Yesu mwathulhughania omwatsi w’obuholho. Aliwe buthuku bughuma, Yesu mwabwira abakwenda biwe athi: “Simughaniraye muthi nasa n’eriletha obuholho omo kihugho; mundasa eriletha obuholho, nikwa omuyali. Kusangwa nasa n’erikathisania omundu n’ise, na mwali na nyinya wiwe, n’omwalyana na nyinyi-byalha wiwe.” (Mt. 10:34, 35) Yesu amanyisayaki?

Yesu sy’abyanzire erighabulha esyofamile, aliwe abya inianasi ngoku esyongangirirya siwe syanga lekire esindi syofamile isyaghabulhana. Busana n’ekyo, abakayisunza eribya bigha ba Kristo n’eribatizibwa batholere ibabya ibanasi ebyanga lhwiririra omw’ithwamu lyabu. Bamabana erihakanisibwa erilhua oko mwanze oyuthikirirye kutse okwa bandi ab’omwa famile yabu, ikyangana bakalira eryamakirira buthaleghulha esyongangirirya sya Kristo.

E Biblia yikahira omwa Bakristayo mw’omuhwa w’eribya ‘n’obuholho oko bandu bosi.’ (Abar. 12:18) Aliwe esyongangirirya sya Yesu syangana kolha ‘ng’omuyali’ omwa sindi famile. Eki kikabya omughulhu omughuma w’okwa famile akaligha esyongangirirya sya Yesu aliwe abandi ibasighana kutse ibasihakanisya. Omwa mibere ng’eyo, abahughu​—abali omwa famile eyo—​banganabya “syonzighu” sy’oyuk’igha ekwenene.​—Mt. 10:36.

Abigha ba Kristo abali omwa syofamile esighabene omwa by’edini okwa bundi buthuku bakabana emibere eyikalenga oko lhwanzo olhwa bawithire Yehova na Yesu. Ng’eky’erileberyako, abahughu abathikirirye bangana bahathikana bathi basangire omwa biro bikulhu by’edini. Nindi oyo banganza eritsemesya bakalengwako? Yesu mwabugha athi: “Oyo wanzire ise kutse nyinya kwilhaba ingye syanyitholere.” (Mt. 10:37) Nomwabine, Yesu syamanyisaya athi eribya mwigha wiwe, abak’igha ekwenene batholere ibakehya olhwanzo olhwa bawithire ababuthi babu. Omwakanya k’ekyo, abya iniakahira omuwatho okwa bya batholere ibahira embere omo ngebe yabu. Ab’okw’ithwe abathikirirye bamahakanisya akaghalha akathukahiraho omw’iramya Yehova, thukasighalha ithunabanzire, aliwe thukaminya ngoku olhwanzo olhwa thuwithire Nyamuhanga lhwa thutholere ithwahira embere.

Ahathe erithika-thika, erihakanisya ly’abahughu likalhuma kutsibu. Nomwabine, abigha ba Yesu bakabya iban’ibukire ebinywe biwe bino: “Omundu oyutheheka [“omuthi wiwe w’amaghali,” NWT] n’erinyikwama syanyitholere.” (Mt. 10:38) Ni bugha ambu, Abakristayo bakalhangira erihakanisya ly’abahughu ng’ekitsweka ky’okw’ighalhwa eryo abigha ba Kristo bakabya ibanayitheghekere. Kandi bakabya ibanawithe amaha bathi emibere yabu mibuya yikendi hira omwa bahughu babu abathikirirye mw’omuhwa w’erihindulha amalengekania n’erianza eriminya omwatsi we Biblia.​—1 Pet. 3:1, 2.