Isaya 60:1 hakabugha hathi: “Hangana, wukoleraye, kusangwa ekyakakalha kyawu kyamasa, n’olhukengerwa lhw’Omwami Mukulhu lhwabirikuhulhukira.” Omuyi we Yerusalemu kutse e Sioni, ow’abya muyi mukulhu we Yuda okwa buthuku obo, akimanira ekihanda kyosi. (Isa. 60:14; 62:1, 2) Neryo, ebinywe bya Isaya bikaletha ebibulyo bibiri: Eky’erimbere, ni mughulhu wahi e Yerusalemu ‘yahangana’ n’erikolerya omwa nzira ey’obunyakirimu kandi yithi? Ekyakabiri, mbwino ebinywe bya Isaya byanga bererere okwa lhulengo lhunene omwa buthuku bw’embere?

E Yerusalemu ‘muyahangana’ n’erikolerya omwa nzira ey’obunyakirimu mughulhu wahi kandi yithi? E Yerusalemu n’ehekalu yayu mubyabya bisambukalirya omughulhu abayuda babya omwa bunyewa mwe Babeli ahabw’emyaka 70. Aliwe Abamedi n’Abapersia, babere babirihamba e Babeli, Abaisraeli ababya omwa buthabali bwosi bwe Babeli mubabya bwiranda erisuba ewabu n’erisuba-subania eriramya ly’okwenene. (Ezr. 1:1-4) Eritsuka omwa 537 E.K.K., abathaleghulha ababya ibakineho erilhua omwa bihanda byosi 12 mubakolha ekyo. (Isa. 60:4) Mubatsuka erihongera Yehova, eryibuka emikonga, n’erithasyatsuka erihimba e hekalu. (Ezr. 3:1-4, 7-11; 6:16-22) Olhukengerwa lhwa Yehova mulhwathasyatsuka erikolerya okwa Yerusalemu—ni bugha ambu erikolerya okw’abandu biwe. Nabo, mubabya kyakakalha okwa bindi bihanda, ebyabya omwa mwirima w’obunyakirimu.

Nomwabine, obuminyereri bwa Isaya obw’erisuba-subania mubwabererera okwa Yerusalemu ya kera okwa lhulengo lhulebe. Erithwalira haghuma, Abaisraeli mubathalholha embere eriowa Nyamuhanga. (Neh. 13:27; Mal. 1:6-8; 2:13, 14; Mt. 15:7-9) Nibya n’enyuma waho, mubaghana Masiya, Yesu Kristo. (Mt. 27:1, 2) Omwa mwaka we 70 E.K., e Yerusalemu n’ehekalu yayu mubyathoghothibwa omurundi wakabiri.

Yehova abya iniabiribugha athi ekyo kikendi syabya. (Dan. 9:24-27) Ahathe erithika-thika, sikyabya kighendererwa kiwe e Yerusalemu y’okwa kihugho eriberererya obuli katotorera k’okwa buminyereri obw’erisuba-subania obuli omo Isaya esura 60.

Mbwino ebinywe bya Isaya bine mubererera okwa lhulengo lhunene munabwire? Ee, aliwe bihambire okwa “Yerusalemu y’endatha.” Omukwenda Paulo mwahandika athi: “Nayu ni koyo wethu.” (Gal. 4:26) E Yerusalemu y’endatha ni kitsweka ky’elhubulha ky’okwa kithunga kya Nyamuhanga ekirimo ebihangikwa eby’ekirimu ebithaleghulha. Abaana biwe mwamuli Yesu ne 144,000 Abakristayo abahakabibwa abawithe amaha w’elhubulha nga Paulo. Abakristayo Abahakabibwa ni “kihanda ekibuyirire”—“abandu ba Nyamuhanga [e Israeli ya Nyamuhanga].”—1 Pet. 2:9; Gal. 6:16.

E Yerusalemu eyikanibweko ahandatha, ‘muyahangana’ ‘n’erikolerya’ yithi? Muyakolha ekyo erilhabira omw’abaana bayu abahakabibwa abali okwa kihugho. Linganisaya ebyo balhabamu n’ebya lhaghulhawa ebiri omu Isaya esura 60.

Abakristayo abahakabibwa ‘mubahangana’ kundi babya ibabiribya omwa mwirima w’obunyakirimu, omughulhu obuyisamambuli bwakanyirira omwa kighana kyakabiri E.K. (Mt. 13:37-43) Neryo mubabya banyewa be Babeli Mukulhu, amadini w’amabehi w’ekihugho kyosi. Abahakabibwa mubabya banyewa erihika ‘okw’ihwererera ly’emighulhu,’ omughulhu owatsuka omwa mwaka owa 1914. (Mt. 13:39, 40) Enyuma waho, omwa 1919, mubabya bwiranda kandi bamatsukiraho erikolerya  bunyakirimu omw’iyihwerya omwa mubiiri w’erithulira. a Hamabirilhaba myaka mingyi, abandu erithimba omwa bihanda byosi ibanemwasa omwa kyakakalha ekyo, imwamune n’emisighalira y’abali omwa Israeli ya Nyamuhanga—“abami” abakanibweko omu Isaya 60:3.—Erib. 5:9, 10.

Omwa buthuku obukasa, Abakristayo abahakabibwa bakendi syakolerya kutsibu omwa nzira y’obunyakirimu. Bathi? Bakendisyabya bakaghunza engebe yabu y’okwa kihugho, bakendisyabya kitsweka ky’okwa “Yerusalemu, omuyi muhya-muhya,” kutse omuheruki wa Kristo abandu 144,000 abami kandi bahereri balikyabo.—Erib. 14:1; 21:1, 2, 24; 22:3-5.

E Yerusalemu nyihya-nyihya yikendi syawathikya kutsibu okw’iberererya ebiri omu Isaya 60:1. (Linganisaya na Isaya 60:1, 3, 5, 11, 19, 20 na Eribisulirwa 21:2, 9-11, 22-26.) Ngoku e Yerusalemu y’okwa kihugho yanabya yikathabalha omwa Israeli ya kera, e Yerusalemu mbyaka na Kristo, yikendi syathabalha omwa mughulhu muhya-muhya oyo. E Yerusalemu mbyaka “[yikasa] yithi eryandaghalha yikalhua elhubulha ewa Nyamuhanga”? Omw’ikolha ebikaghasira ekihugho. Abandu abakubaha Nyamuhanga erilhua omwa bihanda byosi “byasyalendera omo kyakakalha kyagho.” Basyaboholhwa okwa kibi n’olhuholho. (Erib. 21:3, 4, 24) Ekyo kikendi syaleka ihabya erisuba-subanibwa ly’ebindu byosi ngoku Isaya n’abandi baminyereri b’alhaghulha. (Emib. 3:21) Erisuba-subania linene eryo lyatsuka Kristo akabya Mwami kandi likendi syahwererera omw’ithabalha liwe ly’Emyaka Rukumi.