1-2. Omugambuli 11:6 hakahambangana hathi n’erithulha engulhu yuwene y’Obwami?

OMWA bindi bihugho, abandu bakanza eriminya bingyi bakowa engulhu yuwene. Kikabya ikyabalhue balindirire! Omwa bindi bihugho, abandu sibanzire ebya Nyamuhanga kutse ebye Biblia. Abandu b’ewenyu bakalhangira bathi engulhu yuwene? Mbulha bakalhangirayo bathi, Yehova anzire ithwalholha embere erithulira erihika aho akendi syabughira athi omubiiri amahwa.

² Okwa ndambi eyo Yehova abirihiraho, omubiiri w’erithulira akendi syahwa, neryo “enduli yasyahika.” (Mt. 24:14, 36) Obuthuku obo buthe bwahika, thwanga ghendera thuthi okwa binywe “siwikale buyira”? *​—Soma Omugambuli 11:6.

3. Omo mwatsi ono thukendi kania okuki?

³ Omwatsi w’ahanyuma mwakanakania okwa bindu bbini ebyo thukayithagha erikolha erithoka ndeke eribya “basohi b’abandu.” (Mt. 4:19) Omwatsi ono akendi kania okwa syonzira isathu esyo thwanga ghumiryamu erithwamu lyethu ly’erithulira, nomuthwangabya omwa mibere eyiri yithi. Thukendi minya ekikaleka ikyabya kikulhu (1) erihwerya amalengekania okwa mubiiri w’erithulira, (2) erighumisirizya, na (3) eribya n’erikirirya erighumire.

4. Busana naki thutholere ithwahwerya amalengekania wethu okwa mubiiri ogho Yehova abirithuha?

⁴ Yesu mwakania okwa bindu n’emibere eyanga kangenie ebiro by’enyuma-nyuma kandi ebyanga lengemerye abamukwamire eriberererya omubiiri w’erithulira. Mwabwira abigha biwe athi “mutheghaye.” (Mt. 24:42) Munabwire, thukabana ebikalengemeraya  ebiri ng’ebyaleka abandu ab’omwa biro bya Noa ibalemwa erighendera okw’ikunga eryo Noa athulhughanaya. (Mt. 24:37-39; 2 Pet. 2:5) Busana n’ekyo, thwanzire erihwerya amalengekania wethu okwa mubiiri ogho Yehova abirithuha.

5. Emibiri 1:6-8 hakakanganaya hathi erikanyirira ly’omubiiri w’erithulira?

⁵ Munabwire thutholere ithwahwerya malengekania wethu okwa mubiiri w’erithulhughania Obwami. Yesu mwabugha athi omubiiri oyu akendi syakanyirira n’erilholha embere nibya n’enyuma w’olhuholho lhwiwe. (Yn. 14:12) Yesu abere abiriholha, abandi bigha biwe mubasuba omo bubbaliya. Yesu abere abirilhubuka, mwawathikya abigha biwe balebe erihamba amahere omwa nzira y’ekithiko-thiko. Mwakolesya endambi eyo erikakasya abigha biwe ngoku omubiiri wabu w’erisoha abandu wa mukulhu kwilhaba eyindi. (Yn. 21:15-17) Iniakisiya iniaghenda elhubulha, mwabwira abigha biwe athi omubiiri w’erithulhughania ogho abiritsukisya akendi syahika haali erilhaba okwa mithano ye Israeli. (Soma Emibiri 1:6-8.) Enyuma w’emyaka mirebe, Yesu mwaleka omukwenda Yoane inialhangira esyonzoli esikakanganaya ebikendi syabya okwa “kiro ky’Omukama.” * Ekighuma ky’okwa bya Yoane alhangira sy’esyonzoli esikaswekaya esy’omumalaika akathulhughania “engulhu yuwene y’erikotha” erikangiriryayo “oko buli kithunga ky’abandu, n’obuli kihanda, n’obuli mubughe, n’oko bandu.” (Erib. 1:10; 14:6) Omo kwenene, munabwire Yehova anzire ithwasangira omwa mubiiri munene w’erithulira oyu erihika aho akendi syahwera.

6. Thwanga hwerya thuthi amalengekania okwa mubiiri w’erithulira?

⁶ Thwangana hwerya amalengekania wethu oko mubiiri w’erithulira thwamalengekania okwa byosi ebya Yehova anemukolha  erithuwathikya. Ng’eky’erileberyako, anemuthuha ebyalya bingyi eby’obunyakirimu omwa mulingo w’ebitabu by’esyombapura n’ow’ekieletroniki, eby’erihulikirira n’esyovidiyo, ne JW Broadcasting. Thakilengekaniako: Okwa muthahulha wethu we Intaneti, kune emyatsi omwa mibughe eyilhabire okwa 1,000! (Mt. 24:45-47) Omwa kihugho muli abandu abaghabene busana n’eby’ekipolitiki, eby’edini, n’eby’ekisubure muthina-muthina, aliwe abaghombe ba Nyamuhanga abalhabire oko miliyoni munani omwa kihugho kyosi bali bughuma. Ng’eky’erileberyako, Kyakathano, Okwakani 19, 2019, Abema ba Yehova erithimba omwa kihugho kyosi mubabya bughuma bakalebya evidiyo eyikakanaya okwa lisako ly’ekiro ekyo. Erigholho-gholho eryo, abandu 20,919,041 mubahindana okw’Ibuka Olhuholho lhwa Yesu. Thukabya thukaghanirya okwa lhusunzo lhw’erilhangira emyatsi eyi n’erisangira muyo kikaleka ithwanza erihwerya amalengekania wethu oko mubiiri w’Obwami.

7. Eky’erileberyako kya Yesu kikathuwathikaya kithi erihwerya amalengekania oko mubiiri w’erithulira?

⁷ Eyindi nzira eyathwanga kanganiryamu ku thukahira erithulira ly’embere ly’erikwama eky’erileberyako kya Yesu. Mwathalighira ekyosi-kyosi kikamulengemerya okw’ithulha omwatsi w’ekwenene. (Yn. 18:37) Mwathohibwa Sitani akamuha “amani wosi w’ekihugho n’olhukengerwa lhwagho”; kandi mwathaligha erilengwako abandi bakanza erimuyira mo mwami. (Mt. 4:8, 9; Yn. 6:15) Mwathasa mw’omuthima w’erianza ebindu; kandi mwathasagha erihakanisya erikalire. (Lk. 9:58; Yn. 8:59) Erikirirya lyethu lyamalengwako, ithukendi hwerya amalengekania okw’ithulira thwamaghanirya okw’ihabulha ly’omukwenda Paulo. Paulo mwabwira Abakristayo athi bakwame eky’erileberyako kya Yesu nuku ‘sibalhuhe kutse eryolhoba omo mithima yabu’!​—Ebr. 12:3.

8. Erighumisirizya niki, kandi busana naki kutsibu-tsibu likayithaghisibawa lino?

⁸ Erighumisirizya w’amaaka w’erilindirira emibere eya wulimu erihinduka iwunathekene. Mbulha thukakandira erihwaho ly’emibere mibi kutse erilinda eribererera ly’ebibuya ebyo thwabirilinda habw’obuthuku, thukayithagha erighumisirizya. Omuminyereri Habakuki mwakandira erihwaho ery’emibere mibi omo Yuda. (Hab. 1:2) Abigha ba Yesu babya bawithe amaha bathi Obwami bukendilhuaho ibwasa n’eribalhusya omwa munubo w’obuthabali bwe Roma. (Lk. 19:11) Thulindirire kutsibu ekiro Obwami bwa Nyamuhanga bukendi ghunzaho obubi n’eriletha ekihugho kihya-kihya ekithunganene. (2 Pet. 3:13) Aliwe, thutholere ithwaghumisirizya n’erilinda endambi eyo Yehova abirihiraho. Thulebaye esyonzira esyo Yehova akathukangirirayamo erighumisirizya.

9. Ni by’erileberyako byahi ebikakanganaya erighumisirizya lya Yehova?

⁹ Yehova akathuhiriraho eky’erileberyako kyuwene eky’erighumisirizya. Mwaha Noa y’obuthuku obukaghunza obw’erihimbiramo obwathu n’erikolha ‘ng’omuthuliri w’erithunganene.’ (2 Pet. 2:5; 1 Pet. 3:20) Yehova mwahulikirira Abrahamu akamubulya ngendo nyingyi okw’ithwamu Liwe ly’erithoghothya abandu b’omwa miyi mibi ye Sodomo ne Gomora. (Enz. 18:20-33) Ahabw’emyaka mingyi, Yehova mwaghumisirizya kutsibu ekihanda kye Israeli ekyabya kikamuleghulhako. (Neh. 9:30, 31) Munabwire thukalhangira erighumisirizya lya Yehova akaha abosi abo akaletha okw’iyo endambi ‘y’eribindulha emithima yabu n’erileka ebibi.’ (2 Pet. 3:9; Yn. 6:44; 1 Tim. 2:3, 4) Eky’erileberyako kibuya ekya Yehova kikaleka ithwaghumisirizya thukalholha embere erithulira n’erikangirirya. Kandi akathweghesaya erighumisirizya erilhabira omwa ky’erileberyako ekiri omwa Kinywe kiwe.

10. Ngoku kiri omu Yakobo 5:7, 8, eky’erileberyako ky’omulimi kikathweghesayaki?

 ¹⁰ Soma Yakobo 5:7, 8. Eky’erileberyako ky’omulimi kikathukangiriraya ngoku thwanga ghumisirizya. Ni kwenene, ebindi birimwa bikakulha lhuba-lhuba. Aliwe, ebirimwa bingyi, kutsibu-tsibu ebikasa kw’ebighuma, bikaghunza buthuku buuli erisalha bya kulha. Omwa Israeli ebirimwa ibikaghunza mezi mukagha eryera. Omulimi iniakahera ebirimwa embulha yikatsuka, ng’omwakathi-kathi k’Okwerikumi, n’erihulhulha embulha y’erinyuma yikahwa, ng’omwakathi-kathi k’Okwakani. (Mk. 4:28) Ni ky’amenge ithwe erigherererya erighumisirizya ly’omulimi. Aliwe, eki kyangana kalha.

11. Erighumisirizya likendi thuwathikya lithi omw’ithulira lyethu?

¹¹ Abandu abathahikene bakanza ibalhangira ebikalhwiririra omwa kaghalha kabu aho naho. Aliwe, thwamabya thwanzire eririma lyethu ly’eraye ndeke, thutholere ithwabya ithunemulitsomana​—erilirima, erihera, erisekera, n’eryuthangirira. N’omubiiri w’eriyira abigha nawu akayithagha eribera erihiraho akaghalha. Kikayithagha obuthuku eriwathikya abigha erihwamo akasolholho n’erithendi tsomana abandi. Erighumisirizya lyethu likendi leka ithuthahwa amani abandu bakaghana erithuhulikirira. Kandi thutholere ithwaghumisirizya, abandu bakanza erihulikirira n’erigha. Sithwanga kaka omwigha we Biblia erithunga erikirirya. Ihakanayira n’abigha ba Yesu ibathayitheghererya lhuba ebyo alyakangiriraya. (Yn. 14:9) Ambi ithw’ibuka ngoku ithwe thwangana hera n’eryuthangirira, aliwe Nyamuhanga yukabilhasaya.​—1 Kor. 3:6.

12. Thwanga kangania thuthi erighumisirizya thukathulira abahughu bethu?

¹² Eyindi nzira eyo kyangana thukaliramu erighumisirizya mw’omughulhu thukathulira abahughu bethu. Omusingyi owali omwa Omugambuli 3:1, 7 angana thuwathikya. Hakabugha hathi: “Hali . . . omughulhu w’eribya bukuthu,  n’omughulhu w’eribugha.” Emibere yethu mibuya yangana thulira, aliwe kandi thukabya ithunayitheghekire erikania oko kwenene thukabana akaghisa. (1 Pet. 3:1, 2) Ni kwenene thutholere ithwathulira n’erikangirirya n’omuhwa, aliwe kandi thutholere ithwaghumisirizya obuli mundu​—imwamuli n’abahughu bethu.

13-14. Ni by’erileberyako byahi eby’erighumisirizya ebyo thwanga gherererya?

¹³ Eby’erileberyako by’abathaleghulha abali omwa Biblia n’abamunabwire byangana thweghesya erighumisirizya. Habakuki abya anzire obubi ibwahwaho, aliwe mwakangania erighumisirizya akabugha athi: “Ngendi hangana okwa butheya bwaghe.” (Hab. 2:1) Omukwenda Paulo mwabugha athi anzire “eribugha” omubiiri wiwe. Omw’ighumisirizya mwalholha embere ‘erithulha engulhu yuwene.’​—Emib. 20:24.

¹⁴ Lengekanaya okwa ky’erileberyako kya mughalha wethu na mukali wiwe abaghunza esukuru ye Gileadi neryo bamathumwa omwa kihugho ekiri mwa Bema ba Yehova bake kandi ekyoswire mw’abandu abathe Bakristayo. Ababya banzire erigha e Biblia babya bake kutsibu. Aliwe, abo baghunza nabu esukuru ye Gileadi abathumawa omwa bindi bihugho ibakabya ibanemubabwira ngoku bawithe abigha bangyi be Biblia abakakulha-kulhana. Abathahenie aba, omw’ighumisirizya mubalholha embere erithulira nomubanabya omwa bulhambu obuthe mw’erikulha-kulhana. Enyuma w’erithulira habw’emyaka munani omwa bulhambu obuli mw’abandu abathe hulikirira, erighunzerera mubabana etseme bakalhangira omughuma w’okwa bigha babu akabatizibwa. Eby’erileberyako ebya kera n’ebya munabwire ebi bikathweghesayaki? Abathaleghulha aba mubathahwa amani kutse erikalha buyira, kandi Yehova mwabatsumulha busana n’erighumisirizya lyabu. Kwesi ‘thugherereraye ab’ikiriraya n’eriyiyinia n’eriangirira ebyo Nyamuhanga alhagha.’​—Ebr. 6:10-12.

15. Ni nzira yahi nguma eyo erikirirya likaghumirayamu erithwamu lyethu ery’erithulira?

¹⁵ Thw’ikirirye omwatsi ogho thukathulira, neryo thukanza ithwabwira kugho kw’abandu bangyi ngoku thwanga thoka. Thuyikethere emilhaghe eyiri omwa Kinywe kya Nyamuhanga. (Esy. 119:42; Isa. 40:8) Thwabiriyilhangirira amaminyereri we Biblia akabererera munabwire. Thwabiriyilhangirira ngoku abandu bakahindulha esyongebe syabu bakatsuka erighendera okw’ihabulha lye Biblia. Eki kikaleka ithwongera eriligha ngoku engulhu yuwene y’Obwami ni mwatsi ogho obuli mundu akayithagha.

16. Ngoku kiri omwa Esyonyimbo 46:1-3, erikirirya omu Yehova kikaghumaya kithi erithwamu lyethu ly’erithulira? Kandi erikirirya omu Yesu nakyo kikathuwathikaya kithi?

¹⁶ Kandi thw’ikirirye omu Yehova, Omwinye omwatsi ogho thukathulhughanaya, kandi n’omu Yesu oyo abiriyira mw’Omwami w’Obwami. (Yn. 14:1) Nomuthwangabya omwa mibere eyiri yithi, Yehova akendibya iniane busaghiro bwethu n’akaghalha kethu. (Soma Esyonyimbo 46:1-3.) Eryongera okw’ekyo, thuyikethere ngoku Yesu anemusondolha omubiiri w’erithulira iniane elhubulha, omw’ikolesya obuthoki n’ehamuli ebyo Yehova abirimuha.​—Mt. 28:18-20.

17. Iha eky’erileberyako ekikaleka ithwabya ithutholere erilholha embere erithulira.

¹⁷ Erikirirya likaleka ithwakakasya ngoku Yehova akendi tsumulha akaghalha kethu, okwa bundi buthuku omwa syonzira esyo thuthalengekenie. (Omu. 11:6) Ng’eky’erileberyako, obuli kiro esyongumi sy’abandu bakalhangira ebitabu ibine okwa higgali hyethu. Eyi nina nzira eyuwene ey’erithuliramo? Ee! Olhupapura olhwa Omubiiri Wethu w’Obwami olhw’Okwerikuminakughuma  2014 mulhwakania okwa munyasukuru ow’okwa yunivasite oyuwanza erihandika emyatsi eyihambire okwa Bema ba Yehova. Mwathabana ahali Ekisenge ky’Obwami, aliwe mwalhangira emeza eyiri kw’ebitabu iyinathekire okwa sukuru yabu, neryo mwabana eby’erihandika. Erighunzerera, mwabatizibwa kandi lino ni mutemburi w’omughulhu wosi. Ebyalholirweko ng’ebyo bikathuhira mw’omuhwa ow’erilholha embere erithulira kundi bikakanganaya ngoku hakine abandu abanzire eribana n’eriowa omwatsi w’Obwami.

18. Busana naki ithwakakasya ngoku omubiiri w’erithulhughania Obwami akendi syahwa ngoku Yehova abiribugha?

¹⁸ Thwangana kakasya ngoku endambi yikendi hika omubiiri w’erithulhughania Obwami iniahwa. Lengekanaya okwa byabya omwa biro bya Noa. Yehova mwakangania ngoku akatheghaya ndeke obuthuku. Emyaka nga 120 Erighunga ly’Amaghetse lithe lyabya, Yehova mwasangwa akangania obuthuku obwa likendi syatsukiramo. Myaka mingyi enyuma waho, Yehova mwaha Noa y’omubiiri w’erihimba obwathu. Habw’emyaka 40 kutse 50 Erighunga ly’Amaghetse lithe lyatsuka, Noa mwalholha embere erikolha kutsibu. Nomwakine indi abandu sibabya bakahulikirira, Noa mwalholha embere erithulhughania omwatsi w’erikunga erihika aho Yehova abughira athi ingiraye ebisoro by’omwa bwathu. Neryo okwa ndambi eyitholere, Yehova “mwamukingiramo.”​—Enz. 6:3; 7:1, 2, 16.

19. Ni byahi ebya thulindirire thwamathend’ikalha buyira?

¹⁹ Yehova akisiya iniabugha athi omubiiri w’erithulhughania Obwami amahwa; akendi ghunzaho omughulhu mubi wa Sitani n’eriletha ekihugho kihya-kihya ekithunganene. Thunalindirire obuthuku obo, thugherereraye Noa, Habakuki, n’abandi abath’ikalha buyira. Neryo kwesi thuhweraye amalengekania wethu okw’ithulira, thughumisirizaye, n’eribya n’erikirirya erighumire omu Yehova n’emilhaghe yiwe.