1-2. Zadoki abya inindi? (1 Emyatsi y’Emigulu 12:22, 26-28)

 THATHERA akasasani. Endeko y’abalhume abalhabire omu 340,000 ibanahindane haghuma eriyira Dawudi mwa Mwami we Israeli yosi. Abalhume aba mubaghunza omwa bithwe bye Heburoni mw’ebiro bisathu ibane mukania, ery’imba esyonyimbo sy’eripipa esy’obutseme, kandi ibanemuseka. (1 Emy. 12:39) Kyangabya imukithaminyikalha ngoku omulhwana oyukahulhawa mwa Zadoki ane omwa ndeko nene eyi. Nomwabine, Yehova mwalhangira athi thukaminya ngoku Zadoki anabyaho. (Soma 1 Emyatsi y’Emigulu 12:22, 26-28.) Zadoki abya inindi?

² Zadoki abya muhereri oyuwakolha haghuma n’Omuhereri Mukulhu Abiatari. Kandi Nyamuhanga mwaha Zadoki y’amenge manene n’obuthoki bw’eriminyerera erisonda liwe. (2 Sam. 15:27) Abandu ibakahika oku Zadoki bakayithagha erihabulha ery’amenge. Kandi abya mulhume muthubaha. Thukendi kania okwa mubere wiwe oyu omwa mwatsi ono.

3. (a) Busana naki abaramya ba Yehova bakayithagha eribya bathubaha? (b) Omo mwatsi ono thukendi kania okuki?

³ Omwa biro by’enyuma-nyuma bino, Sitani anemwongera kutsibu eribambira abandu ba Nyamuhanga. (1 Pet. 5:8) Thukayithagha eribya bathubaha thunemulinda Yehova erighunzaho Sitani n’omughulhu wiwe mubi. (Esy. 31:24) Leka thulebaye esyonzira isathu esyo thwanga gherereryamo obuthubaha bwa Zadoki.

SIGHIKA OBWAMI BWA NYAMUHANGA

4. Busana naki abandu ba Yehova bakayithagha obuthubaha erithoka erisighika Obwami bwa Nyamuhanga? (Lebaya n’ekisasani.)

⁴ Ithwe ng’abandu ba Yehova, thukasighika Obwami bwa Nyamuhanga n’omuthima wosi, aliwe mughulhu mungyi thukayithagha obuthubaha erikolha ekyo. (Mt. 6:33) Ng’eky’erileberyako, omwa kihugho kibi kino, thukayithagha obuthubaha  erithoka erighendera okwa bihano bya Yehova n’erithulha engulhu yuwene y’Obwami. (1 Tes. 2:2) Kandi mughulhu mungyi thukayithagha eribya bathubaha erithoka erisighalha isithuwithe lhuhandi omwa by’ekipolitiki omwa kihugho ekikongera eriyighabulha kino. (Yn. 18:36) Abangyi b’okwa bandu ba Yehova babiriherya esyosente syabu, eriswiribwa, kutse erihirwa omwa ngomo busana n’erighana erisangira omwa by’ekipolitiki kutse erighana eryingira omwa mahe.

5. Busana naki Zadoki mwayithagha eribya muthubaha erithoka erisighika Dawudi?

⁵ Zadoki mwathaghenda e Heburoni habw’erithayatsemera eky’eribya Dawudi inabiriyirwa mw’omwami. Mwaghendayo n’ebirwanisyo kandi inianayitheghekere amalhwa. (1 Emy. 12:38) Abya inianayitheghekire erikwama Dawudi y’omwa malhwa n’eritheya Israeli y’okwa syonzighu syayo. Iyo ng’omusirikali, Zadoki sy’aby’asi bingyi eby’amalhwa, aliwe abya muthubaha.

6. Dawudi mwahiriraho athi Zadoki eky’erileberyako ekyuwene eky’obuthubaha eky’erigherererya? (Esyonyimbo 138:3)

⁶ Omuhereri nga Zadoki ighira hayi eribya muthubaha? Aby’athimbirweko n’abalhume ab’amaaka kandi abathubaha. Ahathe erithika-thika, mwaghasirwa omwa by’erileberyako byabo. Ngahathya, eky’erileberyako kya Dawudi ‘eky’erihulhukya n’erisubulya e Israeli’ omwa buthubaha mukyaleka Abaisraeli abosi ibamusighika n’omuthima wosi. (1 Emy. 11:1, 2) Mughulhu wosi Dawudi iniakayikethera Yehova erimutheya okwa syonzighu siwe. (Esy. 28:7; soma Esyonyimbo 138:3.) Zadoki abya inianawithe ebindi eby’erileberyako ebyamuhira mw’omuhwa eby’abalhume ababyaho omwa buthuku bwiwe—abalhume nga Yehoyada na mughalha wiwe omusirikali ya Benaya, kuthya n’abakulhu b’ebihanda 22 abayiyunga oku Dawudi. (1 Emy. 11:22-25; 12:26-28) Abalhume aba nabo mubalhwaho ibathwamu erisighika Obwami bwa Dawudi.

7. (a) Ni by’erileberyako byahi ebya munabwire eby’obuthubaha ebyo thwang’ighirako? (b) Ngoku kikanganibwe omwa vidiyo, eky’erileberyako kya mughalha wethu Nsilu kyamakweghesyaki?

 ⁷ Thukabya n’amaaka n’obuthubaha thukalengekania okwa by’erileberyako by’abandu ababirisighika buthubaha obuthabali bwa Yehova. Omwami wethu, Kristo Yesu, inianasikire mwaghana akahathikano k’eriyingirya omwa by’ekipolitiki by’ekihugho kya Sitani. (Mt. 4:8-11; Yn. 6:14, 15) Mughulhu wosi iniakayikethera Yehova erimuha amaaka. Kandi munabwire thuwithe eby’erileberyako bingyi eby’abalhwana ababirighana eryingira omwa mahe kutse eriyingirya omwa by’ekipolitiki. Thukakuhira mw’omuhwa w’erisoma ebyalholirweko byabo okwa jw.org. a

WATHIKAYA BALIKYENYU

8. Ni mughulhu wahi abasyakulhu banga yithagha obuthubaha erithoka eriwathikya balikyabo?

⁸ Abandu ba Yehova banzire eriwathikania. (2 Kor. 8:4) Aliwe, okwa bundi buthuku, erikolha ekyo kikayithagha obuthubaha. Ng’eky’erileberyako, hamabya olhuhi, abasyakulhu bakabya ibanasi ngoku balikyabo bakayithagha erihimbwa, erisighikwa, obundi nibya eribawathikya bunyakirimu kutse kinyamubiri. Busana n’erianza esyombuli, abasyakulhu bakahira engebe yabu y’omw’akabi erithoka erihayo ebikayithaghisibawa. (Yn. 15:12, 13) Bakabya bakakolha ekyo, bakabya ibamagherererya eky’erileberyako eky’obuthubaha ekya Zadoki.

9. Ngoku kiri omu 2 Samweli 15:27-29, Dawudi mwabwira Zadoki athi akoleki? (Lebaya n’ekisasani.)

⁹ Engebe ya Dawudi muyabya omw’akabi. Mughalha wiwe Abusaloma abya iniabirithwamu erimulyako obwami. (2 Sam. 15:12, 13) Dawudi abya w’erilhua e Yerusalemu ahathe erilindirirya! Mwabirikira abaghombe biwe athi: “Muhangane, thuthibithe; bithe bithya isithwendibalhako n’omundu mughuma busana na Abusaloma.” (2 Sam. 15:14) Abaghombe babere banemughenda, Dawudi mwaminya  ngoku akayithagha omundu oyuwanga sighere e Yerusalemu eribya inianemumubwira okwa ebya Abusaloma akathegheka erikolha. Neryo mwathuma Zadoki n’abandi bahereri erikolha ng’abalingyi biwe. (Soma 2 Samweli 15:27-29.) Babya b’erighenda ibanayitheghirye. Ekya Dawudi abwira abahereri abo athi bakole kyabya in’itsama engebe kandi nibya kyanga hirire engebe y’omwa kabi. Thalengekania okwa ekyo Abusaloma omulhume oyuyitsomene, oyuhithene, kandi omuthebya angakolire kw’aminya ngoku Zadoki n’abandi bahereri bane mukolha ng’abalingyi erithoka eritheya Dawudi!

10. Zadoki nabo abya nabo mubatheya bathi Dawudi?

¹⁰ Dawudi mwathegheka erikolha ekindu ekyanga yithaghire Zadoki na Husai, owundi munywani wiwe muthaleghulha erimuwathikya. (2 Sam. 15:32-37) Omw’ighendera okwa ebyo abyakathegheka erikolha, Abusaloma mwatsuka eriyikethera Husai kandi Husai mwamuha erihabulha eryanga here Dawudi y’akathuku k’eriyitheghekera eribambirwa. Enyuma waho, Husai mwabwira Zadoki na Abiatari okwa mitheghekere eyo. (2 Sam. 17:8-16) Neryo abalhume babiri mubathoka erithumira Dawudi y’omwatsi. (2 Sam. 17:17) Omwa buwathikya bwa Yehova, Zadoki n’abandi bahereri mubawathikya okw’itheya engebe ya Dawudi.—2 Sam. 17:21, 22.

11. Thwanga gherererya thuthi obuthubaha bwa Zadoki thukawathikya balikyethu?

¹¹ Thwanga kangania thuthi obuthubaha ng’obwa Zadoki, thwamasabwa eriwathikya balikyethu omwa mughulhu owakalire? (1) Ghendera okwa busondoli. Omwa mibere eyiri ng’eyo, ni ky’omughaso erisighalha ithune bughuma. Ghendera okwa busondoli erilhua okwa kyaghanda ky’omuthahulha eky’ewenyu. (Ebr. 13:17) Abasyakulhu batholere ibabya ibanemulhaba omwa mitheghekere eyo babirihiraho ey’eriyitheghekera ekitsinduli kuthya n’obusondoli bw’ekithunga bikahika okwa ky’erikolha hamabya ekitsinduli. (1 Kor.  14:33, 40) (2) Ibya muthubaha aliwe oyukayitheghaya. (Emi. 22:3) Lengekanaya wuthe w’ayira eky’erikolha. Isiwakwama kyayingirya omw’akabi aho kithayithaghisibawa. (3) Yikethere Yehova. Ibuka ngoku Yehova anzire kutsibu iwe n’abalikyenyu imwabya imune ndeke. Anganakuthokesya eriwathikya balikyenyu nibya engebe yawu isiyathabya omw’akabi.

12-13. Ekyalholirweko kya Viktor na Vitalii kikakweghesayaki? (Lebaya n’ekisasani.)

¹² Thalengekania oku Viktor na Vitalii, baghalha bethu babiri ab’obunyakirimu abakolha okw’ihikya oku balikyabo kw’eby’erirya n’amaghetse e Ukraine. Viktor akabugha athi, “Ithukasondaya eby’erirya ehosi-hosi”. “Mughulhu mungyi ithukabya ithune mwowa amasasi akabugha. Mughalha wethu mughuma mwahayo eby’erirya ebyo abya iniabiriyibikira. Ebyahebawayo ebi mubyaleka abathuliri bangyi ibathunga ebyo babya bakayithagha erithoka eribyaho ahabw’obuthuku bulebe. Thwabere thunemuhira ebindu by’omwa matoka, ebbomu muyawa esyomita nga 20 erilhua aho thwabya. Ekiro kyosi mukyahwa ingane musaba Yehova indi “ambe obuthubaha obwa ng’ayithagha erithoka erilholha embere eriwathikya abathuliri.”

¹³ Vitalii akabugha athi: “Muthwayithagha eribya bathubaha kutsibu”. “Olhughendo lhwaghe lhw’erimbere mulhwaghunza esyosaha 12. Omwa lhughendo lhwosi munasaba Yehova.” Vitalii abya muthubaha, aliwe kandi abya inianayitheghirye. Ak’ongerako athi: “Munalholha embere erisaba Yehova y’amenge n’eriminya ah’amaaka waghe akasubulira. Iningafuyira okwa syonzira esyo egavumente yikalighira nyisa. N’abirighasirwa ingayilhangirira ngoku balikyethu bakolera haghuma. Ibak’iha omwa nzira mw’ebyanga thukakirya, ibasorokya obuwathikya n’eribuhira okwa matoka, n’erithuha eby’erirya, n’emyanya eyathukayithagha erilhuhukiramo ithune omwa lhughendo.”

SIGHALHA MUTHALEGHULHA OKU YEHOVA

14. Thwanga hambwako thuthi omundu oyo thwanzire amasighania Yehova?

¹⁴ Omuhughu kutse omunywani erisighania Yehova, ni kighuma ky’okwa bitsibu ebikaleka ithwahwer’ighuma amani. (Esy. 78:40; Emi. 24:10) Thwamabya ithuwithe obughuma obw’ahakuhi n’omundu oyo, ikwakine mwendy’ongera kithya erithukalira erighumira emibere eyo. Ekindu ekikalhuma ng’ekyo kyamabya ikyanakubereko, eky’erileberyako kya Zadoki eky’obuthaleghulha kyangana kughumya.

15. Busana naki Zadoki mwayithagha eribya muthubaha erithoka erisighalha muthaleghulha oku Yehova? (1 Abami 1:5-8)

¹⁵ Zadoki mwasighalha muthaleghulha oku Yehova omughulhu munywani wiwe Abiatari aleghulha. Eki mukyabya okw’ihwererera ly’erithabalha lya Dawudi. Dawudi iniakisiya iniaholha, mughalha wiwe ya Adoniya mwanza erimulyako ekithumbi ky’obwami ekyo Yehova abya iniabirilhaghanisya Solomona. (1 Emy. 22:9, 10) Abiatari mwathwamu erisighika Adoniya. (Soma 1 Abami 1:5-8.) Omw’ikolha ekyo, Abiatari mwabya iniamaleghulha oku Dawudi n’oku Yehova! Thalengekania okwa bulighe n’eriyiponera erya Zadoki abya nalyo? Ahabw’emyaka nga makumi ani, iyo na Abiatari babya ibabirikolha haghuma ng’abahereri. (2 Sam. 8:17) Mubatsomana “erisanduko lya Nyamuhanga” lya haghuma. (2 Sam. 15:29) Abalhume bosi babiri, babya ibabirisighika obwami bwa Dawudi—kandi ibabirikolha ebindu bingyi.—2 Sam. 19:11-14.

16. Ni byahi ebyangabya imubyawathikya Zadoki erisighalha muthaleghulha?

¹⁶ Zadoki mwasighalha muthaleghulha oku Yehova nomwakine indi Abiatari mwaleghulha.  Dawudi mwathathika-thikira obuthaleghulha bwa Zadoki. Embitha ya Adoniya yabere y’aminyikalha, Dawudi mwabwira Zadoki, Natana, na Benaya athi bahakabaye Solomona ng’omwami. (1 Bam. 1:32-34) Eribya haghuma n’abaramya ba Yehova abathaleghulha nga Natana n’abandi abasighika Omwami Dawudi, kyangabya imukyaghumya Zadoki n’erimuhimba. (1 Bam. 1:38, 39) Solomona abere abiribya mwami, “mwahira omuhereri Zadoki omo mwanya wa Abiatari.”—1 Bam. 2:35.

17. Wanga gherererya wuthi Zadoki munywani wawu amasighania Yehova?

¹⁷ Wanga gherererya wuthi Zadoki? Munywani wawu amathwamu erisighania Yehova, iwe amakirira erithwamu lyawu. (Yos. 24:15) Yehova akendi kuha amaaka n’obuthubaha obo wukayithagha. Muyikethere omw’imusaba n’erisighalha iwune bughuma n’abaramya balikyenyu abathaleghulha. Yehova akalhangira obuthaleghulha bwawu mwa bw’obughuli, kandi akendisya kuhemba busana nabo.—2 Sam. 22:26.

18. Ekyalholirweko kya Marco na Sidse kikakweghesayaki?

¹⁸ Thalengekania okwa ky’erileberyako kya Marco na mukali wiwe, Sidse, abo abaana babu b’obukali babiri abanakulire basighanaya ekwenene. Marco akabugha athi: “Wukanza abaana bawu bo kutsibu erilhua okwa kiro b’abuthawa. Iwukendi kolha ekyosi-kyosi eribatheya okwa kabi. Neryo omughulhu bakathwamu erisighania Yehova, kikabbuna omuthima.” Ak’ongerako athi: “Yehova abiribya iniane haghuma nethu. Akalhangira athi omughulhu ngathawithe akaghalha, mukali waghe akabya n’akaghalha, n’omughulhu mukali waghe athawithe akaghalha, ingye ingabya n’akaghalha.” Sidse ak’ongerako athi: “Sithwanga thokire eriyiyinia Yehova kwathathuha akaghalha ako thukayithagha. Iningabya ingane murwanisya eky’eriyowa nga ningye n’aletha ekitsibu, neryo munabwira Yehova y’eriyowa lyaghe. Habere habirilhaba buthuku buke, mwali wethu oyo nabya inamabirighunza myaka mingyi isindi lholhako mwanyihamba okwa bithigho, amanzamalira, amabugha athi: Sidse, wibuke ngoku ekitsibu si kyawu!’ “Busana n’obuwathikya bwa Yehova, n’abirisighalha inganatsemire nganemumukolera.”

19. Wamathwamu erikolhaki?

¹⁹ Yehova anzire abaramya biwe abosi ibabya bathubaha nga Zadoki. (2 Tim. 1:7) Aliwe, Yehova syanzire thukayikethera amaaka wethu. Anzire ithwamuyikethera. Wamayisanga omwa mibere eyikakuyithaghako eribya muthubaha, saba Yehova. Yikethere ngoku akendi kuha obuthubaha ng’obwa Zadoki!—1 Pet. 5:10.