Wunalhue Wasi?
Amatafali n’esyonzira sy’eribumbira womo ebyabumburawa omwa bisambukalirya bye Babeli bikakanganaya bithi ngoku e Biblia yihikire?
ABAKATHAKULHA ebyakera eby’omwa kithaka babiribumbura omwa Babeli mw’amatafali mangyi awakolesibawa erihimba omuyi oyo. Erikwamana n’omuthakuli w’ebyakera eby’omwa kithaka ya Robert Koldewey, amatafali ng’ayo akolerawa omwa syotanura sy’omuliro esyabya “eyihya w’omuyi, eyabya omuthaka owuwene n’esyongwe . . . nyingyi.”
Ebisakango ebyakera bikakanganaya ngoku kandi abathabali be Babeli ibakakolesaya esyotanura sy’omuliro esyo busana n’ekighendererwa kibi. Paul-Alain Beaulieu, omuprofesa ow’ebyakera ebye Asuria n’omubughe w’eyo ow’okwa Yunivasite eye Toronto, akabugha athi: “Ebisakango bye Babeli bikakanganaya ngoku omwami mwahamulha athi abathemwowa kutse abathesikaya ebisakango ebibuyirire batholere ibaghuswa omwa muliro oyo n’erihisibirwamo.” Ekisakango kighuma ky’omwa biro by’Omwami Nebukadneza kikabugha bino: “Mubathoghothaye, mubahisaye, mubokaye, . . . omwa muliro . . . muleke omukyi wabo ahethukire endatha, mubithe omw’ibaghusa omwa muliro.”
Eki kikibukaya abasomi be Biblia emyatsi eyiri omwa Danieli sura 3. Erikwamana n’ebyasakawa kera ebyo, Omwami Nebukadneza mwasingika esanamu nene ey’ehoro omwa bwerere bwe Dura—eyihya w’omuyi we Babeli. Abalhwana basathu Abaebrania ya Sadiraki, Mesaki, na Abedenego babere baghana eryunamira esanamu eyo, Nebukadneza mwahithana, amahamulha athi “bakaye erirunga ngendo sirinda kwilhaba ko likakibawa,” neryo mwabugha athi abalhwana basathu abo ‘baghusawe omw’irunga erikaghulhumira.’ Omumalaika w’amaaka mwabalhamya okwa lhuholho.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Eritafali erihire erisakangireko erina lya Nebukadneza
Amatafali awabanika omwa Babeli nagho akakanganaya ngoku e Biblia yihikire. Amangyi w’okwa matafali ayo asakangireko ebinywe ebikapipa omwami. Ebighuma by’okwa binywe ebyo bikasomeka bithya: “Nebukadneza, Omwami we Babeli . . . Ekikali, omwanya ogho ingye Omwami w’amaaka nahimba . . . Ambi ab’olhubutho lhwaghe ibathabalhakyo kera na kera.” Ebisakango ebi bisosene ndeke n’ebinywe ebiri omu Danieli 4:30, aho Nebukadneza ayihalhamba athi: “Oku si Babeli kunene, oko nabirihimba busana n’enyumba y’obwami, omo maaka w’obuthoki bwaghe na busana n’olhukengerwa lhw’erikangabasania lyaghe kwehi?”
