1. Omundu erihighithwa kikanahamba kithi okwa bandi?

MBWINO omughuma w’okwa bawanzire ane athahighithwa omwa kithunga? Ekyo kyangana bbuna omuthima! Mwali wethu oyukahulhawamo Hilda akabugha athi: “Mwira waghe omuthaleghulha abere akaholha ithwamabirighunza myaka 41 omwa butheke, munayowa nga ky’ekindu ekikalire kutsibu ekyamabirithanyibyako. * Aliwe mughalha waghe, mukali wiwe, n’abaana biwe babere basighania ekithunga, eki mukyabya kindu ekikalire kutsibu kandi kutsibu.”

2-3. Ngoku kiri omwa Esyonyimbo 78:40, 41, Yehova akayowa athi abaghombe biwe bakamusighania?

² Thalengekania Yehova nga atholere eribya imwakwa bulighe bungahi ab’okw’ihiika liwe ly’abamalaika bakamulholya kw’omughongo! (Yuda 6) Kandi thalengekania nga mwakwa bulighe bungahi abandu biwe banzwa, Abaisraeli bakamuyisamambulhako ngendo na ngendo. (Soma Esyonyimbo 78:40, 41.) Kandi wuminye ngoku Thatha wethu w’olhwanzo ow’elhubulha akakwa bulighe oyo wanzire akamusighania. Akayitheghereraya obulhumi obwawukalhabamu. Omwa lhukeri akendi kuhumulikania n’erikuha obuwathikya obwa wukayithagha.

³ Omo mwatsi ono, thukendi kania okwa bya thwanga kolha eribana obuwathikya bwa Yehova thukaghumira ekitsibu ng’eki. Kandi thukendi lebya ngoku thwanga wathikya abandi omwa kithunga abawithe ekitsibu eki. Aliwe, thuthatsuka erikania okwa malengekania awathatholere agho thutholere ithwayihighulhako.

4. Ababuthi bangyi bakayowa bathi omwana wabu akasighania Yehova?

⁴ Omughulhu omwana mwanze akasighanaya Yehova, ni kya  buli kiro ababuthi erilengekania bathi bangana yirire ekyo bakakolha eriwathikya omwana wabu eribya iniane omwa kwenene. Omwana wa mughalha wethu Luke abere abirihighithwa, Luke akabugha athi: “Munayitsweba. Ikikanaleka ingahahamuka n’omwa kiro. Ihakanayira ingalira n’omuthima inialhuma.” Elizabeth, mwali wethu oyuwabana ekitsibu ng’ekyo, lhulighe-lighe akabugha athi: “Ni kibi kyahi ekyo nabya nakolire ingye nga mama? Iningayowa indi nangabya imunalemwa erikangirirya mughalha waghe y’ekwenene.”

5. Olhubanza ni lhwa ndi omundu amasighania Yehova?

⁵ Thutholere ithw’ibuka ngoku Yehova abiriha obuli mughuma w’okw’ithwe ekihembo ky’obughabe bw’eriyithwiramo. Eki kikamanyisaya kithi thwangana thwamu nga thumw’owe kutse eyihi. Abandi balere abathabya bawithe ababuthi abali ky’erileberyako ekyuwene bakathwamu erikolera Yehova kandi ibasighalha bathaleghulha okw’iyo. Abandi abo ababuthi babu balengaho eribakulya erikwamana n’emisingyi y’Amasako, bakabya babirikulha ibasighania ekwenene. Neryo kwesi, obuli mughuma w’okw’ithwe atholere iniathwamu ng’akendi kolera Yehova. (Yos. 24:15) Busana n’ekyo, inywe babuthi abali omwa bulighe, murwanisaye amalengekania w’eriyowa muthi mbwino eki ni kitsibu kyenyu!

6. Omulere angana hambwako athi omubuthi wiwe amasighania Nyamuhanga?

⁶ Hakanayira omubuthi iniasighania ekwenene kuthya n’eka yiwe. (Esy. 27:10) Eki kyangana hamba nabi okwa baana abalhue bayikethere ababuthi babu ng’eky’erileberyako kyabu. Esther, oyo thatha wiwe ahighithawa, akabugha athi: “Mughulhu mungyi iningalira kundi munaminya ngoku syathakwama kyayisununulha okwa kwenene lisa. Akighenderera erisighania Yehova. Nganzire thatha, neryo omughulhu ahighithawa iningabya ingane muyibulya ng’ali yathi. Nibya iningabera erilhabamo engitsi.”

7. Yehova akayowa athi busana n’omulere oyo mubuthi wiwe abirihighithwa?

⁷ Abalere, omughuma w’okwa babuthi benyu amahighithwa, thukalira haghuma nenyu! Ambi kandi imwaminya ngoku Yehova anasi obulhumi obwa mukalhabamo. Abanzire kandi akasima obuthaleghulha bwenyu, nethu kuthya​—ithwe balikyenyu. N’ekindi, mw’ibuke ngoku erithwamu ly’ababuthi benyu si lhubanza lhwenyu. Ngoku thwabirilhangira, Yehova abiriha obuli mundu obughabe bw’eriyithwiramo. Kandi obuli mundu oyuwabiriyihayo n’eribatizibwa “asyaheka iyuwene omuheke wiwe.”​—Gal. 6:5.

8. Ni kyahi ekyo abakine bathaleghulha omw’eka bangakolha banemulindirira oyo banzire erisuba oku Yehova? (Lebaya akasanduku “ Suba oku Yehova.”)

⁸ Oyo wanzire amasighania Yehova, ni kya buli kiro erithunga amaha wuthi kiro kighuma akendi syamusubako. Wunalindirire ekyo, ni kyahi ekyo wangabya iwunemukolha? Wutholere iwabya iwunemutsomana obunyakirimu bwawu. Omw’ikolha ekyo, iwukendibya ky’erileberyako kyuwene okwa bandi abali omw’eka abakine bathaleghulha nibya n’ok’oyuwabirihighithwa. Iwukendi bana n’akaghalha oko wukayithagha erighumira obulhumi. Thulebaye ebindu birebe ebyo wangakolha.

9. Ni mwanzira syahi wangabana akaghalha erilhua oku Yehova? (Lebaya n’akasanduku “ Amasako Awakahumulikanaya Oyo Wanzire Amasighania Yehova.”)

⁹ Amakirira endegheka yawu mbuya y’obunyakirimu. Ni kikulhu iwe n’abandi omw’eka yenyu erilholha embere eriyighumya. Ekyo wangakikolha wuthi? Bana akaghalha erilhua oku Yehova omw’ilholha embere erisoma Ekinywe kya Nyamuhanga n’erikighaniryako kuthya n’erighenda okwa mihindano y’Ekikristayo. Joanna, oyo thatha wiwe na mwali wabu basighanaya ekwenene, akabugha athi: “Ngabana erithekana ingasoma okwa bakanibweko omwa Biblia nga Abigaili, Esiteri, Yobu, Yozefu, na Yesu. Eby’erileberyako byabu bikanyihimba n’erinyiwathikya eribya n’amalengekania awatholere. Esyonyimbo syethu sy’embaghane nasyo sikanyihumulikanaya kutsibu.”

10. Ebiri omwa Esyonyimbo 32:6-8 bikathuwathikaya bithi erighumira obulhumi?

¹⁰ Bwira Yehova y’eriyowa lyawu. Omughulhu wukayowa nabi, isiwaleka erimusaba. Lemba-lemba Nyamuhanga wethu w’olhwanzo wuthi akuwathikaye erilhangira emibere eyo wulimu ngoku akalhangirayo ‘n’erikukangirirya enzira wangalhabamo.’ (Soma Esyonyimbo 32:6-8.) Ni kwenene, kyangana kalha kutsibu eribwira Yehova y’eriyowa lyawu. Aliwe Yehova akayitheghereraya ndeke obulhumi obuli okwa muthima wawu. Akwanzire kutsibu kandi akakusaba athi wumubwire eriyowa lyawu.​—Eri. 34:6; Esy. 62:7, 8.

11. Ngoku kiri omwa Abaebrania 12:11, busana naki thutholere ithwayikethera erikunga lya Yehova ery’olhwanzo? (Lebaya n’akasanduku “ Erihighitha​—Erikunga lya Yehova ery’Olhwanzo Erikakolha.”)

¹¹ Sighika erithwamu ly’abasyakulhu. Erihighitha ni kighuma ky’okwa ndegheka ya Yehova. Erikunga liwe ly’olhwanzo likaghasira obuli mundu, imwamune n’omukolha-nabi.  (Soma Abaebrania 12:11.) Abandi omwa kithunga bangana ghana erilighirana n’erithwamu ly’abasyakulhu ery’erihighitha omundu mulebe. Aliwe wibuke, abandu ng’abo mughulhu mungyi sibalyanza eribugha okwa bithuwene ebyo mukolha-nabi oyo akakolha. Thukabya isithwasi okwenene okwosi. Neryo ni ky’amenge eriyikethera ngoku abasyakulhu abathwamu okwa mwatsi oyo mubalengaho kutsibu erighendera okwa misingyi y’Amasako n’erimanira Yehova bakatswera.​—2 Emy. 19:6.

12. Ni bibuya byahi ebya bandi babiriyilhangirira busana n’erisighika endegheka ya Yehova ey’erihighitha?

¹² Wamasighika erithwamu ly’abasyakulhu ery’erihighitha oyo wanzire, iwangana muwathikya erisuba oku Yehova. Elizabeth, oyothulyakanayako, akabugha athi: “Erilekera ighuma erikolongana na mughalha waghe mukulhu kyabya kindu ekikalire kutsibu. Aliwe abere abirisuba oku Yehova, mwabugha athi aby’atholere erihighithwa. Endambi muyahika, amakangania erisima busana n’amasomo agho igha omw’ekyo. Mun’igha ngoku erikunga lya Yehova likabya iry’erihikire.” Mwira wiwe ya Mark, akongerako athi: “Habere halhaba buthuku, mughalha waghe mwambwira athi mwanza erisuba oku Yehova kundi muthuthakolongana nayu nahake. Ngatsemire eribya Yehova imwathuwathikya eribya bowa.”

13. Ni byahi ebyanga kuwathikya erighumira eriyowa nabi?

¹³ Kaniraya abanywani bawu abakakuyitheghereraya. Nywana Abakristayo abakulire bunyakirimu abanga kuwathikya eribya iwune n’amalengekania awatholere. (Emi. 12:25; 17:17) Joanna, oyothulyakanayako, akabugha athi: “Omo muthima waghe, munayowa ingali ingyuwene. Aliwe erikania n’abanywani abayiketherwa mukyanyiwathikya erighuma.” Kandi ibbwa abandi omo kithunga bamakubwira ebyanga leka iwongera eriyowa nabi?

14. Busana naki thukayithagha ‘erighanyirana n’eribuyirana’?

¹⁴ Ghumisirizaya balikyenyu. Okwenene kuli kuthi, si buli mundu ambu akendi bugha ebitholere. (Yak. 3:2) Ithwe bosi sithuhikene, neryo isiwasweka abandi bamabulha eby’eribugha kutse nibya omw’ithendi kighenderera ibabugha ebikaponesaya. Ibuka erihabulha ly’omukwenda Paulo lino: “Neryo mughanyirane, mubuyirane omughulhu omundu awithe omwatsi oko wundi.” (Kol. 3:13) Mwali wethu mughuma oyo omuhughu wiwe ahighithawa akabugha athi: “Yehova mwangwathikya erighanyira balikyethu abanyihithanaya bakanza erinyihumulikania.” Ekithunga kyanga kolhaki eriwathikya abathaleghulha abali omw’eka?

15. Thwanga kolhaki eriwathikya ab’omw’eka ow’okw’ibo amahighithwa?

¹⁵ Nywana abathaleghulha abali omw’eka. Mwali wethu oyukahulhawamo Miriam akabugha athi mughalha wabu abere abirihighithwa omwa kithunga iniakayowa nabi erighenda  okwa mihindano. “Iningasagha ebya bandu banga bugha. Aliwe habya ihane abanywani babuya abalirikana naghe kandi isibathabugha nabi oku mughalha wethu oyo oyuhighithirwe. Ngabasima, mungathabya ingyuwene omwa bulighe.” Owundi mwali wethu akabugha athi: “Mughalha waghe abere abirihighithwa, banywani bethu banzwa mubasathuhumulikania. Abandi mubabugha bathi si babya bawithe eky’eribugha. Mubalira haghuma naghe kutse erinyihandikira othubbaruha othukahumulikanaya. Ebya bakolha mubyanyiwathikya kutsibu!”

16. Ekithunga kyanga lholha kithi embere eriwathikya abawithe abahighithirwe?

¹⁶ Lholha embere erisighika ab’omw’eka abathaleghulha. Bakayithagha olhwanzo lhwenyu n’eribahumulikania lino kwilhaba kera. (Ebr. 10:24, 25) Okwa bundi buthuku, ab’oku yulyahighithawa bakanayowa nabu nga babirighabulhwa okwa kithunga. Isithwalighira ekyo kikababyako! Abalere abo ababuthi babu babirisighania ekwenene, kutsibu-tsibu bakayithagha erisimwa n’erihiribwa mw’omuhwa. Maria, oyo mwira wiwe ahighithawa kandi amasighania eka yiwe, akabugha athi: “Abandi banywani baghe ibakasa ewaghe ibathutsumbira n’erinyiwathikya erigha n’abaana baghe. Ibakangwira obulighe kandi ibalira haghuma naghe. Mubanyilhwirako abandi bakanyilhalhaniako amabehi. Mubaleka omuthima iniasuba omo nda!”​—Abar. 12:13, 15.

17. Abasyakulhu banga kolhaki erihumulikania abali omwa bulighe?

¹⁷ Abasyakulhu, mukolesaye akaghisa kosi-kosi erighumya abathaleghulha abali omw’eka. Muwithe olhukwamirwa lhw’embaghane olhw’erihumulikania abaramya balikyenyu abawithe ababirisighania Yehova. (1 Tes. 5:14) Mubye b’erimbere eribahumulikania emihindano yithe yatsuka kandi yikahwamu. Mubabungire kandi musabe haghuma nabu. Mukole haghuma nabu omw’ithulira, kutse okwa bundi buthuku mubakokaye okw’iramya lyenyu ly’eka. Abalisya b’obunyakirimu batholere ibakwira esyombuli sya Yehova esikaghalhawa sy’obulighe, ibasikangania olhwanzo, n’eritsomana.​—1 Tes. 2:7, 8.

18. Ngoku kiri omu 2 Petero 3:9, Nyamuhanga anzire abakolha-nabi ibakolhaki?

¹⁸ Yehova “syanzire omundu n’omughuma akahera, nikwa anzire abandu abosi ibabindulha emithima yabu n’erileka ebibi.” (Soma 2 Petero 3:9.) Omundu nomwanga kolha erilholho erikalire, engebe yiwe yikabya iyikine y’obughuli embere sya Nyamuhanga. Thalengekania okwa kindu ky’obughuli bunene ekya Yehova abirithulihira​—endongolya y’ekihongo kya Mughalha wiwe mwanzwa​—busana n’esyongebe sy’abakolha-nabi. Omo lhwanzo Yehova akalengaho eriwathikya abandu ng’abo nuku bamusubeko. Awithe amaha athi bakendi thwamu erikolha ekyo, ngoku kikanganibwe omwa musyo wa Yesu ow’omwana oyuwatsaha. (Lk. 15:11-32) Abangyi abasighanaya ekwenene endambi muyahika bamasuba oku Thatha wabu w’olhwanzo. N’ekithunga mukyabangirira n’amaboko abiri. Elizabeth, oyothulyakanayako, mwatsema kutsibu mughalha wiwe akasubulha. Akabya akasubya ameso w’enyuma, akabugha athi, “Omo kwenene ngasima abathuhira mw’omuhwa w’erithendihwa amaha.”

19. Busana naki ithwalholha embere eriyikethera Yehova?

¹⁹ Thwangana yikethera Yehova mughulhu wosi. Syanga thuha obusondoli obukendi thwaghalya. Ni Thatha omwenge kandi oyukakwira abandi b’obulighe oyuwanzire kutsibu abosi abamwanzire kandi abakamuramaya. Wuyikethere ngoku Yehova syanga kusighania omwa buthuku wuli omwa bulighe. (Ebr. 13:5, 6) Mark, oyothulyakanayako, akabugha athi, “Yehova mwathathusighania. Akabya iniane hakuhi nethu omwa bitsibu.” Yehova akendi lholha embere erikuha “obuthoki bunene.” (2 Kor. 4:7) Kwesi, wangana sighalha muthaleghulha kandi iwune n’amaha n’omughulhu oyo wanzire akasighanaya Yehova.