1. Ni kwenene yahi eyo waminya wukatsuka erigha e Biblia?

 WANGAN’IBUKA nga watsuka erigha e Biblia mughulhu wahi? Wangabya imuwasweka wukaminya ngoku Nyamuhanga awithe erina. Obundi muwahumulikana wukaminya ngoku Nyamuhanga syali ghalhaya abandu omwa muliro wa kera na kera. Kandi wangabya imuwatsemera amaha w’erisyalhangira abanze bawu ababiriholha bakathasyabyaho n’erisyabya haghuma nabu okwa kihugho paradiso.

2. Eryongera okw’igha ekwenene ye Biblia, ni rindi kulha-kulhana lyahi eryo wakolha? (Abanya Efeso 5:1, 2)

² Wabere wuk’ongera erigha Ekinywe kya Nyamuhanga, olhwanzo olhwawuwithire Yehova ku lhwan’ongera lhuthya. Olhwanzo olho mulhwakuhira mw’omuhwa w’erighendera okwa bya wuk’igha. Muwakolha erithwamu eryuwene eriseghemere okwa misingyi ye Biblia. Muwuwania amalengekania n’emibere yawu kundi wabya wanzire eritsemesya Nyamuhanga. Ngoku omwana akanagherereraya omubuthi wiwe oyuwithe olhwanzo, wabya iwukagherereraya Thatha wawu w’elhubulha.—Soma Abanya Efeso 5:1, 2.

3. Ni bibulyo byahi ebya thwanga yibulya?

³ Ithwangana yibulya: ‘Mbwino lino olhwanzo olhwa ngawithire Yehova lhwabiryongera kwilhaba omughulhu nabatizibawa? Eritsuka aho ngathabatizibirwa, mbwino amalengekania n’emikolere yaghe byabiryongera eribya ng’ebya Yehova—kwilhabirirya omw’ikangania balikyethu b’olhwanzo?’ Olhwanzo lhwawu lhw’erimbere lhwamabya ilhwabiribya nga lhukaholhoka, isiwahwa amani. Ekiri ng’ekyo mukyabya okwa Bakristayo ab’omwa kighana ky’erimbere. Yesu mwathabalhuhirirako, kandi nethu  syendi thulhuhirirako. (Erib. 2:4, 7) Anasi ngoku thwangana thasyakulha-kulhania olhwanzo olho thwabya nalho thukatsuka erigha ekwenene.

4. Thukendi kania okuki omo mwatsi ono?

⁴ Omwatsi ono akendi kangania nga thwanga lholha thuthi embere erikulha-kulhania olhwanzo olhwa thuwithire Yehova n’abandi. Neryo thukendi lhangira emighuma y’okwa mighisa eyo ithwe n’abandi thukabana thwamaghumya olhwanzo lhwethu.

5-6. Ni bitsibu byahi ebya omukwenda Paulo abana omw’ithulira liwe, aliwe ni byahi ebyamuhira mw’omuhwa w’erilholha embere erikolera Yehova?

⁵ Omukwenda Paulo mwatsemera engebe eyuwene omwa mubiiri wa Yehova, aliwe abya inianawithe ebitsibu bingyi eby’erirwanisya. Mughulhu mungyi Paulo iniakaghenda esyongendo nyiri-nyiri, kandi omwa biro ebyo emibere y’erighenderamo iyikalire. Omwa syongendo siwe, ihakanayira Paulo iniabana ‘obwiko bw’esyonyusi n’obwiko bw’abarahi.’ Kandi okwa bundi buthuku abahakani ibakamukolha nabi. (2 Kor. 11:23-27) Kandi mughulhu mungyi Abakristayo balikyabo isibalimusima busana n’akaghalha ako akahiraho eribawathikya.—2 Kor. 10:10; Fil. 4:15.

⁶ Ni kyahi ekya wathikaya Paulo erilholha embere erikolera Yehova? Paulo mw’igha bingyi okwa mibere ya Yehova erilhua omwa Masako n’omwa byalhabamo. Paulo mwaligha ngoku Yehova Nyamuhanga amwanzire. (Abar. 8:38, 39; Efe. 2:4, 5) Kandi nayu mwanza Yehova ya kutsibu. Paulo mwakangania olhwanzo olhwawithire Yehova omw’ikolha n’erilholha embere ‘erikolera abandu ba Nyamuhanga.’—Ebr. 6:10.

7. Ni nzira yahi nguma eya thwanga kulha-kulhaniryamo olhwanzo olhwa thuwithire Yehova?

⁷ Thwangana kulha-kulhania olhwanzo olhwa thuwithire Nyamuhanga omw’iyeghesya Ekinywe kiwe n’omuhwa. Wukasoma e Biblia, lengaho erilebya obuli mwatsi ng’akabisulhaki oku Yehova. Yibulhaye: ‘Omwatsi oyu akakanganaya athi ngoku Yehova anyanzire? Ni nzumwa syahi esiri omo mwatsi oyu esyanga leka inganza Yehova?’

8. Omusabe angathuwathikya athi erikulha-kulhania olhwanzo olhwa thuwithire Nyamuhanga?

⁸ Eyindi nzira eya thwanga kulha-kulhaniryamo olhwanzo olhwa thuwithire Yehova ly’erimukyungulira omuthima wethu mughulhu wosi omw’isaba. (Esy. 25:4, 5) Na Yehova iniakendi subirya emisabe yethu. (1 Yn. 3:21, 22) Khanh, mwali wethu e Asia, akabugha athi: “Okw’itsuka olhwanzo olhwa ngabya ngawithire Yehova lhwabya lhuseghemere okw’iminya, aliwe olhwanzo olho mulhwongera ingalhangira ngoku akasubiraya emisabe yaghe. Eki mukyaleka inganza erikolha ebikamutsemesaya.” b

9. Timoteo mwakangania athi kw’anemukulha-kulhana omwa lhwanzo?

⁹ Myaka mirebe Paulo alibere Mukristayo, mwabanangana n’omulhwana mubuya ya Timoteo. Timoteo aby’anzire Yehova n’abandu. Paulo mwabwira Abanya Filipi athi: “Singwithe owundi oyuwithe omuthima ng’owaghe [nga Timoteo], kutse oyubahirire kw’omuthima wiwe.” (Fil. 2:20) Hano si bugha indi Paulo akanaya okwa maaka agho Timoteo aby’awithe ng’oyuwasi eritheghekania kutse embuyi, aliwe omo kwenene Paulo mwatsemera olhwanzo olho Timoteo aby’awithire balikyabo. Ahathe erithika-thika ab’omwa bithunga ebyo Timoteo aby’akabungira ibakamulindirira kutsibu.—1 Kor. 4:17.

10. Anna na mwira wiwe mubakangania bathi olhwanzo olhwa bawithire balikyabo?

¹⁰ Nethu kuthya thukasondekanaya esyonzira sy’eriwathikiryamo balikyethu. (Ebr. 13:16)  Thulebaye ekyalholirweko kya Anna, oyukanibweko omwa mwatsi w’ahanyuma. Enyuma w’ekiyagha kinene, iyo na mwira wiwe mubabungira efamile nguma ey’Abema neryo bameya olhuthwe lhw’enyumba yabu ilhwabiritsandalikanibwa. Busana n’ekyo, ab’omwa famile eyo babya isibawithe esyongyimba esihenirye. Anna akabugha athi: “Muthwathwalha esyongyimba syabu, thwamasyoya, thwamasisubulya ithwabirisigoma n’erisilinga ndeke. Okw’ithwe, ako kabya kandu kake, aliwe mwabirilhwiririra obunywani obukamathire erihika na munabwire.” Olhwanzo olho Anna na mwira wiwe bawithire balikyabo mulhwabahira mw’omuhwa w’eribawathikya.—1 Yn. 3:17, 18.

11. (a) Akaghalha kethu ak’erikangania olhwanzo kanga hamba kathi okwa bandi? (b) Ngoku kiri omwa Emisyo 19:17, Yehova akakolha kyahi thukakangania olhwanzo?

¹¹ Thukabya thukakolongana n’abandi omo lhwanzo n’omwa lhukeri, mughulhu mungyi bakalhangira akaghalha kethu k’erikangania amalengekania n’emikolere ya Yehova. Kandi banganasima olhukeri lhwethu kwilhaba ngoku thwanga lengekania. Khanh, oyukanibweko okw’itsuka, akibuka ndeke abamuwathikaya. Akabugha athi: “Ngasima kutsibu bali bethu abosi abanzwa ababya bakanyithwalha omw’ithulira. Ibakasyanyenda, ibanyikokya okwa ky’erirya, kandi ibanyisubya eka ya buholho. Lino nabiriminya ngoku kyabya kikayithagha akaghalha. Kandi ibakakolha ekyo busana n’olhwanzo.” Si bugha indi obuli mundu akendi thusima busana n’ebya thukamukolera. Khanh akakanaya okwa bamuwathikaya athi: “Ngayisunza indi ambi ingabathuha busana n’ebibuya bingyi ebyo banyikolera, aliwe lino singasi eyo abosi bikere. Aliwe Yehova anasi, kandi ngasaba indi asyanyithuhirabo.” Khanh ahikire. Yehova akalhangira nibya n’akandu kake ak’olhukeri ako thukakolera abandi. Akakalhangira ini kindu ky’obughuli kandi ng’eribanza eryo akendi syaliha.—Soma Emisyo 19:17.

12. Baghalha bethu banga kangania bathi olhwanzo olhwa bawithire ekithunga? (Lebaya n’ebisasani.)

 ¹² Wamabya iwuli mughalha wethu, wanga kangania wuthi abandi b’olhwanzo n’erikolha ebyanga bawathikya? Mughalha wethu omulere ya Jordan mwabulya omusyakulhu w’ekithunga athi ng’angakolhaki eryongera eriwathikya omwa kithunga. Omusyakulhu mwamusima busana n’erikulha-kulhana eryo abirikolha neryo mwamuha amenge awanga muwathikya erikolha bingyi. Ng’eky’erileberyako, mwabwira Jordan athi ambi iniahika lhuba okwa Kisenge ky’Obwami n’eriramukya abandi, erisangira omwa mihindano, erithulira mughulhu wosi n’egurupu yiwe y’eriyathulira, n’erisondekania esyonzira esyo angawathikiryamo abandi. Jordan abere aghendera okwa menge aya, mwathasubulira okw’igha bindu birebe aliwe kandi mwongera olhwanzo olhwawithire balikyabo. Jordan mwaminya ngoku mughalha wethu amabiribya mughombe omuwathikya, syalisubulira okw’itsuka eriwathikya abandi lisa; omwakanya k’ekyo, akalholha embere eribawathikya.—1 Tim. 3:8-10, 13.

13. Olhwanzo mulhwaleka lhuthi mughalha wethu Christian iniathasyatholera erikolha ng’omusyakulhu w’ekithunga?

¹³ Kandi ibbwa wamabya iwanabya mughombe omuwathikya kutse omusyakulhu w’ekithunga? Yehova ak’ibuka omubiiri ogho wakolha kera n’olhwanzo olhwakuhira mw’omuhwa w’erikolhagho. (1 Kor. 15:58) Kandi akalhangira olhwanzo olhwa wukinalholha embere erikangania. Mughalha wethu Christian mwapona akalhusibwa okwa busyakulhu. Aliwe akabugha athi: “Munathwamu erikolha ekyosi-kyosi ekyo nangathoka erikolera Yehova busana n’olhwanzo—mbulha ngwithe esyonzunzo kutse eyihi.” Endambi muyahika, amathasyasombolhwa ng’omusyakulhu w’ekithunga. Christian akaligha athi: “Munanasagha erithasyakolha. Aliwe munathwamu indi busana n’obughanyiri bwiwe,  Yehova amabya iniabirinyilighira erithasyakolha ng’omusyakulhu w’ekithunga, ngendi bukolha busana n’olhwanzo olhwa ngamuwithire n’olhwa ngawithire balikyethu.”

14. Wuk’ighaki okwa bya mwali wethu owe Georgia abugha?

¹⁴ Kandi abaghombe ba Yehova bakakanganaya abataka babu bw’olhwanzo. (Mt. 22:37-39) Ng’eky’erileberyako, Elena, mwali wethu owe Georgia, akabugha athi: “Okw’itsuka, ekindu kighuma kisa ekyanyihira mw’omuhwa w’erithulira lhwabya ilhw’olhwanzo olhwa ngawithire Yehova. Aliwe olhwanzo olhwa ngawithire Thatha waghe w’elhubulha lhwabere lhukayongera, n’olhwanga withire abandu ku lhwan’ongera lhuthya. Iningalengaho erithera akasasani k’ebitsibu ebya bakabana kandi nga ni myatsi yahi eyanga bahika okwa muthima. Iningabya ingongera eribalengekaniako omwa nzira eyi, ikwanganongera indya erianza eribawathikya.”—Abar. 10:13-15.

15-16. Ngoku kikanganibwe omwa bisasani, ni mighisa yahi eyikasa busana n’erikangania abandi b’olhwanzo?

¹⁵ Thukabya thukakangania balikyethu b’olhwanzo, sibo basa abakaghasirawa. Ekihunzo ky’ekorona (COVID-19) kyabere kyatsuka, mughalha wethu Paolo na mukali wiwe mubawathikya bali bethu bangyi abakulire omo myaka erigha ngoku banga kolesya ebyuma byabo by’ekielekitroniki nuku bathulire. Mwali wethu mughuma oyo okw’itsuka kyakalira erikolesya ekyuma kiwe, erighunzerera mwathoka.  Mwathoka erikikolesya erikokya abahughu biwe okw’Ibuka. Engagha y’okw’ibo mubahindana omw’ikolesya enganirania y’evidiyo! Mwali wethu oyo n’abahughu biwe abosi mubaghasirwa omwa kaghalha ka Paolo na mukali wiwe. Enyuma waho, mwali wethu mwahandikira Paolo athi: “Mwasingya erithukangirirya ithwe bakulire omwa myaka. Sinendi syibirirwa eritsomana lya Yehova n’akaghalha kenyu kanene.”

¹⁶ Ebyalholirweko ng’ebi mubyeghesya Paolo y’erisomo likulhu. Mw’ibukibwa ngoku olhwanzo ni lhukulhu kutsibu kwilhaba eriminya kutse amaaka w’obuhangiranwa. Ak’ibuka bino: “Nabya ingakolha ng’omulebererya w’omuthimbo. Munabwire, ngakyasi ngoku nomwakine indi abathuliri babiribirirwa emikania yaghe, bakin’ibuka obuwathikya obo nabaha.”

17. Ni bandi bahi abakendi ghasirwa omughulhu thukakanganaya olhwanzo?

¹⁷ Thukabya thukakangania abandi b’olhwanzo, thukaghasirawa omwa nzira esyathuthayitsulirye. Jonathan, oyuwikere e New Zealand, akakakasaya eki. Kyamukagha kighuma omw’ithungyi omwisi iniabirikolha kutsibu, mwalhangira omutemburi inianemuthulira okwa nzira. Jonathan mwathwamu eribya akakolha nayu obuli Kyamukagha omw’ithungyi. Aho mwathaminya ng’angaghasirwa bungahi omwa kindu ky’olhukeri eki. Jonathan akaligha athi, “Okwa buthuku obo, sinabya nganzire omubiiri w’erithulira. Aliwe nabere nganemuhulikirira emibere omutemburi eyo akakangirirayamo n’erilhangira ebibuya ebikalhua omw’ithulira liwe, mukyaleka inganza omubiiri oyu. Kandi mwabya munywani mubuya oyuwanyiwathikaya erikulha-kulhana bunyakirimu, eritsemera omubiiri w’erithulira, n’eryongera eriyithunda hakuhi na Yehova.”

18. Yehova anzire ithwakolhaki?

¹⁸ Yehova anzire ithwe bosi ithwakulha-kulhania olhwanzo olhwa thumuwithire n’olhwa thuwithire abandi. Ngoku thwamabir’igha, thwangana ghumya olhwanzo olhwa thuwithire Yehova omw’isoma Ekinywe kiwe n’erikighaniryako n’omw’ikania nayu mughulhu wosi omw’isaba. Thwangana kulha-kulhania olhwanzo olhwa thuwithire balikyethu omw’ibawathikya. Olhwanzo lhwethu lhukendibya lhunemwongera, thukendyongera eriyithunda hakuhi na Yehova n’erihiika lyethu ly’obunyakirimu. Kandi thukendi tsemera abanywani abo kera na kera!