OMWATSI W’ERIGHA 30
OLHWIMBO 36 Thukatheghaya Emithima Yethu
Amasomo w’Omughaso Agho Thukighira Okwa Bami be Israeli
“Mwasyasubulha, mwasyasombolha n’eriminyerera omwa kathi-kathi k’abathunganene n’ababi, n’omwa kathi-kathi k’oyukakolera Nyamuhanga, n’oyuthemukolera.”—MAL. 3:18.
EKIGHENDERERWA
Eriminya Yehova ng’aby’awithe okwa bami be Israeli kw’amalengekaniaki nuku thuyitheghereraye ekya Yehova akayithagha okwa baramya biwe munabwire.
1-2. E Biblia yikabisulhaki okwa bami balebe be Israeli?
E BIBLIA yikahulha abalhume abalhabire omu 40 abathabalha ng’abami omwa Israeli. a Omwatsi oyo akabisulha bingyi ebihambire okwa baghuma b’okw’ibo. Ng’eky’erileberyako, nibya n’abami babuya mubanakolha ebindu bibi. Thalengekania okwa Mwami mubuya Dawudi. Yehova mwabugha athi: “Ng’omughombe waghe Dawudi . . . n’oyo wanyikwama n’omuthima wiwe wosi, erikolha ebithunganene bisa omo meso waghe.” (1 Bam. 14:8) Nomwabine, omulhume oyo mwasingira n’omukali omuthahibwa kandi amaya embitha y’er’ithira mwira wiwe y’omwa lhuhi.—2 Sam. 11:4, 14, 15.
2 Okwa lhundi lhuhandi, abangyi b’okw’abami abaleghulha mubanakolha ebindu ebyuwene. Thalengekania oku Rehoboamu. Embere sya Yehova, “mwakolha ekyabya kibi.” (2 Emy. 12:14) Aliwe, Rehoboamu mwaghendera okw’ilhaghira lya Nyamuhanga ery’erighabulha ebihanda ikumi okwa bwami bwiwe. Ekihanda kiwe mukyaghasirwa akathasyaghumya emiyi yakyo.—1 Bam. 12:21-24; 2 Emy. 11:5-12.
3. Ni kibulyo kyahi kikulhu ekikabuthukaho, kandi thukendi kania okuki omo mwatsi ono?
3 Ekyo kikaleka ihabuthuka ekibulyo kikulhu. Abami be Israeli bamabya imubakolha ebindu bibuya n’ebindu bibi, Yehova erithwamu omwami nga nina muthaleghulha embere siwe kyabya kiseghemere okuki? Eky’erisubirya okwa kibulyo ekyo kikendi thuwathikya eriminya ekya Yehova akathuyithaghako. Thukendi kania okwa bindu bisathu ebyo Yehova abya akalengekaniako akalebya omwami we Israeli nga ni mubuya kutse mubi: ebiri omwa muthima wiwe, eriyisubamu liwe, n’emibere akamakirira eriramya ly’okwenene.
MUBAKOLERA YEHOVA N’OMUTHIMA WOSI
4. Ni mbaghane yahi eyiri ahakathi-kathi k’abami bathaleghulha n’abami abaleghulha?
4 Abami abatsemesaya Yehova mubamuramya n’omuthima wosi. b Omwami mubuya ya Yosafati ‘mwasondya Omwami Mukulhu n’omuthima wiwe wosi.’ (2 Emy. 22:9) Ebinywe ebyasondolibawa bikabugha oku Yosia bithi: “Muhathabya mwami ng’iyo embere siwe, oyuwabindukira Omwami Mukulhu n’omuthima wiwe wosi.” (2 Bam. 23:25) Kandi ibbwa Solomona, oyo enyuma waho akolha ebindu bibi? “Omuthima wiwe syabya akwamire Omwami Mukulhu Nyamuhanga wiwe.” (1 Bam. 11:4) Kandi bikahika oku Abiyamu, owundi mwami oyuwaleghulha, e Biblia yikabugha yithi: “N’omuthima wiwe mwathakwama ndeke oko Mwami Mukulhu.”—1 Bam. 15:3.
5. Soborera nga kikamanyisayaki erikolera Yehova n’omuthima owathaghabene.
5 Neryo kwesi, erikolera Nyamuhanga n’omuthima wosi kutse owathaghabene kikamanyisayaki? Omundu oyuwithe omuthima owathaghabene syaliramaya Nyamuhanga habw’erithabya iniatholere erimuramya. Omwakanya k’ekyo, akakolha busana n’olhwanzo n’eriyihayo. Ery’ongera okw’ekyo, akasighalha inianawithe olhwanzo olho n’eriyihayo omo ngebe yiwe yosi.
6. Thwanga sighalha thuthi ithunawithe omuthima owathaghabene? (Emisyo 4:23; Matayo 5:29, 30)
6 Thwanga gherererya thuthi abami abathaleghulha n’erisighalha ithune n’omuthima owathaghabene? Omw’iyihighulha okwa bindu ebyanga thuhambako nabi. Ng’eky’erileberyako, eby’eriyitsemesya ebithuwene byangana leka omuthima wethu iniayighaba. Kuthya n’abanywani babi, n’amalengekania w’erianza ebindu. Thwamalhangira ekindu kirebe ikyabiritsuka eritsekya olhwanzo olhwa thuwithire Yehova, ambi ithwathwamu aho naho eriyilhusyakyomo.—Soma Emisyo 4:23; Matayo 5:29, 30.
7. Busana naki ni kikulhu eriyihighulha okwa kyosi-kyosi ekyanga tsekya obughuma bwethu na Yehova?
7 Sithutholere thukalighira emithima yethu eriyighaba. Thwamathendi yitheya, ithwangana yitheba omw’ilengekania thuthi erikanyirirya emibiiri yethu y’obunyakirimu kikendi thutheya okwa byanga thuhambako nabi. Ng’eky’erileberyako, thalengekania iwune eyihya okwa kiro ky’omuyagha owali mw’ekihuhiriro kinene. Wukahika eka, iwukendi ghenda ahali ekihuhania. Mbwino iwune mwend’ighasirwa wamathendi kinga olhuyi? Ekihuhiriro ikikendi lhuaho iky’usulha omwa nyumba yawu. Erisomo? Sithutholere thukakwama kyasubulira okw’irya ebyalya eby’obunyakirimu ebyanga huha-huhania obughuma bwethu na Yehova. Aliwe kandi thutholere ithwakinga olhuyi olhwang’ingirya amalengekania awathuwene nuku “embeho” y’ekihugho, kutse amalengekania awathatsemesaya Nyamuhanga, sy’ingire omwa muthima wethu n’erighabulhawo.—Efe. 2:2.
MUBAYISUBAMU BUSANA N’EBIBI BYABU
8-9. Omwami Dawudi n’Omwami Hezekia mubakolhaki bakakungwa? (Lebaya n’ekisasani .)
8 Ngoku kikanganibwe okw’itsuka, Omwami Dawudi mwakolha ekibi ekikalire. Aliwe omuminyereri Natana abere akamubwira kw’abirikolha ekibi, Dawudi mwa yisubamu inianayikehirye. (2 Sam. 12:13) Ebinywe biwe ebiri omwa Esyonyimbo 51, bikathukanganaya eriyisubamo liwe ery’okwenene. Dawudi mwathakwama kyayikangania ng’oyuwabiriyisubamu nuku athebe Natana, kutse eriyihighulha okw’isuyirwa.—Esy. 51:3, 4, 17, ehinywe ehiri ahighulhu okwa sura.
9 Omwami Hezekia nayu mwahalya oku Yehova. E Biblia yikabugha yithi: “Omuthima wiwe mwayiheka; busana n’ekyo erihithana mulyamubyako, n’oko Yuda ne Yerusalemu.” (2 Emy. 32:25) Ni kyahi ekyaleka Hezekia iniayiheka? Obundi mwayiheka busana n’obugaga bwiwe, eribya imwakinda Abasuria, kutse erilhamibwa okwa bulhwere omwa nzira y’ekithiko-thiko. Obundi emiyiheko y’eyaleka iniakangania abanya Babeli b’obugaga bwiwe, kyamaleka omuminyereri Isaya iniamukunga. (2 Bam. 20:12-18) Aliwe nga Dawudi, omw’iyikehya, Hezekia mwayisubamu. (2 Emy. 32:26) Erighunzerera, Yehova mwamulhangira ng’omwami omuthaleghulha oyuwakolha “ekyabya kibuya.”—2 Bam. 18:3.
Omwami Dawudi n’Omwami Hezekia mubayisubamu ibanayikehirye bakabwirwa ku babirikolha ebibi (lebaya enungu 8-9)
10. Omwami Amazia mwakolhaki akahengulhwa?
10 Mbaghane n’ekyo, Omwami Amazia owe Yuda mwakolha ekihikire “nikwa butsira omo muthima wosi.” (2 Emy. 25:2) Ni kyahi ekyaleka ikyabya kithya? Yehova abere abirimuwathikya erisingura abanya Edomu, Amazia munamira esyonyamuhanga syabu. c Neryo omuminyereri wa Yehova abere akakania nayu, omw’ikighenderera omwami mwathamuhulikirira kandi mwamuthibithako.—2 Emy. 25:14-16.
11. Ngoku kiri omwa 2 Abanya Korinto 7:9, 11, thwangakolhaki nuku thughanyirawe? (Lebaya n’ebisasani.)
11 Eby’erileberyako ebi bikathweghesayaki? Thutholere ithwayisubamu busana n’ebibi byethu kandi ithwakolha ekyosi-kyosi ekyo thwanga thoka eriyihighulha okw’ikisubira. Kandi ibbwa abasyakulhu b’ekithunga bamathuhabulha, nibya n’okwa mwatsi ogho thukalhangira nga nina muke? Ambi isithwayowa Yehova kutse abasyakulhu ng’ababirithughana. Kundi nibya n’abami babuya be Israeli mubayithagha erihabulhwa n’erisuyirwa. (Ebr. 12:6) Thwamahebwa erihabulha, thutholere (1) ithwalirigha ithunayikehirye, (2) ithwakolha esyombinduka esikayithayisibawa, kandi (3) ithwalholha embere erikolera Yehova n’omuthima wosi. Thwamayisubamu, Yehova iniakendi thughanyira.—Soma 2 Abanya Korinto 7:9, 11.
Thwamahebwa erihabulha, thutholere (1) ithwalirigha ithunayikehirye, (2) ithwakolha esyombinduka esikayithaghisibawa, kandi (3) ithwalholha embere erikolera Yehova erilhua okwa muthima (Lebaya enungu 11) f
MUBAMAKIRIRA ERIRAMYA LY’OKWENENE
12. Kutsibu-tsibu, ni kyahi ekyaleka abami abathaleghulha ibabya bambaghane okw’abaleghulha?
12 Abami abo Yehova alhangira mw’abathaleghulha mubaghenda-ghendania n’eriramya ly’okwenene. Kandi mubahira omwa bandu abo babya bakathabalhako mw’omuhwa w’erikolha ikyan’ekyo. Ni kwenene, ngoku thwanabirilhangira, babya ibanawithe erilemererwa lyabu. Aliwe mubayihayo oku Yehova n’omuthima wabo wosi nibya n’erikolha kutsibu erighunzaho eriramya lyosi ly’esyosanamu. d
13. Ni kyahi ekyaleka Yehova iniabugha athi Omwami Ahabu mwaleghulha?
13 Kandi ibbwa abami abo Yehova abugha athi mubaleghulha? Kilhangirikire ngoku siby’ebyosi ebyo bakolha indi byabya bibi. Nibya n’Omwami mubi Ahabu mwakangania eriyikehya okwa lhulengo lhulebe kandi mwayikubyabwomo ahabw’erisangira omw’ithibwa lya Naboti. (1 Bam. 21:27-29) Kandi mwahimba emiyi n’eriwathikya e Israeli erisingura esyonyuhi. (1 Bam. 20:21, 29; 22:39) Aliwe Ahabu mwaminywa ng’oyuwakulha-kulhanaya eriramya ly’amabehi busana n’ery’ohibwa na mukali wiwe. Okw’ekyo, mwathayisubamu.—1 Bam. 21:25, 26.
14. (a) Ni kyahi ekyaleka Yehova inialhangira Omwami Rehoboamu ng’oyuwaleghulha? (b) Ni byahi ebyo abami abaleghulha bakolha omwa buthabali bwabu?
14 Thalengekania okwa wundi mwami oyuwaleghulha—Rehoboamu. Ngoku kikanganibwe enyuma, mwanakolha ebindu birebe ebyuwene omwa buthabali bwiwe. Aliwe obwami bwabere bwabirighuma ndeke, mwagheghena ekihano kya Yehova amakwama eriramya ly’amabehi. (2 Emy. 12:1) Enyuma waho, mwabya omw’iramya ly’ekwenene n’ery’amabehi. (1 Bam. 14:21-24) Rehoboamu na Ahabu s’ibo bami basa abasighanaya eriramya ly’okwenene. Omo kwenene, abangyi b’okwa bami abaleghulha mubasighika eriramya ly’amabehi omwa nzira ndebe. Kilhangirikire ngoku, embere sya Yehova, ery’amakirira eriramya ly’okwenene kyabya kindu kikulhu ekyabya kikaleka omwami inialhangirwa ng’omubuya kutse mubi.
15. Busana naki ery’amakirira eriramya ly’okwenene ni kindu kikulhu embere sya Yehova?
15 Busana naki omwatsi ow’eriramya abya mukulhu embere sya Yehova? Kundi abami babya bawithe olhukwamirwa lhw’erisondolha abandu ba Nyamuhanga omw’iramya ly’ekwenene. Kandi, eriramya ly’amabehi likakolhaya okwa bindi bibi ebikalire, n’obuthe bulingirirania. (Hos. 4:1, 2) N’ekindi, abami n’abo babya bakathabalhako babya ibabiriyihayo oku Yehova. Busana n’ekyo, e Biblia yikalinganisaya ibo erisangira omw’iramya ly’amabehi n’erisingira. (Yer. 3:8, 9) Thunasi ngoku omundu oyukasingira akabya iniamasoberya omwanze wiwe. Kuthya, omughombe wa Yehova oyuwabiriyihayo, amasangira omw’iramya ly’amabehi akabya iniamamusoberya. e—Ebi. 4:23, 24.
16. Embere sya Yehova, kutsibu-tsibu ni kyahi ekikakanganaya embaghane eyiri ahakathi-kathi k’omuthunganene n’omubi?
16 Thuk’ighaki? Thutholere ithwathwiramu ighuma eriyihighulha okw’iramya ly’amabehi. Aliwe kandi thutholere ithw’amakirira eriramya ly’okwenene n’erilholha embere erisangira mulyo. Omuminyereri Malaki mwakangania ndeke-ndeke ekindu ekikakanganaya embaghane eyiri ahakathi-kathi k’omundu mubuya n’omundu mubi embere sya Yehova. Mwahandika athi: “Mwasyasubulha, mwasyasombolha n’eriminyerera omwa kathi-kathi k’abathunganene n’ababi, n’omwa kathi-kathi k’oyukakolera Nyamuhanga, n’oyuthemukolera.” (Mal. 3:18) Busana n’ekyo, sithutholere thukalighira ekyosi-kyosi—nibya n’obuthahikana bwethu kutse ebisobyo— erithughunza amani erihika okwa kiika ky’erileka erikolera Nyamuhanga. Erileka erikolera Yehova nakyo ni kibi ekikalire.
17. Busana naki thutholere ithwayitheya thukasombolha ow’eringira nayu omwa butheke?
17 Wamabya iwuli muhuru kandi iwunemulengekania okw’ingira omwa butheke, wanamalhangira ngoku ebinywe bya Malaki ebihambire okw’ikolera Nyamuhanga bikahamba okw’ithwamu lyawu ery’erisombolha ow’eringira nayu omwa butheke? Omundu anganabya inianawithe emibere eyuwene, aliwe omundu oyo amabya isyalikolera Nyamuhanga ow’okwenene, mbwino omundu oyo lino analhangirwe ng’oyuthunganene embere sya Yehova? (2 Kor. 6:14) Oyo w’amasombolha ng’omwanze wawu oyo, anemwendi leka iwalholha embere bunyakirimu? Thalengekania oku kino: Abakali b’Omwami Solomona abakafiri bangabya ibabya ibanawithe emibere mirebe emibuya. Aliwe sibabya baramya ba Yehova, kandi lyolho-lyolho mubaleka Solomona iniasangira omw’iramya ly’amabehi.—1 Bam. 11:1, 4.
18. Ni kyahi ekyo ababuthi batholere ibakangirirya abaana babu?
18 Ababuthi, mwangana kolesya emyatsi eye Biblia eyihambire oko bami eriwathikya abaana benyu eribya n’omuhwa omw’iramya lya Yehova. Mubawathikaye eriminya ngoku Yehova abya akalhangira omwami ng’omubuya kutse mubi kutsibu-tsibu erikwamana n’emibere akasighikiramu eriramya ly’okwenene. Kangiriraya abaana bawu omwa binywe n’omwa mikolere ngoku emyatsi y’obunyakirimu—ng’erigha e Biblia, erihindana okwa mihindano, n’erisangira omw’ithulira—bitholere ibyabya embere okwa yindi mibiiri yosi. (Mt. 6:33) Bithe bithya abaana benyu ibangana ghunzerera bathi eribya Mwema wa Yehova kiri ng’erikwama kyabya omwa “dini y’efamile.” Busana n’ekyo, ibangana ghana erihira eriramya ly’okwenene ly’embere kutse ibalisighanirya ighuma.
19. Hali mahaki okwa owosi-wosi oyuwabirileka erikolera Yehova? (Lebaya n’akasanduko “ Wangana suba oku Yehova!”)
19 Mbwino omundu oyuwabirileka erikolera Yehova syakiri kw’amalenguliro? Eyihi, kundi angana yisubamu n’erithasyasuba omw’iramya ly’okwenene. Erithoka erikolha ekyo, atholere iniayihamo emiyiheko n’eriligha obuwathikya bw’abasyakulhu b’ekithunga. (Yak. 5:14) Akaghalha ak’akahiraho nuku athasyasimawa na Yehova kakalhwiririra mw’ebibuya!
20. Thwamagherererya abami abathaleghulha, Yehova iniakendi thulhangira athi?
20 Neryo, ni masomo wahi agho thwam’ighira okwa bami be Israeli? Ithwanganabya ng’abami abathaleghulha thwamasighalha ithunayihereyo oku Yehova n’omuthima wosi. Thw’ighire okwa bisobyo byethu, thuyisubemo, kandi thukole esyombinduka esikayithaghisibawa. Kandi thw’ibuke omughaso w’ery’amakirira eriramya lya Nyamuhanga mughuma musa ow’okwenene. Wamamakirira Yehova, akendi kulhangira ng’omundu oyukakolha ebihikire embere siwe.
OLHWIMBO 45 Amalengekania w’Omuthima Waghe
a Omo mwatsi ono, ebinywe “abami be Israeli” bikamanyisaya abami abosi abathabalha okw’abandu ba Yehova, mbulha mubathabalha okwa bihanda bibiri eby’obwami bwe Yuda, kutse ebihanda ikumi by’obwami bwe Israeli, kutse ebyosi 12.
b ERISOBORERA EBINYWE: Mughulhu mungyi e Biblia yikakolesaya ekinywe “omuthima” yikakania okwa mundu w’omwakathi, eby’akayisunza, amalengekania, emibere, eby’akathoka, n’ebilhubirirwa biwe.
c Ngoku kilhangirikire, abya mubere w’abami abakafiri, eriramya esyonyamuhanga esy’ekihanda ekyabirikindwa.
d Omwami Asa mwakolha ebibi ebikalire. (2 Emy. 16:7, 10) Nomwabine, akakanibawako ndeke omwa Biblia. Nomwakine indi okw’itsuka mwaghana erihabulhwa, atholere eribya imwayisubamo enyuma waho. Omwa byosi ebi, emibere yiwe mibuya yabya yilengire ebisobyo biwe. Ngoku kilhangirikire, Asa aby’akaramya Yehova musa kandi mwalengaho erilhusya omw’obwami bwiwe mw’eriramya ly’esyosanamu—1 Bam. 15:11-13; 2 Emy. 14:2-5.
e Kikanganibwe ngoku, ekihano ky’erimbere n’ekyakabiri eby’emighambo ya Musa byabya bikaghania eriramya owosi-wosi kutse ekyosi-kyosi ekithe Yehova.—Eri. 20:1-6.
f ERISOBORERA EBISASANI: Omusyakulhu w’ekithunga omulere akakanaya na mughalha wethu okwa mibere akanywiramo obwabu. Mughalha wethu akaligha erihabulha inianayikehirye, akakolha esyombinduka, kandi akalholha embere erikolera Yehova buthaleghulha.
