OMWATSI W’ERIGHA 29
OLHWIMBO 121 Thukayithagha Eriyikakirya
Lholha Embere Eriyitheya okw’Irengwako
“Mubye mukasaba n’eritheya, isimwingira omw’irengwako.”—MT. 26:41.
EKIGHENDERERWA
Erithuwathikya erilhangira ekikaleka ithwayithagha eriyihighulha okw’ikolha ekibi n’ebiika ebikakolhaya okw’ikikolha.
1-2. (a) N’ikunga lyahi eryo Yesu aha abigha biwe? b) Ni kyahi ekyaleka abigha biwe ibamusighania? (Lebaya n’ebisasani.)
“OMUTHIMA akaligha, nikwa omubiri ni mwolho.” (Mt. 26:41b) Omwa binywe ebyo, Yesu mwakangania ngoku anasi ku thuthahikene kandi ngoku thwangana sobya. Aliwe kandi ebinywe ebi biri mw’erikunga: Eriyihighulha okw’iyikethera amaaka wethu. Omw’ithumbi iryaneryo, abigha babya ibabiribugha ibanasikire ku babirithwamu eryamakirira Omukama wabu. (Mt. 26:35) Babya ibanawithe ekighendererwa kibuya. Nomwabine, mubathaminya ngoku bakend’ilhuaho ibalemwa bakahirwako akahathikano. Ky’ekyaleka Yesu iniabakunga athi: “Mubye mukasaba n’eritheya, isimwingira omw’irengwako.”—Mt. 26:41a.
2 Eky’obulighe, abigha mubalemwa eribya ibanatheghirye. Yesu abere akahambwa, mbwino mubana sighalha ibane haghuma nayu kutse mububaha neryo bamathibitha? Omwa buthaminya, abigha mubayisanga ibabirikolha ekyonyine-nyine ekyo babya ibabiribugha bathi sibangakolha—mubasighania Yesu.—Mt. 26:56.
Yesu mwabwira abigha biwe athi balhole embere eritheya n’eriyitheya okw’ilengwako, aliwe mubamusighania (Lebaya enungu 1-2)
3. (a) Erithoka erisighalha bathaleghulha oku Yehova, busana naki thutholere ithwayihighulha okw’iyikethera amaaka wethu? (b) Omo mwatsi ono thukendikania okuki?
3 Sithutholere thukayikethera amaaka wethu. Ni kwenene, thwabirithwamu erithendi lighira ekyosi-kyosi kikathulhusya oku Yehova. Nomwabine, nethu sithuhikene kandi kyangan’olhoba erithebibwa. (Abar. 5:12; 7:21-23) Kitsumbukirania, ithwangana yisanga omwa mibere eyikaleka ekindu ekithuwene ikyabya nga kyamatsemesya. Erithoka erisighalha bathaleghulha oku Yehova na Mughalha wiwe, thutholere ithwaghendera okw’ihabulha ery’erilholha embere eriyitheya okw’ilengwako ery’erikolha ekibi. Omwatsi ono akendi thuwathikya erikolha ekyo. Eky’erimbere, thukendi lebya nga ni mwa mibereki kutsibu-tsibu eyo thukayithaghiramo eriyitheya. Neryo, thukendi lebya nga thwanga yitheya thuthi okw’irengwako. Erighunzerera, thukendi lebya nga thwanga sighalha thuthi ithunatheghirye.
NI MIBERE YAHI EYIKATHUYITHAGHAKO ERISIGHALHA ITHUNATHEGHIRYE?
4-5. Busana naki thutholere ithwayihighulha n’okwa bisobyo bike-bike?
4 Nibya n’ebibi ebikabya nga nina bike-bike byangana tsekya obughuma bwethu na Yehova. Kandi, byangana thukolya okw’ikolha ebibi bingyi ebikalire.
5 Ithwe bosi thukalengawako erikolha ekibi. Aliwe obuli mughuma w’okwithwe anawithe aho akalemererawa, mbulha n’ikolha ekibi ekikalire, kutse erisangira omwa mutse mubi mulebe, kutse erihambwako nabi n’amalengekania w’ekihugho. Ng’eky’erileberyako, omundu mulebe anganabya iniane murwanisya erilengwako ly’erisingira. Owundi anganabya iniane murwanisya omutse mubi, ng’erinyighitha bitsuko by’olhubutho kutse erilebya eponografe. Nibya owundi anganabya iniane murwanisya eky’eryubaha abandu, amalengekania w’eriyisondolha, erihithana lhuba-lhuba, kutse ekindi kindu. Ngoku Yakobo abugha, “obuli mundu akalengawako omughulhu akakurawa n’erihekwa n’esyongumbu siwe nyibi.”—Yak. 1:14.
6. Ni kyahi ekya thutholere ithwayiberamo b’okwenene?
6 Mbwino wunasi emibere eyo kik’olhoberamo iwe erilengwako? Ni ky’akabi ithwe erighana obutseke bwethu kutse eribugha thuthi thunaghumire sithwangawa omwa kibi. (1 Yn. 1:8) Ekyo kine aho, Paulo mwabugha athi nibya ‘n’abakakolha omo Mulimu [abatholere bunyakirimu]’ bangana lengwako bamathendi lholha embere eritheya. (Gal. 6:1) Thutholere ithwayibera b’okwenene n’eriminya aho thukalemererawa.—2 Kor. 13:5.
7. Ni byahi ebya thutholere ithwalhangira thuthi thukayitheghayako? Iha eky’erileberyako.
7 Neryo thwamabiriminya emibere eyo kik’olhoberamo ithwe erilengwako, thutholere ithwakolhaki? Ghumaya amaaka wawu w’erighana erilengwako eryo! Ng’eky’erileberyako, omwa biro bye Biblia, olhukyo lhw’esyombimbo abya mwanya ogho kyabya kik’olhoberamo esyonzighu eryingira omwa muyi. Busana n’ekyo, esyongyo isy’esikatheghibawa kutsibu. Kuthya, thutholere ithwaminya ndeke emyanya eyo kyang’olhoberamo ithwe erilengwako.—1 Kor. 9:27.
NGOKU THWANGATHEYA
8-9. Omulhwana oyukanibweko omwa Emisyo sura 7 angakolireki eriyihighulha okw’ikolha ekibi ekikalire? (Emisyo 7:8, 9, 13, 14, 21)
8 Thwanga yitheya thuthi? Thulebaye ekyo thwang’ighira okwa mulhwana oyukanibweko omwa Emisyo sura 7. Mwasingira n’Omukali omumalaya. Omulhondo 22 hakathubwira ngoku omulhwana mwathwamu “lhuba” buthalengekania. Aliwe ngoku emilhondo y’ahanyuma yikanganirye, abya iniabirikwama ebiika binene ebyamukolhaya lyolho-lyolho okw’ikolha ekibi.
9 Ni byahi ebyamukolhaya okw’ikolha ekibi? Eky’erimbere, omw’igholho-gholho, “mwalhaba omo nzira hakuhi n’engonde yiwe [eyo mukali omumalaya].” Neryo, mwalhaba-lhaba hakuhi n’enyumba yiwe. (Soma Emisyo 7:8, 9.) N’ekindi, abere abirisamalira omukali, mwathalhuaho. Omwakanya k’ekyo, mwaligha erilyatsirira liwe n’erimuhulikirira akakania okw’amahongo w’obuholho agho abirihayo, obundi akanza alengekanaye athi si mundu mubi. (Soma Emisyo 7:13, 14, 21.) Omulhwana oyo kwayitheya okwa ebyamukolhaya okw’ikolha ekibi, angayitheghirye okw’irengwako n’okw’ikolha ekibi.
10. Omundu angayitheya athi okw’ikolha ekibi ekiri ng’eky’omulhwana oyo?
10 Eky’erileberyako kya Solomona kikathukanganaya ekyangana hika okwa muramya wa Yehova owosi-wosi. Inianganawa omwa kibi ekikalire neryo enyuma waho iniayowa ebyosi ngabiryabya “kitsumbukirania.” Kutse iniangana bugha athi, “mukikakwama kyabya.” Aliwe, amalengekania okwa biryabya, iniakendi minya ngoku mwakathwa ebiika birebe ebithatholere ebiryamukolhaya okw’ikolha ekibi. Ebiika ebyo ibyanganabya imwamuli eribya n’abanywani abath’uwene, eby’eriyitsemesya ebithuwene, kutse eribera eribya omwa myanya eyithatholere—obundi busu okwa busu kutse okwa Intaneti. Kandi, obundi abya iniabirilekeraho erisaba, erisoma e Biblia, erihindana okwa mihindano, kutse erisangira omw’ithulira. Ngoku kyanabya okwa mulhwana oyukanibweko omwa Emisyo, nayu angabya imwathayisanga “kitsumbukirania” omwa kibi.
11. Thwanga kolhaki nuku thuyihighule okw’ikolha ekibi?
11 Thuk’ighaki? Sithutholere thukasubulira okw’iyitheya okwa kibi aliwe n’okwa biika ebyanga thukolya okwa kibi ekyo. Solomona akaha enzumwa iyaneyo enyuma w’erikania okwa mwatsi w’omulhwana n’omukali omumalaya. Akakania okwa mukali, akabugha athi: “Omuthima wawu syalholhaye oko syonzira siwe.” (Emi. 7:25) Kandi akathasya bugha okwa mukali omubi oyu athi: “Wuhire enzira yawu yo haali kw’iye, suhike hakuhi n’olhukyo lhw’enyumba yiwe.” (Emi. 5:3, 8) Omo kwenene, thukayitheghaya okwa kibi omw’iyihighulira ighuma okwa mibere eyanga thukolya kukyo. a Eki mwamuli eriyihighulha okwa mibere kutse erikolha ebindu ebyo Abakristayo bathaghanibawa erikolha aliwe ibinasibwe kubyangana thukolya okw’ilengwako.—Mt. 5:29, 30.
12. N’ithwamu lyahi eryo Yobu akolha, kandi lyanga muwathikirye lithi eriyitheya okw’ilengwako? (Yobu 31:1)
12 Erithoka eriyihighulha okwa mibere eyanga kolya okw’ikolha ekibi, thutholere ithwathwamu ithunasikire. Ekyo kya Yobu akolha. ‘Mwayira endaghano n’ameso wiwe’ ey’erithendi samalira owundi mukali omwa syongumbu nyibi. (Soma Yobu 31:1.) Erighenda-ghendania n’erithwamu ng’eri kyanga muwathikirye eriyihighulha okw’isingira. Nethu thwangana thwamu eriyihighulha okwa kyosi-kyosi ekyangana thukolya okw’irengwako.
13. Busana naki thutholere ithwatheya amalengekania wethu? (Lebaya n’ebisasani.)
13 Kandi thutholere ithwatheya amalengekania wethu. (Eri. 20:17) Abandi bakalengekanaya bathi si kibi eribera erilengekania okwa syongumbu nyibi, ekikulhu omundu amabya isyathakolha ekibi. Aliwe ayo ni malengekania awathatholere. Omundu oyukabera erilengekania okwa syongumbu nyibi akaleka isyongera. Amakolha ekyo, akayilethera erilengwako, erikendi muyithaghako eribya akarwanisya. Ni kwenene, amalengekania mabi akendibya inianemuthwasamo. Ekikulhu ly’erighana amalengekania ayo aho n’aho n’erisubya omo mwanya wawu mw’awuwene. Thwamakolha ekyo, ithukendibya ithwamayihighulha okwa malengekania awangakulha erihika okw’ibya syongumbu esikalire esyanga thulema erirwanisya kandi esyanga thukolya okw’ikolha ekibi ekikalire.—Fil. 4:8; Kol. 3:2; Yak. 1:13-15.
Thutholere ithwayihighulha okwa kindu kyosi-kyosi ekyangaleka ithwalengwako (Lebaya enungu 13)
14. Ni kindi kyahi ekyanga thuwathikya eriyitheya okw’ilengwako?
14 Ni kindi kyahi ekyo thwangakolha nuku thuyitheghaye okw’ilengwako? Thutholere ithwayikethera ndeke ngoku mughulhu wosi thukendi ghasirwa thwamaghendera okwa bihano bya Yehova. Okwa bundi buthuku, kyangana thukalira erihambania amalengekania wethu n’esyongumbu syethu n’ebya Nyamuhanga akasima, aliwe thwamahiraho akaghalha ithukendi thunga obuholho.
15. Erikulha-kulhania esyongumbu esitholere kyanga thuwathikya kithi eriyitheya okw’irengwako?
15 Thutholere ithwakulha-kulhania esyongumbu esitholere. Thwam’igha ‘erighalirwa okwa bibi n’erianza ebibuya,’ ithukendi ghumya erithwamu lyethu ly’erikolha ekihikire n’eriyihighulha okwa mibere eyangaleka ithwakolha ekibi. (Amo. 5:15) Kandi esyongumbu esitholere sikendi leka ithwasighalha ithunasikire thwamayisanga omw’irengwako eryo thulhue isithuyitsulirye kutse eryo thuthe thwanga yihighulhako.
16. Emibiiri y’obunyakirimu yanga thuwathikya yithi erilholha embere eriyitheya? (Lebaya n’ebisasani.)
16 Thwanga kulha-kulhania thuthi esyongumbu esitholere? Thutholere ithwayihwerya omwa mibiiri y’obunyakirimu ngoku thwanga thoka. Omughulhu thuli okwa mihindano y’Ekikrisitayo kutse omw’ithulira, kikalire ithwe erilengwako erikolha ekibi. Omwakanya k’ekyo, thukaghumaya eriyisunza lyethu ly’eritsemesya Yehova. (Mt. 28:19, 20; Ebr. 10:24, 25) Omw’isoma Ekinywe kya Nyamuhanga n’erikighaniryako, thukaghumaya olhwanzo lhwethu busana n’ekibuya n’eryongera eripona ekibi. (Yos. 1:8; Esy. 1:2, 3; 119:97, 101) Wibuke, Yesu mwabwira abigha biwe athi: “Mubye mukasaba . . ., isimwingira omw’irengwako.” (Mt. 26:41) Thukabya thunemusaba thatha wethu w’elhubulha, thukaghasirawa omwa buwathikya bwiwe n’erighumya erithwamu lyethu ly’erimutsemesya.—Yak. 4:8.
Endegheka eyuwene ey’obunyakirimu yikaleka ithwathoka eriyihighulha okw’ilengwako (Lebaya enungu 16) b
SIGHALHA IWUNAYITHEGHIRYE
17. Ni mutse wahi ogho Petero alemawa erirwanisya emirundi eyilhabire okwa mughuma?
17 Thwangana singura emibere mirebe ey’obuthahikana. Aliwe thwangana yisanga eyindi mibere iyabirithukalira erileka. Thalengekania okwa kyabya okwa mukwenda Petero. Mubaha abandu omughulhu aghana Yesu emirundi isathu. (Mt. 26:69-75) Petero angabya imwasingura obuba obo omughulhu aha obwema omw’ibughiro omwa buthubaha. (Emib. 5:27-29) Nomwabine, myaka mirebe enyuma waho, busana ‘n’eryubaha abakakwama omwatsi w’eribania,’ mwaleka erirya n’Abakristayo abanya Bihanda ahabw’obuthuku bulebe. (Gal. 2:11, 12) Petero kandi mwathasyakwa obuba. Obundi bwabya isibuli bwamuhweramu ighuma.
18. Ni kyahi ekyangabya bikahika okwa mitse mibi mirebe?
18 Thwangana yisanga omwa mibere eyiri ng’eyo. Thuthi? Omubere owathwabya thukalengekania thuthi thwabirisighania, anganathasyasubulha erithasyathulengako . Ng’eky’erileberyako, mughalha wethu mughuma akaligha athi: “Munayihighulha okwa ponografe ahabw’emyaka ikumi kandi nabya inabirikakasya nyithi ekitsibu kyaghe kyabirihwa. Aliwe obutseke bwaghe bwabya ng’ekisoro ekikalire ekyabya ikyabiriyibisa erilindirira obuthuku obutholere obw’erinyiwirira.” Thukasima, kundi mughalha wethu mwathalhuhirira. Mwaminya ngoku akayithagha erihiraho akaghalha obuli kiro ak’erirwanisya omutse oyu—obundi omwa ngebe yiwe yosi omwa mughulhu mubi ono. Omwa buwathikya bwa mukali wiwe n’abasyakulhu b’ekithunga kiwe, mwayihiriraho amenge awanga muwathikya eriyihighulha okwa ponografe.
19. Thwanga yihighulha thuthi okwa mutse owakabera eribya iniane musubulha?
19 Thwanga yihighulha thuthi okwa mutse ogho thwabya nagho kera owakabya iniane mwanza erithasyasubulha? Omw’ighendera okw’ihabulha lya Yesu erihambire okw’irengwako: ‘eritheya.’ Nibya n’omughulhu wukayowa iwunemuthoka, lholha embere eriyihighulha okwa mibere eyangaleka iwalengwako. (1 Kor. 10:12) Lholha embere erighendera okwa menge awakuwathikaya erithoka. Emisyo 28:14 hakabugha hathi: ‘Obutseme buli n’omundu oyukubaha [eritheya] emighulhu yosi.’—2 Pet. 3:14.
EMIGHISA EYIKALHWIRIRIRA OMW’ILHOLHA EMBERE ERITHEYA
20-21. (a) Ni mighisa yahi eya thwangabana thwamalholha embere eriyitheya okw’ilengwako? (b) Thwamakolha owethu, Yehova iniakendi thukoleraki? (2 Abanya Korinto 4:7)
20 Thwangana kakasya ngoku erilholha embere eritheya likaghanduka. Ekibi kyangana thulethera ‘etseme y’akathambi kake’, aliwe erighendera okwa bihano bya Yehova likathulethera etseme nene kutsibu. (Ebr. 11:25; Esy. 19:8) Ekyo kiri kithya kundi thuhangikirwe ithuli b’erighendera okwa bihano biwe. (Enz. 1:27) Thwamakolha ekyo ithukendibya n’obunyamuthima-thima obuhenirye kandi ithwabya ithunatholere eribana engebe y’erikotha.—1 Tim. 6:12; 2 Tim. 1:3; Yuda 20, 21.
21 Ni kwenene, “omubiri ni mwolho.” Aliwe eki sikirimanyisaya kithi sithuwithe kiwathikya. Yehova anayitheghekire erithuha amaaka agho thukayithagha. (Soma 2 Abanya Korinto 4:7.) Nomwabine, wibuke ngoku Nyamuhanga akaha obuthoki bunene kutse amaaka awalhabire ow’obuli kiro. Amaaka w’obuli kiro k’akaghalha ako thukahiraho mughulhu wosi eriyitheya okw’irengwako—n’ithwe thutholere ithwakahiraho. Thwamakolha owethu, ithwangana yikethera ngoku Yehova akendi subirya omusabe wethu ow’erithwongera amaaka omughulhu thukayithaghagho. (1 Kor. 10:13) Omo kwenene, omwa buwathikya bwa Yehova, thwangana yitheya okw’ilengwako.
OLHWIMBO 47 Wusabe Yehova Buli Kiro
a Omundu oyo wabirikolha ekibi ekikalire angana bana obuwathikya omwa kitabu Tsemera Engebe Kera na Kera!, erisomo 57 enzumwa 1-3 n’omwatsi “Samalira Ebikasa Embere” omwa Akaleberyo, Okwerikuminakughuma 2020, olhup. 27-29, enu. 12-17.
b ERISOBORERA EKISASANI: Mughalha wethu akasoma erisako erya buli kiro omwangyakya, akasoma e Biblia omw’ithungyi okwa ndambi y’erilhuhuka, kandi akahindana okwa muhindano ow’ahakathi-kathi k’eyenga omw’igholho.
