1-2. Ni mwanziraki Omukristayo angabya ng’enyumba nyiri-nyiri? (1 Abanya Korinto 15:58)

 OKW’IHWERERERA ly’emyaka ye 1970, enyumba nyiri-nyiri ey’esyokayina 60 muyahimbwa e Tokyo, Japan. Abandu mubabulha enyumba eyi nga yinemwendi thoka er’imanira emisiki eyikabera eribya omwa tawuni eyo. Ni kyahi ekyathokesayayo? Abainjiniya mubahimbayo omwa nzira y’eribya iyighumire kandi iyangana ghenda-ghendania n’erisuka-sukania ly’emisiki. Abakristayo bali ng’enyumba nyiri eyo. Omwa nziraki?

² Omukristayo atholere iniabya inianasikire n’erighenda-ghendania n’emibere eyiriho. Akayithagha eribya inianaghumire kandi isyali segha-seghana bikahika okw’amakirira ebilhaghiro n’ebihano bya Yehova. (Soma 1 Abanya Korinto 15:58.) “Akowa lhuba” kandi syalibikyako. Okwa lhundi lhuhandi, akayithagha eribya n’obuyitheghererya kutse erighenda-ghendania n’emibere eyiriho, emibere eyo alimu yamamulighira kutse nibya kyamayithaghisibwa. (Yak. 3:17) Omukristayo oyuwabir’igha eribya n’amalengekania ng’aya iniakendi yihighulha okw’ibya oyukamaghirira ekiwe kutse oyukaligha obuli kindu. Omo mwatsi ono, thukendi lebya ngoku thwangabya buthasegha-seghana. Kandi thukendi minya esyonzira ithano esya Sitani akalengeserayamu eritsekya erithwamu lyethu n’eriminya ngoku thwangarwanisya akaghalha kiwe.

3. Ni bilhaghiro byahi eby’Oyulengireyo Oyukaha Ebilhaghiro ebiri omwa Emibiri 15:28, 29?

³ Iyo ng’Oyulengireyo Oyukaha Ebilhaghiro, Yehova abiribya inianemuha abandu biwe b’ebilhaghiro ebilhangirikire. (Isa. 33:22) Ng’eky’erileberyako, akathunga akakasondolha ak’omwa kighana ky’erimbere mukaminyikalya esyonzira isathu esyo Abakristayo batholere ibasighalhamo ibanaghumire: (1) omw’ighana eriramya esyosanamu, ibaramya Yehova musa, (2) omw’isikya  obubuyirire bw’omusasi, na (3) omw’ighendera okwa bihano bye Biblia eby’esyongeso. (Soma Emibiri 15:28, 29.) Munabwire, Abakristayo banga sighalha bathi ibanasikire omo nzira isathu esi?

4. Thukaramaya thuthi Yehova musa? (Eribisulirwa 4:11)

⁴ Thukaghana eriramya esyosanamu, thukaramaya Yehova musa. Mwalhaghira athi Abaisraeli bamuramaye iyo musa. (Ebi. 5:6-10) Kandi Diabolo abere akalenga oku Yesu, Yesu mwakangania ndeke-ndeke ngoku thutholere ithwaramya Yehova musa. (Mt. 4:8-10) Busana n’ekyo, sithuliramaya esyosanamu esy’amadini. Kandi sithuli ramaya abandu—mbulha ni basondoli b’amadini, abathabali b’ekipolitiki, kutse abasathi nyakabara omwa by’amasatha n’eby’eriyitsemesya—eribalhangira ng’esyonyamuhanga. Thukasighalha ithune okwa lhuhandi lhwa Yehova kandi thukaramaya ‘oyuwahangika ebindu byosi’ musa.—Soma Eribisulirwa 4:11.

5. Busana naki thukamakirira ekihano kya Yehova ekihambire okwa bubuyirire bw’engebe n’omusasi?

⁵ Thukamakirira ekihano kya Yehova ekihambire okwa bubuyirire bw’engebe n’omusasi. Busana naki? Kundi Yehova akabugha athi omusasi ak’imanira engebe, ekihembo ky’obughuli erilhua okw’iyo. (Law. 17:14) Yehova abere akalighira abandu erirya enyama y’ebisoro, mwababwira athi sibalye omusasi. (Enz. 9:4) Mwasuba omwa kihano eki akaha Abaisraeli b’Emighambo ya Musa. (Law. 17:10) Kandi mwasondolha akathunga akakasondolha ak’omwa kighana ky’erimbere eribwira Abakristayo abosi kathi ‘baleke erirya omusasi.’ (Emib. 15:28, 29) Ithunasikire thukaghondera ekihano eki thukathwamu okwa by’emithambirire. b

6. Ni kaghalha kahi ako thukahiraho erighendera okwa bihano bya Yehova eby’esyongeso?

⁶ Thukaghendera ndeke okwa bihano bya Yehova eby’esyongeso. (Ebr. 13:4) Omw’ikolesya omubughe w’omusyo owalhangirikire, omukwenda Paulo mwathuhabulha athi ‘thwithe’ ebitsuku byethu by’omubiri—ni bugha ambu eriyihiriraho eby’erighenderako ebighumire nuku thuyihemo esyongumbu sy’omubiri. Thukayihighulha okw’isamalira kutse erikolha ekyosi-kyosi ekikendi thuletha mw’esyongumbu sy’emyatsi y’engyingo. (Kol. 3:5; Yobu 31:1) Thwamalengwako, aho n’aho thukaghana amalengekania kutse emikolere yosi-yosi eyanga tsandya obunywani bwethu Nyamuhanga.

7. Thutholere ithwathwamu erikolhaki, kandi busana naki?

⁷ Yehova anzire ‘ithwamwowa n’omuthima wosi.’ (Abar. 6:17) Mughulhu wosi obusondoli bwiwe bukathughasira ndeke, kandi sithwanga hindulha ebihano biwe. (Isa. 48:17, 18; 1 Kor. 6:9, 10) Thukalengaho eritsemesya Yehova kandi thukakanganaya amalengekania awali ng’aw’omuhandiki w’esyonyimbo oyuwabugha athi: “Nabirisoha nyithi ngendi kenga amahamulho wawu, erihika ekiro nasyaholha.” (Esy. 119:112) Nomwabine, Sitani akendi lengaho eritsekya erithwamu lyethu. Ni syonzira syahi esyo akakolesaya?

8. Sitani akakolesaya athi eriendererya akalengaho eritsekya erithwamu lyethu?

⁸ Eriendereribwa. Diabolo akakolesaya ebithegho by’ekinyamubiri n’eby’omw’iyowa erilengaho eritsekya erithwamu lyethu. Ekilhubirirwa kiwe nianza ‘erithulya,’ eritsandya obughuma bwethu na Yehova. (1 Pet. 5:8) Abakristayo b’omwa kighana ky’erimbere mubahayirwa, bamaswiribwa, n’er’ithibwa busana  n’erithwamu erisighalha ibanasikire. (Emib. 5:27, 28, 40; 7:54-60) Namunabwire Sitani anemulholha embere erikolesya eriendereribwa. Eki kilhangirikire omw’ikolhwa nabi kutsibu ery’abalikyethu abe Russia n’omwa bindi bihugho n’erihakanisya erikalhua okwa bahakani.

9. Iha eky’erileberyako ekikakanganaya ngoku thutholere ithwabya ithunayitheghirye okw’akahathikano akathalhangirikire.

⁹ Akahathikano akathalhangirikire. Eryongera okw’endererya, Sitani akakolesaya “amenge.” (Efe. 6:11) Thalengekania okwa ky’erileberyako kya mughalha wethu Bob, oyuwabya w’erikolhwako erisemezibwa erikalire. Mwabwira abadokita athi nomubyangabya bithi, syangaligha erihirwako omusasi. Omudokita mwalighirana n’erithwamu liwe. Aliwe omwa kiro athali asemezibwa, owundi dokita mwasyalebya Bob abahughu biwe ibamabirisuba eka. Mwabwira Bob athi omusasi angana ghan’ikolesibwa, aliwe athi bakendibya ibane nagho kundi anganayithaghisibwa. Obundi dokita mwalengekania athi Bob angahindwire amalengekania wiwe kundi ab’okw’iyo sibaliho. Aliwe Bob mwasighalha inianasikire omw’ibugha athi syangahirwako omusasi nomubyangabya bithi.

10. Busana naki amalengekania w’abandu ni kithegho? (1 Abanya Korinto 3:19, 20)

¹⁰ Amalengekania w’abandu. Thwamalhangira emyatsi erikwamana n’amalengekania w’abandu, ithwangana sighania Yehova n’ebihano biwe. (Soma 1 Abanya Korinto 3:19, 20.) “Amenge w’ekihugho kino” mughulhu mungyi akaleka abandu ibathowa Nyamuhanga. Abakristayo bake e Pergamo ne Tuatera mubaghendera okwa malengekania w’abandu aw’eriramya esyosanamu n’aw’obutswatswa awabya akanyirire omwa syotawuni esyo. Yesu mwaha ebithunga bibiri ebyo by’erihabulha erikalire busana n’erilighira eby’obutswatswa. (Erib. 2:14, 20) Munabwire, thukabana akahathikano k’erighendera okwa malengekania awathahikire. Abahughu n’abanywani bethu bangana hamba okw’iyowa lyethu n’eribugha bathi thubikyeko. Ng’eky’erileberyako, bangana bugha bathi erighendera okwa syongumbu syethu siki kandi bathi ebihano bye Biblia eby’esyongeso byabirihwa okwa buthuku.

11. Thunemusika, thutholere ithwayihighulha okuki?

¹¹ Hanganayira ithwalengekania thuthi obusondoli obwa Yehova akathuha sibutholere. Nibya ithwangana lengwako ‘ithwasoha nabi.’ (1 Kor. 4:6) Ekitsibu eki mukyahamba okwa basondoli b’edini b’omwa biro bya Yesu. Omw’ongera omwa Mighambo mw’ebilhaghiro by’abandu, mubahira okwa bandu ba buli kiro kw’omuheke owakalire. (Mt. 23:4) Yehova akathuha obusondoli obulhangirikire erilhabira omwa Kinywe kiwe n’ekithunga kiwe. Sihali enzumwa eyangaleka thuk’ongera omwa busondoli obw’akathuha. (Emi. 3:5-7) Busana n’ekyo, sithuli soha nabi kutse erilhaba okwa bihandikire omwa Biblia kutse erihiriraho balikyethu ebilhaghiro oko myatsi y’eriyithwiramo.

12. Sitani akakulha-kulhanaya athi “eritheba buyira”?

¹² Amathebo. Sitani akakolesaya “eritheba buyira” ‘n’emyatsi y’ebirimu ebikathabalha oko bihugho’ erithebya abandu n’eribaghabulha. (Kol. 2:8) Omwa kighana ky’erimbere, ebi mwabya imwamuli esyongangirirya esiseghemere okwa malengekania w’abandu, esyongangirirya sy’Abayuda esithaseghemere okwa masako, n’engangirirya y’eribugha indi Abakristayo batholere ibaghendera okwa Mighambo ya Musa. Aya abya mathebo kundi mwaleka abandu ib’iha amalengekania w’okwa Nzuko y’amenge w’okwenene, Yehova. Munabwire, Sitani akakolesaya emedia n’emithahulha y’erikanirania erilhalhania ebinyambwirwa n’emyatsi y’amabehi eyo abasondoli b’ekipolitiki bakakulha-kulhanaya. Muthwayilhangirire  eki omwa kihunzo ky’ekorona (COVID-19). c Abema ba Yehova abahulikirira obusondoli obwahebawa omwa kithunga kyethu mubayihighulha okwa maghaniryo mangyi agho ababya bakahulikirira emyatsi y’amabehi babana.—Mt. 24:45.

13. Busana naki thutholere ithwayitheya okw’ilengemeribwa?

¹³ Ebikalengemeraya. Sithutholere thuk’ibirirwa “ebikulhu kutsibu.” (Fil. 1:9, 10, NWT) Ebikalengemeraya byangana thulira obuthuku bwethu bunene n’erileka ithw’iha amalengekania w’okw’ikwamirira eby’omughaso munene. Ebindu bya buli kiro—ng’erirya, erinywa, eriyitsemesya, n’emibiiri y’ekihugho—byangana thulengemerya thwamabihweryako amalengekania. (Lk. 21:34, 35) Eryongera okw’ekyo, obuli kiro thukabana emyatsi mingyi eyihambire okwa katabanguko n’eby’ekipolitiki. Sithwangaligha erilengemeribwa omwa myatsi eyi. Bithe bithya, ithwangana tsuka eribya na lhuhandi omwa bulengekania n’omwa mithima yethu. Sitani akakolesaya esyonzira syosi esi esyabirikanibwako ahighulhu inianawithe ekilhubirirwa ky’eritsekya erithwamu lyethu ery’erikolha ekihikire. Leka thulebaye ngoku thwanga rwanisya akaghalha kiwe kandi ithwasighalha ithunaghumire.

14. Ni kindu kighuma kyahi ekyanga thuwathikya erisighalha ithunaghumire okwa lhuhandi lhwa Yehova?

¹⁴ Lengekanaya okw’iyihayo lyawu n’eribatizibwa. Muwathwa ebiika ebi kundi muwanza eribya okwa lhuhandi lhwa Yehova. Thasyalengekanaya okwa byaleka iwaligha ku wabiribana ekwenene. Muwaminya Yehova ya ndeke kandi muwatsuka erimusikya n’erimwanza nga Thatha wawu w’elhubulha. Muwakulha-kulhania erikirirya lyawu kandi muwanza eriyisubamu. Omuthima wawu mwakuhira mw’omuhwa w’erileka emitse mibi n’ow’erianza eribyaho erikwamana n’erisonda lya Nyamuhanga. Muwathekana wukaminya ngoku Nyamuhanga abirikughanyira. (Esy. 32:1, 2) Muwahindana okwa mihindano y’Ekikristayo  n’eritsuka eribwira abandi okwa bindu bibuyanga ebyo wabya wuk’igha. Iwe ng’Omukristayo oyubatizibirwe, lino wunemulendera omwa nzira y’engebe, kandi wabirithwamu erithend’ilhua omwa nzira eyo.—Mt. 7:13, 14.

15. Busana naki erigha n’erighanirya ni by’omughaso?

¹⁵ Erigha Ekinywe kya Nyamuhanga n’erikighaniryako. Ngoku omuthi akanabya inianaghumire emirihi yagho yamabya iyin’ingire ndeke omwa kithaka, thwangana sighalha ithunaghumire erikirirya lyethu lyamabya irin’ingire ndeke omwa Kinywe kya Nyamuhanga. Omuthi akabya anemukulha, emirihi yagho yik’ingira omwa kithaka mwa haali n’erilhanda kutsibu. Thukabya thuk’igha n’erighanirya, thukaghumaya erikirirya lyethu n’eryongera eriligha ngoku esyonzira sya Nyamuhanga sy’esyuwene kutsibu. (Kol. 2:6, 7) Lengekanaya okwa mibere erikangirirya lya Yehova, obusondoli, n’obutheya byawathikaya abaghombe biwe abakera. Ng’eky’erileberyako, Ezekieli mwahulikirira ndeke omumalaika akamusoborera ebipimo by’ehekalu eyo alhangira omwa syonzoli. Esyonzoli esi musyaghumya Ezekieli, kandi sikathuha amasomo awuwene awahambire okwa mibere thwangamakiriramo ebihano bya Yehova by’eriramya ly’okwenene. d (Eze. 40:1-4; 43:10-12) Nethu thukaghasirawa thwamahiraho obuthuku bw’erigha n’erighanirya okwa myatsi y’omwakathi ey’Ekinywe kya Nyamuhanga.

16. Omuthima w’erisika mwawathikya athi Bob? (Esyonyimbo 112:7)

¹⁶ Kulha-kulhanaya omuthima w’erisika. Omwami Dawudi mwakangania ngoku syangaleka erianza Yehova ak’imba athi: “Nyisikire, Nyamuhanga.” (Esy. 57:7) Nethu thwanganabya n’omuthima w’erisika, eriyikethera ighuma Yehova. (Soma Esyonyimbo 112:7.) Thalengekanaya ngoku eki kyawathikaya Bob, oyukanibweko okw’itsuka. Abere akabwirwa ngoku abadokita bakendibya ibane n’omusasi kundi anganayithaghisibwa, aho n’aho mwasubirya athi kubanza erimuhirako omusasi, angalhuireho inialhua okwa sipatara eyo. Enyuma waho, Bob mwabugha athi, “Nabya isindi keta-keta kandi isingakwire obuba.”

17. Ekyalholirweko kya Bob kyanga thweghesyaki? (Lebaya n’ekisasani.)

 ¹⁷ Bob abya inianasikire kundi abya iniabirithwamu eribya inianaghumire athali aghenda okwa sipatara. Eky’erimbere, mwanza eritsemesya Yehova. Ekyakabiri mwayithendya okwa ebya Biblia n’ebitabu byethu ebiseghemere okwa Biblia bikabugha okwa bubuyirire bw’engebe n’omusasi. Ekyakasathu, abya inianalighire ngoku erikwama obusondoli bwa Yehova kyanga mulethere emighisa eya kera na kera. Nethu thwanganabya n’omuthima w’erisika nomuthwangabana ebitsibu ebiri bithi.

18. Eky’erileberyako kya Baraka kyamathweghesyaki okw’iyikethera Yehova? (Lebaya ekisasani ky’okwa kidipa.)

¹⁸ Yikethere Yehova. Thalengekania okwa mibere Baraka asinguriramo busana n’eriyikethera obusondoli bwa Yehova. Nomwakine indi Abaisraeli si babya bawithe esyongabo kutse amathumu, Yehova mwamubwira athi ayalhwe n’amahe awanawithe ndeke eby’amalhwa aw’omukulhu w’amalhwa owe Kanana ye Sisera. (Abat. 5:8) Omuminyereri w’obukali ya Debora mwabwira Baraka athi andaghalire omwa omusya owaterekerere eriyasanga-sangana na Sisera n’ebiggali biwe by’amalhwa 900. Nomwakine indi ebiggali byangaghendire ndeke omwa musya owaterekerere oyo, Baraka mwowa. Abasirikali babere banemwandaghalha okwa kithwe Tabori, Yehova mwawisya embulha. Ebiggali by’amalhwa bya Sisera mubyahathira omwa byondo, na Yehova mwaleka Baraka iniasinga. (Abat. 4:1-7, 10, 13-16) Kuthya, Yehova angana leka ithwasinga thwamamuyikethera kuthya n’obusondoli obw’akathuha erilhabira omw’abakamw’imanira.—Ebi. 31:6.

19. Busana naki wanzire erisighalha iwunasikire?

¹⁹ Amalhwa wethu w’erisighalha ithunasikire akendi lholha embere thune omwa mughulhu mubi ono. (1 Tim. 6:11, 12; 2 Pet. 3:17) Ka thuthwemo erithendi hekwa eyi n’eyi busana n’eriendereribwa, akahathikano akathalhangirikire, amenge w’abandu, amathebo, n’ebikalengemeraya. (Efe. 4:14) Omwakanya k’ekyo, thubye ithunaghumire, ithunasikire omw’iyihayo lyethu oku Yehova n’erithendi segha-seghana omw’owa ebihano biwe. Kandi thutholere ithwabya n’obuyitheghererya. Omo mwatsi owakakwamako, thukendi syaminya ngoku Yehova na Yesu ni by’erileberyako ebihikene eby’abawithe obuyitheghererya.