1. Busana naki ni ky’amenge eriyitheghekera ebitsinduli?

 ERIYITHEGHEKA likalhamaya esyongebe. Ng’eky’erileberyako, hamabya ekitsinduli, abandu ababiriyitheghekerakyo bakabya ibabangana lhama kandi ibathoka eriwathikya n’abandi. Ekithongole ekikawathikaya abandu ekiri omwa Yuropu kikakibughako kithi: “Eriyithegheka ndeke lyangana lhamya esyongebe.”

2. Busana naki thutholere ithwayitheghekera obulighe bunene? (Matayo 24:44)

² “Obulighe bunene” bukendi syasa kitsumbukirania. (Mt. 24:21) Aliwe erithendibya ng’ebindi bitsinduli bingyi, obulighe bunene sibwendi bulikirirania obuli mundu. Myaka nga 2,000 enyuma, Yesu mwaghusa okwa bigha biwe kw’akasali nuku bayitheghekere ekiro ekyo. (Soma Matayo 24:44.) Thwamabya ithunayitheghekire, ikikendi syathwolhobera erilhaba omwa mughulhu owakalire oyo kandi ithwawathikya abandi erikolha ekyo.—Lk. 21:36.

3. Eriyiyinia, erikwira abandi b’obulighe, n’olhwanzo bikendi thuwathikya bithi eriyitheghekera obulighe bunene?

³ Thulebaye emibere isathu eyanga thuwathikya eriyitheghekera obulighe bunene. Ithukendi kolhaki thwamabwirwa indi thuthulhughanaye omwatsi owakalire ow’eritswera neryo abathikirirye ibathuhakanisya? (Erib. 16:21) Ithukendi yithagha eriyiyinia nuku thughondere Yehova, ithunayikethere ngoku akendi thutheya. Ithukendi kolhaki balikyethu bamaherya ebighuma by’okwa bindu byabo kutse ebyosi? (Hab. 3:17, 18) Ithukendi yithagha omubere w’erikwira abandi b’obulighe nuku thubawathikaye. Ithukendi kolhaki, thwamabya b’erikalha n’abalikyethu ahabw’akathuku busana n’eribambirwa ly’ebihanda ebiyiyungire haghuma? (Eze. 38:10-12) Ithukendi yithagha eribanza kutsibu nuku thuthoke erilhaba omwa mibere eyikalire eyo.

4. E Biblia yikakanganaya yithi ku thutholere ithwabya ithunemukulha-kulhania omubere w’eriyiyinia, erikwira abandi b’obulighe, n’olhwanzo?

⁴ Ekinywe kya Nyamuhanga kikathuhira mw’omuhwa ow’eribya  ithunemukulha-kulhania omubere w’eriyiyinia, erikwira abandi b’obulighe, n’olhwanzo. Luka 21:19 hakabugha hathi: “Busana n’erihathikana [eriyiyinia] lyenyu mwasyabana engebe yenyu.” Abanya Kolosai 3:12 hathi: “Muyire emithima y’erighanyira [erikwira abandi b’obulighe].” Na 1 Abanya Tesalonika 4:9, 10 hakabugha hathi: “Nyamuhanga akabakangiriraya ngoku mwanganzana. . . . Nikwa thukabalemba-lemba, balikyethu, thuthi mukole muthya kwilhaba aho.” Amasako wosi aya ahandikirawa abigha ababya ibabirikangania eriyiyinia, erikwira abandi b’obulighe, n’olhwanzo. Nomwabine, babya b’erilholha embere erikulha-kulhania emibere eyi. Nethu thutholere ithwakolha ikyan’ekyo. Erithuwathikya, thukendi lebya Abakristayo abakera nga mubakangania bathi obuli mubere. Neryo thukendi lebya nga thwanga gherererya thuthi abigha abo, kandi ngoku thwanga kangania ku thunayitheghekere obulighe bunene.

5. Abakristayo abakera mubayiyinirya bathi ebitsibu byabu?

⁵ Abakristayo abakera mubayithagha eriyiyinia. (Ebr. 10:36) Eryongera okw’ibana ebitsibu ebikahika okwa bandu abosi, mubabana n’ebindi bitsibu. Abangyi omw’ibo mubabana eriendereribwa erikalhua okwa bakulhu b’edini y’Ekiyuda n’abathabali be Roma kuthya n’abahughu babo. (Mt. 10:21) Kandi n’omwa kithunga, ihakanayira ibayithagha eriyitheya okwa syongangirirya esy’abakayisamambulha okw’ikirirya esyanga baghabulha. (Emib. 20:29, 30) Nomwabine, Abakristayo abo mubayiyinia. (Erib. 2:3) Bathi? Mubaghanirya okwa by’erileberyako by’Amasako eby’eriyiyinia, ng’ekya Yobu. (Yak. 5:10, 11) Mubasaba Yehova y’akaghalha. (Emib. 4:29-31) Kandi mubahira amalengekania okwa bibuya ebikalhwiririra omw’iyiyinia lyabu.—Emib. 5:41.

6. Ebya Merita akolha akayiyinirya erihakanisibwa bikakweghesayaki?

⁶ Nethu thwangana yiyinia thwamayeghesya mughulhu wosi okwa by’erileberyako by’eriyiyinia ebiri omwa Kinywe kya Nyamuhanga n’omwa bitabu byethu n’eribighaniryako. Omw’ikolha ekyo, mwali wethu Merita, owe Albania, mwathoka erighumira erihakanisya erikalire ery’abahughu biwe. Akabugha athi: “Munahumulikana kutsibu ingayeghesya omwatsi we Biblia owahambire oku Yobu. Mwaghalhwa kutsibu—isyasi oyukaleka iniaghalhwa—nomwabine, Yobu mwabugha athi: ‘Erihika okw’iholha lyaghe sinendisyaghana erithunganene lyaghe.’ (Yobu 27:5) Munalengekania ngoku ebitsibu bya Yobu byabya binene okwa byaghe. Erithendibya nga Yobu, ingye nabya inganasi oyukandethera ebitsibu ebi.”

7. Nomuthwangabya isithuwithe ekitsibu ekikalire lino, thutholere ithw’igha erikolhaki?

⁷ Kandi thwangana ghumya eriyiyinia lyethu omw’ibwira Yehova y’ebyosi ebikathulyambaya erilhua okwa muthima kandi mughulhu wosi. (Fil. 4:6; 1 Tes. 5:17) Obundi lino siwuwithe ekitsibu ekikalire. Nomwabine, wukanasondaya obusondoli bwa Yehova omughulhu wuhithene, wabiriyibulha-bulha kutse wulithoherwe? Wamabya mughulhu wosi iwukanasaba Nyamuhanga wethu y’obuwathikya omwa bitsibu ebyo wukabana munabwire, isiwendi lemwa erikolha ekyo wukabana ebitsibu binene-binene omwa buthuku obukasa. Neryo iwukendi yikethera ngoku anasi endambi eyonyine-nyine ey’eriyira eky’erikukolera kandi ng’akendi kikolha athi.—Esy. 27:1, 3.

8. Eky’erileberyako kya Mira kikakanganaya kithi ngoku eriyiyinirya ebitsibu lino kyangana thuwathikya eriyiyinirya eby’obuthuku obukasa? (Yakobo 1:2-4) (Lebaya n’ekisasani.)

⁸ Ikyangana syathwolhobera eriyiyinirya obulighe bunene obukasa thwamayiyinirya ebitsibu ebya munabwire. (Abar. 5:3) Busana naki  ithwabugha thuthya? Balikyethu bangyi babirilhangira ngoku obuli lengwako eryo babiriyiyinirya likabawathikaya erighumira erikakwamako. Eriyiyinia lyabiribawathikya, ikyaleka ibaghumya erikirirya lyabo ngoku Yehova anayitheghekire kandi anzire eribawathikya. N’erikirirya, lyabiribawathikya eriyiyinirya ekitsibu ekikakwamako. (Soma Yakobo 1:2-4.) Mira, omutemburi e Albania, abirilhangira ngoku eriyiyinia liwe erya kera lyabirimuwathikya erilholha embere eriyiyinia. Akaligha ngoku okwa bundi buthuku akanayowa nga n’iyo musa oyuwithe ebitsibu binene kutsibu. Aliwe neryo akibuka ebingyi ebya Yehova abirimukolera omwa myaka 20 eyihwere erimuwathikya, neryo akayibwira athi: ‘Sighalha muthaleghulha. Leka erilighira emyaka eyosi eyo n’ebitsibu byosi ebyo wabirisingura omwa buwathikya bwa Yehova bikakwira busa.’ Nawu kuthya wangana lengekania okwa mibere Yehova abirikuwathikiryamu eriyiyinia. Yikethere ngoku akabya inianalhangire wukayiyinirya obuli ekitsibu kandi kw’akendi syakuhemba. (Mt. 5:10-12) Neryo obulighe bunene bukendibya bukatsuka, wukendibya iwabiriminya ngoku wanga yiyinia kandi wukendi thwamu erilholha embere eriyiyinia.

9. Ab’omwa kithunga kye Antiokia eye Suria mubakangania bathi omubere w’erikwira abandi b’obulighe?

⁹ Thulebaye ekyabya omughulhu Abakristayo abe Yudea babya omwa nzalha nene. Ab’omwa kithunga kye Antiokia eye Suria babere bowa okwa nzalha eyo, ahathe erithika-thika mubakwira balikyabo be Yudea b’obulighe. Neryo aliwe mubakangania obulighe obo omwa mikolere. ‘Obuli mundu w’okwa bigha mwayisunza erithuma esyofranka ngoku anga thoka busana n’omubiiri w’eriwathikya abalikyethu abikere e Yudea.’ (Emib. 11:27-30) Nomwakine indi balikyethu ababya omwa nzalha aba babya bikere haali, Abakristayo be Antiokia mubathwamu eribawathikya.—1 Yn. 3:17, 18.

10. Ni mwanzira syahi thwanga kangania omubere w’erikwira abandi b’obulighe omughulhu balikyethu bakahambawako n’ekitsinduli? (Lebaya n’ekisasani.)

¹⁰ Nethu munabwire thwangana kangania omubere w’erikwira abandi b’obulighe thukaminya ngoku balikyethu babirihambwako busana n’ekitsinduli. Thukalhuaho ithwayira eky’erikolha—obundi omw’ibulya abasyakulhu nga thwangana wathikya okwa buhimbe, omw’ihayo erisighika omubiiri ow’ekihugho kyosi, kutse omw’ihira omwa misabe ababiriwako ekitsinduli. b (Emi. 17:17) Ng’eky’erileberyako, omwa 2020, Esyokomiti Esikawathikaya Ahawire Ekitsinduli esilhabire omu 950 musyahirwaho omwa kihugho kyosi eriwathikya ababirihambwako n’ekihunzo ky’ekorona. Thutholere ithwasima kutsibu abakakolera okwa syokomiti esyo. Busana n’erikwira balikyabo b’obulighe, babiribaghabira obuwathikya bw’ekinyamubiri, eribatsomana bunyakirimu, n’okwa bundi buthuku erisuba-subania kutse erithasyahimba amanyumba wabu n’emyanya y’eriramiryamo.—Thasyalebaya na 2 Abanya Korinto 8:1-4.

11. Ebya thukakolha busana n’erikwira abandi b’obulighe bikaha bithi Thatha wethu w’elhubulha y’ekitsumbi?

¹¹ Thukabya thukakwira abandi b’obulighe omughulhu hawire ekitsinduli, abandi bakalhangira eriyihayo lyethu. Ng’eky’erileberyako, omwa 2019, ekiyagha Dorian mukyatsandalikania Ekisenge ky’Obwami omwa Bahamas. Balikyethu babere bakathasyahimba ekisenge ekyo, mubabulya oyo baha omubiiri mulebe oyuthe Mwema bathi omubiiri oyo ng’akendi yithagha singahi. Mwababwira athi: “Nganzire ingahayo .  . . ebyuma by’erikolesya, obukoli n’eby’erihimbisya. . . . Nganzire ingakolha eki  busana n’ekithunga kyenyu. Nabiritsemera emibere mukakolonganiramu n’abanywani benyu.” Abandu bangyi omwa kihugho sibasi Yehova. Aliwe abangyi omw’ibo bakabya ibanemulhangira ebyo Abema ba Yehova bakakolha eriwathikya abandi. Ka ni lhusunzo eriminya ngoku ebyo thukakolha busana n’erikwira abandi b’obulighe byangana leka abandu ibasa oko yuwithe “erighanyira linene”!—Efe. 2:4.

12. Erikulha-kulhania omubere w’erikwira abandi b’obulighe lino kikathutheghekera kithi obulighe bunene? (Eribisulirwa 13:16, 17)

¹² Busana naki thukendi syayithagha omubere w’erikwira abandi b’obulighe omwa buthuku bw’obulighe bunene? E Biblia yikakanganaya ngoku abakaghana erisighika eby’ekipolitiki bakendi bana ebitsibu—lino n’omwa buthuku bw’obulighe bunene. (Soma Eribisulirwa 13:16, 17.) Balikyethu bangana yithagha obuwathikya obw’eribana ebiyithawa byabo by’ekinyamubiri. Omwami wethu, Kristo Yesu, akendibya akasyatswera, ambi iniathusanga ithunemukangya omubere w’erikwira abandi b’obulighe neryo iniathubwira athi “mwimaye obwami.”—Mt. 25:34-40.

13. Ngoku kiri omwa Abanya Roma 15:7, Abakristayo abakera mubaghumya bathi olhwanzo lhwabu?

¹³ Olhwanzo k’abya kaminyikalho akabya kakaminyikalya Abakristayo abakera. Aliwe mukyanab’olhobera erikangya olhwanzo? Thulebaye abandu muthina-muthina ababya omwa kithunga ekye Roma. Omw’ibo mwabya Abayuda abakangiriribawa Emighambo ya Musa, n’abanya bihanda abalhuire omwa mibere eyithasosene nahake. Obundi abandi Bakristayo babya bakobe n’abandi ibane bwiranda—obundi nibya abandi ibawithe abakobe. Abakristayo abo banga singwire bathi erithendi sosana eri n’erighumya olhwanzo lhwabu? Omukwenda Paulo mwababwira athi ‘bakokanaye.’ (Soma Abanya Roma 15:7.) Amanyisayaki? Ekinywe ekyahindulhawamo “mukokanaye” kikamanyisaya eryangirira omundu omwa lhukeri, ng’omwa nyumba y’omundu kutse omwa banywani. Ng’eky’erileberyako, Paulo mwabwira Filemono ngoku ang’angirira omukobe omuthibithi ya Onesimo, athi: “Wumukokaye.” (File. 17) Na Pirisila na Akwila mubangirira Apolo, oyuwabya asi bike okwa Kikristayo, ‘omw’ighenda haghuma nayu’ ewabu. (Emib. 18:26) Abakristayo abo mubathalighira erithendi sosana eryo likabaghabulha kandi mubakokania.

14. Anna na mwira wiwe mubakangania bathi olhwanzo?

¹⁴ Nethu thwangana kangania balikyethu b’olhwanzo omw’ibakokya eribya banywani bethu. Neryo ekyo kikendi leka nabo ibanza erithukangya olhwanzo mughulhu wosi. (2 Kor. 6:11-13) Thulebaye ekyalholirweko kya Anna na mwira wiwe. Buthuku buke imubanamathunga olhukwamirwa lhuhyaka ng’abamisyonare omwa West Africa, ekihunzo ky’ekorona mukyatsuka. Ibo ng’abahyaka, babya isibanga thoka erihindana n’ekithunga kyabo busu okwa busu. Banga kangenie bathi olhwanzo lhwabu? Mubakolesya enganirania y’evidiyo erikanirania n’abalikyethu ab’eyo n’eribabwira nga banzire bungahi eribaminya ndeke. Balikyethu mubahambwako kutsibu neryo bamabya bakabatherera mughulhu wosi n’eribathumira esyomeseji. Ni kyahi ekyaleka abathahenie aba ibakolha ekyo? Anna akabugha athi, “Olhwanzo olho ingye n’efamile yethu thwakanganibawa omwa mighulhu eyuwene n’eyikalire, lhwabirinyihambako kutsibu kandi lhwabirinyihira mw’omuhwa ow’erikangania olhwanzo.”

15. Ni kyahi ekya thuk’ighira okwa ky’erileberyako kya Vanessa bikahika okwanza balikyethu abosi? (Lebaya n’ekisasani.)

¹⁵ Abangyi omw’ithwe bali omwa bithunga ebiri mw’abalikyethu abalhuire omwa mibere muthina-muthina kandi abawithe emibere eyithasosene. Thwangana ghumya olhwanzo  olho thuwithire abosi omw’ihira amalengekania okwa mibere yabu mibuya. Mwali wethu ya Vanessa, oyukakolera omwa New Zealand, ikikamukalira erikolongana n’abandi omwa kithunga kiwe. Aliwe mwathwamu eribya akasiba n’abawithe emibere eyikamuponesaya omwakanya k’eribayisununulhako. Erikolha ekyo mukyaleka inialhangira ekikaleka Yehova iniabanza. Akabugha athi: “Aho mwira waghe akathabera mulebererya w’omuthimbo, thukaghunza ndambi nene ithune n’abalikyethu abawithe emibere muthina-muthina, kandi kikanyolhobera erikolongana nabo. Lino nganzire abandu muthina-muthina. Ahathe erithika-thika Yehova nayu anzire ekyo kundi abirithuletha omwa gurupu ng’eyo ey’abandu bangyi muthina-muthina.” Thukabya thuk’igha erilhangira abandi ngoku Yehova akabalhangira, thukakanganaya ku thubanzire.—2 Kor. 8:24.

16. Busana naki olhwanzo lhukendi syayithaghisibwa omwa bulighe bunene? (Lebaya n’ekisasani.)

¹⁶ Olhwanzo lhukendi syayithaghisibwa omwa buthuku bw’obulighe bunene. Obulighe bunene bukendi syabya bukatsuka, ni hayi aho thukendi syabana obutheya? Thulebaye ekya Yehova abwira abandu biwe athi bakole omughulhu e Babeli yakera yabambirawa: “Mwase, abandu baghe, mwingire omo manyumba wenyu, mukinge esyonyuyi syenyu enyuma wenyu. Muyibise oko kathambi kake, erihika aho erihithana lyamabilhabira.” (Isa. 26:20) Ebinywe ebyo kandi bikabya nga bihambire okw’ithwe abakendi syabya omwa bulighe bunene. ‘Amanyumba’ anganamanyisya ebithunga byethu. Omwa bulighe bunene, thukendi syabana obutheya obo Yehova akalhaghanisaya thwamalholha embere ithune bughuma n’abalikyethu. Busana n’ekyo, lino thutholere ithwakolha kutsibu erianza balikyethu butsira erikwama kyabaghumira. Erilhama lyethu lyangana seghemera okw’ekyo!

17. Thwamayithegheka lino, ni byahi ebyo thukendi syathoka erikolha omwa bulighe bunene?

¹⁷ “Ekiro kinene ky’Omwami Mukulhu” kikendi syalethera abandu b’obulighe. (Zef. 1:14, 15) Abandu ba Yehova nabo bakendi syabana ebitsibu. Aliwe thwamayithegheka lino, ithukendi syathoka eribya ithunathekene n’eriwathikya abandi. Thukendi syayiyinirya ekitsibu kyosi-kyosi ekyanga thwasira. Balikyethu bamasyaghalhwa, ithukendi syakolha ebyo thwanga thoka eribawathikya omw’ibakwira obulighe n’eribaha ebya bakayithagha. Kandi thukendi syasighalha ithunamakirire balikyethu, abo thwabiribya ithunanzire. Neryo Yehova akendisya thuhemba omw’ithuha engebe y’erikotha omwa kihugho omo ebitsinduli byosi n’amalighe wosi bikendi sy’ibiriranwa.—Isa. 65:17.