1. Busana naki thutholere ithwaghondera Yehova?

THUTHOLERE ithwaghondera * Yehova kundi ni Muhangiki wethu. Busana n’ekyo awithe ehamuli y’erihiriraho ebihangikwa biwe ebihano. (Erib. 4:11) Aliwe hane n’eyindi nzumwa eyangaleka ithwanza erimwowa​—emithabalire yiwe ya yuwene kutsibu. Eritsuka kera, abathabali bangyi babirithunga obuthoki bw’erithabalha oko bandi. Thwamalinganisya emithabalire yabu n’eya Yehova, thukalhangira Yehova ini Muthabali oyulengire kutsibu abosi omwa menge, omo lhwanzo, omo lhukeri, n’omw’ighanyira.​—Eri. 34:6; Abar. 16:27; 1 Yn. 4:8.

2. Ni nzumwa syahi esiri omu Abaebrania 12:9-11 esyangaleka ithwaghondera Yehova?

² Yehova anzire ithwamwowa, butsira kundi thukamusagha, aliwe kundi thumwanzire kandi thukamulhangira nga Thatha wethu w’olhwanzo. Omwa baruha eyo Paulo ahandikira Abaebrania, akakanganaya ngoku thutholere ‘ithwowa Thatha wethu’ kundi akathuthendeka “erithukolha ndeke,” ni bugha ambu thughasirawe.​—Soma Abaebrania 12:9-11.

3. (a) Thukakanganaya thuthi ku thukaghondera Yehova? (b) Ni bibulyo byahi ebya thukendi kaniako?

³ Thukaghondera Yehova omw’ilengaho kutsibu erimwowa omwa myatsi yosi n’eriyitheya okw’iyeghemerya amenge wethu. (Emi. 3:5) Kikolhoba erighondera Yehova thwam’igha  okwa mibere yiwe mibuyanga. Busana naki? Kundi emibere eyo yikalhangirika omwa byosi ebyo akakolha. (Esy. 145:9) Thukabya thukongera erigha oku Yehova, thukongera erimwanza. Kandi thwamabya ithwanzire Yehova, sithuliyithagha bilhaghiro bingyi erithubwira ekitholere n’ekithatholere erikolhwa. Thukahiraho akaghalha eribya n’amalengekania agho Yehova anzire ithwabya nagho n’eriyihighulha okwa kibi. (Esy. 97:10) Aliwe hanganayira ikyathukalira eriowa Yehova. Busana naki? Kandi ni byahi ebyo abasyakulhu, abathatha, n’abamama bang’ighira oku Muthabali Nehemia; Omwami Dawudi; na Maria, mama wa Yesu? Omwatsi ono akendisubirya ebibulyo ebi.

4-5. Ngoku kiri omu Abanya Roma 7:21-23, busana naki kyanganakalha erighondera Yehova?

⁴ Enzumwa nguma eyangaleka ikyakalha erighondera Yehova ly’eribya ithwabirisighalya ekibi n’obuthahikana. Neryo thuli mw’obuthowa. Adamu na Eva babere baghana eriowa Nyamuhanga omw’irya ekighuma, mubabya ibamathwamu eriyisondolha. (Enz. 3:22) Namunabwire, abandu bangyi bakagheghena Yehova n’erianza eriyithwiramu ekibuya n’ekibi.

⁵ Nibya n’abanasi Yehova n’erimwanza, kyanganabakalira erimughondera ndeke. Omukwenda Paulo mwabana ekitsibu ekyo. (Soma Abanya Roma 7:21-23.) Nga Paulo, thwanzire erikolha ekikatsemesaya Yehova. Aliwe mughulhu wosi thutholere ithwarwanisya omubere w’erianza erikolha ebithuwene.

6-7. Enzumwa eyakabiri eyangaleka ikyakalha erighondera Yehova y’eyahi? Iha eky’erileberyako.

⁶ Eyindi nzumwa eyangaleka ikyakalha erighondera Yehova ly’eribya ithukahambawako n’emibere ey’aho thwakulira. Amalengekania w’abandu bangyi ahukene okw’isonda lya Yehova, kandi kyanganabera erithukalira erithendi lengekania ng’abathuthimbireko. Eky’erileberyako kya kino.

⁷ Omwa yindi myanya abalere bakahathikanawa eriyihwerya omw’isondya esyosente nene. Mwali wethu oyukahulhawamo Mary * mwabana ekitsibu ekyo. Athali aminya Yehova, abya okwa nguma y’okwa syo yunivasite esyuwene kutsibu omw’ihanga lyabu. Ab’eka y’obu Mary mubamuhirako akahathikano k’eribana omubiiri w’ekitsumbi kandi owaliko sente nene. Nayu iniananzire ekyo. Aliwe, abere abiriminya Yehova n’erimwanza, mwahindulha amalengekania. Nomwabine, akabugha athi: “Hakanayira inalhangira ebyanga nyingirirya esyosente nene aliwe ibyangana tsandya endegheka yaghe y’obunyakirimu. Emibere eya nakulibawamo yikanaleka ikyanyikalira eribugha indi eyihi okwa bindi bindu. Neryo ngasaba Yehova anyiwathikaye nuku singalengaweko eriligha omubiiri owanga nyikakirya erimukolera.”​—Mt. 6:24.

8. Thukayakanaya okuki?

⁸ Thukaghasirawa thwamaghondera Yehova. Aliwe kandi abawithe obuthoki bulebe, ng’abasyakulhu, abathatha, n’abamama bamaghondera Nyamuhanga ibakendi leka abandi ibaghasirwa. Thulebaye eby’erileberyako omwa Biblia ebikathweghesaya ngoku thwanga kolesya obuthoki omwa nzira eyikatsemesaya Yehova.

9. Ni bitsibu byahi ebya Nehemia abana?

⁹ Yehova abiriha abasyakulhu b’olhukwamirwa lhukulhu olhw’eritheya esyombuli  siwe. (1 Pet. 5:2) Abasyakulhu bangan’igha bingyi okwa mibere Nehemia athwaliramo abandu ba Yehova. Kundi Nehemia abya muthabali w’omwa Yuda, abya awithe obuthoki bunene. (Neh. 1:11; 2:7, 8; 5:14) Thalengekania okwa bighuma by’okwa bitsibu ebyo Nehemia abana. Abya iniabiriminya ngoku abandu babiritsandya ehekalu kandi ku sibakisighika Abalawi omwa by’esyosente ngoku kyabya omwa Mighambo. Abayuda isibakisikirye omughambo we Sabato, kandi n’abandi ibabirithahya abakali b’ehandi. Omuthabali Nehemia abya atholere eriyira eky’erikolha omwa mibere eyikalire eyi.​— Neh. 13:4-30.

10. Nehemia mwakolhaki akabana ebitsibu?

¹⁰ Nehemia mwathakolesya obuthoki bwiwe erikaka abandu erighendera okwa biwe. Omwakanya k’ekyo, mwasaba Yehova y’obuwathikya, kandi amakangirirya abandu b’Emighambo ya Yehova. (Neh. 1:4-10; 13:1-3) Kandi omw’iyikehya Nehemia mwakolha haghuma n’abalikyabo nibya n’eribawathikya erithasyahimba esyombimbo sye Yerusalemu.​—Neh. 4:15.

11. Erikwamana na 1 Abanya Tesalonika 2:7, 8, abasyakulhu batholere ibakolongana bathi n’abali omwa kithunga?

¹¹ Si bugha indi abasyakulhu bakendi bana ebitsibu ebiri ng’ebya Nehemia abana, aliwe bangana mugherererya omwa nzira nyingyi. Ng’eky’erileberyako, bakakolha kutsibu eriwathikya abikirirya balikyabo. Kandi obuthoki obwa bawithe sibuli leka bakayowa nga balengire abandi. Omwakanya k’ekyo, bakabuya-buya balikyethu. (Soma 1 Abanya Tesalonika 2:7, 8.) Olhwanzo n’eriyikehya lyabu bikalhangirika omwa mibere bakakanirayamu n’abandi. Andrew, omusyakulhu w’ekithunga akabugha athi: “Nabirilhangira omusyakulhu amayihira okwa bandi n’eribya w’olhukeri, kikahamba oku balikyethu. Emibere eyi yikaleka balikyethu ibakolongana ndeke n’abasyakulhu.” N’owundi musyakulhu oyukahulhawamo Tony, akabugha athi:  “Ngalengaho erighendera okw’ihabulha eriri omu Abanya Filipi 2:3 n’erilengaho mughulhu wosi erilhangira abandi ibandengire. Eki kikanyiwathikaya erithendi kaka abandi erighendera okwa byaghe.”

12. Busana naki abasyakulhu batholere ibayikehya?

¹² Abasyakulhu batholere ibayikehya, nga Yehova kw’ayikehirye. Nomwakine indi Yehova ya Muthabali w’obuhangwa bwosi, “akunama” erisumba “abera oko lhuthuthu.” (Esy. 18:35, NW; Esy. 113:6, 7) Kandi e Biblia yikathubwira yithi Yehova akapona abakayiheka.​—Emi. 16:5.

13. Busana naki omusyakulhu atholere ‘iniakunga olhulimi lhwiwe’?

¹³ Omusyakulhu oyukaghondera Yehova atholere ‘iniakunga olhulimi lhwiwe.’ Bithe bithya, iniangana subirya nabi omundu amathendi musikya. (Yak. 1:26; Gal. 5:14, 15) Andrew, oyulyakanibawako, akabugha athi: “Ihakanayira, inganza erisubirya kithya-kithya mulikyethu oyukabya nga syanyisikirye. Aliwe, ngaghaniraya okwa balhume bathaleghulha ab’omwa Biblia, kandi ekyo kyabirinyiwathikya eriminya omughaso w’eriyikehya n’eribya mwolho.” Abasyakulhu bakakanganaya ku bakaghondera Yehova omw’ibya b’olhukeri n’olhwanzo bakakania n’abalikyethu omwa kithunga, imwamune n’abandi basyakulhu balikyabo.​—Kol. 4:6.

14. Ni lhukwamirwa lhwahi olho Yehova abirihererya abathatha, kandi anzire ibakolha kyahi?

¹⁴ Yehova abiriha abathatha b’olhukwamirwa lhw’eribya muthwe w’eka, kandi Nyamuhanga anzire ibathendeka n’erihabulha abaana babu. (1 Kor. 11:3; Efe. 6:4) Aliwe obuthoki bwa thatha bunawithe aho busubulire​—ni w’erilhuthonda embere sya Yehova busana n’emibere eyo akathwaliramu ab’eka yiwe, kundi Yehova yuwatsukisaya amaka. (Efe. 3:14, 15) Abathatha bakakanganaya ku bakaghondera Yehova omw’ikolesya obuthoki bwabu omwa mibere eyikatsemesaya Nyamuhanga. Bangana minya bingyi omw’igha okwa ngebe y’Omwami Dawudi.

15. Busana naki Omwami Dawudi ni ky’erileberyako ekyuwene ekya bathatha batholere ibagherererya?

¹⁵ Yehova mwasombolha Dawudi eribya muthwe w’eka yiwe kandi n’ekihanda kyosi kye Israeli. Iyo ng’Omwami, Dawudi aby’awithe obuthoki bunene. Mwanakolesya obuthoki obo bwa nabi neryo amakolha ebisobyo ebikalire. (2 Sam. 11:14, 15) Aliwe mwakangania ngoku akaghondera Yehova omw’iligha erikungwa. Mwabwira Yehova eriyowa liwe. Kandi mwalengaho kutsibu eriowa  erihabulha lya Yehova. (Esy. 51:1-4) Eryongera okw’ekyo, mwayikehya kutsibu amaligha erihabulha butsira ery’abalhume basa aliwe n’ery’abakali. (1 Sam. 19:11, 12; 25:32, 33) Dawudi mw’ighira okwa bisobyo biwe n’erithwamu erikolera Yehova omwa ngebe yiwe yosi.

16. Ni byahi ebya bathatha bang’ighira oko Dawudi?

¹⁶ Thulebaye amasomo malebe agho abathatha bang’ighira oku Mwami Dawudi: Isiwakolesaya nabi obuthoki obo Yehova abirikuha. Ligha ebisobyo byawu, kandi ligha abandi bakakuha erihabulha eriseghemere okwa Biblia. Wamakolha ekyo, ab’eka yawu ibakendi kusikya busana n’eriyikehya lyawu. Wukasaba n’eka yawu, bwira Yehova y’eriyowa lyawu​—ambi ibalhangira ngoku wuyikethere Yehova. Ekikulhu kutsibu, ambi erikolera Yehova ikyabya ikya kindu kikulhu omwa ngebe yawu. (Ebi. 6:6-9) Eky’erileberyako kyawu ekyuwene ni kighuma ky’okwa bihembo ebibuyanga ebyo wangaha eka yawu.

17. Ni lhukwamirwa lhwahi olhwa Yehova abirihererya abamama?

¹⁷ Yehova abiriha obuli mama y’olhukwamirwa omw’eka, kandi abirimuha obuthoki bulebe okwa baana biwe. (Emi. 6:20) Ebya mama akakolha n’eribugha byangana hamba oko baana biwe omwa ngebe yabu yosi. (Emi. 22:6) Lhangira ekya bamama bang’ighira oku Maria, mama wa Yesu.

18-19. Ni byahi ebya bamama bang’ighira oku Maria?

¹⁸ Maria iniasi ndeke Amasako. Iniasikirye Yehova ya kutsibu kandi iniawithe engolongana eyuwene nayu. Iniakaghondera obusondoli bwa Yehova n’omuthima wosi, nomwakine indi kyanga lekire engebe yiwe iyahinduka.​—Lk. 1:35-38, 46-55.

¹⁹ Abamama, mwangana gherererya Maria omwa nzira nyingyi. Muthi? Eky’erimbere, omw’ibya n’obunywani obughumire na Yehova omw’iyeghesya e Biblia mughulhu wosi n’erisaba. Ekyakabiri, omw’ibya iwangana kolha esyombinduka omwa ngebe yawu nuku wutsemesaye Yehova. Ng’eky’erileberyako, ababuthi bawu banganabya ibabya bakahithana lhuba-lhuba n’erikaramira abaana babu. Neryo iwangana lengekania wuthi nawu ku wutholere iwakolha wuthya abaana bawu. Nibya iwabirin’igha ngoku Yehova anzire iwakolongana n’abaana bawu, ikyangana kukalira eribya iwunathekene n’erighumisirizya, kutsibu-tsibu bamathendi kwowa omughulhu wulhuhire. (Efe. 4:31) Okwa buthuku obo, wukayithagha kutsibu eriyikethera Yehova omw’isaba. Mama  oyukahulhawamo Lydia akabugha athi: “Hakanayira, ingayithagha erisaba kutsibu nuku singakaramire mughalha waghe omughulhu akaghana erinyowa. Nganathwamu erileka eribugha neryo ingasaba Yehova y’obuwathikya kikuthu-kuthu. Omusabe akaleka ingathekana.”​—Esy. 37:5.

20. Ni kitsibu kyahi ekya bandi bamama bakabana, kandi banga kisingura bathi?

²⁰ Ekindi kitsibu ekya bandi bamama bakanabana kiri indi kikanabakalira erikangania abaana babu b’olhwanzo. (Tito 2:3, 4) Abandi bakali bakulira omwa maka agho ababuthi babu babya isibali bakanganaya olhwanzo. Wamabya ikuwakulibawa wuthya, si wutholere wukasuba omwa bisobyo bya babuthi bawu. Mama oyukaghondera Yehova atholere in’igha erikangania abaana biwe b’olhwanzo. Kyangana mukalira erihindulha amalengekania, eriyowa, n’emikolere yiwe. Aliwe kyangana thokekana, kandi esyombinduka esyo isikendi mughasira n’eka yiwe.

21-22. Erikwamana na Isaya 65:13, 14, ni mighaso yahi eyo thukabana busana n’erighondera Yehova?

²¹ Omwami Dawudi mwaminya emighaso y’erighondera Yehova. Mwahandika athi: “Erihamulha ly’Omwami Mukulhu lithunganene, likatsemesaya omuthima; ebihano by’Omwami Mukulhu ni bibuya bikakoleraya ameso. Ebi bikahana omughombe wawu, n’oyukakwamabyo, akabana olhuhembo lhunene.” (Esy. 19:8, 11) Munabwire, thwangana lhangira embaghane eyiri ahakathi-kathi k’abakaghondera Yehova n’abakaghana obusondoli bwiwe b’olhwanzo. Abakaghondera Yehova “basyutha obogho omo butseme bw’omuthima.”​—Soma Isaya 65:13, 14.

²² Abasyakulhu, abathatha, abamama bamaghondera Yehova erilhua okwa muthima, esyongebe syabu sikuwana, amaka wabu iniatsema, n’ekithunga ikyabya bughuma. Ekikulhu kutsibu, bakaleka Yehova iniatsema. (Emi. 27:11) Olho ni lhuhembo lhunene!