Ithwe bosi sithuwithe obuthuku obukaghunza obw’eriyegheseryamo. Thwanga bukolesya thuthi ndeke? Erimbere, yithondolhaye. Iwukendyongera erighasirwa omw’iyeghesya ndeke emyatsi mike omwakanya k’erisoma emyatsi mingyi omw’iharabana.

Neryo, hira ebikulhu by’embere. (Efe. 5:15, 16) Lengekanaya okwa menge ano:

• Soma e Biblia obuli kiro. (Esy. 1:2) Kyanganabya kibuya eritsukira okwa ndegheka y’obusomi bwethu bwe Biblia obw’obuli wiki obw’emihindano y’ahakathi-kathi k’ewiki.

• Thegheka Akaleberyo ak’Erigha n’emihindano y’ahakathi-kathi k’ewiki. Ibya iwunayitheghekire erisubirya.​—Esy. 22:22.

• Kandi kisi lengaho erisoma n’erilebya ebindi byalya by’obunyakirimu ebiri okwa buthuku, ng’esyogazeti syethu esy’erighaba, esyovidiyo, n’emyatsi eyikahulhukibawa okwa jw.org.

• Sekulhaya. Wangana sekulya okwa kitsibu ekya wuwithe, ekibulyo, kutse omwatsi we Biblia ogho wanzire eriyitheghererya ndeke. Eribana amenge, ghenda omwa katsweka “Bible Study Activities” okwa jw.org.