1. Ni mwa nziraki Abakristayo batholere ibabya ng’omuthi? (Lebaya n’ekisasani.)

 “OMUYAGHA syangatherya omuthi ow’angana gholholhoka.” Omusyo oyu akakanganaya omubere mukulhu owakaleka emithi mirebe iyaghuma: erighenda-ghendania n’emibere eyiriho. Erikulha-kulhana bunyakirimu, Abakristayo batholere ibaghenda-ghendania n’emibere eyiriho, ibanayitheghekire erigholholhoka. Bathi? Thutholere ithwabya n’obuyitheghererya omw’ighenda-ghendania n’embinduka omwa mibere eyathulimu n’omw’isikya amalengekania n’erithwamu ly’abandi.

2. Ni mibere yahi eyikendi thuwathikya erighenda-ghendania n’embinduka omwa mibere eyathulimu, kandi thukendikania okuki omo mwatsi ono?

² Ithwe ng’abaghombe ba Yehova, thwanzire ithwabya n’obuyitheghererya. Kandi thwanzire ithwabya abayikehirye kandi abakakwira abandi b’obulighe. Omo mwatsi ono, thukendilebya ngoku emibere ng’eyo, yawathikaya Abakristayo balebe erighenda-ghendania n’embinduka omwa mibere eyabalimu. Kandi thukendi lebya ngoku emibere eyi yanga thuwathikya. Aliwe, thuthatsuka erighira oku Yehova na Yesu, abali ky’erileberyako ekihikene eky’obuyitheghererya.

3. Ni bwema bwahi obwathuwithe obukakanganaya ngoku Yehova ni w’obuyitheghererya?

³ Yehova akahulhawamo “Olhukuka” kundi asikire, syalisegha-seghana. (Ebi. 32:4, NWT) Aliwe kandi, ni w’obuyitheghererya. Emyatsi yinemuhinduka, Nyamuhanga wethu akalholha embere erighenda-ghendania nayu nuku alhangire athi ekighendererwa kiwe kikabererera. Yehova mwahangika abandu omwa kisosekanio kiwe ibanawithe amaaka w’erighenda-ghendania n’embinduka omwa mibere eyabalimu. Abirithuha emisingyi ye Biblia eyilhangirikire eyikathuwathikaya erithwamu ndeke nomuthwangabana  ebitsibu ebiri bithi. Eky’erileberyako kya Yehova n’emisingyi eyabirithuha ni bwema obukakanganaya ngoku Yehova n’omwane “lhukuka,” ni w’obuyitheghererya.

4. Iha eky’erileberyako ekikakanganaya obuyitheghererya bwa Yehova. (Abalawi 5:7, 11)

⁴ Esyonzira sya Yehova sihikene kandi ni sy’obuyitheghererya. Syalimaghirira ekiwe akakolongana n’abandu. Ng’eky’erileberyako, thulebaye ngoku Yehova akanganaya obuyitheghererya akakolongana n’Abaisraeli. Isyalibugha athi abandu baheyo ebihongo bighumerere, mbulha wuli mugaga kutse munakwa. Ihakanayira, inialighira obuli mundu erihayo obuhere erikwamana n’emibere eyalimu.—Soma Abalawi 5:7, 11.

5. Iha eky’erileberyako ekikakanganaya ngoku Yehova mwayikehya n’erikwira abandi b’obulighe.

⁵ Omubere wa Yehova ow’eriyikehya n’ow’erikwira abandi b’obulighe yikaleka iniabya w’obuyitheghererya. Ng’eky’erileberyako, eriyikehya lya Yehova mulyalhangirika iniakisiya iniathoghothya abandu babi be Sodomo. Erilhabira omwa bamalaika biwe, Yehova mwalhaghira omuthunganene Loti athi asaghire okwa bithwe. Loti mwasagha eriyayo. Mwayilemba-lemba athi iyo n’efamile yiwe balighirawe erithibitha e Zoari, akayi kake akabya ikakayathoghothibawa. Yehova anganahathikene athi Loti aghendere okwa busondoli obw’abirimuha. Omwakanya k’ekyo, mwaligha erisaba lya Loti, nomwakine indi mukyamanyisya indi e Zoari yilhamibawe. (Enz. 19:18-22) Enyuma w’ebighana bingyi, Yehova mwakwira abanya Ninawe b’obulighe. Mwathumayo omuminyereri Yona eriyaranga athi e Ninawe n’abandu b’eyo babi bakisiya ibaheribwa. Aliwe abanya Ninawe babere bayisubamo, Yehova mwabakwira obulighe neryo amabalhamya n’omuyi wabu.—Yona 3:1, 10; 4:10, 11.

6. Iha eky’erileberyako ekikakanganaya ngoku Yesu mwagherererya obuyitheghererya bwa Yehova.

⁶ Yesu mwagherererya obuyitheghererya bwa Yehova. Athumawa okwa kihugho erithulira “esyombuli esiherire sy’enyumba ya Israeli.” Aliwe mwakangania obuyitheghererya akakolha omubiiri oyo. Buthuku bughuma, omukali oyuthabya Muisraeli mwamulemba-lemba athi alhamaye mwali wiwe oyuwabya ‘kw’embinga eyikamughalhaya kutsibu.’ Omw’imukwira obulighe, Yesu mwakolha ekyo omukali amusaba neryo amalhamya mwali wiwe. (Mt. 15:21-28) Thulebaye ekindi eky’erileberyako. Okw’itsuka ly’omubiiri wiwe w’erithulira, mwabugha athi: “Oyukanyighana . . .  naghe nibya nasyamughana.” (Mt. 10:33) Aliwe mwanaghana Petero, oyuwamughana mirundi isathu? Eyihi. Yesu mwalengekania okw’iyisubamu n’erikirirya lya Petero. Yesu abere abirilhubuka, mwabuthukira oku Petero kandi angabya imwamukakasya kw’abirimughanyira kandi kw’amwanzire.—Lk 24:33, 34.

7. Ngoku kiri omwa Abanya Filipi 4:5, thwanzire ithwaminywa thuthi?

⁷ Thwamabirilhangira ngoku Yehova Nyamuhanga na Yesu Kristo bawithe obuyitheghererya. Kandi ibbwa ithwe? Yehova anzire ithwabya b’obuyitheghererya. (Soma Abanya Filipi 4:5.) Embindulha nguma ye Biblia yikahindulha omulhondo oyu yithi: “Wuminyawe ng’oyuwithe  obuyitheghererya.” Ithwangana yibulya: ‘Mbwino abandu bakana nyilhangira ng’oyuwithe obuyitheghererya n’oyukaghenda-ghendania n’emibere eyiriho? Kutse bakanyilhangira ng’oyukamaghirira ekiwe, oyutsurumire, kutse oyukalire? Nganahathikana abandi indi bakole emyatsi ngoku ngalengekanaya indi yitholere iyakolhwa? Kutse, nganahulikirira abandi n’eriligha amalengekania wabu omughulhu kikayithaghisibawa?’ Olhulengo lhw’obuyitheghererya bwethu lhukakanganaya ngathunemugherererya bungahi Yehova na Yesu. Thulebaye emibere ibiri eyikayithaghisaya obuyitheghererya—omughulhu emibere eyathulimu yikahinduka n’omughulhu amalengekania w’abandi n’ebya bakathwamu biri mbaghane okwa byethu.

8. Ni kyahi ekyanga thuwathikya eribya n’obuyitheghererya hakabya embinduka omwa mibere eyathulimu? (Lebaya n’omwatsi ahikwa.)

⁸ Obuyitheghererya ly’erighenda-ghendania n’embinduka omwa mibere eyathulimu. Esyombinduka ng’esyo syangana thulethera ebitsibu ebya thuthayitsulirye. Ithwangana bana ekitsibu ky’amaghalha ekya thuthayitsulirye. Kutse kitsumbukirania eyathwikere yanganabya embinduka omwa by’emingirirye kutse omwa by’ekipolitiki ebyangaleka engebe iyakalir’ighuma. (Omu. 9:11; 1 Kor. 7:31) Nibya n’embinduka omwa lhusunzo lhwethu lhw’ekiteokrasi yangana thulengako. Mbulha ni kitsibuki, thwanganathoka erighenda-ghendania n’emibere mihyaka thwamakwama ebiika bbini bino: (1) ligha embinduka, (2) hira ameso w’embere, (3) hweraya amalengekania w’okwa bibuya, na (4) kolera abandi. b Leka thulebaye ebyalholirweko birebe ebikakanganaya ngoku erikwama ebiika ebi kyangana wathikya.

9. Abamisyonare abathahenie, mubathoka erighumira bathi ebitsibu ebyasa isibayithulirye?

⁹ Ligha embinduka. Emanuele na Francesca mubathumwa ng’abamisyonare omwa kindi kihugho. Imubanamatsuka erigha omubughe n’eribeghera ekithunga kyabu ekihyaka, ekihunzo ky’ekorona (COVID-19) mukyabuthuka neryo bamabya b’eribya ibobene. Neryo kitsumbukirania, mama wa Francesca mwaholha. Omw’iyibulha-bulha Francesca mwanza eriyabya n’ab’eka yabu, aliwe ekihunzo mukyamukakirya. Mwathoka athi erighumira emibere eyikaghunza amani eyi? Eky’erimbere, Emanuele na Francesca, ibo ng’abathahenie, omwa musabe mubasaba amenge w’erilengekania okwa buli kiro ahabwakyo. Yehova mwasubirya emisabe yabu erilhabira omwa byalya by’obunyakirimu ebyasira okwa buthuku. Ng’eky’erileberyako, mubahimbwa omwa ebya mughalha wethu abugha omwa vidiyo y’eribulibwa bino: “Omwa byalhuba thwamaligha engebe eyathwamabiribyamo, n’etseme yethu kwa yikanasubulha yithya kandi ithwathoka n’erikolesya ndeke ehighisa ehyo thukabana omwa mibere mihya-mihya eyo thwamabyamo.” c Ekyakabiri, mubahiribwa mw’omuhwa w’eryuwania omubere wabu w’erithulira okwa simu kandi nibya mubatsukisya n’omwigha we Biblia. Ekyakasathu, omw’isima mubaligha erihumulikanibwa ery’olhwanzo n’obuwathikya bw’abalikyabo. Mwali wethu mughuma oyutsomene, obuli kiro iniakabathumira akameseji akali mw’erisako ahabw’omwaka. Kuthya nethu thwamaligha emibere mihyaka eyathulimu, ithukendi tsemera ebya thukathoka erikolha.

10. Mwali wethu mughuma mwaghenda-ghendania athi n’embinduka nene omwa ngebe yiwe?

¹⁰ Hira ameso w’embere, kandi hweraya amalengekania  w’okwa bibuya. Mwali wethu Christina, owe Romania oyuwikere e Japan, mwayiponera ekithunga ky’Olhusungu ekyo abya akahindaniramu kikahwaho. Aliwe, mwathahwerya amalengekania w’okwabya kera. Omwakanya k’ekyo, mwathwamu erikolha ngoku angathoka omwa kithunga ky’omubughe w’Olhujapani omw’isangira n’omuhwa omw’ithulira. Mwasaba oyobabya bakakolha nayu kera athi amuwathikaye erigha omubughe oyo. Omukali oyo mwaligha erikolesya e Biblia n’ebrokyuwa Tsemera Engebe Kera na Kera! eryeghesya Christina y’Olhujapani. Christina m’uwania amaaka wiwe w’eribugha Olhujapani n’omukali oyo mwatsuka eritsemera ekwenene. Thwamahira ameso w’embere n’okwa bibuya, esyombinduka esikasa isithuyitsulirye isyangana lhwiririramo emighisa eyathuthalhue thulengekenie.

11. Abathahenie ababana ekitsibu ky’esyosente, mubaghuma bathi?

¹¹ Kolera abandi. Abathahenie abikere eyo omubiiri wethu imanibirwe mubabana ekitsibu ky’esyosente eby’emingirirye omwa kihugho kyabu bikakalha. Mubaghenda-ghendania bathi n’emibere? Okw’itsuka, mubathwa ebiika by’ery’olhobya engebe yabu. N’ekindi, omwakanya k’erihwerya amalengekania okwa bitsibu byabu, mubathwamu erihiragho okw’iwathikya abandi, n’erisighalha ibane bbize omwa mubiiri w’erithulira. (Emib. 20:35) Mwira wiwe mwabugha athi, “Eribya bbize omwa mubiiri w’erithulira mukyaleka ithuthabana endambi y’erilengekania okwa bithatholere kyamaleka ithwahira amalengekania okw’ikolha erisonda lya Nyamuhanga.” Emibere eyathulimu yamahinduka thutholere ithwibuka ku ni kikulhu erilholha embere eriwathikya abandi, kutsibu-tsibu erilhabira omwa mubiiri wethu w’Ekikristayo.

12. Eky’erileberyako ky’omukwenda Paulo, kyanga thuwathikya kithi erighenda-ghendania n’emibere eyiriho omw’ithulira lyethu?

¹² Omw’ithulira lyethu, thukayithagha erighenda-ghendania n’emibere eyiriho. Thukabana abandu abawithe esyonyikirirya n’amalengekania muthina-muthina kandi abalhuire omwa mibere eyithasosene. Omukwenda Paulo iniakaghenda-ghendanaya n’emibere eyiriho, kandi thwangan’ighira okwa ky’erileberyako kiwe. Yesu mwasombolha Paulo ‘ng’omukwenda w’ebihanda.’ (Abar. 11:13) Omwa mubiiri oyo, Paulo mwathulira Abayuda, Abagiriki, ab’amenge, abalimi, abathabali, n’abami. Erithoka erihika okwa mithima y’abandu muthina-muthina abo, ‘omo myatsi yosi, Paulo mwalenga eribya hakuhi n’abandu b’emisindo yosi.’ (1 Kor. 9:19-23) Mwalengekania okwa kalikya, emibere, n’esyonyikirirya sy’abahulikiriri biwe n’eribathulira erikwamana n’emibere eyabalimu. Nethu kuthya thwangan’ongera erithulira lyethu thwamaghenda-ghendania n’emibere eyiriho n’erithulira abahulikiriri bethu erikwamana n’ebiyithawa byabu.

13. Ni kabi kahi akali omwa 1 Abanya Korinto 8:9 aka thwanga yihighulhako thwamabya ithunasikirye amalengekania w’abandi?

¹³ Kandi obuyitheghererya bukathuwathikaya erisikya amalengekania w’abandi. Ng’eky’erileberyako, abandi bali bethu banzire eriyipamba, abandi eyihi. Abandi Bakristayo bakatsemera erinywa obwabu okwa lhulengo, aliwe abandi bakathwamu erithendi bunywa. Abakristayo abosi banzire amaghalha awuwene aliwe bakasombolha esyonzira muthina-muthina sy’eritsomaniramo amaghalha wabu. Thwamayowa thuthi erithwamu lyethu ly’erihikire kandi thukanza erilikulha-kulhania omwa kithunga, ithwangana thwikalya abandi n’erilethaho erighabulhana. Ahathe erithika-thika sithwanganza erikolha ekyo! (Soma 1 Abanya Korinto 8:9; 10:23, 24) Thulebaye eby’erileberyako bibiri ebikakanganaya ngoku erighendera okwa misingyi y’Amasako kyangana thuwathikya eribya  n’amalengekania awatholere n’erilhangira thuthi hakabya ihane obuholho.

14. Ni misingyi yahi ye Biblia eya thwangabya ithun’ibukire bikahika omwa myambalire n’emiyipambire yethu?

¹⁴ Emyambalire n’emiyipambire. Omwakanya k’erihiraho emyambalire mirebe, Yehova abirithuha emisingyi eya thwanga ghenderako. Thuli b’eryambalha omwa nzira eyitholere abaghombe ba Nyamuhanga, erikangania obuyitheghererya, eriyikehya, “n’eriyitheya.” (1 Tim. 2:9, 10; 1 Pet. 3:3) Busana n’ekyo, sithulyambalha omwa mibere y’erileka abandu ibathuhweryako amalengekania. Kandi emisingyi ye Biblia yikawathikaya abasyakulhu eriyihighulha okw’iyihiriraho ebilhaghiro ebihambire okwa myambalire n’emipambire y’esyonzwiri. Ng’eky’erileberyako, abasyakulhu omwa kithunga kirebe mubanza eriwathikya baghalha bethu balebe abalere ababya ibabirikopa emighembere ey’esyonzwiri nguhi-nguhi esilinga-lingirwe eyabya yikanyirire. Abasyakulhu bangabawathikirye bathi isibathayihiriraho ekilhaghiro? Omulebererya w’omuthimbo mwahabulha abasyakulhu athi babwire baghalha bethu abo bathi, “Wamabya iwune okwa platifomu n’abahulikiriri bakahwerya amalengekania okwa misosere yawu omwakanya k’ebya wukabugha, iwukendibya iwuwithe ekitsibu omwa myambalire n’emiyipambire yawu.” Erisoborera lyolho eryo mulyaghunzaho ekitsibu isibathayihiriraho ekilhaghiro. d

15. Thukathwamu, ni bihano byahi bye Biblia n’emisingyi ebya thukaghenderako bikahika okw’itsomana amaghalha wethu? (Abanya Roma 14:5)

¹⁵ Eritsomana amaghalha. Obuli Mukristayo atholere iniathwamu ng’angatsomana athi amaghalha wiwe. (Gal. 6:5) Ebihano bike bye Biblia, ng’eky’eriyihighulha okwa musasi n’eby’obulhaghu, bikahamba okw’ithwamu ly’Omukristayo ery’eby’emithambirire. (Emib. 15:20; Gal. 5:19, 20) Ebindi ni myatsi y’eriyithwiramo. Bikahika okw’itsomana amaghalha wabu, abandi  bakatsemera emithambirire y’ekisungu misa, n’abandi ibatsemera eyindi. Nomuthwangabya ithuwithe eriyowa eriri lithi okwa mithambirire mirebe, thutholere ithwasikya erithwamu ly’abalikyethu erihambire okw’itsomana amaghalha wabu. Omw’ekyo, thutholere ithwabya ithun’ibukire esyonzumwa hino: (1) Obwami bwa Nyamuhanga busa bw’obukendi syathulhamya kera na kera. (Isa. 33:24) (2) Obuli Mukristayo atholere ‘iniaminya ndeke ebyo amaligha’ ebimutholere. (Soma Abanya Roma 14:5.) (3) Sithuli tswera kutse erithwikalya abandi. (Abar. 14:13) (4) Abakristayo bakakanganaya olhwanzo kandi sibalihira obughabe bwabu bw’eriyithwiramu bw’embere okwa bughuma bw’ekithunga. (Abar. 14:15, 19, 20) Thwamabya ithun’ibukire esyonzumwa esi, ithukendibya ithune bughuma n’abalikyethu kandi ithukendi leka omwa kithunga imwabya obuholho.

16. Omusyakulhu angakangania athi obuyitheghererya akakolongana n’abandi basyakulhu balikyabo? (Lebaya n’ebisasani.)

¹⁶ Abasyakulhu batholere ibahiraho eky’erileberyako ekyuwene bikahika okw’ibya ab’obuyitheghererya. (1 Tim. 3:2, 3) Ng’eky’erileberyako, omusyakulhu syatholere akalengekania athi amalengekania wiwe akendi bera eriliwa habw’erithabya ini mukulhu omwa myaka okwa bandi basyakulhu. Akaminya ngoku omulimu wa Yehova anganasukuma owosi-wosi okwa kathunga k’abasyakulhu eribugha ekyanga leka ibathwamu ndeke. Kandi hamabya isihali omusingyi we Biblia ow’amathwibwa, abasyakulhu b’obuyitheghererya bakabya ibanayitheghekire erisighika erithwamu ly’abangyi okwa kathunga, nomukyangabya indi erithwamu lyabu liri mbaghane.  

17. Abakristayo abali n’obuyitheghererya bakatsemera mighisa yahi?

¹⁷ Abakristayo bakabana emighisa mingyi busana n’eribya b’obuyitheghererya. Thukatsemera obughuma obuwene n’abalikyethu, kandi n’ekithunga kikabyamo obuholho. Thukatsemera emibere n’emirwa muthina-muthina eyuwene eyiri omwa baramya ba Yehova abali bughuma. Ekikulhu kutsibu, thukatsema habw’eriminya ngoku thukagherereraya Nyamuhanga wethu w’obuyitheghererya, Yehova.