Nicolas na Céline mubabana ekindi kitsibu. Mubaligha olhusunzo erilhua okwa kyaghanda ky’omuthahulha ekye France olhw’erihumira omwa kindi kithunga. Bakabugha bathi: “Okw’itsuka muthwatsema, aliwe endambi muyahika thwamatsuka erikwa banywani bethu b’olhukando. Thwabya isithuli thwathunga obughuma obukamathire n’abalikyethu omwa kithunga kyethu ekyo thwasubamo.” Nomuhane ebitsibu ng’ebi, wanga kolhaki erithoka eribeghera ekithunga ekyo wabirihumiramu? Abandi banga kolhaki erikuwathikya? Ni mighisa yahi y’obunyakirimu eyo wangabana kandi n’eyo wangaha ekithunga ekyo wabirisubiramo?

EMISINGYI INI EYANGA KUWATHIKYA ERIKOLHA ESYOMBINDUKA

1. Yikethere Yehova. (Esy. 37:5) Kazumi, owe Japan, mwahuma omwa kithunga ekyo abya iniabiribyamu ahabw’emyaka 20 omughulhu mwira wiwe ayakolera ehandi. Mwayikethera athi Yehova? Akabugha athi: “Munabwira Yehova y’ebyosi ebiri okwa muthima ebihambire okwa buba, embwera, n’amaghaniryo agho nabya ngawithe. Iningabya ingakolha ekyo, iniakanyiha amaaka agho ngayithagha.”

Wanga ghumya wuthi eriyikethera lyawu omu Yehova? Ngoku ekirimwa kikanayithagha amaghetse n’ekirisya ekikalhua omwa muthaka erithoka erikulha, n’erikirirya likayithagha eribya irinemulisibwa nuku lyongere. Nicolas, oyulyakanibawako, mwaghasirwa omw’ilengekania okwa ky’erileberyako kya Abrahamu, Yesu, na Paulo—abalhume abayithalhaya okwa bindi erithoka erikolha erisonda lya Nyamuhanga, ekindu ekyaleka iniongera eriyikethera obuwathikya bwa Yehova. Endegheka y’eriyeghesya e Biblia mughulhu wosi yikendi kuwathikya erighumira embinduka omwa ngebe n’erikuha ebihembo by’obunyakirimu ebyo wanga kolesya erihimba abandi omwa kithunga ekyo wabirisubamo.

 2. Yihighule okw’ilinganisya ekithunga ekyo wabyamo kera n’ekyo wulimo lino. (Omu. 7:10) Jules mwayilhangirira embinduka nene omwa kalikya akahuma erilhua e Benin erisuba e United States. Akabugha athi: “Munayowa ng’angatholere ingabwira obuli mundu muhyaka oyo ngabanangana nayu ebihambire okwa ngebe yaghe.” Kundi ekyo kyabya mbaghane okwa ekyo abya abeghere, mwatsuka eriyisolholha okwa kithunga. Nomwabine, abere abiriminya balikyethu ba ndeke, mwahindulha amalengekania wiwe. Akabugha athi: “Ngaligha ngoku ahosi aho thwangabya okwa kihugho, abandu ni baghumerere. Kighuma kisa bakabugha n’erikolha omwa syonzira esithasosene. Erithwalha abandu ngoku bali ni kikulhu.” Yihighule okw’ilinganisya ekithunga ekyo wabyamo kera n’ekyo wulimo lino. Mwali wethu omutemburi, Anne-Lise, akakibughako athi: “Sinahuma busana n’erisondya ebyo nasigha enyuma, munahuma nuku ngaminya ebindu bihyaka.”

Kuthya n’abasyakulhu batholere ibayihighulha okw’ilinganisya ekithunga kyabu ekihyaka n’ekyakera. Esyonzira esy’embaghane esy’erikoleramu emyatsi sikabya isisiwire. Ni ky’amenge eriminya emibere eyiriho wuthe waha amalengekania wawu. (Omu. 3:1, 7b) Ni kikulhu erihiraho eky’erileberyako omwakanya k’erikaka ekithunga ky’amalengekania wawu.—2 Kor. 1:24.

3. Ibya n’ebingyi by’erikolha. (Fil. 1:27) Erihuma likayithagha endambi n’akaghalha, aliwe ni kikulhu erihindana okwa mihindano y’ekithunga—kyamathokekana busu okwa busu—okw’inatsuka. Kundi nibya, abali omwa kithunga kyawu ekihyaka banga kusighika bathi bamabya isibali kulholhako nahake kutse isibali bera erikulholhako? Lucinda, oyo wahumira omwa muyi munene owe South Africa haghuma na bali biwe babiri, akabugha athi: “Munahabulhwa eribya n’ebingyi by’erikolha haghuma n’ekithunga, erikolha n’abandi omw’ithulira, n’erisangira omwa mihindano. Kandi muthwaligha omuhindano w’eriyathulira erikolerwa eka wethu.”

Erikolera haghuma n’abalikyethu emibiiri y’ekiteokrasi omwa kithunga ekyo wabirisubamo ni nzira eyuwene ey’erisangira omwa ‘ngulhu yuwene y’erikirirya.’ Abasyakulhu mubahira omu Anne-Lise oyulyakanibawako okw’itsuka mw’omuhwa w’erithulira n’obuli mughuma omwa kithunga ekyo ahumiramo. Ekyalhwiririramu? Akabugha athi: “Munalhuaho ingakilhangira ngoku eyi ni nzira ngulhu eyanga ngwathikya eribeghera. Kuthya, n’eriyihayo erisangira omwa mibiri ng’eriyonza n’erisugha ekisenge ky’obwami ikikendi kangania ku wabiriminya ngoku wuli w’omwa kithunga ekyo. Wukendibya wune muthunga bingyi by’erikolha, kwa wunemwendiongera wuthya eriliwa n’eriyowa iwuli kitsweka ky’okwa famile yawu mbyaka ey’obunyakirimu.

4. Sondaya abanywani abahyaka. (2 Kor. 6:11-13) Eritsomana abandi ni nzira eyuwene ey’eribaniramu abanywani, n’eryo hira h’obuthuku obukaghunza emihindano yithe yatsuka kandi yikahwamo obw’erihikira abandi n’erilengaho  eribaminya. Lengaho eriminya amena wabu. Eryibuka amena w’abandi, eribatsangira, n’eribya oyo kik’olhobera abandi erihikako, kikendi leka abandi ibakunywana kandi ahathe erithika-thika iwathunga abanywani abahyaka.

Omwakanya k’eriyilhalikirira abandi nga banemwendi kuyihirako, lighira balikyenyu abahyaka erikuminya ndeke. Ighira oku Lucinda, oyukabugha athi: “Munabwire thuwithe abanywani ab’okwa ndungu kundi muthwatsuka eribya thukabakokya ewethu.”

“MUKOKANAYE”

Abandi bakasagha eringira omwa Kisenge ky’Obwami ekirimo abandu bangyi abo bathasi. Neryo wanga wathikya wuthi abahyaka eriyowa buholho? Omukwenda Paulo mwathuhiramo omuhwa athi: “Mukokanaye ngoku Kristo athukokaya.” (Abar. 15:7) Omw’igherererya Kristo, abasyakulhu batholere ibawathikya abahyaka eriyowa buholho. (Lebaya akasanduko “ Ebyanga Leka Iwatsemera Erihuma Lyawu.”) Nomwabine, abosi omwa kithunga, imwamune n’abaana, batholere ibayira eky’erikolha erisondya abanywani abahyaka.

Erithangirira abandi mwamuli eribakokya ewethu, aliwe kandi imwamune n’eribaha obuwathikya. Ng’eky’erileberyako, mwali wethu mughuma, mwahayo obuthuku bwiwe eriyaramburya oyo wahumira ewabu y’omwa tawuni n’erimusoborera aho angabana esyomatoka n’etreyini eby’erighendamo. Ekya mwali wethu akolha mukyahamba okwa mugheni kandi kyamamuwathikya eribeghera.

AKAGHISA AK’ERIKULHA-KULHANA

Engyike yikabya yikakulha, yikayithuthulhako engoba yayo mirundi mingyi ebipupa byayo bithe byatsuka erighulhuka. Kuthya, wamahumira omwa kithunga ekihyaka, wutholere iwayihako ekyosi-kyosi ekyanga kulemesya erisanza ebipupa byawu omwa mubiiri wa Yehova. Nicolas na Céline mubakakasya bathi: “Erihuma ni nzira eyuwene ey’erithendekerwamu. Eribeghera abandu abahyaka  n’emibere muthina-muthina eyiri ewabu mukyathuhiramo omuhwa w’erikulha-kulhania emibere mihyaka.” Jean-Charles, oyulyakanibawako okw’itsuka, akabugha ngoku efamile yiwe yabirighasirwa: “Embinduka y’abirilighira abaana bethu erikulha-kulhana omwa kithunga ekyo thwahumiramo. Enyuma w’amezi make, omwana wethu w’obukali mwaligha erihebwa ekitsweka omwa mihindano y’ahakathi-kathi k’eyenga n’omwana wethu w’obulhume amabya muthuliri oyuthabatizibirwe.”

Kandi ibbwa emibere eya wulimo y’amathendi kulighira erihuma, ng’eky’erileberyako, eriya eyiri obuyithawa bunene? Busana naki iwathakolesya amenge agho thwam’igha ahighulhu omwa kithunga ekya wulimo? Wune muyikethera Yehova, yihweraye omwa mibiiri y’ekithunga omw’ihiraho endegheka ey’erikolha n’abandi omw’ithulira n’erisondya abanywani abahyaka kutse erighumya abo wuwithe. Mbwino siwanga tsomana abahyaka omwa kithunga kutse abali omwa buyithawa omw’ibawathikya omwa nzira ndebe? Kundi olhwanzo lhukaminyikalhaya Abakristayo ab’okwenene, erikolha ekyo kikendi leka iwakulha-kulhana bunyakirimu. (Yn. 13:35) Yikethera ngoku ebyo “biri ng’amahere awakatsemesaya Nyamuhanga.”—Ebr. 13:16.

Nomuhane ebitsibu, Abakristayo bangyi babirithoka eribeghera ebithunga ebyo bakahumiramu—nawu wanganakolha ekyo! Anne-Lise akabugha athi: “Erihumira omwa kindi kithunga mukyangwathikya eriyihira okwa bandi.” Kazumi akaligha ngoku erihumira omwa kindi kithunga “kikakuwathikaya erilhangira obuwathikya bwa Yehova omwa syonzira esyo wuthe wathalhangira.” Kandi ibbwa Jules? Akabugha athi: “Abanywani abo n’abiribana bakaleka ingayowa buholho. Hathya ngayowa ingali mughuma w’okwa kithunga ekyo nabirihumiramo erihika okw’ibya ikyangana nyikalira erikilhuamo.”