Omulhondo oyu akabugha athi: “Wamalhangira erinuba ly’abera, n’erighana eribanza [obulingirirania] n’erithunganene omo kihugho, suswekere omwatsi oyo; kusangwa omukulhu mughuma akatheghaya owundi mukulhu; kandi hali bandu bakulhu kwilhababo.”—Omu. 5:8.

Okwa bulengekania b’omundu, ebinywe ebi bikakanaya okwa bandu b’obuthoki omwa gavumente. Aliwe kandi thwamakilengekaniako, bikakanganaya ekwenene eyihambire oku Yehova, eyitholere iyathuhumulikania n’erithughumya.

Omugambuli 5:8 hakakanaya okwa muthabali oyukanubaya abera n’erithendi bakangania obulingirirania. Omuthabali oyo atholere in’ibuka ngoku hane owundi oyumulhangire oyumulengirye ekitsumbi kutse oyuwithe ekitsumbi kinene omwa gavumente ku mulenga. Kandi, hanganabya ihane n’abandi abali omwa bitsumbi bya haghulhu kutsibu. Eky’obulighe, omwa syogavumente sy’abandu, abathabali abosi banganabya mw’obulibathangania, neryo abandu bakaghalhawa busana n’obulibathangania obo.

Nomwakine indi hakabya nga sihali maha, thwangana humulikana thukaminya ngoku Yehova analhangire abathabali bakulhu ab’omwa syogavumente sy’abandu. Thwangana lemba-lemba Nyamuhanga n’erimughusira amalighe wethu. (Esy. 55:22; Fil. 4:6, 7) Thunasi ngoku “ameso w’Omwami Mukulhu akalhaba-lhaba omo kihugho kyosi eriyikangya mo w’amaaka busana n’ab’omuthima ahikene kw’iye.”—2 Emy. 16:9.

Neryo Omugambuli 5:8 hakathwibukaya emibere y’abandu abali omwa gavumente ngoku mughulhu wosi hakabya ihane omundu oyuwithe obuthoki bunene. Ekikulhu kutsibu, omulhondo oyu akathuwathikaya erilhangira ngoku Yehova yulengireyo, kandi ow’Obuthoki Bunene Kutsibu. Lino anemuthabalha erilhabira omo Mughalha wiwe, Yesu Kristo, Omwami w’Obwami. Omuthoki w’Ebyosi, oyusamalire ebyosi, ni w’obulingirirania, kuthya na Mughalha wiwe.