kyosi.​—Dan. 2:44.

13. ‘Omwami w’omunani’ ‘n’abami ikumi’ abali omwa Eribisulirwa 17:9-12, bik’imaniraki, kandi obuminyereri obu bwabiribererera buthi?

¹³ Soma Eribisulirwa 17:9-12. Eritsandalikania lingyi eryalhwiririra omwa Lhuhi lhw’Ekihugho Kyosi Olhw’Erimbere mulyaberererya obundi buminyereri bwe Biblia obuhambire okwa biro by’enyuma-nyuma. Abathabali b’ekihugho mubanza eriletha omwa kihugho mw’obuholho. Neryo omo Kwokubanza 1920, mubatsukisya ekithongole eky’Amahanga Awayitherene. Okwerikumi 1945 ekithongole eky’Obughuma bw’Ebihanda (UN) mukyasuba omwa mwanya wakyo. Ekithongole eki kikahulhawamo ‘omwami w’omunani.’ Aliwe ekithongole ekyo si buthabali bw’amaaka omo kihugho kyosi. Kikabana amaaka n’obuthoki erilhua okwa mathabali w’ekipolitiki awakakisighika. E Biblia yikakanaya okwa mathabali ayo ‘ng’abami ikumi.’

14-15. (a) Ebiri omwa Eribisulirwa 17:3-5 bikabisulhaki oku “Babeli Mukulhu”? (b) Ni kyahi ekinemubya okwa bakasighika amadini w’amabehi?

¹⁴ Soma Eribisulirwa 17:3-5. Omw’isondolibwa na Nyamuhanga, omwa syonzoli omukwenda Yoane mwalhangira omumalaya, “Babeli Mukulhu,” eyik’imanira amadini wosi  w’amabehi. Esyonzoli esi sikabisulhaki? Amadini w’amabehi amabirighunza buthuku inianemukolongana n’amathabali w’ekipolitiki aw’ekihugho kandi abiribya iniane mubasighika. Aliwe Yehova akisiya iniahira omwa mithima y’abanya politiki ‘mw’erisonda erikolha eriyisunza liwe.’ Mukendi syalhwiririraki? Abanya politiki abo​—‘abami ikumi,’ bakendi syabindukira amadini w’amabehi n’erithoghothyagho.—​Erib. 17:1, 2, 16, 17.

¹⁵ Thukaminya thuthi ngoku Babeli Mukulhu akisiya iniahwaho? Erithoka erisubirya ekibulyo ekyo, ni kikulhu eriminya ngoku olhusi lhunene lhwe Efurati ilhukawathikaya okw’itheya omuyi wakera we Babeli. Ekitabu ky’Eribisulirwa kikalinganisaya esyomiliyoni sy’abakasighika Babeli Mukulhu ‘n’amaghetse’ awakatheghaya. (Erib. 17:15) Kandi kikabisulha ngoku amaghetse ‘angumire,’ erikangania ngoku abangyi banga lekire erisighika amadini wosi w’amabehi. (Erib. 16:12) Omw’ibererera ly’obuminyereri obo, munabwire omughanzo w’abandu ng’ababo babirisighania amadini w’amabehi n’eritsuka erisonderya ehandi h’eby’erisubirya okwa bibulyo byabu.

16. Thwanga ghasirwa thuthi omw’iyitheghererya amaminyereri awahambire okw’ibyaho ly’Obughuma bw’Ebihanda (UN) n’erihwaho lye Babeli Mukulhu?

 ¹⁶ Amaminyereri aya angathughasira athi? Eribyaho ly’ekithongole ky’Obughuma bw’Ebihanda (UN) n’erisebebera ly’abakasighika amadini w’amabehi bikongera erikangania ngoku thuli omo biro by’enyuma-nyuma. Nomwakine indi amaghetse​—abakasighika Babeli—​anemuma, erihweraho ighuma ery’amadini w’amabehi likendibya omo yindi nzira. Ngoku kyabirikanganibwa, Yehova akendihira omwa mithima ‘y’abami ikumi’​—amathabali w’ekipolitiki awakasighika Obughuma bw’Ebihanda (UN)—​mw’erisonda “erikolha eriyisunza liwe.” Ebihanda ebyo bikendi thoghothya amadini w’amabehi kitsumbukirania, ekindu ekikendi swekya ekihugho kyosi. * (Erib. 18:8-10) Erithoghothibwa lya Babeli Mukulhu likendi suka-sukania ekihugho kyosi kandi lyangana syaleka engebe iyakalha, aliwe hane esyonzumwa ng’ibiri esikendi syaleka abandu ba Nyamuhanga ibatsema. Enzighu ya Yehova Nyamuhanga eyi eyamabirighunza buthuku buuli yikendi hweraho ighuma, nethu ithwabya ithukayalhama okwa mughulhu mubi ono!​—Lk. 21:28.

17-18. (a) Thwanga lholha thuthi embere erighumya erikirirya lyethu? (b) Omo mwatsi owakakwamako thukendi syakania okuki?

¹⁷ Danieli mwalhaghulha athi “eriminya” ly’ekwenene lyanga ‘kanyirire.’ Kandi kwenene ekyo kyabiribya! Thwamabiriyitheghererya ndeke amaminyereri awahambire okwa buthuku obwa thulimo. (Dan. 12:4, 9, 10) Eribererera ly’amaminyereri aya likaleka ithwongera erisikya Yehova n’Ekinywe kiwe ekyasondolibawa. (Isa. 46:10; 55:11) Neryo lholha embere erighumya erikirirya lyawu omw’iyeghesya Amasako n’omuhwa n’omw’iwathikya abandi eribya n’obughuma obuwene na Yehova. Akendi theya abosi abakamuyikethera ndeke, kandi akendi baha ‘obuholho obuhikene.’​—Isa. 26:3.

¹⁸ Omo mwatsi owakakwamako, thukendi syakania okwa maminyereri awahambire okwa kithunga ky’Ekikristayo eky’omwa mughulhu w’enduli. Ngoku thukend’igha, amaminyerera aya akakanganaya ndeke-ndeke ngoku thuli omwa biro by’enyuma-nyuma. Thukendi syalhangira obundi bwema obukakanganaya ngoku Yesu​—Omwami wethu oyunemuthabalha​—anemusondolha abathaleghulha abakamukwama.