OMWATSI W’ERIGHA 28
OLHWIMBO 123 Erighondera Emitheghekere y’Ekiteokrasi
Wukanaminyerera Ekwenene?
“Neryo muhangane . . . muhire omwatsi w’ekwenene ng’omukoba omo mbindi syenyu.”—EFE. 6:14.
EKIGHENDERERWA
Erigha nga thwanga minyerera thuthi embaghane eyiri ahakathi-kathi k’ekwenene eyo thw’igha oku Yehova n’amabehi agho Sitani n’abahakani bethu bakakulha-kulhanaya.
1. Wukalhangira ekwenene ya wuthi?
ABANDU ba Yehova banzire ekwenene eyiri omwa Kinywe kya Nyamuhanga. Erikirirya lyethu liseghemere kuyo. (Abar. 10:17) Thwabirikakasya ngoku Yehova mwahiraho ekithunga ky’Ekikristayo eribya ‘nduyi eyikasikaya omwatsi w’ekwenene.’ (1 Tim. 3:15) Kandi thukaghondera ‘abakasondolha’ abakathusoborera ekwenene ye Biblia n’erithuha obusondoli obuhambene n’erisonda lya Nyamuhanga.—Ebr. 13:17.
2. Ngoku kiri omu Yakobo 5:19, ni bitsibu byahi ebya thukabana thwabir’igha ekwenene?
2 Nomwabine, nibya n’enyuma w’eriligha ekwenene n’eriligha ngoku thukayithagha obusondoli bw’ekithunga obwanga yiketherwa, ithwangana thebibwa. (Soma Yakobo 5:19.) Sitani anzire thuheraye eriyikethera lyethu omwa Biblia kutse omwa busondoli obo thukahebawa omwa kithunga kya Nyamuhanga.—Efe. 4:14.
3. Busana naki wutholere iwamakirira ekwenene? (Abanya Efeso 6:13, 14)
3 Soma Abanya Efeso 6:13, 14. Omwa buthuku obuthe bw’ahaali, Diabolo akendi kolesya amabehi awakalire eritheba ebihanda ebyosi nuku bihakanisaye Yehova. (Erib. 16:13, 14) Kandi thunasi ngoku Sitani akendi hiraho akaghalha kanene kutsibu erithebya abandu ba Yehova. (Erib. 12:9) Neryo kwesi, ni kikulhu ithwe erigha nga thwanga minyerera thuthi embaghane eyiri ahakathi-kathi k’ekwenene n’amabehi nuku thukwamirire ekwenene. (Abar. 6:17; 1 Pet. 1:22) Ekyo ky’ekikendi syaleka ithwalhama omwa buthuku bw’obulighe bunene!
4. Thukendi kania okuki omwa mwatsi ono?
4 Omo mwatsi ono, thukendi minya emibere ibiri eyikayithaghisibawa eyanga thuwathikya eriminyerera ekwenene ye Biblia n’eriligha obusondoli bw’ekithunga kya Nyamuhanga. Neryo thukendi kania okwa bindu bisathu ebya thwanga kolha erithoka erilholha embere eryamakirira ekwenene.
EMIBERE EYO THUKAYITHAGHA ERITHOKA ERIMINYERERA EKWENENE
5. Eryubaha Yehova likathuwathikaya lithi eriminyerera ekwenene?
5 Eryubaha Yehova. Thwam’ubaha Yehova omwa nzira eyitholere, ithukendi mwanza kutsibu erihika okw’ibya isithwanga kolha ekindu kyosi-kyosi ekyanga muponesya. Thukabya ithunayitheghekire eriminya embaghane eyiri ahakathi-kathi k’ekihikire n’ekiwire, ekwenene n’amabehi, erithoka erisimwa na Yehova. (Emi. 2:3-6; Ebr. 5:14) Isithwalighira eryubaha eryo thuwithire abandu likalenga olhwanzo olho thuwithire Yehova, kundi mughulhu mungyi ebya abandu bakatsemera bikaponesaya Yehova.
6. Eryubaha abandu mulyaleka lithi abakulhu ikumi Abaisraeli ibasighania ekwenene?
6 Thwam’ubaha abandu kwilhaba Nyamuhanga, ithwangana sighania ekwenene. Thalengekania okwa ky’erileberyako ky’abakulhu 12 abayalinga ekihugho ekyo Yehova alhagha eriha Abaisraeli. Obuba obo abalingyi ikumi babya n’abo busana n’abanya Kanana bwabya bunene kwilhaba olhwanzo olho bawithire Yehova. Mubabwira Abaisraeli balikyabo bathi: “Sithwanga thoka erihethuka n’eribambira abandu abo; kusangwa ni b’amaaka kwilhaba ithwe.” (Emig. 13:27-31) Ni kwenene, okwa malengekania w’abandu, abanya Kanana babya b’amaaka kwilhaba Abaisraeli. Aliwe oyuwanga bughire athi Abaisraeli sibanga singura esyonzighu, angabya imwathalengekania oku Yehova. Abalingyi ikumi abo babya batholere ibahwerya amalengekania okwa ekyo Yehova aby’anzire Abaisraeli ibakolha. Kandi babya b’erighanirya okwa ebyo Yehova abya iniabiribakolera omwa biro by’enyuma. Neryo bangaminyire ngoku amaaka wa Yehova awalengethukireyo ni manene kwilhaba aw’abanya Kanana. Mbaghane n’abalingyi abathabya bawithe erikirirya abo, Yosua na Kalebu mubanza erisimwa na Yehova. Mubabwira abandu bathi: “Omwami Mukulhu amathusima, asyathulyathya omo kihugho eki, n’erithuhakyo.”—Emig. 14:6-9.
7. Thwanga ghumya thuthi eryubaha erya thuwithire Yehova? (Lebaya n’ekisasani.)
7 Erithoka erighumya eryubaha eryo thuwithire Yehova, thutholere ithwathwamu erimutsemesya omwa bul’ithwamu eryo thukakolha. (Esy. 16:8) Wukasoma emyatsi ye Biblia, yibulhaye wuthi, ‘Ku nabya omwa mibere eyo, nanga thwiremo indi?’ Ng’eky’erileberyako, thera akasasani iwunemuhulikirira abakulhu ikumi Abaisraeli bakathulha engulhu nyibi. Wangana lighire engulhu eyo n’eryubaha abandu ibyalenga olhwanzo olho wuwithire Yehova n’eriyisunza lyawu ly’erimutsemesya? Ekihanda kyosi kye Israeli mukyalemwa eriminyerera ekwenene eyo Yosua na Kalebu babugha. Busana n’ekyo, mubaherya akaghisa k’eringira omwa Kihugho Ekyalhaghanisibawa.—Emig. 14:10, 22, 23.
Wanga lighire ebyandi? (Lebaya enungu 7)
8. Ni mubere wahi ogho thutholere ithwalengaho erikulha-kulhania, kandi busana naki?
8 Eriyikehya. Yehova akabisulira abayikehirye b’ekwenene. (Mt. 11:25) Omw’iyikehya, muthwaligha obuwathikya obw’erigha ekwenene. (Emib. 8:30, 31) Nomwabine, thutholere ithwayihighulha okw’ibya b’emiyiheko. Eribya ab’emiyiheko kyangana leka ithwalengekania thuthi amalengekania wethu ingene n’emisingyi y’Amasako n’obusondoli obwa ekithunga kya Yehova kikaha.
9. Thwanga sighalha thuthi ithunayikehirye?
9 Erithoka erisighalha ithunayikehirye, thutholere ithw’ibuka ngoku thuli buyira thwamalinganisibwa na Yehova. (Esy. 8:3, 4) Kandi thutholere ithwasaba erikulha-kulhania eriyikehya, n’omuthima w’erianza erigha. Yehova akendi thuwathikya erihira amalengekania wiwe w’embere okwa wethu, amalengekania agho akathuha erilhabira omwa Kinywe kiwe n’ekithunga kiwe. Sondaya omwa busomi bwawu bwe Biblia mw’esyonzumwa esikakanganaya ngoku Yehova anzire abakayikehaya kandi ngoku aponire emiyiheko, emiyitumyo, n’abakapona abandi. Kandi lhangira wuthi wukasighalha iwunayikehirye wukahebwa olhusunzo olhukaleka iwasikibwa okwa lhulengo lhulebe.
NGOKU THWANGA MAKIRIRA EKWENENE
10. Ni bahi abo Yehova akakolesaya eriha abandu biwe eby’erighenderako n’obusondoli?
10 Yikethere obusondoli bw’ekiteokrasi. Omwa Israeli ya kera, Yehova mwakolesya Musa n’enyuma waho amakolesya Yosua eriha abandu biwe b’obusondoli. (Yos. 1:16, 17) Abaisraeli mubatsumulhwa bakalhangira abalhume aba ng’ab’imaniri ba Yehova Nyamuhanga. Bighana bingyi enyuma waho, ekithunga ky’Ekikristayo mukyatsuka, abakwenda 12 ibabakaha obusondoli. (Emib. 8:14, 15) Neryo egurupu eyo muyongerwamo abandi basyakulhu be Yerusalemu. Omw’ighendera okwa busondoli obo abalhume abathaleghulha aba babya bakabaha, “esyokanisa musyabana amaaka omw’ikirirya, n’erighanza lyabo mulyakanya obuli kiro.” (Emib. 16:4, 5) Nethu munabwire thukatsumulhawa thukakwama obusondoli bw’ekiteokrasi obo ekithunga kya Yehova kikaha. Aliwe Yehova iniakendi yowa athi thwamaghana erisikya abo akasombolha? Thwangana subirya ekibulyo ekyo omw’ilengekania okwa kyabya Abaisraeli bakaghenda omwa Kihugho Ekyalhaghanisibawa.
11. Ni kyahi ekyahika okwa Baisraeli abakera abahakanisaya eky’eribya Nyamuhanga imwasombolha Musa erisondolha? (Lebaya n’ekisasani.)
11 Buthuku bulebe omwa lhughendo lhw’Abaisraeli olhw’eriya omwa Kihugho Ekyalhaghanisibawa, abalhume ab’ebitsumbi mubahakanisya Musa n’olhukwamirwa olho Yehova abya iniabirimuha. Mubabugha bathi: “Endeko yosi [butsira Musa iyuwene] ibuyirire, n’obuli mughuma wa kubo, kandi Omwami Mukulhu ali omo kathi-kathi kabo.” (Emig. 16:1-3) Nomwakine indi embere sya Nyamuhanga “endeko yosi” yabya yibuyirire, Yehova mwasombolha Musa erisondolha abandu biwe. (Emig. 16:28) Abayisamambuli eritsweba Musa, babya ibamayisamambulha oku Yehova. Mubathahira amalengekania w’okwa ekyo Yehova anzire; mubahiragho okwa ekyo banzire—eryongera eribya n’obuthoki n’obuminywa. Nyamuhanga mwathoghothya abasondoli b’abayisamambuli, kuthya n’esyongumi sy’abandu ababayiyungako. (Emig. 16:30-35, 41, 49) Munabwire thwangana yikethera ngoku Yehova syalitsemera abakaghana emitheghekere y’ekithunga kiwe.
Wanga sighikire ndi? (Lebaya enungu 11)
12. Thwanga sighalha thuthi ithunayikethere Ekithunga kya Yehova?
12 Thwangana lholha embere ithunayikethere ekithunga kya Yehova. Kyamalhangirika ndeke indi enzira eyo thukayitheghererayamo ekwenene ndebe ye Biblia yikayithagha eryuwanibwa kutse emithondekere y’omubiiri wethu w’Obwami, abakasondolha sibali saghirira erikolha esyombinduka esikayithaghisibawa. (Emi. 4:18) Bakakolha ekyo kundi banzire eritsemesya Yehova kwilhaba owundi wosi-wosi. Kandi bakalengaho eriseghemerya erithwamu lyabu okwa Kinywe kya Nyamuhanga, ebihano ebyo abandu ba Yehova abosi batholere ibaghenderako.
13. “Ebinywe by’ekwenene” niki, kandi thutholere ithwakolhaki busana nabyo?
13 “Wuhambe ndeke ebinywe by’ekwenene.” (2 Tim. 1:13)“Ebinywe by’ekwenene” sy’esyongangirirya sy’Ekikristayo esiri omwa Biblia. (Yn. 17:17) Ebyosi ebyo thwikirirye biseghemere okwa syongangirirya esyo. Ekithunga kya Yehova kyabirithukangirirya eriseghemerya esyongangirirya syethu okw’ekyo. Thwamakolha ekyo, ithukendi tsumulhwa.
14. Abakristayo balebe mubaleka bathi eryamakirira “ebinywe by’ekwenene”?
14 Ni kyahi ekyangabya thwamasighania “ebinywe by’ekwenene”? Thalengekania okwa ky’erileberyako kino. Kilhangirikire ngoku omwatsi abya inianemulhandaghana omwa Bakristayo balebe owakakanganaya ngoku ekiro kya Yehova kiri hakuhi. Hangabya ihabya ihane ebaruha eyangabya imuyahandikwa n’omukwenda Paulo eyaleka ihabya amalengekania ng’ayo. Abakristayo balebe e Tesalonika mubaligha ebinyambwirwa ebyo n’erilhandaghaniabyo isibali baminya okwenene kw’omwatsi. Sibanga thebibwe ku baligha emyatsi eyo Paulo abakangiriraya iniakine haghuma nabo. (2 Tes. 2:1-5) Paulo mwahabulha balikyabo athi isibaligha ebyosi ebyo bak’owa. Kandi erithoka eribawathikya omwa buthuku obw’embere, Paulo mwaghunzerera ebaruha yiwe y’akabiri okwa banya Tesalonika n’ebinywe bino: “Ingye Paulo ngasaka erikerya eri omo byalha byaghe. Ko ngasaka nyithya omo syobaruha syaghe syosi.”—2 Tes. 3:17.
15. Thwanga yitheya thuthi okwa mabehi awakabya nga ni kwenene? Iha eky’erileberyako. (Lebaya n’ebisasani.)
15 Ebinywe ebyo Paulo ahandikira abanya Tesalonika bikathweghesayaki? Thwam’owa omwatsi owathahambene n’ebyo thwabirigha omwa Biblia kutse thuk’owa amabehi awak’itha obuba, thutholere ithwakolesya obuyitheghererya. Omwa Soviet Union eyakera, esyonzighu syethu musyaha balikyethu b’ebaruha eyalhangirika ng’eyikalhua okwa kyaghanda kikulhu. Ebaruha muyabugha yithi balikyethu balebe bayighabule okwa kithunga kya Yehova, batsukisaye ekindi. Ebyabya omwa baruha mubyalhangirika nga ni by’okwenene. Aliwe balikyethu abathaleghulha mubathathebibwa. Mubaminya ngoku omwatsi owabya omwa baruha syabya ahambene n’ebyo babya ibabirikangiriribwa. Munabwire, hakanayira abakahakanisaya ekwenene ibakolesya etekinologia bakanza erithuherya n’erithughabulha. Omwakanya ‘k’erisuka-sukanibwa omo malengekania [wethu],’ thwangana yitheya omw’ilebya ebyo thuk’owa kutse erisoma nga binahambene n’ebyo thwabir’igha.—2 Tes. 2:2; 1 Yn. 4:1.
Siwuthebibawe omwa mabehi awakabya nga ni kwenene (Lebaya enungu 15) a
16. Ngoku kiri omwa Abanya Roma 16:17, 18, thutholere ithwakolhaki abandi bamayisununulha okwa kwenene?
16 Sighalha iwune bughuma n’abatheleghulha oku Yehova. Nyamuhanga anzire ithwabya bughuma omw’iramya lyethu. Thukendi sighalha ithune bughuma thwamamakirira ekwenene. Owosi-wosi oyukayisununulha okwa kwenene akaletha omwa kithunga mw’erighabulhana, ekyo ky’ekikaleka Nyamuhanga iniabugha athi ‘thusaghebo.’ Bithe bithya, ithukendi sighania ekwenene.—Soma Abanya Roma 16:17, 18.
17. Thukaghasirawa thuthi thwamaminyerera ekwenene n’eryamakirirayo?
17 Thwamaminyerera ekwenene n’eryamakirirayo, ithukendibya ithune ndeke bunyakirimu. (Efe. 4:15, 16) Ithukendi theghibwa okwa mabehi n’ebinyambwirwa bya Sitani, kandi thukendisya sighalha ithune omwa butheya bwa Yehova omwa buthuku bw’obulighe bunene. Mulhole embere eryamakirira ekihikire, “Nyamuhanga omwinye obuholho asyabya nenyu.”—Fil. 4:8, 9.
OLHWIMBO 122 Musike, Simusegha-seghane!
a ERISOBORERA EKISASANI: Erikolha ngoku kyanabya ery’ebyabya myaka mingyi enyuma, omughulhu balikyethu ab’omwa Soviet Union ya kera bahebawa ebaruha eyalhangirika nga yikalhua okwa Kyaghanda kikulhu aliwe iyiryalhua okwa syonzighu syethu. Munabwire, esyonzighu syethu syangana kolesya e Intaneti erilhalhania amabehi awahambire okwa kithunga kya Yehova
