OMWATSI W’ERIGHA 38
“Mwase okw’ingye, . . . Ngendi Balhuhukya”
“Mwase okw’ingye, inywe bosi ko mukanuba n’eriheka ebirithohire, ngendi balhuhukya.”—MT. 11:28.
OLHWIMBO 17 “Nyinanzire”
EBIKENDI KANIBWAKO *
1. Ngoku kiri omu Matayo 11:28-30, Yesu mwalhaghanisya athiki?
YESU mwalhaghanisya endeko y’abandu ababya bamuhulikirire. Mwabaha omulhaghe owuwene ono athi: “Mwase okw’ingye, . . . ngendi balhuhukya.” (Soma Matayo 11:28-30.) Ebi sibyabya binywe buyira. Ng’eky’erileberyako, thalengekania okwa ky’akolera omukali oyuwabya alhwere obulhwere obukalire kutsibu.
2. Ni kyahi ekya Yesu akolera omukali omulhwere?
2 Omukali abya akayithagha kutsibu obuwathikya. Iniabirighenda okwa bathambiri bangyi akasondya erilhama. Iniabiriaghalhwa habw’emyaka 12, aliwe isihali oyuwanga mulhamya. Erikwamana n’Emighambo, abya ini mutsandirya. (Law. 15:25) Neryo mwowa ngoku Yesu akalhamaya abakaghalhawa, neryo mwasondya Yesu. Abere akamubana, mwathulha okwa musike w’olhukimba lhwiwe, neryo amalhuaho inialhama! Yesu mwathasubulira okw’imulhamya lisa aliwe kandi mwaleka omukali oyo iniayowa inianzibirwe n’erisikibwa. Ng’eky’erileberyako, abere akakania nayu mwakolesya ekinywe ky’olhwanzo n’ekikaha ekitsumbi athi “mwali waghe.” Ahathe erithika-thika, omukali mwabana erilhuhuka n’erighumibwa!—Lk. 8:43-48.
3. Ni bibulyo byahi ebyo thukendi subirya?
3 Wibuke ngoku omukali mwasondya Yesu. Mwahiraho akaghalha erisondya Yesu. Ku bine bithya namunabwire—thutholere ithwahiraho akaghalha ‘eriasa’ oku Yesu. Munabwire, Yesu syendi kolha ebithiko-thiko erilhamya abalhwere ‘abakasa’ okw’iyo. Aliwe akinathukokaya athi: “Mwase okw’ingye, . . . ngendi balhuhukya.” Omo mwatsi ono thukendi subirya ebibulyo bithano: Ni byahi ebya thutholere ithwakolha ‘eriasa’ oku Yesu? Yesu amanyisayaki akabugha athi: “Mwimaye engomo yaghe, muhekeyo”? Ni byahi ebya thwang’ighira oku Yesu? Busana naki omubiiri ogho Yesu abirithuha akalhuhukaya? Kandi thwanga lholha thuthi embere eribana erilhuhuka omwa ngomo ya Yesu?
“MWASE OKW’INGYE”
4-5. Ni nzira syahi esyo thwangasiramu oku Yesu?
4 Enzira nguma ey’eriasiramu oku Yesu ly’erigha bingyi okwa bindu eby’abugha n’erikolha. (Lk. 1:1-4) Sihali oyuwanga thukolera eki—thutholere ithwayeghesya emyatsi eyi ahabwethu. Kandi thukasa oku Yesu omw’ithwamu eribatizibwa n’eribya mwigha wa Kristo.
5 Eyindi nzira ey’eriasiramu oku Yesu ly’erihika okwa basyakulhu b’ekithunga thukayithagha obuwathikya. Yesu akakolesaya abalhume b’olhusunzo aba eritsomana esyombuli siwe. (Efe. 4:7, 8, 11; Yn. 21:16; 1 Pet. 5:1-3) Thutholere ithwahiraho akaghalha eribasaba obuwathikya. Isithwalengekanaya thuthi abasyakulhu bakendi minya ebiri omwa muthima wethu n’eriminya ebya thukayithagha. Thulebaye ebya mughalha wethu oyukahulhawamo Julian akabugha: “Munabya w’erilhua okwa Beteli busana n’amaghalha waghe, neryo omughuma w’okwa banywani baghe mwambwira athi ngasabe abasyakulhu banyibungire. Erimbere, munayowa nga sindi bayithagha. Aliwe enyuma waho, munasaba obuwathikya, ibo erinyibungira mukyabya iky’ekihembo kibuyanga ekyo nabirithahebwa.” Abasyakulhu abathaleghulha, ng’ababiri ababungira Julian, bangana thuwathikya eriminya “obulengekania bwa Kristo,” ni bugha ambu, eriyitheghererya n’erigherererya amalengekania n’emibere yiwe. (1 Kor. 2:16; 1 Pet. 2:21) Eki ni kighuma ky’okwa bihembo bibuyanga ebyo banga thuha.
“MWIMAYE ENGOMO YAGHE, MUHEKEYO”
6. Yesu amanyisayaki akabugha athi: “Mwimaye engomo yaghe, muhekeyo”?
6 Yesu abere akabugha athi: “Mwimaye engomo yaghe, muhekeyo,” angabya iniamanyisaya “Ligha obuthoki bwaghe.” Kandi angabya iniamanyisaya athi “Thuheke nayu engomo, thwanakolera Yehova haghuma.” Mbulha ni kyahi okw’ebi, engomo eyi ni kolha.
7. Erikwamana na Matayo 28:18-20, ni mubiiri wahi ogho thwabirihebwa erikolha, kandi thwangana yiketheraki?
7 Thukaligha erikokya lya Yesu thukayihayo oku Yehova n’eribatizibwa. Obuli mundu akakokibawa—Yesu syendi syaghana owosi-wosi oyukanza erikolera Nyamuhanga erilhua okwa muthima. (Yn. 6:37, 38) Abigha ba Kristo abosi babirihebwa olhusunzo olhw’erisangira omwa mubiiri ogho Yehova aha Yesu erikolha. Thwangana yikethera ngoku Yesu akendibya iniane nethu erithuwathikya erikolha omubiiri oyo.—Soma Matayo 28:18-20.
“MW’IGHIRE OKW’INGYE”
Lhuhukaya abandi ngoku yesu akolha (Lebaya enungu 8-11) *
8-9. Ni kyahi ekyaleka abandu abayikehirye ibanza eriasa oku Yesu, kandi ni bibulyo byahi ebya thutholere ithwayibulya?
8 Abandu abayikehirye ibakasa oku Yesu. (Mt. 19:13, 14; Lk. 7:37, 38) Busana naki? Thulebaye embaghane eyiri ahakathi-kathi ka Yesu n’Abafarisayo. Abakulhu b’edini abo isibatsomene abandu kandi ini b’emiyiheko. (Mt. 12:9-14) Yesu iniawithe olhwanzo kandi iniayikehirye. Abafarisayo ibawithe emiyiheko busana n’ebitsumbi byabu. Yesu mwabugha athi si kyuwene eribya n’emibere ng’eyo. Mwakangirirya abigha biwe eriyikehya. (Mt. 23:2, 6-11) Abafarisayo mubathabalha oko bandu kundi ibakabubahisaya. (Yn. 9:13, 22) Yesu mwalhuhukya abandi omw’ibakolera ebindu by’olhwanzo n’eribabwira ebinywe by’olhukeri.
9 Mbwino wunemugherererya Yesu? Yibulhaye: ‘Nganasibwe ng’omundu mwolho kandi oyuyikehirye? Ngana kolha emibiiri y’ahisi erikolera abandi? Ngana kanganaya abandi b’olhukeri?’
10. Emibere eya Yesu ahiriraho abakakolha nabu yabya yithi?
10 Yesu mwahiraho emibere eyikaleka abakakolha nabu ibayowa buholho, kandi mwanza eribathendeka. (Lk. 10:1, 19-21) Mwahira omwa bigha biwe mw’omuhwa w’eribulya ebibulyo, kandi mwanza eriminya amalengekania wabu. (Mt. 16:13-16) Ng’ebirimwa ebikuthangirirawa ndeke, abigha mubakulha-kulhana ndeke. Mubigha amasomo agho Yesu abya akakangirirya neryo bamahethya ebighuma omw’ikolha ebyuwene.
Yihire okwa bandi kandi leka kibolhobere erikania nawu
Ibya n’omuhwa
Yikehaye n’erikolha kutsibu *
11. Ni bibulyo byahi ebya thutholere ithwayibulya?
11 Wunawithe obuthoki bulebe? Wamabya iwunabuwithe, yibulhaye: ‘Ni mibere yahi eya ngahiraho okwa mubiiri kutse eka? Nganahiraho emibere y’obuholho? Nganahira omwa bandi mw’omuhwa w’eribulya ebibulyo? Ngananza erihulikirira ebirengekanio byabu?’ Sithwanganza eribya ng’Abafarisayo, ababya bakahithana oko babya bakabulya n’eriendererya ababya bakaha ebirengekanio ebiri mbaghane okwa by’Abafarisayo.—Mk. 3:1-6; Yn. 9:29-34.
“NENYU MWASYABANA ERILHUHUKA”
12-14. Busana naki omubiiri ogho Yesu abirithuha akathulhuhukaya?
12 Busana naki thukabana erilhuhuka thukakolha omubiiri ogho Yesu abirithuha? Ni nzumwa nene, aliwe thukendi thakania okwa nyike.
13 Thuwithe abalebererya abuwene. Yehova, Omulebererya wethu Mukulhu Kutsibu, si mukama oyuthesima kutse oyukaramire. Akasima ebya thukakolha. (Ebr. 6:10) Akathuha akaghalha akathukayithagha erikolha omubiiri ogho abirithuha. (2 Kor. 4:7; Gal. 6:5) Yesu, Omukama wethu, abirithuhiriraho eky’erileberyako ekyuwene eky’erikwama. (Yn. 13:15) Abasyakulhu abakathutheghaya bakalengaho erigherererya Yesu, “omulisya mukulhu.” (Ebr. 13:20; 1 Pet. 5:2) Bakalengaho eribya b’olhukeri, abakasikaya emithima, kandi buthubaha bakathukangiriraya n’erithutheya.
14 Thuwithe abanywani abuwene. Sihali abandi bandu abawithe abanywani n’omubiiri owuwene ng’ithwe. Thalengekania: Thuwithe olhusunzo olhw’erikolha n’abandu abawithe emibere eyuwene kutsibu aliwe kandi isibaliyilhangira ng’abathunganene kwilhaba abandi. Bawithe bingyi ebyo basi aliwe bakayikehaya, kandi bakalhangira abandi ibabalengire. Bakathulhangira ithukakolha haghuma nabu kandi ithwabya banywani. Kandi obunywani obo bughumire kutsibu indi bakahika n’okwa kiika ky’erithuholera!
15. Thutholere ithwalhangira thuthi omubiiri ogho thukakolha?
15 Thuwithe omubiiri owuwene kutsibu. Thukakangiriraya abandu ekwenene eyihambire oku Yehova n’eribisulha amabehi wa Sitani. (Yn. 8:44) Sitani akahekaya abandu b’emiheke eyo bathe bangathoka. Ng’eky’erileberyako, anzire ithw’ikirirya thuthi Yehova syanga thughanyira n’eriyowa nga syathwanzire. Oyu ni muheke munene, kandi amabehi awakalire! Thukabya ‘thukasa’ oku Kristo, thukaghanyirawa ebibi byethu. Kandi omo kwenene, Yehova athwanzire kutsibu. (Abar. 8:32, 38, 39) Ni butseme bunene eriwathikya abandu erigha eriyikethera Yehova n’erilhangira bakakolha esyombinduka!
LHOLHA EMBERE ERIBANA ERILHUHUKA OMW’ISI SY’ENGOMO YA YESU
16. Omuheke ogho Yesu akabugha athi thuheke ni w’embaghane athi okwa yindi miheke eyo thukaheka?
16 Omuheke ogho Yesu akabugha athi thuheke ni w’embaghane okwa yindi eyo thutholere eriheka. Ng’eky’erileberyako, abanene bakalhua okwa mubiiri ibabirilhuha kandi isibatsemire. Mbaghane n’ekyo, thukayowa ndeke thwamasiba omwa mubiiri wa Yehova na Kristo. Thwanganabya ithwabirilhuha busana n’emibiiri aliwe kandi ithwayikaka erighenda okwa mihindano y’erigholho ekiro ekyo. Aliwe mughulhu mungyi thukalhuayo ithwabirilhuhuka n’erithunga amani. Ku bikanabya bithya thwamahiraho akaghalha k’erithulira n’eriyeghesya e Biblia. Olhuhembo olhwathukabana lhulengire akaghalha kosi aka thwanga hiraho!
17. Thutholere ithwaminyaki n’eriyitheya okuki?
17 Thutholere ithwaminya ngoku obuli mundu anawithe akaghalha kalebe. Neryo thutholere ithwayitheya okwa bya thukakolha. Ng’eky’erileberyako, ithwangana yisanga ithwabiritsandya akaghalha thukasondya eby’obughuda. Lhangira ekya Yesu abwira omulhwana w’ebindu bingyi oyuwamubulhaya athi: “Nyikoleki eribana engebe y’erikotha?” Omulhwana abya inianasikirye Emighambo. Angabya iniabya mulhume mubuya kundi Enjiri ya Mariko yikamukanayako yithi Yesu ‘mwamwanza.’ Yesu mwabwira omulhwana y’eky’erikolha. Mwabugha athi, “Wughende, wughulhaye ebyosi wuwithe, . . . wase wunyikwame.” Mwayiponera, amayowa isyanga sighania ebindu biwe bingyi. (Mk. 10:17-22) Mwabya iniamaghana engomo eyo Yesu amuha neryo mwalholha embere eribya mukobe ‘w’ebindu.’ (Mt. 6:24) Iwe wangakolire kyahi?
18. Thutholere ithwabya ithune mukolhaki, kandi busana naki?
18 Mughulhu wosi, thutholere ithwabya ithunemulebya ebya thukahira embere. Busana naki? Nuku thukakasaye nga thunemukolesya akaghalha kethu ka ndeke. Thalebya ekya omulhwana Mark akabugha: “Ahabw’emyaka mingyi, ingasi indi ngan’olhobirye engebe. Nabya mutemburi, aliwe ininga lengekanaya kutsibu okwa syosente n’erianza eribya omwa ndeke. Munabulha ekikaleka engebe iyakalha. Neryo munalhangira ebyaghe ibyangahira embere kutsibu neryo Yehova ingamuha endambi n’akaghalha ebyamasaka.” Mark mwahindulha amalengekania n’engebe yiwe nuku akole bingyi omwa mubiiri wa Yehova. Akabugha athi: “Hakanayira inahangya-hangya, aliwe busana n’obuwathikya bwa Yehova na Yesu nabirisingura.”
19. Busana naki ni kikulhu erithunga amalengekania awatholere?
19 Thukendi lholha embere eribana erilhuhuka omw’isi sy’engomo ya Yesu thwamakolha ebindu bisathu bino. Eky’erimbere, ibya iwune n’amalengekania awatholere. Thukakolha omubiiri wa Yehova, neryo thutholere ithwakolhagho ngoku anzire. Ithwe thuli bakoli, na Yehova y’Omukama. (Lk. 17:10) Thwamalengesya erikolhagho ngoku thwanzire, ithukendi leka ikyathukalira. Nibya n’ende eyiwithe amani iyangana yihuthalya n’eriyilhuhya yamabera erianza eriyisondolha n’erisambanga omughera ogho oyukasondolhayo akakolesaya. Aliwe thwamakolha omubiiri wa Yehova omwa mibere eyo akanza, ithukendi kolha n’ebya thuthabya thukalengekania thuthi thwangana kolha. Wibuke ngoku sihali oyuwanga kakirya erisonda liwe eribererera!—Abar. 8:31; 1 Yn. 4:4.
20. Thutholere ithwabya na kilhubirirwaki thukaheka engomo ya Yesu?
20 Ekyakabiri, ibya n’ekilhubirirwa ekitholere. Ekilhubirirwa kyethu ly’eripipa Thatha wethu w’olhwanzo, Yehova. Abandu b’omwa buthuku bwa Yesu ababya bawithe omururu n’eriyitsomana muhathalhaba buthuku bathe babulha etseme neryo mubasighania engomo ya Yesu. (Yn. 6:25-27, 51, 60, 66; Fil. 3:18, 19) Aliwe, ababya banzire Nyamuhanga n’abaliranwa ibanatsemire mubaheka engomo ya Yesu omwa ngebe yabu yosi okwa kihugho, ibanawithe amaha w’erisyakolha haghuma na Kristo omwa lhubulha. Nethu ng’ibo, ithukendibya ithunatsemire thwamabya n’ekilhubirirwa ekyuwene thukaheka engomo ya Yesu.
21. Ngoku kiri omu Matayo 6:31-33, ni kyahi ekya Yehova akendi thukolera?
21 Ekyakasathu, ibya n’amaha awatholere okwa byangabya. Thwabirisombolha engebe y’eriyihayo n’omubiiri owakalire. Yesu mwabugha athi thukendi syendereribwa. Aliwe thukayikethera ngoku Yehova akendi thuha amaaka w’eriyiyinirya ekitsibu kyosi-kyosi. Thwam’ongera eriyiyinia, ithukendyongera erighuma. (Yak. 1:2-4) Kandi thwangana yikethera ngoku Yehova akendi thuha ebya thukayithagha, na Yesu ngoku akendi thusondolha, n’abalikyethu ibathusikya emithima. (Soma Matayo 6:31-33; Yn. 10:14; 1 Tes. 5:11) Hane kindi ekilhabire okw’aho ekya thukayithagha?
22. Thukasimaki?
22 Omukali oyo Yesu alhamaya mwabana erilhuhuka ekiro alhamibawa. Aliwe angabanire erilhuhuka erya kera na kera, inianalyabya mwigha muthaleghulha wa Kristo. Wukalengekanaya omukali oyo mwakolhaki? Amabya imwasombolha eribya omwisi sy’engomo ya Yesu, iniakendi syabana olhuhembo—erikolha haghuma na Yesu omwa lhubulha! Ekyosi-kyosi ekyo angabya imwayithalyako erikwama Kristo imukyaghanduka. Mbulha thuwithe maha wahi—erisyabyaho kera na kera omwa lhubulha kutse okwa kihugho—thukasima eribya ithwabiriligha erikokya lya Yesu lino: “Mwase okw’ingye!”
OLHWIMBO 13 Kristo Ni ky’Erileberyako Kyethu
^ enu. 5 Yesu akabugha athi thwase okw’iyo. Erikokya eri mwamuliki? Omwatsi ono akendi subirya ekibulyo ekyo, kandi akendi thw’ibukya ngoku thwangabana erilhuhuka omw’ikolha haghuma na Kristo.
